Whẹdatọ lẹ 4:1-24
4 Ṣigba, to okú Ehudi tọn godo, Islaelivi lẹ sọ vọ́ wà nuhe ylan to nukun Jehovah tọn mẹ.+
2 Enẹwutu, Jehovah sà yé do alọ Jabini ahọlu Kenani tọn mẹ,+ mẹhe dugán to Hazọli. Sisela wẹ yin ogán awhànpa etọn tọn bo nọ nọ̀ Halọṣẹti+ kosi lẹ tọn.*
3 Islaelivi lẹ dawhá ylọ Jehovah,+ na Jabini* tindo osọ́-kẹkẹ awhàn tọn 900 he ohí didá lẹ to afọ yetọn go+ bo yí kanyinylan do gbidikọna Islaelivi lẹ+ na owhe 20 wutu.
4 Todin Debola, yẹwhegán-yọnnu+ he yin asi Lapidọti tọn wẹ to whẹda to Islaeli to ojlẹ enẹ mẹ.
5 Ewọ nọ saba sinai do odétin Debola tọn glọ to Lama+ po Bẹtẹli+ po ṣẹnṣẹn to lẹdo osó tọn Eflaimi tọn mẹ; Islaelivi lẹ sọ nọ hẹji yì e dè nado sè whẹdida Jiwheyẹwhe tọn.
6 Ewọ domẹhlan Balak+ visunnu Abinoami tọn sọn Kedẹṣi-naftali+ bo dọna ẹn dọmọ: “Be Jehovah Jiwheyẹwhe Islaeli tọn ma ko na gbedide lọ ya? ‘Sọawhànnu bo yì* Osó Taboli ji, bosọ plan sunnu 10 000 hẹn sọn omẹ Naftali po Zebuluni po tọn lẹ mẹ.
7 Yẹn na dọ̀n Sisela ogán awhànpa Jabini tọn po osọ́-kẹkẹ awhàn tọn etọn lẹ po gọna awhànpa etọn lẹ wá dè we to tọ̀sisa* Kiṣọni tọn kọ̀n,+ yẹn nasọ jo e do alọ towe mẹ.’”+
8 Enẹwutu, Balak dọna yọnnu lọ dọmọ: “Eyin hiẹ hodo mi, yẹn na yì, ṣigba eyin hiẹ ma hodo mi, yẹn ma na yì.”
9 To whenẹnu, yọnnu lọ dọmọ: “Matin ayihaawe, yẹn na hodo we yì. Ṣigba, gigo lọ ma na yin towe to gbejizọnlin ehe mẹ, na alọ yọnnu de tọn mẹ wẹ Jehovah na jo Sisela do.”+ To whenẹnu, Debola fọ́n bo hodo Balak yì Kedẹṣi.+
10 Balak ylọ omẹ Zebuluni po Naftali po tọn lẹ pli dopọ+ wá Kedẹṣi, bọ sunnu 10 000 hodo e yì. Debola lọsu sọ hẹji hodo e yì.
11 Nalete, Hobabi asi-tọ́ Mose tọn+ sin kúnkan lẹ wẹ Keninu lẹ.+ Hebeli Keninu lọ ko klan sọn yewlẹ go bọ gòhọ etọn yin tùntùn sẹpọ atin daho he tin to Zaanannimi to Kedẹṣi.
12 Yé na linlin Sisela dọ Balak visunnu Abinoami tọn ko hẹji yì Osó Taboli ji.+
13 To afọdopolọji, Sisela bẹ osọ́-kẹkẹ awhàn tọn etọn lẹpo—yèdọ osọ́-kẹkẹ awhàn tọn 900 he ohí didá lẹ to afọ yetọn go—gọna awhànpa he tin to e dè lẹpo pli dopọ sọn Halọṣẹti kosi lẹ tọn nado yì tọ̀sisa* Kiṣọni tọn kọ̀n.+
14 Todin, Debola dọna Balak dọmọ: “Fọ́n, na egbehe wẹ Jehovah na jo Sisela do alọ towe mẹ. Be Jehovah ma to yìyì to nukọn towe?” Balak sọ jẹte sọn Osó Taboli ji po sunnu 10 000 po to godo.
15 To whenẹnu, Jehovah hẹn Sisela po osọ́-kẹkẹ awhàn tọn etọn lẹpo po gọna awhànpa lọ pete biọ bẹwlu mẹ+ to ohí Balak tọn nukọn. To godo mẹ, Sisela jẹte sọn osọ́-kẹkẹ etọn ji bo doge-wezun mẹ.
16 Balak sọ dómọna osọ́-kẹkẹ awhàn tọn lọ lẹ po awhànpa lọ po kaka yì Halọṣẹti kosi lẹ tọn. Gbọnmọ dali, awhànpa Sisela tọn pete jai gbọn ohí dali; dopo tata ma pò to yé mẹ.+
17 Ṣigba, Sisela doge-wezun mẹ kaka yì gòhọ Jaeli+ asi Hebeli+ Keninu lọ tọn mẹ, na jijọho tin to Jabini+ ahọlu Hazọli tọn po whédo Hebeli Keninu lọ tọn po ṣẹnṣẹn wutu.
18 Whenẹnu, Jaeli tọ́n wá pé Sisela bo dọna ẹn dọmọ: “Biọ họmẹ, oklunọ ṣie, wá biọ họmẹ. A dibu blo.” Enẹwutu, e biọ gòhọ lọ mẹ bọ yọnnu lọ yí avọ̀ titli de ṣinyọ́n na ẹn.
19 Enẹgodo, e dọna yọnnu lọ dọmọ: “Jaale, na mi osin vude nado nù, na nugbla to hùhù mi.” Enẹwutu, yọnnu lọ hùn ayúgò anọ́sin tọn de bo na ẹn nù+ bosọ gọ̀ avọ̀ ṣinyọ́n na ẹn.
20 Ewọ sọ dọna yọnnu lọ dọmọ: “Ṣite to họntonu gòhọ lọ tọn bọ eyin mẹdepope wá bo kanbiọ we dọ, ‘Be mẹde to finẹ ya?’ hiẹ na dọ, ‘Lala!’”
21 Ṣigba, Jaeli asi Hebeli tọn ze opò tlọ́ntlọ́n gòhọ tọn de bosọ ze ṣówhènú de hẹn do alọmẹ. Enẹgodo, to whenue e ko damlọn yìkànmẹ bọ agbọ́ ko pé e, yọnnu lọ zọ̀n dẹẹdẹ yì e dè bo whè opò tlọ́ntlọ́n lọ do topá na ẹn luntọ́n biọ kọmẹ, bọ e kú.+
22 Balak dómọna Sisela yì finẹ bọ Jaeli tọ́n wá pé e bo dọmọ: “Wá, yẹn na do dawe he hiẹ to dindin lọ hia we.” Ewọ sọ biọ họmẹ hodo e bo mọdọ Sisela ko kú do kọmẹ bọ opò tlọ́ntlọ́n gòhọ tọn lọ to topá na ẹn luntọ́n.
23 Enẹwutu, Jiwheyẹwhe hẹn Jabini ahọlu Kenani tọn zun mẹmẹglọ to Islaelivi lẹ nukọn to azán enẹ gbè.+
24 Alọ Islaelivi lẹ tọn sọ to sinsinyẹn mapote sọta Jabini ahọlu Kenani+ tọn kaka yé do hù Jabini ahọlu Kenani tọn.+
