Luti 4:1-22
4 Todin, Boazi hẹji yì họngbo tòdaho lọ tọn+ kọ̀n bo sinai do finẹ. Podọ pọ́n! mẹflitọ he Boazi dọho etọn dai+ lọ juwajei. Boazi sọ dọmọ: “Wáfi bo sinai, hiẹ Omẹ-le.” Ewọ sọ yì bo sinai.
2 To whenẹnu, Boazi plan mẹho tòdaho lọ tọn+ ao wá bo dọmọ: “Mì sinai.” Yelọsu sọ sinai.
3 Todin, Boazi dọna mẹflitọ+ lọ dọmọ: “Naomi, mẹhe lẹkọwa sọn aigba Moabi tọn ji+ lọ dona sà aigba he yin nọvisunnu mítọn Elimelẹki+ tọn.
4 Enẹwutu wẹ n’lẹndọ e jẹ dọ ma hẹn ẹn zun yinyọnẹn na we dọ, ‘Họ̀ ẹ to tòmẹnu lọ lẹ po mẹho omẹ ṣie lẹ tọn lẹ po nukọn.+ Eyin hiẹ jlo na fli i, bo fli i. Ṣigba, eyin hiẹ ma jlo na fli i, dọ ẹ na mi, na yẹn nido yọnẹn, na hiẹ wẹ tindo jlọjẹ nado fli i, podọ yẹn wẹ bọdo gowe to hukan lọ ji.’” Ewọ sọ gblọn dọmọ: “Yẹn tindo ojlo nado fli i.”+
5 Whenẹnu, Boazi dọmọ: “Gbeegbe hiẹ họ̀ aigba lọ to Naomi si, hiẹ sọ dona họ̀ ẹ sọn Luti, Moabinu lọ, he yin asi sunnu he ko kú lọ tọn si ga, na hiẹ nido hẹn oyín sunnu he ko kú lọ tọn gọwá ogú etọn ji.”+
6 Mẹflitọ lọ sọ gblọn dọmọ: “Yẹn ma na penugo nado fli i gba, na ehe sọgan zọ́n bọ n’na hẹn ogú ṣie titi bu. Fli i na dewe po jlọjẹ mẹfifli tọn ṣie po, na yẹn ma na penugo nado fli i gba.”
7 Todin, to aṣa ojlẹ hohowhenu tọn mẹ to Islaeli, nuhe nọ yin wiwà gando jlọjẹ mẹfifli tọn po nutindo de yíyí do diọ devo po go nado hẹn nudepope lodo die: Sunnu de dona de afọpa+ etọn bo ze e na omẹ awetọ, bọ ehe nọ yin aliho de nado hẹn gbekọndopọ* de lodo to Islaeli.
8 Enẹwutu, whenue mẹflitọ lọ dọna Boazi dọ, “Họ̀ ẹ na dewe,” e de afọpa.
9 To whenẹnu, Boazi dọna mẹho lọ lẹ po gbẹtọ lẹpo po dọmọ: “Mìwlẹ yin kunnudetọ+ to egbé dọ yẹn to nuhe yin Elimelẹki tọn lẹpo họ̀ sọn Naomi si, gọna nudepope he yin Kiliọni po Malọni po tọn.
10 Yẹn nasọ yí Luti, Moabinu lọ, he yin asi Malọni tọn taidi asi ṣie nado hẹn oyín sunnu he ko kú lọ tọn gọwá ogú etọn ji,+ na oyín sunnu he ko kú lọ tọn nikaa yin sinsánsẹ sọn nọvisunnu etọn lẹ ṣẹnṣẹn podọ sọn owhé etọn gbè to họngbo tòdaho lọ tọn kọ̀n. Mìwlẹ yin kunnudetọ to egbé.”+
11 Whenẹnu, mẹhe to họngbo tòdaho lọ tọn kọ̀n lẹpo po mẹho lọ lẹ po dọmọ: “Mí yin kunnudetọ! Na Jehovah ni hẹn asi he jlo na wá owhé towe gbè lọ nado taidi Laheli po Lea po, mẹhe yé omẹ awe lẹ hẹn whédo Islaeli tọn lodo.+ Na hiẹ ni tindo kọdetọn dagbe to Eflata+ bo wleawuna oyín dagbe* de to Bẹtlẹhẹm.+
12 Gbọn kúnkan he Jehovah na na we gbọn yọnnu jọja ehe+ gblamẹ lọ dali, whédo towe ni wá taidi whédo Pelẹzi+ tọn, mẹhe Tamali ji na Juda.”
13 Enẹwutu, Boazi plan Luti bọ e lẹzun asi etọn. Ewọ sọ tindo kọndopọ zanhẹmẹ tọn hẹ ẹ, Jehovah sọ dike bọ e mọhò bo ji visunnu de.
14 Whenẹnu, yọnnu lẹ dọna Naomi dọmọ: “Pipà ni tin hlan Jehovah, mẹhe dike bọ a tindo mẹflitọ de to egbé. Gbọ oyín etọn ni yin lilá pé to Islaeli!
15 Ewọ* ko hẹn ogbẹ̀* towe gọwá bo nasọ penukundo gowe to yọnhowhe towe mẹ, na ovisi towe he yiwanna we+ bo tlẹ pọnte hú visunnu ṣinawe na we wẹ ji i wutu.”
16 Naomi yí ovi lọ bo hẹn ẹn do akọ́nnu bosọ nọ penukundo e go.*
17 Whenẹnu, kọmẹnu etọn yọnnu lẹ na ẹn oyín de. Yé dọmọ, “Visunnu de ko yin jiji na Naomi,” yé sọ ylọ oyín etọn dọ Obẹdi.+ Ewọ wẹ yin otọ́ na Jẹsse,+ he yin otọ́ Davidi tọn.
18 Todin, hukan whẹndo Pelẹzi+ tọn die:* Pelẹzi ji Hẹzloni;+
19 Hẹzloni ji Lami; Lami ji Aminadabi;+
20 Aminadabi+ ji Naṣọni; Naṣọni ji Salmọni;
21 Salmọni ji Boazi; Boazi ji Obẹdi;
22 Obẹdi ji Jẹsse; podọ Jẹsse+ ji Davidi.+
Nudọnamẹ Odò Tọn
^ Kavi “kunnudenu.”
^ To paa mẹ, “bo lá oyín.”
^ Enẹ wẹ, ovivi Naomi tọn.
^ Kavi “alindọn.”
^ Kavi “bosọ lẹzun nukunpedomẹgotọ etọn.”
^ To paa mẹ, “ehelẹ wẹ whẹndo Pelẹzi tọn lẹ.”
