1 Samuẹli 17:1-58
17 Filistinu+ lẹ sọ bẹ awhànpa* yetọn lẹ pli na awhàn. Yé pli do Sokohi+ Juda tọn, bo dosla do Sokohi po Azeka+ po ṣẹnṣẹn, to Efẹsi-damimi.+
2 Sauli po sunnu Islaeli tọn lẹ po pli bo dosla do Agbàdo Elahi tọn+ mẹ bosọ to yede kannukannu nado pehẹ Filistinu lẹ.
3 Filistinu lẹ tin to awà osó lọ tọn dopo ji bọ Islaelivi lẹ tin to awà osó lọ tọn awetọ ji bọ agbàdo lọ tin to ṣẹnṣẹn na yé.
4 Whenẹnu, awhànfuntọ-gán de tọ́n wá sọn osla Filistinu lẹ tọn lẹ mẹ; oyín etọn wẹ Goliati,+ sọn Gati+ bọ tedidi etọn yin awagbà ṣidopo e lán alọpapa dopo.*
5 E ṣinyọ́n ogangbakun gànvẹẹ tọn bo do awù he yè lọ̀n di gbaja de he linlọ̀n etọn lẹ ṣinyọ́n ode awetọ ji. Zínpinpẹn awù he yè yí gànvẹẹ do lọ̀n+ lọ tọn yin ṣekẹli 5 000.*
6 E sọ yí gànvẹẹ do bu azangandan etọn lẹ bo plá dludlu+ gànvẹẹ tọn de do nẹgbé.
7 Akún owhán etọn tọn klo taidi dòtin avọ̀lọ̀ntọ lẹ tọn,+ bọ zínpinpẹn gànyuu didá he to onù na owhán etọn lọ tọn yin ṣekẹli 600;* awọ̀yinu hẹntọ etọn sọ to zọnlinzin to nukọnna ẹn.
8 Whenẹnu, e ṣite bo dawhá hlan awhànpa Islaeli tọn+ dọmọ: “Naegbọn mì do to mìde kannukannu? Be e ma yin yẹn wẹ yin Filistinu lọ bọ mìwlẹ yin devizọnwatọ Sauli tọn lẹ ya? Mì de sunnu de bo gbọ ewọ ni jẹte wá dè e.
9 Eyin ewọ penugo nado hoavùn hẹ mi bo hù mi, míwlẹ na lẹzun devizọnwatọ mìtọn lẹ. Amọ́, eyin yẹn wẹ duto ewọ ji bo hù i, mìwlẹ na lẹzun devizọnwatọ mítọn bo na nọ sẹ̀n mí.”
10 Enẹgodo, Filistinu lọ dọmọ: “Yẹn vlẹ* awhànpa Islaeli tọn+ kò to egbé. Mì de sunnu de na mi, na mí ni hoavùn bo pọ́n!”
11 To whenue Sauli po Islaeli pete po sè ohó Filistinu lọ tọn ehelẹ, obu jẹ yé ji bọ ahun yetọn gbàdo pete.
12 Todin, Davidi yin visunnu Eflatinu+ de tọn he nọ yin Jẹsse+ bo wá sọn Bẹtlẹhẹm+ Juda tọn, yèdọ dawe de he tindo visunnu ṣinatọ̀n+ bo ko poyọnho to azán Sauli tọn lẹ gbè.
13 Visunnu Jẹsse tọn atọ̀n he yin mẹho hugan lẹ ko hodo Sauli yì awhàn.+ Oyín visunnu etọn atọ̀n he yì awhàn lọ lẹ tọn wẹ Eliabi+ he yin plọnji lọ, Abinadabi+ he yin visunnu awetọ podọ Ṣammahi+ he yin atọ̀ntọ.
14 Davidi wẹ yin pẹvi pete lọ,+ bọ atọ̀n he yin mẹho hugan lẹ ko hodo Sauli.
15 Davidi nọ to yigọyigọ basi sọn Sauli dè nado wá penukundo lẹngbọ otọ́ etọn tọn lẹ go+ to Bẹtlẹhẹm.
16 To ojlẹ enẹ mẹ, Filistinu lọ nọ tọ́n wá egbesọegbesọ to afọnnu po whèjai po na azán 40.
17 Whenẹnu, Jẹsse dọna visunnu etọn Davidi dọmọ: “Jaale, yí jinukun sisọ ojlẹnu efa tọn* ehe po akla ao ehelẹ po bo yawu ze yé yì na mẹdaho towe lẹ to osla lọ mẹ.
18 Podọ hẹn anọ́sin mimlin* ao ehelẹ yì na ogán omẹ fọtọ́n lẹ tọn lọ; humọ dindona lehe mẹdaho towe lẹ te do bo hẹn kunnudenu wá sọn yé dè he dohia dọ yé to ganji.”
19 Yé tin to Sauli dè gọna sunnu Islaeli tọn devo lẹpo to Agbàdo Elahi tọn+ mẹ bo to avùnho sọta Filistinu lẹ.+
20 Enẹwutu, Davidi fọ́n to afọnnu fuu bo dín mẹde do otẹn etọn mẹ nado penukundo lẹngbọ lẹ go; enẹgodo e doagban bo dedo kẹdẹdile Jẹsse ko degbena ẹn do. To whenue e jẹ osla lọ mẹ, awhànpa lọ to tintọ́n jei awhànfuntẹn bo to awhágbe awhàn tọn do.
21 Islaeli po Filistinu lẹ po sọ pannukọn ode awetọ nado pé awhàn hẹ yedelẹ.
22 To afọdopolọji, Davidi jo agbàn etọn do na mẹhe nọ penukundo agbàn go lọ bo họ̀nwezun yì awhànfuntẹn lọ. Whenue e jẹ finẹ, e jẹ lehe mẹdaho etọn lẹ te do kanbiọ ji.+
23 Dile e to hodọ hẹ yé, awhànfuntọ-gán lọ, Goliati,+ yèdọ Filistinu he wá sọn Gati lọ wá. Ewọ tọ́n wá sọn awhànpa Filistinu lẹ tọn mẹ bosọ dọ nudopolọ he e ko nọ dọ dai,+ bọ Davidi sọ sè.
24 To whenue sunnu Islaeli tọn lẹpo mọ dawe lọ hlan, yé doge-wezun mẹ, na obu wutu.+
25 Sunnu Islaeli tọn lẹ sọ to didọmọ: “Mì mọ dawe he ja ehe ya? Islaeli wẹ e nọ wá vlẹko.*+ Ahọlu na na adọkun daho sunnu depope he penugo nado hù i, bo nasọ na mẹlọ viyọnnu etọn titi,+ e nasọ de owhé otọ́ etọn tọn dovo to Islaeli.”
26 Davidi jẹ didọna sunnu he ṣite sẹpọ ẹ lẹ ji dọmọ: “Etẹwẹ na yin wiwà na sunnu he na hù Filistinu he to dọ́n lọ nado de vlẹko sẹ̀ sọn Islaeli ji? Na mẹnu wẹ Filistinu he ma gboadà ehe yin bo na nọ to awhànpa Jiwheyẹwhe ogbẹ̀nọ lọ tọn vlẹko?”*+
27 Gbẹtọ lọ lẹ sọ dọ nudopolọ na ẹn dọmọ: “Nuhe na yin wiwà na sunnu he na hù i lọ niyẹn.”
28 Whenue mẹdaho Davidi tọn Eliabi+ sè bọ e to hodọna sunnu lọ lẹ, e gblehomẹ do Davidi go bo dọmọ: “Etẹwutu a do jẹte wáfi? Podọ mẹnu wẹ a jo lẹngbọ vude lọ lẹ do na to danfafa ji?+ N’yọ́n sakla towe po linlẹn ylankan ahun towe mẹ tọn po ganji; na hiẹ nido pọ́n awhàn lọ wutu wẹ a do jẹte wá.”
29 Davidi gblọn dọmọ: “Etẹwẹ n’wà yindo din? Nukanbiọ janwẹ n’te poun sin!”
30 Enẹwutu, e lẹhlan mẹdevo bo kàn nudopolọ sè,+ gbẹtọ lọ lẹ sọ na ẹn gblọndo dopolọ.+
31 Gbẹtọ lẹ gblató nuhe Davidi dọ bosọ na linlin Sauli. Ewọ sọ dowẹn hlan ẹn.
32 Davidi sọ dọna Sauli dọmọ: “A dike ahun mẹdepope tọn gbàdo,* na ewọ tọn wutu blo. Devizọnwatọ towe na yì bo hoavùn hẹ Filistinu ehe.”+
33 Ṣigba, Sauli dọna Davidi dọmọ: “Hiẹ ma na penugo nado hoavùn hẹ Filistinu ehe gba, na yọpọ sunnu de poun wẹ hiẹ+ bọ ewọ ka ko yin awhànfuntọ* de sọn jọja whenu etọn.”
34 Whenẹnu, Davidi dọna Sauli dọmọ: “Lẹngbọhọtọ de wẹ devizọnwatọ towe yin na lẹngbọpa otọ́ etọn tọn, bọ kinnikinni de+ wá podọ beali de ga, dopodopo yetọn sọ wle lẹngbọ de sọn lẹngbọpa lọ mẹ.
35 Yẹn sọ dómọna ẹn bo linú in bosọ whlẹn lẹngbọ lọ sọn onù etọn mẹ. To whenue e fọ́n do ji e, n’wle ogbì* etọn hẹn bo linú in bosọ hù i.
36 Yẹn devizọnwatọ towe hù kinnikinni po beali lọ po, podọ Filistinu he ma gboadà ehe na lẹzun dopo taidi kanlin ehelẹ, na ewọ ko vlẹ* awhànpa Jiwheyẹwhe ogbẹ̀nọ lọ tọn kò wutu.”+
37 Enẹgodo, Davidi yidogọ dọmọ: “Jehovah he whlẹn mi sọn ofẹ̀n kinnikinni po beali lọ po tọn mẹ, ewọ wẹ nasọ whlẹn mi sọn alọ Filistinu ehe tọn mẹ.”+ Whenẹnu, Sauli dọna Davidi dọmọ: “Yì, na Jehovah ni tin hẹ we.”
38 Todin, Sauli yí awù etọn lẹ do na Davidi. E sọ yí ogangbakun gànvẹẹ tọn ṣinyọ́n na ẹn, enẹgodo e yí awù he yè lọ̀n di gbaja de do na ẹn.
39 Whenẹnu, Davidi blá ohí etọn do awù etọn lẹ ji bo tẹnpọn nado dedo ṣigba e ma gán yì, na nulọ lẹ ma ko má ẹn wutu. Davidi sọ dọna Sauli dọmọ: “N’ma gán do onú ehelẹ yì, na yé ma ko má mi wutu.” Enẹwutu, Davidi de yé dai.
40 Enẹgodo, e ze opò etọn do alọmẹ bo ṣinyan zannu he dídí atọ́n sọn otọ̀-zànmẹ* bo bẹ yé do aglò lẹngbọhọtọ tọn etọn mẹ, bọ akòtopẹ́+ etọn to alọ etọn mẹ. E sọ jẹ dindọnsẹpọ Filistinu lọ ji.
41 Filistinu lọ to sisẹpọ bo to dindọnsẹpọ Davidi janwẹ bọ awọ̀yinu hẹntọ etọn to nukọnna ẹn.
42 To whenue Filistinu lọ pọ́n nukọn hlan bo mọ Davidi, e yẹ́n-awọnlín do e bo vlẹ ẹ kò, na ewọ bia bosọ yin yọpọ sunnu whanpẹnọ de.+
43 Enẹwutu, Filistinu lọ dọna Davidi dọmọ: “Avún+ de wẹ n’ka yin bọ hiẹ do ja dè e po opò lẹ po ya?” Gbọnmọ dali, Filistinu lọ yí yẹwhe etọn titi lẹ do hodẹ̀do Davidi.
44 Filistinu lọ dọna Davidi dọmọ: “Saa wá dè e, yẹn nasọ yí olàn towe na ohẹ̀ agahomẹ tọn lẹ podọ na gbekanlin danji tọn lẹ.”
45 Davidi gblọnna Filistinu lọ dọmọ: “Hiẹ ja dè e po ohí po gọna owhán po dludlu+ de po, ṣigba yẹn ja dè we to oyín Jehovah awhànpa lẹ tọn+ mẹ, yèdọ Jiwheyẹwhe awhànpa Islaeli tọn, mẹhe hiẹ vlẹko.*+
46 Jehovah na jo we do alọ ṣie mẹ to egbé bọ yẹn na hù we+ bo na sán ota towe sẹ̀; podọ egbehe wẹ yẹn na yí oṣiọ mẹhe to osla Filistinu lẹ tọn mẹ lẹ tọn na ohẹ̀ agahomẹ tọn lẹ podọ na gbekanlin aigba ji tọn lẹ; mẹhe nọ nọ̀ aigba ji lẹpo nasọ yọnẹn dọ Jiwheyẹwhe de tin to Islaeli.+
47 Podọ mẹhe pli tofi lẹpo* na yọnẹn dọ Jehovah ma nọ whlẹnmẹ gbọn ohí po owhán po gblamẹ gba,+ na Jehovah tọn wẹ awhàn lọ,+ ewọ nasọ jo mìmẹpo do alọ mítọn mẹ.”+
48 Whenẹnu, Filistinu lọ fọ́n bo jẹ dindọnsẹpọ ji nado wá pé Davidi, ṣigba Davidi yawu họ̀nwezun dedo awhànfuntẹn lọ nado pé Filistinu lọ.
49 Davidi sọ yí alọ etọn do aglò etọn mẹ bo de zannu de tọ́n sọn e mẹ bosọ yí akòtopẹ́ do de e. E de e do ota Filistinu lọ tọn nukọn bọ zannu lọ biọ ota etọn nukọn bọ ewọ họ́jai bo sú nukunmẹ ai.+
50 Mọ wẹ Davidi yí akòtopẹ́ po zannu de po do duto Filistinu lọ ji do; Davidi hù Filistinu lọ mahopọnna dọ ewọ ma hẹn ohí to alọmẹ.+
51 Davidi sọ họ̀nwezun kaka bo yì ṣite to e ji. Enẹgodo, e hẹn ohí Filistinu lọ tọn+ go bo sún in sọn apà etọn mẹ bosọ sán ota etọn sẹ̀ nado hẹn ẹn diun dọ e kú. Whenue Filistinu lẹ mọdọ huhlọnnọ yetọn lọ ko kú, yé doge-wezun mẹ.+
52 Whenẹnu, sunnu Islaeli tọn lẹ po Juda tọn lẹ po fọ́n bo jẹ abobo do ji bosọ dómọna Filistinu lẹ sọn agbàdo lọ+ mẹ kaka yì họngbo Eklọni tọn lẹ kọ̀n,+ bọ oṣiọ Filistinu he yin hùhù lẹ tọn to kọmẹ to aliji sọn Ṣaalaimi+ kaka yì Gati po Eklọni po.
53 To whenue Islaelivi lẹ ko dómọna Filistinu lẹ klinkán-klinkán bo ko lẹkọwa godo, yé bẹ ogblànnu lẹ to osla yetọn lẹ mẹ.
54 Enẹgodo, Davidi ze ota Filistinu lọ tọn bo hẹn ẹn wá Jelusalẹm, ṣigba e bẹ awhànfunnu Filistinu lọ tọn lẹ do gòhọ etọn titi mẹ.+
55 To whenue Sauli mọdọ Davidi tọ́nyi nado pé Filistinu lọ, e dọna Abneli,+ ogán awhànpa lọ tọn dọmọ: “Abneli, visunnu mẹnu tọn wẹ yọpọ sunnu ehe?”+ Abneli gblọn dọmọ: “Dile e họnwun dọ hiẹ togbẹ̀,* ahọlu E, yẹn ma yọnẹn!”
56 Ahọlu lọ sọ dọmọ: “Dindona visunnu mẹhe tọn dẹpẹ lọ yin.”
57 Enẹwutu, tlolo he Davidi lẹkọwa sọn Filistinu lọ hùhù gbé, Abneli plan ẹn wá Sauli nukọn po ota Filistinu lọ tọn+ po to alọ etọn mẹ.
58 Todin, Sauli kanse e dọmọ: “Dẹpẹ, visunnu mẹnu tọn wẹ hiẹ yin?” bọ Davidi gblọnna ẹn dọmọ: “Visunnu devizọnwatọ towe Jẹsse+ Bẹtlẹhẹminu+ lọ tọn wẹ.”
Nudọnamẹ Odò Tọn
^ To paa mẹ, “osla.”
^ Kavi “diọnukunsọ.”
^ To paa mẹ, “hẹn anọ́sin.”
^ Kavi “diọnukunsọ.”
^ Kavi “diọnukunsọ.”
^ Kavi “dike mẹdepope hẹn adọgbigbo etọn bu.”
^ Kavi “sunnu awhàn tọn.”
^ Kavi “aglànká.”
^ Kavi “diọnukunsọ.”
^ Kavi “agbàdo mẹ.”
^ Kavi “diọnukunsọ.”
^ To paa mẹ, “agun ehe lẹpo.”
^ Kavi “Gbọn ogbẹ̀ alindọn towe tọn dali.”
