Isaia 19:1-25
19 Whẹdida de sọta Egipti:+
Pọ́n! Jehovah hẹ aslọ he to yìyì po awuyiya po de ji bo ja Egipti.
Yẹwhe ovọ́ Egipti tọn lẹ na sisọ to nukọn etọn,+Bọ ahun mẹhe to Egipti lẹ tọn na gbàdo to ohò yetọn mẹ.
2 “Yẹn na fọ́n Egiptinu lẹ do Egiptinu lẹ ji,Bọ yé na hoavùn sọta ode awetọ,Yèdọ mẹdopodopo sọta nọvisunnu etọn po kọmẹnu etọn po,Tòdaho sọta tòdaho, ahọluduta sọta ahọluduta.
3 Mẹhe to Egipti lẹ nasọ biọ bẹwlu mẹ,Podọ yẹn na wlu tito yetọn lẹ.+
Yé na lẹhlan yẹwhe ovọ́ lẹ,Hlan bojlẹtọ lẹ, hlan afinyọnnọ lẹ, podọ hlan dọṣẹdọtọ lẹ.+
4 Yẹn na ze Egipti do alọmẹ na ogán kanylantọ de,Podọ ahọlu fifiẹtọ de wẹ na dugán do yé ji,”+ wẹ Oklunọ nugbo lọ, Jehovah awhànpa lẹ tọn dọ.
5 Osin hùmẹ tọn na hú,Tọ̀sisa lọ nasọ hú bo hú petepete.+
6 Tọ̀sisa lẹ nasọ to wánlùn;Osinwhín Nile tọn lẹ to Egipti na yìdo bo hú pete.
Ofán lẹ po owóko lẹ po na yọ̀n.+
7 Ogbé he to Tọ̀sisa Nile tọn tó lẹ, yèdọ to bẹbẹnu Nile tọn lẹ,Podọ aigba he ji jinukun yin dido do to Nile tó lẹpo+ na hú petepete.+
E na yin fúfú sẹ̀ bo ma nasọ tin ba.
8 Whèhutọ lẹ nasọ biọ aluẹmẹ,Mẹhe nọ dlan omlẹn whèhuhu tọn do Nile mẹ lẹ na doavihàn,Podọ yé mẹhe nọ yìn odọ̀ yetọn do otọ̀ lọ mẹ lẹ na depò.
9 Mẹhe nọ wazọ́n sekan tọn lẹ+Po mẹhe nọ lọ̀n avọ̀ wewe lẹ po na duwinyan.
10 Yè na gídí avọ̀lọ̀ntọ etọn lẹ;Pakanọ lọ lẹpo wẹ na blawu.*
11 Nulunọ wẹ ahọvi Zoani+ tọn lẹ.
Ayinamẹ nulú tọn wẹ ayinamẹtọ nuyọnẹntọ hugan Falo tọn lẹ nọ na.+
Naegbọn mìwlẹ do dọna Falo dọ:
“Kúnkan nuyọnẹntọ lẹ tọn wẹ yẹn,Yèdọ kúnkan ahọlu hohowhenu tọn lẹ tọn”?
12 To whelọnu lo, fie wẹ nuyọnẹntọ towe lẹ te?+
Gbọ yé ni dọna we eyin yé yọ́n nuhe Jehovah awhànpa lẹ tọn ko magbe etọn gando Egipti go.
13 Ahọvi Zoani tọn lẹ ko yinuwa po nulú po;Ahọvi Nofi* tọn+ lẹ ko yin kiklọ;Ogán hẹnnu etọn lẹ tọn lẹ ko hẹn Egipti buali.
14 Jehovah ko kọ̀n gbigbọ bẹwlu tọn jẹgbonu do e ji;+Yé ko sọ hẹn Egipti buali to nudepope he e to wiwà mẹ,Taidi ahànnumunọ de he to sàmù to oslú etọn mẹ.
15 Podọ Egipti ma na tindo azọ́n depope nado wà ba,Vlavo ota kavi osi, alà-vú kavi owóko.*
16 To azán enẹ gbè, Egiptinu lẹ na wá taidi yọnnu lẹ, bo na to sisọsisọ bosọ to budi, na alọ budonamẹ tọn he Jehovah awhànpa lẹ tọn zedaga sọta yé wutu.+
17 Aigba Juda tọn nasọ lẹzun budonamẹnu de na Egipti. Eyin yè dọho etọn, e na nọ gbàhundona yé, na nudide he Jehovah awhànpa lẹ tọn ko basi sọta yé wutu.+
18 To azán enẹ gbè, tòdaho atọ́n wẹ na tin to aigba Egipti tọn ji he na nọ do ogbè Kenani tọn+ bo na whlé nado nọ yin nugbonọ na Jehovah awhànpa lẹ tọn. Tòdaho dopo na nọ yin yiylọdọ Tòdaho Hihọliai tọn.
19 To azán enẹ gbè, agbà de na tin na Jehovah to otò Egipti tọn ṣẹnṣẹn podọ dòtin de na Jehovah to dogbó etọn ji.
20 E na yin ohia de podọ kunnudenu de na Jehovah awhànpa lẹ tọn to otò Egipti tọn mẹ; na yé na dawhá ylọ Jehovah na kọgbidinamẹtọ lẹ tọn wutu, ewọ nasọ do mẹwhlẹngántọ, yèdọ omẹ daho de hlan yé, he na wá whlẹn yé.
21 Jehovah nasọ wá yin yinyọnẹn gbọn Egiptinu lẹ dali, Egiptinu lẹ nasọ yọ́n Jehovah to azán enẹ gbè, podọ yé na nọ basi avọ́sinsan lẹ po nunina lẹ po bo na nọ dopà hlan Jehovah bo nasọ nọ de e.
22 Jehovah na linú Egipti,+ e na linú in bosọ hẹnazọ̀ngbọna ẹn; podọ yé na lẹkọwa Jehovah dè, ewọ nasọ dotoaina ovẹvivẹ yetọn lẹ bo na hẹnazọ̀ngbọna yé.
23 To azán enẹ gbè, alihogbó de+ na tọ́n sọn Egipti yì Asilia. To whenẹnu, Asilianu lẹ na nọ wá Egipti, bọ Egiptinu lẹ na nọ yì Asilia, podọ Egipti na nọ sẹ̀n Jiwheyẹwhe dopọ hẹ Asilia.
24 To azán enẹ gbè, Islaeli na lẹzun atọ̀ntọ na Egipti po Asilia po,+ yèdọ dona de to aigba ṣẹnṣẹn,
25 na Jehovah awhànpa lẹ tọn na ko dona ẹn, dọmọ: “Donanọ wẹ Egipti, omẹ ṣie lẹ, podọ Asilia, azọ́n alọ ṣie lẹ tọn, gọna Islaeli, ogú ṣie.”+
Nudọnamẹ Odò Tọn
^ Kavi “blawu to alindọn yetọn mẹ.”
^ Kavi “Mẹmfisi.”
^ Kavi vlavo, “odéma kavi ofán.”
