Hagai 1:1-15
1 To owhe awetọ Ahọlu Daliusi tọn mẹ, to osun ṣidopotọ mẹ, to azán tintan osun lọ tọn, ohó Jehovah tọn wá gbọn yẹwhegán Hagai*+ gblamẹ hlan Zelubabẹli+ visunnu Ṣealtiẹli tọn, yèdọ ayimatẹn-gán Juda tọn podọ hlan Jọṣua visunnu Jehozadaki tọn he yin yẹwhenọ daho lọ dọmọ:
2 “Nuhe Jehovah awhànpa lẹ tọn dọ die, ‘Omẹ ehelẹ to didọ dọ, “Ojlẹ ma ko sọ̀ na ohọ̀* Jehovah tọn nido yin gbigbá.”’”*+
3 Ohó Jehovah tọn sọ wá gbọn yẹwhegán Hagai+ gblamẹ whladopo dogọ dọmọ:
4 “Be ojlẹ lọ die na mìwlẹ nado nọ nọ̀ ohọ̀ whanpẹnọ mìtọn lẹ mẹ to whenue ohọ̀ ehe gbẹ́ gbọgbé ya?+
5 Todin, nuhe Jehovah awhànpa lẹ tọn dọ die, ‘Mì ze ahun mìtọn do* aliho mìtọn lẹ ji.
6 Mì ko do jinukun susu, ṣigba jibẹwawhé vude wẹ mì tindo.+ Mì nọ dù, ṣigba ohò ma nọ gọ́ mì. Mì nọ nù, ṣigba mì ma nọ nù bọ e nọ pekọna mì. Mì nọ do avọ̀, ṣigba mẹde ma nọ hlá yozò. Mẹhe yin pakanọ nọ bẹ azọ́nkuẹ etọn do apò tintọ́n mẹ.’”
7 “Nuhe Jehovah awhànpa lẹ tọn dọ die, ‘Mì ze ahun mìtọn do* aliho mìtọn lẹ ji.’
8 “‘Mì hẹji yì osó ji bo gbò atin daho lẹ wá.+ Mì sọ gbá ohọ̀ lọ,+ na yẹn nido mọ homẹhunhun to e mẹ bo yin gigopana,’+ wẹ Jehovah dọ.”
9 “‘Mì to nukundo nususu ṣigba vude wẹ mì to mimọyi; podọ eyin mì hẹn ẹn wá whégbè, yẹn nọ fú i sẹ̀.+ Na whẹwhinwhẹ́n tẹ wutu?’ wẹ Jehovah awhànpa lẹ tọn kanse. ‘Na ohọ̀ ṣie gbẹ́ gbọgbé, to whenue dopodopo mìtọn lẹ to yidọn-yide mìtọn lẹ basi bo to nukunpedo ohọ̀ etọn titi go.+
10 Enẹwutu wẹ olọn he to aga do doalọtena ahun ma nado ja bọ aigba doalọtena jinukun etọn nina.
11 Yẹn sọ zindonukọn nado to akúdido hẹnwa aigba ji, podọ do osó lẹ, jinukun lẹ, ovẹn yọyọ, amì, nuhe nọ wú sọn aigba mẹ lẹ, gbẹtọ po kanlin-yìnyìn po gọna tuklajijẹ mìtọn lẹpo ji.’”
12 Zelubabẹli+ visunnu Ṣealtiẹli+ tọn po Jọṣua visunnu Jehozadaki+ tọn he yin yẹwhenọ daho lọ po gọna mẹhe pò lẹpo sọ dotoaina ogbè Jehovah Jiwheyẹwhe yetọn tọn podọ na ohó yẹwhegán Hagai tọn, na Jehovah Jiwheyẹwhe yetọn wẹ do e hlan wutu; gbẹtọ lẹ sọ jẹ budi ji na Jehovah tọn wutu.
13 Whenẹnu wẹ Hagai, wẹnsagun Jehovah tọn, dowẹn ehe gbẹtọ lọ lẹ to gbesisọ mẹ hẹ gbedide he Jehovah na ẹn dọmọ: “‘Yẹn tin hẹ mì,’+ wẹ Jehovah dọ.”
14 Enẹwutu, Jehovah whàn ayiha+ Zelubabẹli visunnu Ṣealtiẹli, yèdọ ayimatẹn-gán Juda+ tọn lọ tọn po ayiha Jọṣua+ visunnu Jehozadaki tọn he yin yẹwhenọ daho lọ tọn po, gọna ayiha mẹhe pò lẹpo tọn; yé sọ wá bo bẹ azọ́n jẹeji to ohọ̀ Jehovah awhànpa lẹ tọn, yèdọ Jiwheyẹwhe yetọn tọn go.+
15 Ehe jọ to azán 24tọ osun ṣidopotọ tọn to owhe awetọ Ahọlu Daliusi+ tọn mẹ.
Nudọnamẹ Odò Tọn
^ Zẹẹmẹdo “Yin Jiji to Hùnwhẹ de Whenu.”
^ Kavi “tẹmpli.”
^ Kavi “vivọgbá.”
^ Kavi “Mì yí sọwhiwhe do lẹnnupọndo.”
^ Kavi “Mì yí sọwhiwhe do lẹnnupọndo.”
