Zekalia 7:1-14
7 Podọ to owhe ẹnẹtọ Ahọlu Daliusi tọn mẹ, ohó Jehovah tọn wá Zekalia+ dè to azán ẹnẹtọ osun ṣinẹnẹtọ tọn, enẹ wẹ, osun Kislẹvi* tọn.
2 Mẹhe tin to Bẹtẹli lẹ do Ṣalezẹli gọna Legẹmi-melẹki po sunnu etọn lẹ po hlan nado yì biọ nukundagbe Jehovah tọn,*
3 bo dọna yẹwhenọ ohọ̀* Jehovah awhànpa lẹ tọn lọ tọn lẹ po yẹwhegán lẹ po dọmọ: “Be n’dona viavi to osun atọ́ntọ+ lọ mẹ bo nọ huvẹ dile n’ko wà do na owhe susu wẹ ya?”
4 Ohó Jehovah awhànpa lẹ tọn sọ vọ́ wá dè e dọmọ:
5 “Dọna mẹhe tin to aigba lọ ji lẹpo po yẹwhenọ lẹ po dọ, ‘To whenue mì nọ blanù bo nọ viavi to osun atọ́ntọ mẹ podọ to osun ṣinawetọ+ mẹ na owhe 70,+ be yẹn wẹ mì blanù na nugbonugbo ya?
6 Podọ to whenue mì to dùdù bo to nùnù, be e ma yin mìde titi wẹ mì nọ to dùdù bo nọ to nùnù na ya?
7 Be e ma jẹ dọ mì ni setonuna ohó he Jehovah dọ gbọn yẹwhegán hohowhenu tọn lẹ gblamẹ,+ to whenue gbẹtọ lẹ nọ nọ̀ jijọho mẹ to Jelusalẹm po tòdaho he lẹdo e pé lẹ po mẹ, podọ to whenue gbẹtọ lẹ nọ nọ̀ Negẹb po Ṣefela po ya?’”
8 Ohó Jehovah tọn sọ vọ́ wá Zekalia dè dọmọ:
9 “Nuhe Jehovah awhànpa lẹ tọn dọ die, ‘Mì nọ yí nugbo do dawhẹ dodo+ bo nọ yí owanyi nugbo+ po lẹblanu po do yinuwa hẹ ode awetọ.
10 Mì ma nọ hò asuṣiọsi, tọṣiọvi,+ jonọ+ kavi wamọnọ dù blo;+ mì masọ nọ kàn ayiha ylankan do ode awetọ go to ahun mìtọn mẹ blo.’+
11 Ṣigba, yé to gbigbẹ́ mapote nado tuntoai+ bo yí tasinsinyẹn do lẹgodo+ bosọ sú otó yetọn ma nado sè.+
12 Yé hẹn ahun yetọn zun diamọndi* nkọ+ bo ma setonuna osẹ́n* po ohó he Jehovah awhànpa lẹ tọn yí gbigbọ etọn do dohlan gbọn yẹwhegán hohowhenu tọn lẹ gblamẹ po.+ Enẹwutu wẹ homẹgble sinsinyẹn do wá yé ji sọn Jehovah awhànpa lẹ tọn dè.”+
13 “‘Kẹdẹdile yé ma dotoai to whenue yẹn* ylọ yé do,+ mọjanwẹ yẹnlọsu ma dotoai to whenue yé ylọ mi do niyẹn,’+ wẹ Jehovah awhànpa lẹ tọn dọ.
14 ‘Yẹn sọ yí yujẹhọn do vúnvún yé pé gbọn akọta he yé ma ko yọnẹn dai lẹpo mẹ,+ aigba lọ sọ gbọgbé to godo yetọn, bọ mẹdepope ma nọ jugbọn finẹ kavi lẹkọ do finẹ;+ na yé diọ aigba dagbedagbe lọ zun nudobu de wutu.’”
Nudọnamẹ Odò Tọn
^ Kavi “hẹn nukunmẹ Jehovah tọn bọ̀.”
^ Kavi “tẹmpli.”
^ Kavi vlavo, “zannu sinsinyẹn.”
^ Kavi “anademẹ.”
^ To paa mẹ, “ewọ.”
