1 Ahọlu lẹ 5:1-18
5 Whenue Hilami ahọlu Tile+ tọn sè dọ Sọlomọni ko yin amisisayidode taidi ahọlu do otẹn otọ́ etọn tọn mẹ, e do devizọnwatọ etọn lẹ hlan Sọlomọni, na họntọn Davidi tọn wẹ Hilami ko yin dai.*+
2 Enẹwutu, Sọlomọni lọsu dowẹn hlan Hilami+ dọmọ:
3 “Hiẹ yọnẹn ganji dọ Davidi otọ́ ṣie ma penugo nado gbá ohọ̀ de na oyín Jehovah Jiwheyẹwhe etọn tọn, na awhàn he fọ́n do ewọ ji sọn awà lẹpo ji wutu, kakajẹ whenue Jehovah wá yí kẹntọ etọn lẹ do afọ etọn lẹ glọ.+
4 Ṣigba todin, Jehovah Jiwheyẹwhe ṣie ko na mi gbọjẹ to awà lẹpo ji.+ Mẹde ma tin he to nukundiọsọ mi, mọ nuylankan de masọ to jijọ.+
5 Enẹwutu, n’to linlẹn nado gbá ohọ̀ de na oyín Jehovah Jiwheyẹwhe ṣie tọn, kẹdẹdile Jehovah ko dopagbe etọn na Davidi otọ́ ṣie do dọmọ: ‘Visunnu towe he yẹn na zedo ofìn towe ji do otẹn towe mẹ, ewọ wẹ na gbá ohọ̀ lọ na oyín ṣie.’+
6 Todin, degbena omẹ towe lẹ nado gbò kedali Lẹbanọni tọn lẹ+ na mi. Devizọnwatọ ṣie lẹ na wazọ́n hẹ devizọnwatọ towe lẹ, yẹn nasọ suahọ devizọnwatọ towe lẹ sọgbe hẹ azọ́nkuẹ he hiẹ na dọ, na hiẹ lọsu yọnẹn dọ depope to mí mẹ ma yọ́n atin gbò sọ Sidoninu lẹ.”+
7 Whenue Hilami sè nuhe Sọlomọni dọ, homẹ etọn hùn taun bọ e dọmọ: “Na Jehovah ni yin pipà to egbé, na ewọ ko na visunnu nuyọnẹntọ de Davidi nado dugán do akọta daho* ehe ji!”+
8 Enẹwutu, Hilami dowẹn hlan Sọlomọni dọmọ: “N’ko sè owẹ̀n towe. Nuhe a jlo lẹpo wẹ n’na wà nado wleawuna owhlẹ kedali po junipeli+ po tọn lọ lẹ.
9 Devizọnwatọ ṣie lẹ na bẹ yé jẹte sọn Lẹbanọni jẹ huto, bọ n’na blá yé dopọ nado gbọn ohù ji jẹ fihe hiẹ dena mi. N’nasọ hẹn ẹn diun dọ yé yin túntún to finẹ, bọ hiẹ sọgan bẹ yé yì. To otẹn ehe tọn mẹ, hiẹ na wleawu núdùdù he yẹn biọ tọn na whédo ṣie.”+
10 Gbọnmọ dali, Hilami do owhlẹ kedali po junipeli po tọn he Sọlomọni jlo lẹpo hlan ẹn.
11 Sọlomọni lọsu sọ do likun ojlẹnu kọli* tọn 20 000 po amì olivie tọn akú ojlẹnu kọli tọn 20 po hlan Hilami taidi núdùdù na whédo etọn. Nuhe Sọlomọni nọ na Hilami to whemẹwhemẹ niyẹn.+
12 Jehovah sọ na nuyọnẹn Sọlomọni kẹdẹdile E ko dopagbe etọn na ẹn do.+ Jijọho sọ tin to Hilami po Sọlomọni po ṣẹnṣẹn, bọ yé omẹ awe lẹ basi gbekọndopọ* de.
13 Ahọlu Sọlomọni sọ de sunnu delẹ sọn Islaelivi lẹpo mẹ na azọ́n sinsinyẹn wiwà; sunnu 30 000 wẹ yin dide.+
14 Ewọ nọ do 10 000 to yé mẹ hlan Lẹbanọni to sunmẹsunmẹ to aliho mẹjijẹ-mẹjijẹ tọn mẹ. Yé nọ nọ̀ Lẹbanọni na osun dopo bo nọ nọ̀ owhé yetọn lẹ gbè na osun awe; Adonilami+ wẹ sọ yin nukọntọ na mẹhe yin dide na azọ́n sinsinyẹn wiwà lẹ.
15 Sọlomọni tindo pakanọ paa* 70 000 po zannu-pàtọ+ 80 000 po to osó lẹ ji,+
16 gọna nukunpedonugotọ+ Sọlomọni tọn 3 300 lẹ he nọ yinuwa di azọ́ngán nado deanana azọ́nwatọ lẹ.
17 Sọgbe hẹ gbedide ahọlu tọn, yé yì dín zannu dahodaho lẹ wá, yèdọ zannu họakuẹ lẹ+ nado yí zannu pipà lẹ+ do dó dodonu+ ohọ̀ lọ tọn.
18 Gbọnmọ dali, họ̀gbátọ Sọlomọni tọn lẹ gọna họ̀gbátọ Hilami tọn lẹ po Gebalinu+ lẹ po wazọ́n nado pà zannu lọ lẹ, yé sọ wleawu owhlẹ po zannu lẹ po tọn dai nado gbá ohọ̀ lọ.
Nudọnamẹ Odò Tọn
^ Kavi “na Hilami ko yiwanna Davidi dai.”
^ Kavi “he sù to sọha mẹ.”
^ Kavi “alẹnu.”
^ Kavi “agbàn hẹntọ.”
