Whẹdatọ lẹ 15:1-20
-
Samsọni yiahọsu to Filistinu lẹ go (1-20)
15 To ojlẹ kleun de godo, to jibẹwawhé likun tọn whenu, Samsọni yì dla asi etọn pọ́n bo hẹn gbọgbọẹvu de. Ewọ dọmọ: “Yẹn jlo na biọ abò mẹ yì asi ṣie dè.” Amọ́, otọ́ yọnnu lọ tọn ma yigbena ẹn nado biọ e mẹ.
2 Otọ́ lọ dọmọ: “Yẹn lẹn to dee mẹ dọ, ‘E họnwun dọ hiẹ dona ko gbẹwanna ẹn.’+ Enẹwutu, yẹn ko yí i na dopo to họntọn asisunọ yọyọ tọn towe lẹ mẹ di asi.+ Be nọviyọnnu etọn pẹvi ma yọnwhanpẹ hú i ya? Jaale, yí ewọ di asi do otẹn etọn mẹ.”
3 Ṣigba, Samsọni dọna yé dọmọ: “Todin, Filistinu lẹ ma sọgan gblewhẹdo mi eyin yẹn wà danú do yé.”
4 Enẹwutu, Samsọni yì bo wle owọ̀ 300. E sọ bẹ zòwhán lẹ bo sìn osi owọ̀ lọ lẹ tọn awe-awe dopọ bosọ blá zòwhán do osi lọ lẹ go to ṣẹnṣẹn.
5 Enẹgodo, e flọ miyọ́n do zòwhán lọ lẹ nù bo do owọ̀ lọ lẹ hlan likun he tin to ote to ogle Filistinu lẹ tọn lẹ mẹ. E sọ domiyọ́n nulẹpo, sọn getin ji jẹ likun he to ote lẹ ji gọna vẹngle lẹ po olivie-gle lẹ po.
6 Filistinu lẹ kanse dọmọ: “Mẹnu wẹ wà ehe?” Yé sọ yin didọna dọmọ: “Samsọni ovisu Timnanu lọ tọn wẹ, na ewọ yí asi Samsọni tọn bo yí i na dopo to họntọn asisunọ yọyọ tọn etọn lẹ mẹ wutu.”+ Filistinu lẹ sọ hẹji yì bo yí miyọ́n do fiọ yọnnu lọ po otọ́ etọn po.+
7 To whenẹnu, Samsọni dọna yé dọmọ: “Eyin mọ wẹ mì nọ yinuwa do, yẹn ma na lẹkọ kakajẹ whenue yẹn na ko yiahọsu to mì go.”+
8 E sọ jẹ yé hù ji debọdo-dego* bo hù yé badabada, enẹgodo e jẹte yì bo gbọṣi oslò osé Etami tọn mẹ.
9 To godo mẹ, Filistinu lẹ hẹji wá bo dosla do Juda bosọ jẹ dindanpe ji to Lehi.+
10 To whenẹnu, sunnu Juda tọn lẹ dọmọ: “Naegbọn mìwlẹ do hẹji wá nado tọ́nawhàn mí?” yé sọ gblọn dọmọ: “Mí hẹji wá nado wle* Samsọni, na mí nido wà na ẹn kẹdẹdile e wà na mí do.”
11 Enẹwutu, sunnu 3 000 sọn omẹ Juda tọn lẹ mẹ jẹte yì oslò osé Etami tọn lọ mẹ bo dọna Samsọni dọmọ: “Be hiẹ ma yọnẹn dọ Filistinu lẹ wẹ to gandu do mí ji?+ To whenẹnu, naegbọn hiẹ do wà ehe do mí?” Ewọ sọ dọna yé dọmọ: “Kẹdẹdile yé wà na mi do, mọ wẹ yẹnlọsu ko wà na yé do.”
12 Ṣigba, yé dọna ẹn dọmọ: “Mí wá nado wle* we bo ze we do alọmẹ na Filistinu lẹ.” Samsọni sọ dọmọ: “Mì whlé na mi dọ mìwlẹ ma na fọ́n do ji e.”
13 Yé dọna ẹn dọmọ: “Lala, mí na blá we poun wẹ, bo na ze we do alọmẹ na yé, ṣigba mí ma na hù we.”
Enẹwutu, yé yí okàn yọyọ awe do blá ẹ bo hẹn ẹn jẹgbonu sọn osé lọ mẹ.
14 To whenue e jẹ Lehi, Filistinu lẹ yí ayajẹ do dabobo to whenue yé pé e. To whenẹnu, gbigbọ Jehovah tọn na ẹn huhlọn,+ bọ okàn he tin to alọ na ẹn lọ lẹ wá taidi okàn alavọ tọn he miyọ́n ko dupò bosọ flẹ sọn alọ etọn go.+
15 Todin, e mọ aglànkáhú kẹtẹkẹtẹ asu he ṣẹṣẹ kú de tọn; e dealọ bo ze e bosọ yí i do hù sunnu 1 000.+
16 To whenẹnu, Samsọni dọmọ:
“Aglànkáhú kẹtẹkẹtẹ de tọn wẹ yẹn yí do hù yé bo bẹ yé pli do gọnu-gọnu!
Aglànkáhú kẹtẹkẹtẹ de tọn wẹ yẹn yí do hù sunnu 1 000.”+
17 To whenuena e dotana hodidọ etọn, e ze aglànkáhú lọ dlan bo ylọ filọ dọ Lamati-lehi.*+
18 Enẹgodo, nugbla hù i taun bọ e dawhá ylọ Jehovah dọmọ: “Hiẹ wẹ na whlẹngán daho ehe devizọnwatọ towe. Ṣigba todin, be yẹn na kú na nugbla wutu bo jai jẹ alọ mẹhe ma gboadà lẹ tọn mẹ wẹ?”
19 Enẹwutu, Jiwheyẹwhe hùn odò he tin to Lehi de bọ osin tọ́njẹgbonu sọn e mẹ.+ To whenue ewọ ko nù, e gọ̀ huhlọn mọyi bo gọwá ede mẹ. Enẹ wẹ zọ́n bọ e ylọ filọ dọ Ẹn-hakọle,* ehe tin to Lehi kakajẹ egbé.
20 Ewọ sọ dawhẹ to Islaeli to ojlẹ Filistinu lẹ tọn mẹ na owhe 20.+
Nudọnamẹ Odò Tọn
^ To paa mẹ, “E sọ hù yé afọ do asapada ji.”
^ Kavi “blá.”
^ Kavi “blá.”
^ Zẹẹmẹdo “Ofi Yiaga Aglànkáhú lọ Tọn.”
^ Zẹẹmẹdo “Asisa Mẹhe to Yiylọ lọ Tọn.”
