• Yin dide gbọn Jiwheyẹwhe dali. “Yẹnlọsu wẹ ze ahọlu ṣie . . . yẹn nasọ na we akọta lẹ taidi ogú bo na yí opodo aigba tọn lẹ na we taidi nutindo.”—Salmu lẹ 2:6, 8.

• Wá sọn kúnkan Ahọlu Davidi tọn mẹ. “Ovi de ko yin jiji na mí, visunnu de ko yin nina mí . . . Jideji huhlọn gandudu etọn tọn po jijọho etọn po ma na wá vivọnu gbede, to ofìn Davidi tọn ji podọ to ahọluduta etọn mẹ nado sọgan hẹn ẹn lodo gligli.”—Isaia 9:6, 7.

• Yin jiji to Bẹtlẹhẹm. “Bẹtlẹhẹm Eflata E . . . , hiẹ mẹ wẹ mẹhe na dugán . . . na tọ́n sọn na mi . . . Kiklo-yinyin etọn na yì jẹ opodo aigba tọn lẹ.”—Mika 5:2, 4.

• Yin gbigbẹdai gbọn gbẹtọ lẹ dali bo na yin hùhù. “E yin vivlẹko bọ mí gbẹ́ ẹ dai. . . . Yè sọnú in na sẹ́nhẹngba mítọn wutu; yè gídí i na nuṣiwa mítọn lẹ wutu.”—Isaia 53:3, 5.

• Yin finfọn sọn oṣiọ lẹ mẹ bo yin zizedaga. “Hiẹ ma na jo mi do Yọdò mẹ. Hiẹ ma na dike nugbonọ towe ni mọ odò lọ. . . . Homẹhunhun tin to adusilọ towe mẹ kakadoi.”—Salmu lẹ 16:10, 11.

To gbẹtọvi lẹpo mẹ, mẹdopo gee he jẹ nado yin Ahọlu enẹ wẹ Jesu Klisti. Abajọ angẹli de dọna Malia onọ̀ Jesu tọn dọ: “Jiwheyẹwhe nasọ yí ofìn Davidi otọ́ etọn tọn na ẹn, . . . podọ Ahọluduta etọn ma na wá opodo.”—Luku 1:31-33.

Jesu ma dugán to aigba ji pọ́n. Kakatimọ, taidi Ahọlu Ahọluduta Jiwheyẹwhe tọn, olọn mẹ wẹ e na nọ do dugán do gbẹtọvi lẹ ji. Naegbọn uwọ ṣo wẹ yin Gandutọ he jẹ lọ? Pọ́n nuhe e wà to whenue e to aigba ji.

•   Jesu wà dagbe na mẹlẹ. Jesu nọ gọalọna sunnu po yọnnu po, yọpọ po mẹho po, mahopọnna akọ̀ he mẹ yé wá sọn podọ vlavo yé yin wamọnọ kavi adọkunnọ. (Matiu 9:36; Malku 10:16) To whenue pòtọnọ de vẹvẹna Jesu dọ: “Eyin hiẹ jlo domọ, hiẹ sọgan hẹn mi zun wiwe,” onú etọn wàlẹblanuna ẹn bọ e gbọazọ̀nna ẹn.—Malku 1:40-42.

• Jesu plọn gbẹtọ lẹ lehe yé gán wà ojlo Jiwheyẹwhe tọn do. E dọmọ: “Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.” E sọ dọ dọ nuhe mí jlo dọ mẹlẹ ni wà na mí wẹ mí dona nọ wà na yé; hogbe Jesu tọn ehelẹ wẹ nọ yin yiylọdọ Osẹ́n Sika tọn. Gbọnvona enẹ, e dohia dọ e ma yin nuhe mí nọ wà kẹdẹ wẹ nọ vivi na Jiwheyẹwhe gba, amọ́ nuhe to ahun mítọn mẹ ga. Enẹwutu, mí dona nọ payi nuhe to ohò mítọn mẹ go taun. (Matiu 5:28; 6:24; 7:12) Jesu sọ zinnudeji dọ eyin mí jlo na do ayajẹ nugbo, mí dona yọ́n ojlo Jiwheyẹwhe tọn bosọ wà ẹ.—Luku 11:28.

• Jesu plọn gbẹtọ lẹ nado nọ yiwanna ode awetọ. Nuhe Jesu nọ dọ nọ siso bo nọ whàn hosetọ etọn lẹ. “Awuji gbẹtọgun lẹ, na aliho mẹpinplọn tọn etọn wutu, na e to nuplọn yé taidi mẹhe tindo aṣẹ.” (Matiu 7:28, 29) E plọn yé dọ: “Mì . . . nọ yiwanna kẹntọ mìtọn lẹ.” E tlẹ hodẹ̀ do mẹhe doalọ to okú etọn mẹ lẹ tamẹ dọ: “Otọ́, jona yé, na yé ma yọ́n nuhe wà yé te.”—Matiu 5:44; Luku 23:34.

Jesu wẹ Ahọlu he jẹ nado deanana aihọn, na e nọ homẹtọnpọn bosọ jọmẹ taun wutu. Amọ́, whetẹnu wẹ gandudu etọn na bẹ?