Howhinwhẹn lẹ 18:1-24
18 Mẹdepope he nọ klan ede dovo nọ doafọna ojlo ṣejannabi tọn etọn titi lẹ;E sọ nọ gbẹ́* nuyọnẹn yọ́n-na-yizan lẹpo dai.
2 Nulunọ ma nọ mọ awuvivi depope to nukunnumọjẹnumẹ tintindo mẹ;Kakatimọ, nuhe to ahun etọn mẹ wẹ e nọ dehia.+
3 Eyin mẹylankan wá, wangbẹna lọsu nọ wá,Podọ flumẹjijẹ wẹ nọ zọnpọ hẹ winyan.+
4 Ohó he to onù gbẹtọ tọn mẹ taidi otọ̀ he siso lẹ.+
Asisa nuyọnẹn tọn taidi osinwhín he to sisà jẹgbonu.
5 E ma yọ́n nado nọ do mẹnukuntahihopọn hia mẹylankan+Kavi nado nọ tẹ̀ whẹdida dodo mẹhe yin dodonọ.+
6 Hodidọ nulunọ tọn nọ dekọtọn do whẹgbè mẹ,+Onù etọn sọ nọ hẹn hihò wá.+
7 Onù nulunọ tọn wẹ na hẹn dindọn wá e ji,+Podọ omọ̀ de wẹ nùflo etọn lẹ yin na ogbẹ̀* etọn titi.
8 Ohó mẹhẹngbletọ de tọn lẹ nọ taidi núdùdù he dotọ́n;*+Yé nọ yin zize mì bo nọ jẹte yì homẹ tlọlọ.+
9 Mẹdepope he nọ wàdidọ to azọ́n etọn kọ̀nYin nọvisunnu mẹhe nọ hẹn dindọn wá tọn.+
10 Atọ̀họ̀ gángán de wẹ oyín Jehovah tọn yin.+
Dodonọ nọ họ̀nwezun biọ e mẹ bo nọ mọ hihọ́.*+
11 Adọkun wẹ yin tòdaho gángán adọkunnọ tọn;E sọ nọ taidi adó hihọ́-basinamẹ tọn de to linlẹn etọn mẹ.+
12 Jẹnukọnna aijijẹ ajiji, ahun gbẹtọ tọn nọ ze ede daga,+Amọ́, whiwhẹ wẹ nọ jẹnukọnna gigo.+
13 Eyin mẹdepope gblọnho gando whẹho de go whẹpo do sè e,Be nulunu po winyannu de po wẹ e wà.+
14 Gbigbọ he mẹde tindo sọgan hẹn ẹn dote to whenue e to azọ̀njẹ,+Ṣigba, mẹnu wẹ sọgan doakọnna ayiha he jẹflumẹ?*+
15 Ahun mẹhe tindo nukunnumọjẹnumẹ tọn nọ bẹ oyọnẹn pli,+Podọ otó nuyọnẹntọ tọn nọ dín oyọnẹn mọ.
16 Nunina he mẹde basi wẹ nọ hùnali na ẹn;+E nọ hùnali na ẹn yì omẹ nukundeji lẹ dè.
17 Omẹ tintan he wá jẹwhẹ nọ taidi mẹhe owhẹ̀ etọn whẹ́n,+Kakajẹ whenue omẹ awetọ wá bo dedòna ẹn.*+
18 Ovò dide wẹ nọ doalọtena nudindọn+Bo nọ gbòhó to* mẹhe to nudọn sinsinyẹn lẹ ṣẹnṣẹn.
19 E vẹawu nado gbọwhẹ hẹ nọvisunnu he yè ṣinuwa do de hú nado yí tòdaho gángán de,+Nudindọn delẹ sọ tin he nọ taidi dòtin figángán de tọn lẹ.+
20 Sinsẹ́n he ohó* mẹde tọn detọ́n wẹ na gọ́ho na ẹn;+Nuhe nùflo etọn lẹ nọ detọ́n wẹ na pekọna ẹn.
21 Okú po ogbẹ̀ po tin to huhlọn odẹ́ tọn glọ;+Mẹhe yiwanna nado nọ yí i zan lẹ na nọ dù sinsẹ́n etọn.+
22 Mẹhe mọ asi dagbe dà ko mọ nudagbe de,+Bosọ mọ nukundagbe* Jehovah tọn.+
23 Wamọnọ nọ vẹvẹ dile e to hodọ,Ṣigba, adọkunnọ nọ gblọnho po ogbè sinsinyẹn po.
24 Họntọn delẹ tin he nọ wleawufo nado gídí ode awetọ,+Ṣigba, họntọn delẹ tin he nọ sẹpọ yede pẹkipẹki hú nọvisunnu.+
Nudọnamẹ Odò Tọn
^ Kavi “gbẹwanna.”
^ Kavi “alindọn.”
^ Kavi “taidi nuhe sọgan yin zize mì po nukunkẹn po.”
^ To paa mẹ, “bo nọ yin zizedaga,” enẹ wẹ, to hihọ́ mẹ to fie alọ ma sọgan plá.
^ Kavi “doakọnna flumẹjijẹ pete?”
^ Kavi “bo gbeje e pọ́n.”
^ To paa mẹ, “nọ klan.”
^ To paa mẹ, “onù.”
^ Kavi “ojlo dagbe.”
