Efesunu lẹ 1:1-23
1 Paulu, apọsteli Klisti Jesu tọn de gbọn ojlo Jiwheyẹwhe tọn gblamẹ, to wekanhlan omẹ wiwe lẹ he tin to Efesu+ bo yin nugbonọ to kọndopọ mẹ hẹ Klisti Jesu:
2 Na mì ni tindo nukundagbe majẹhẹ po jijọho po sọn Jiwheyẹwhe Otọ́ mítọn podọ Oklunọ Jesu Klisti dè.
3 Pipà ni tin hlan Jiwheyẹwhe podọ Otọ́ Oklunọ mítọn Jesu Klisti tọn, na ewọ ko yí dona gbigbọmẹ tọn lẹpo he tin to lẹdo olọn tọn lẹ mẹ to kọndopọ mẹ hẹ Klisti do dona mí,+
4 dile ewọ ko de mí nado tin to kọndopọ mẹ hẹ ẹ* jẹnukọnna didá aihọn tọn, na míwlẹ nido yin wiwe bo ma tindo oblọ+ to owanyi mẹ to Jiwheyẹwhe nukọn.
5 Na ewọ ko de mí jẹnukọn+ nado yin sọdodovi+ gbọn Jesu Klisti gblamẹ taidi ovi etọn titi lẹ, to kọndopọ mẹ hẹ nuhe nọ hẹn homẹ etọn hùn po ojlo etọn po,+
6 nado hẹn pipà wá na ẹn na nukundagbe majẹhẹ gigonọ etọn+ he ewọ yí homẹdagbe do na mí gbọn mẹyiwanna etọn gblamẹ.+
7 Gbọn mẹhe gblamẹ míwlẹ mọ tundote yí gbọn ofligọ he omẹ enẹ yí ohùn etọn do basi lọ gblamẹ,+ mọwẹ, yèdọ jona sẹ́nmẹjijẹ mítọn lẹ tọn,+ sọgbe hẹ nukundagbe majẹhẹ susugege etọn.
8 Ewọ na mí nukundagbe majẹhẹ ehe susugege to nuyọnẹn po nukunnumọjẹnumẹ* lẹpo po mẹ
9 gbọn aṣli wiwe+ ojlo etọn tọn hinhẹn zun yinyọnẹn na mí dali. Ehe sọgbe hẹ nuhe nọ hẹn homẹ etọn hùn he ewọ lọsu ko lẹn
10 nado ze tito anadenanu tọn de dai* to whenue ojlẹ dide lọ lẹ pé nado sọgan bẹ nulẹpo pli dopọ to Klisti mẹ, yèdọ nuhe tin to olọn mẹ lẹ po nuhe tin to aigba ji lẹ po.+ Mọwẹ, to ewọ mẹ,
11 yèdọ mẹhe míwlẹ tin to kọndopọ mẹ hẹ bo ko yin dide nado yin gudutọ+ lẹ to pọmẹ hẹ, na mí ko yin dide jẹnukọn sọgbe hẹ lẹndai mẹhe nọ hẹn nulẹpo di dile e basi dide etọn sọgbe hẹ ojlo etọn do lọ tọn,
12 na míwlẹ he ko yin omẹ tintan he tindo todido to Klisti mẹ lẹ nido wadevizọn nado pà gigo etọn.
13 Ṣigba, mìlọsu lẹ ga tindo todido to ewọ mẹ to whenue mì ko sè ohó nugbo tọn lọ godo, enẹ wẹ wẹndagbe lọ he gando whlẹngán mìtọn go. To whenue mìwlẹ ko yise godo, gbigbọ wiwe dopagbe lọ sọ yin yíyí do dohiagona mì+ gbọn ewọ dali,
14 ehe yin ohia jẹnukọn* de gando ogú mítọn go,+ na lẹndai lọ he yin nado tún nutindo Jiwheyẹwhe lọsu titi tọn dote+ gbọn ofligọ de dali,+ hlan pipà gigonọ etọn.
15 Enẹ wẹ zọ́n bọ yẹnlọsu ga, sọn whenue yẹn ko sè gando yise he mì tindo to Oklunọ Jesu mẹ go, gọna owanyi he mì dohia omẹ wiwe lẹpo,
16 yẹn ma doalọtena pẹdido do ota mìtọn mẹ. Yẹn zindonukọn nado nọ to dẹ̀ho gando mì go,
17 dọ Jiwheyẹwhe Oklunọ mítọn Jesu Klisti tọn, Otọ́ gigonọ lọ, nido sọgan na mì gbigbọ nuyọnẹn tọn po osọhia tọn po nado tindo oyọnẹn he pegan gando ewọ go.+
18 E ko hùn nukun ahun mìtọn tọn, na mìwlẹ nido sọgan yọ́n todido he kọ̀n ewọ ylọ mì do lọ, yèdọ gigo susugege he ewọ wleawu etọn taidi ogú de na omẹ wiwe lẹ,+
19 podọ lehe kiklo-yinyin huhlọn etọn tọn gando mí mẹhe yin yisenọ lẹ go ma yọnjlẹ sọ.+ Ehe nọ yin mimọ to aliho he mẹ ewọ nọ yí huhlọn etọn zan te mẹ,
20 ehe e ko yizan to whenue e fọ́n Klisti sọn oṣiọ lẹ mẹ bo ze e sinai do adusilọ etọn+ mẹ to olọn mẹ
21 bo hẹn ẹn yiaga hú gandudu, aṣẹpipa, huhlọn, oklunọ-yinyin lẹpo podọ oyín he nọ yin yiylọ lẹpo,+ e ma yin to titonu* ehe kẹdẹ mẹ, ṣigba to dehe ja lọ lọsu mẹ ga.
22 Ewọ sọ hẹn nulẹpo zun mẹmẹglọ to afọ etọn+ lẹ glọ bo hẹn ẹn yin tatọ́ nuhe gando agun go lẹpo tọn,+
23 ehe yin agbasa etọn,+ yèdọ gigọ́-yinyin ewọ he gọ́ nulẹpo to onú popo mẹ tọn.
Nudọnamẹ Odò Tọn
^ Enẹ wẹ, Klisti.
^ Kavi “linlẹn dagbe.”
^ Kavi “nado deanana nulẹ.”
^ Kavi “jidenamẹnu (afàsúnú) gando nuhe to nukọn ja go.”
