“Eyin mìwlẹ biọ nudepope Otọ́, ewọ na na ẹn mì to oyín ṣie mẹ.”—Johanu 16:23.

Hogbe Jesu tọn ehelẹ dohia dọ Jehovah ma jlo dọ mí ni nọ zan boṣiọ do nọ hodẹ̀ kavi dọ mí ni nọ hodẹ̀ gbọn mẹwiwe lẹ, angẹli lẹ kavi tọgbo mítọn he ko kú lẹ ji. Jesu Klisti kẹdẹ ji wẹ mí dona nọ gbọn do hodẹ̀. Eyin mí nọ hodẹ̀ hlan Jiwheyẹwhe to yinkọ Jesu tọn mẹ, enẹ nọ dohia dọ mí yiwanna nue Jesu wà do ota mítọn mẹ. Abajọ Jesu do dọ dọ: “Mẹdepope ma nọ wá Otọ́ dè adavo gbọn yẹn gblamẹ.”—Johanu 14:6.

“Mì nọ hùn ahun mìtọn na ẹn.”—Salmu lẹ 62:8.

Eyin mí to dẹ̀ho hlan Jehovah, mí dona nọ voawu dile mí na voawu do dọhona otọ́ owanyinọ de do. Enẹwutu, mí dona nọ yí sisi do dọ homẹ na ẹn, kakati nado nọ hia odẹ̀ sọn owe de mẹ kavi plọn do tamẹ.

“Nudepope he mí biọ sọgbe hẹ ojlo etọn, ewọ nọ sè mítọn.”—1 Johanu 5:14.

To Biblu mẹ, Jehovah Jiwheyẹwhe dọ nudagbe he e jlo na wà na mí lẹ po nue e jlo dọ mílọsu ni wà lẹ po. Whẹpo Jiwheyẹwhe na sè odẹ̀ mítọn, nue mí nọ dọ lẹ dona “sọgbe hẹ ojlo etọn.” Enẹwutu, mí dona plọn Biblu nado yọ́n Jiwheyẹwhe ganji. Whenẹnu kẹdẹ wẹ e gán sè dẹ̀ mítọn lẹ.

Nue Mí Do Hudo Etọn Lẹ. Mí gán nọ hodẹ̀ bo biọ Jiwheyẹwhe dọ ni na mí nue sin hudo mí do to azán dopodopo ji lẹ. E gán yin núdùdù, avọ̀ po fie mí na dọ́ po. E ma ylan dọ mí ni nọ biọ nuyọnẹn nado nọ bayi dide dagbe lẹ bo nọ dọna Jiwheyẹwhe dọ ni gọalọna mí to adángbòmẹ mítọn lẹ mẹ. Nudevo he mí gán biọ wẹ yise, jona ylando mítọn lẹ tọn po godonọnamẹ Jiwheyẹwhe tọn po.—Luku 11:3, 4, 13; Jakọbu 1:5, 17.

Nọ Hodẹ̀ Do Mẹdevo lẹ Tamẹ. E nọ vivi na mẹjitọ lẹ taun, eyin yé mọdọ ovi yetọn lẹ yiwanna yede. Jehovah lọsu nọ jlo dọ míwu ovi etọn he to aigba ji lẹ ni nọ yiwanna míde. Nudagbe wẹ e yin dọ mí ni nọ hodẹ̀ na asu kavi asi mítọn, ovi mítọn lẹ, whẹndo mítọn po họntọn mítọn lẹ po. To Biblu mẹ, devi Jakọbu na ayinamẹ dọ mí ni “nọ hodẹ̀ na ode awetọ.”—Jakọbu 5:16.

Nọ Dopẹ́. Biblu dohia dọ Mẹdatọ mítọn nọ ‘wà nudagbe lẹ bo nọ na mí jikun sọn olọn podọ ojlẹ sinsẹ́n susugege lẹ tọn bosọ nọ yí núdùdù do pekọna mí bo nọ yí ayajẹ do gọ́ ahun mítọn.’ (Owalọ lẹ 14:17) Eyin mí nọ yiagbọji bo nọ lẹnnupọndo nú planplan he Jiwheyẹwhe wà na mí lẹ ji, e na sisẹ́ mí nado nọ hodẹ̀ bo dopẹna ẹn. Aliho dagbe devo nado nọ dopẹna Jiwheyẹwhe wẹ nado nọ setonuna ẹn.—Kolosinu lẹ 3:15.

To whedelẹnu, e gán nọ vẹna mí dọ mí dọ homẹ na Jiwheyẹwhe bọ e ma siọ mí. Be enẹ dohia dọ Jiwheyẹwhe ma to mítọn dọ wẹ ya? E ma yinmọ! Apajlẹ he bọdego lẹ dohia dọ mí ma dona nọ hònúpla gando dẹ̀hiho go.

Steve he mí dọho etọn wayi dọmọ: “Eyin dẹ̀ tọn dẹ́n, n’na o hònúpla.” Amọ́, etẹwẹ gọalọna ẹn? E jẹ Biblu plọn ji bo wá mọnukunnujẹemẹ dọ mí dona gbẹ́ to dẹ̀ho eyin mí tlẹ lẹndọ Jiwheyẹwhe ma siọ mí. Steve dọmọ: “N’hodẹ̀ hlan Jiwheyẹwhe bo dopẹna ẹn dọ họntọn vivẹ́ ṣie lẹ nọgodona mi. N’do ayajẹ todin taun.”

Bọ Jenny he nọ mọ vọ́ mẹ na ede bo nọ lẹndọ Jiwheyẹwhe ma gán sè dẹ̀ gbẹtọ uwọ nkọ lẹ tọn lo? E dọmọ: “Eyin n’mọ vọ́ mẹ na dee, n’nọ vẹ̀ Jiwheyẹwhe dọ ni gọalọna mi nado yọ́n nue zọ́n n’do nọ mọ vọ́ mẹ na dee sọmọ.” Etẹwẹ ehe diọ? Nue Jenny dọ die: “Odẹ̀ gọalọna mi nado diọ linlẹn he n’do dai. Eyin ahun ṣie tlẹ nọ gblewhẹdo mi, n’yọnẹn dọ Jiwheyẹwhe uwọ ma to whẹgbledo mi. Dẹ̀ sọ gọalọna mi ma nado hònúpla.” Dagbe tẹwẹ enẹ hẹnwa? E dọ dọ: “Dẹ̀ zọ́n bọ n’mọ Jehovah di Jiwheyẹwhe ṣie, Otọ́ ṣie podọ Họntọn ṣie he yiwanna mi taun bo ma na jo mi do gbede eyin n’to gán do nado wà nue sọgbe to nukun etọn mẹ.”

Apajlẹ mẹdevo tọn die. To whenue Isabel mọhò, doto lẹ dọna ẹn dọ vi lọ na do blọ taun. Isabel jẹflumẹ. Mẹdelẹ tlẹ dọna ẹn dọ ni de hò lọ. E dọ dọ, “N’sè vivẹ́ sọmọ bọ e didọ n’na kú wẹ nkọ.” Etẹwẹ e wà? E dọmọ: “Odẹ̀ ján n’nọ to hihò poun dọ Jiwheyẹwhe ni gọalọna mi.” Visunnu he e ji lọ nọ yin Gerard bo do blọ nugbo. Etẹwẹ Isabel lẹn? Be Jiwheyẹwhe sè dẹ̀ etọn ya? Gbau! Amọ́, gbọnna? Isabel dọ dọ, “Vi ṣie o do whe 14 todin, bọ eyin n’mọ lee e do ayajẹ sọ mahopọnna dọ e do blọ, n’nọ mọdọ Jiwheyẹwhe sè dẹ̀ ṣie nugbo. Ovi ehe wẹ yin dona dagbe hugan he n’mọ sọn Jehovah Jiwheyẹwhe dè.”

Hó dagbedagbe ehelẹ gán flin mí nue Salmu lẹ 10:17 dọ. Wefọ lọ dọmọ: “Jehovah E, hiẹ na sè ovẹ̀ homẹmimiọnnọ tọn. Hiẹ na hẹn ahun yetọn lodo bo na na ayidonugo nujọnu tọn yé.” Ehe lẹpo wẹ zọ́n bọ mí dona gbẹ́ to dẹ̀ho eyin mí tlẹ lẹndọ Jiwheyẹwhe ma siọ mí.

Odẹ̀ Jesu tọn susu wẹ to Biblu mẹ. Dehe mẹsusu jẹakọ hẹ wẹ odẹ̀ he e plọn devi etọn lẹ. Etẹwẹ mí gán plọn sọn odẹ̀ enẹ mẹ?