Pipli He Nọ Penukundo Agbasalilo Go Lẹdo Aihọn Pé (OMS) dọ dọ, “Lẹdo aihọn pé, mẹlẹ nọ wadanu do yọnnu lẹ go, podọ aṣa ehe to gbigbayipe taidi azọ̀n bẹplamẹ de. Enẹwutu, nujọnu wẹ e yin nado yí nude wà bo doalọtena ẹn.” Pipli lọ dohia dọ diblayin 30 to kanweko ji “yọnnu he ko wlealọ kavi nọ họntọn mẹ pọ́n lẹ tọn wẹ ko jiya danuwadomẹgo tọn, vlavo na [mẹhe yé dà kavi to họntọn mẹ hẹ] hò yé kavi zanhẹmẹ yé gánnugánnu wutu.” Podọ linlin he ONU na de dohia dọ to owhe agọe tọn de mẹ, yọnnu 137 wẹ kú to azán dopodopo ji lẹdo aihọn pé na mẹhe yé dà kavi to họntọn mẹ hẹ kavi hagbẹ whẹndo tọn de wadanu do yé go wutu. a

 Sọhayinanú lẹ gán do obá he mẹ danuwadomẹgo to whẹndo mẹ ylan jẹ hia, amọ́ yé ma gán bayi zẹẹmẹ awufiẹsa he mẹhe adán enẹ gbò lẹ nọ mọ to numọntolanmẹ-liho podọ to agbasa-liho tọn.

 Be yè ko wadanu do gowe to whẹndo mẹ pọ́n ya? Kavi be a yọ́n mẹde he ko jiya etọn ya? Eyin mọ wẹ, pọ́n lehe nuhe Biblu dọ ehelẹ gán gọalọna we do.

  Danuwadomẹgo to whẹndo mẹ ma yin owhẹ̀ towe

  A gán mọ alọgọ

  A ma to dewe ṣo

  Danuwadomẹgo to whẹndo mẹ na wá doalọte

  Lehe a gán gọalọna mẹhe jiya etọn do

 Nuhe Biblu dọ: “Dopodopo mítọn wẹ na dogbè edetiti tọn na Jiwheyẹwhe.”—Lomunu lẹ 14:12.

 Nọ flin ehe: Mẹhe to danu wà do gowe wẹ na dogbè nuhe wà e te tọn.

 Eyin mẹhe a dà kavi to họntọn mẹ hẹ fli owhẹ̀ danuwadomego tọn etọn do jiwe, owhẹ̀ etọn ma whẹ́n. Owanyi sin hudo we yọnnu lẹ do, e ma jẹ dọ yè ni wadanu do yé go.—Kolosinu lẹ 3:19.

 To ojlẹ delẹ mẹ, e gán yindọ mẹhe to danuwadomẹgo de to apọ́nmẹ-zọ̀n jẹ, kavi dọ e whẹ́n to whẹndo he nọ ylanhùn de mẹ kavi e nọ nùahàn zẹjlẹgo. Etomọṣo, e na dogbè na Jiwheyẹwhe na aliho he mẹ e yinuwa hẹ we te. Podọ ewọ losu si wẹ e pò te nado diọ jijọ ylankan enẹ.

 Nuhe Biblu dọ: “Gbọn ayinamẹtọ susu gblamẹ wẹ nuwadotana dagbe nọ tin.”—Howhinwhẹn lẹ 15:22.

 Nọ flin ehe: Eyin a mọdọ emi to owù mẹ kavi a ma yọ́n nuhe a na wà, mẹdevo lẹ gán gọalọna we.

 Naegbọn a gán do hudo alọgọ tọn sọn mẹdevo lẹ dè? Whẹho sinsinyẹn de wẹ danuwadomẹgo to whẹndo mẹ yin. Na a ma yọ́n nuhe yin nujọnu hugan to nuhe to odò ehelẹ mẹ wutu, e gán vẹawuna we nado magbe nuhe na yọ́n na we hugan tọn:

•   Hihọ́ hiẹ lọsu tọn

•   Dagbemẹninọ ovi towe lẹ tọn

•   Akuẹ mimọ zan

•   Owanyi he a do na mẹhe a dà kavi to họntọn mẹ hẹ lọ

•   Ojlo towe nado gbẹ́ nọpọ́ po e po eyin e diọ jijọ

 Nado dọ hójọhó, ninọmẹ lọ gán húagbọ́ we bọ a na biọ bẹwlu mẹ. Mẹnu dè wẹ a gán biọ alọgọ sọn?

 Họntọn kavi hagbẹ whẹndo tọn he go a dejido de gán na we ayinamẹ dagbe delẹ bosọ gọalọna we to numọtolanmẹ-liho. Hodidọ na mẹhe nọ hò towe pọ́n de gán gọalọ taun.

 Sọha alokan tọn delẹ tin bọ mẹhe go yè wadanu do lẹ gán ylọ na yè nido yawu goalọna yé. Mẹhe nọ wazọ́n to azọ́nwhé enẹlẹ gán gọalọna we nado yọ́n nuhe a na wà nado basi hihọ́na dewe. Eyin mẹhe a dà kavi to họntọn mẹ hẹ lọ yọnẹn dọ emi dona jo danuwadomẹgo do, bo ka jlo na diọ nugbo, azọ́nwhé lọ gán gọalọna ẹn nado yọ́n afọdide he e dona ze lẹ.

 Mẹdevo lẹ he nọ penukundo nujijọ ajiji go lẹ gán gọalọna we eyin a tindo hudo alọgọ tọn to niyaniya mẹ. Delẹ to omẹ ehelẹ mẹ gán bẹ doto lẹ kavi azọ́nyọnẹntọ devo lẹ hẹn.

 Nuhe Biblu dọ: “Jehovah b ma dẹn do mẹhe ahun yetọn jẹflumẹ lẹ; E nọ whlẹn ayimajainọ lẹ.”—Salmu lẹ 34:18.

 Nọ flin ehe: Jiwheyẹwhe dopà dọ emi na gọalọna we.

 Jehovah nọ hò towe pọ́n taun. (1 Pita 5:7) E mọnukunnujẹ linlẹn po numọtolanmẹ towe lẹ po me. E gán yí Ohó etọn, Biblu do miọnhomẹna we. Podọ e jlo dọ a ni nọ hodẹ̀ hlan emi. Eyin a to dẹ̀ho, a gán biọ ẹ dọ ni na we nuyọnẹn po huhlọn he sin hudo a do po nado pehẹ ninọmẹ towe.—Isaia 41:10.

Nuhe Biblu dọ: “Mẹdopodopo na nọ nọ̀ vẹntin etọn glọ podọ to ovòtin etọn glọ, bọ mẹde ma na nọ dobuna yé.”—Mika 4:4, Odò.

Nọ flin ehe: Biblu dopagbe sọgodo he to yakẹ de tọn to whenue mẹlẹpo na nọ nọ̀ jijọho mẹ to whẹndo mẹ.

Jehovah Jiwheyẹwhe wẹ tindo pọngbọ dopo gee lọ nado didẹ nuhahun mítọn lẹ, ehe na yin pọngbọ tẹgbẹ tọn de. Biblu dopà dọ: “Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.” (Osọhia 21:4) To ojlẹ enẹ mẹ, mí ma nasọ flin nuylankan lẹ ba, na onú dagbe lẹ wẹ na diọtẹnna yé. (Isaia 65:17) Sọgodo dagbedagbe he Biblu dopà etọn na we niyẹn.