2 Samuẹli 7:1-29
7 To whenue ahọlu ko jẹ owhé* etọn titi gbè+ bọ Jehovah ko na ẹn gbọjẹ sọn alọ kẹntọ etọn he lẹdo e pé lẹpo tọn mẹ,
2 ahọlu dọna Natani+ yẹwhegán lọ dọmọ: “Yẹn die nọ nọ̀ ohọ̀ he yè yí kedali do gbá de mẹ+ bọ Apotin Jiwheyẹwhe nugbo lọ tọn ka tin to gòhọ he yè yí avọ̀ do basi de mẹ.”+
3 Natani sọ gblọnna ahọlu dọmọ: “Yì bo wà nudepope he tin to ahun towe mẹ, na Jehovah tin hẹ we.”+
4 To ozán enẹ mẹ, ohó Jehovah tọn wá Natani dè dọmọ:
5 “Yì bo dọna devizọnwatọ ṣie Davidi dọ, ‘Nuhe Jehovah dọ die: “Be hiẹ sọgan gbá ohọ̀ de na mi nado nọ nọ̀ e mẹ wẹ ya?+
6 Na sọn azán he gbè n’plan omẹ Islaeli tọn lẹ jẹgbonu sọn Egipti kakajẹ egbé, yẹn ma ko nọ ohọ̀ de mẹ pọ́n,+ ṣigba yìyì* pé wẹ n’nọ te to gòhọ de mẹ podọ to gòhọtúntún de mẹ.+
7 To ojlẹ he mẹ n’to yìyì pé hẹ Islaelivi* lẹpo lọ pete gblamẹ, be n’ko dọna depope to nukọntọ hẹnnu Islaeli tọn lẹ tọn he n’de nado nọ yìn Islaeli omẹ ṣie lẹ mẹ pọ́n dọ, ‘Naegbọn mìwlẹ ma do gbá ohọ̀ he yè yí kedali do basi de na mi?’”’
8 Todin, dọna devizọnwatọ ṣie Davidi dọ, ‘Nuhe Jehovah awhànpa lẹ tọn dọ die: “Kanlindugbo mẹ wẹ n’plan we sọn, yèdọ sọn hihodo lẹngbọpa lọ mẹ,+ nado wá lẹzun nukọntọ na Islaeli omẹ ṣie lẹ.+
9 Yẹn na tin hẹ we to fidepope he hiẹ na yì,+ yẹn nasọ de* kẹntọ towe lẹpo sẹ̀ sọn nukọn towe;+ podọ yẹn na basi oyín daho de na we+ taidi oyín sunnu nukundeji he tin to aigba ji lẹ tọn.
10 Yẹn na de nọtẹn de na Islaeli omẹ ṣie lẹ bo na hẹn yé nado nọ nọ̀ finẹ, yé nasọ nọ nọ̀ finẹ bọ mẹde ma na nọ dotukla yé ba; podọ mẹylankan lẹ ma na nọ gbidikọna yé dile yé ko basi wayi do ba,+
11 yèdọ sọn azán he gbè n’ko de whẹdatọ+ lẹ do Islaeli omẹ ṣie lẹ ji. Yẹn nasọ na we gbọjẹ sọn alọ kẹntọ towe lẹpo tọn mẹ.+
“‘“Humọ, Jehovah ko dọna we dọ, Jehovah na basi owhé* de na we.+
12 Whenue azán towe lẹ na ko wá vivọnu+ bọ hiẹ na ko yin hinhẹn nado mlọnai hẹ tọgbo towe lẹ, whenẹnu wẹ yẹn na ze kúnkan* towe daga to godo towe, yèdọ visunnu towe titi,* bọ yẹn na hẹn ahọluduta etọn lodo gligli.+
13 Ewọ wẹ na gbá ohọ̀ de na oyín ṣie,+ bọ yẹn na hẹn ofìn ahọluduta etọn tọn lodo gligli kakadoi.+
14 Yẹn na lẹzun otọ́ etọn bọ ewọ na lẹzun visunnu ṣie.+ Eyin ewọ waylan, yẹn na nọ yí opò gbẹtọ tọn po obá gbẹtọvi tọn lẹ* po do wọhẹ ẹ.+
15 Owanyi nugbo ṣie ma na yin yíyí sọn ewọ si dile yẹn yí i sọn Sauli si do,+ yèdọ mẹhe yẹn desẹ sọn nukọn towe.
16 Whédo towe po ahọluduta towe po na yin hihọ́-basina kakadoi to nukọn towe; ofìn towe na yin hinhẹn lodo gligli kakadoi.”’”+
17 Natani sọ dọ onú ehe lẹpo po numimọ ehe pete po na Davidi.+
18 Whenẹnu, Ahọlu Davidi wá bo sinai to Jehovah nukọn bosọ dọmọ: “Oklunọ Nupojipetọ Jehovah E, mẹnu wẹ yẹn? Podọ etẹwẹ whédo ṣie yin bọ hiẹ do hẹn mi kaka wáfi?+
19 Podọ taidi dọ enẹ ma ko pé wẹ nkọ, Oklunọ Nupojipetọ Jehovah E, hiẹ sọ dọho gando whédo devizọnwatọ towe tọn go hlan sọgodo dindẹn de; podọ Oklunọ Nupojipetọ Jehovah E, anademẹ* de wẹ ehe sọ yin na gbẹtọvi lẹpo.
20 Oklunọ Nupojipetọ Jehovah E, etẹwẹ devizọnwatọ towe Davidi sọgan sọ dọna we din to whenuena e yindọ hiẹ ko yọ́n mi sọmọ?+
21 Hiẹ ko wà onú daho ehe lẹpo bo ko sọ de yé hia devizọnwatọ towe, na ohó towe tọn wutu podọ to gbesisọ mẹ hẹ ahun towe.*+
22 Oklunọ Nupojipetọ Jehovah E, enẹwutu wẹ hiẹ do yin zizedaga na taun tọn.+ Mẹde ma tin di hiẹ+ podọ Jiwheyẹwhe devo de ma tin adavo hiẹ;+ nuhe otó mítọn ko sè lẹpo wẹ do ehe hia.
23 Podọ akọta devo tẹwẹ to aigba ji he taidi Islaeli omẹ towe lẹ?+ Jiwheyẹwhe yì bo fli yé gọ̀ taidi omẹ etọn+ lẹ bosọ basi oyín de na ede+ gbọn onú daho po nujiawu lẹ po wiwà do ota yetọn mẹ dali.+ Hiẹ yàn akọta lẹ po yẹwhe yetọn lẹ po do omẹ towe, he hiẹ fligọ na dewe sọn Egipti lẹ tamẹ.
24 Hiẹ hẹn Islaeli omẹ towe lẹ nado lẹzun akọta towe titi kakadoi;+ podọ hiẹ Jehovah E, hiẹ ko lẹzun Jiwheyẹwhe yetọn.+
25 “Todin, Jehovah Jiwheyẹwhe E, hẹn opagbe he a ko do gando devizọnwatọ towe po whédo etọn po go lọ di kakadoi, na hiẹ nisọ basi kẹdẹdile a ko dopagbe etọn do.+
26 Na oyín towe ni yin zizedaga kakadoi,+ na gbẹtọ lẹ nido nọ dọ dọ, ‘Jehovah awhànpa lẹ tọn wẹ Jiwheyẹwhe do Islaeli ji,’ podọ na whédo devizọnwatọ towe Davidi tọn ni yin hinhẹn lodo gligli to nukọn towe.+
27 Na hiẹ, Jehovah awhànpa lẹ tọn, yèdọ Jiwheyẹwhe Islaeli tọn ko basi osọhia de hlan devizọnwatọ towe gbọn didọ dali dọ, ‘Yẹn na gbá owhé* de na we.’+ Enẹ wẹ zọ́n bọ devizọnwatọ towe do tindo adọgbigbo lọ* nado hò odẹ̀ ehe hlan we.
28 Todin, Oklunọ Nupojipetọ Jehovah E, hiẹ wẹ Jiwheyẹwhe nugbo lọ, podọ nugbo wẹ ohó towe lẹ,+ bọ hiẹ ko dopagbe nudagbe ehelẹ tọn na devizọnwatọ towe.
29 Enẹwutu, na e ni yin homẹhunnu de na we nado dona whédo devizọnwatọ towe tọn, podọ e ni zindonukọn kakadoi to nukọn towe;+ na hiẹ Oklunọ Nupojipetọ Jehovah E, hiẹ ko dopagbe, podọ whédo devizọnwatọ towe tọn ni yin didona kakadoi gbọn dona towe dali.”+
Nudọnamẹ Odò Tọn
^ Kavi “họ̀nmẹ.”
^ To paa mẹ, “zọnlinzin.”
^ To paa mẹ, “visunnu Islaeli tọn.”
^ To paa mẹ, “sán.”
^ Kavi “hukan gandudu tọn.”
^ To paa mẹ, “okún.”
^ To paa mẹ, “mẹde he na tọ́n sọn ohò towe mẹ.”
^ Kavi vlavo, “obá visunnu Adam tọn lẹ.”
^ Kavi “osẹ́n.”
^ Kavi “podọ sọgbe hẹ ojlo towe.”
^ Kavi “hukan gandudu tọn.”
^ To paa mẹ, “do dín ahun etọn mọ.”
