1 Ahọlu lẹ 21:1-29
21 To onú ehelẹ godo, nujijọ de wá aimẹ gando vẹngle Naboti Jezleẹlinu lọ tọn go; Jezleẹli+ wẹ vẹngle lọ te sẹpọ họ̀nmẹ Ahabi ahọlu Samalia tọn.
2 Ahabi dọna Naboti dọmọ: “Jo vẹngle towe na mi, na yẹn nido yí i zan di jipa omá lẹ tọn, na e sẹpọ owhé ṣie gbè. Yẹn nasọ yí vẹngle devo he pọnte hú i na we do otẹn etọn mẹ. Kavi eyin a jlo, yẹn na yí akuẹ do suahọ etọn we.”
3 Ṣigba, Naboti dọna Ahabi dọmọ: “To pọndohlan Jehovah tọn mẹ, e ma sọgan wá linlẹn mẹ na mi gbede nado yí ogú tọgbo ṣie lẹ tọn na we.”+
4 Enẹwutu, Ahabi kúṣiọ bo lẹkọyi whé po flumẹjijẹ po, na gblọndo he Naboti Jezleẹlinu lọ na ẹn wutu dọ: “Yẹn ma na jo ogú tọgbo ṣie lẹ tọn na we.” E sọ mlọn adọzan etọn ji bo lẹ́ nukunmẹ pannukọn fidevo bosọ gbẹ́ núdùdù.
5 Jezebẹli+ asi etọn biọ họmẹ yì e dè bo kanse e dọmọ: “Naegbọn a* do blawu sọmọ bosọ gbẹ́ núdùdù?”
6 E gblọnna ẹn dọmọ: “Na n’dọna Naboti Jezleẹlinu lọ dọ, ‘Jo vẹngle towe na mi na yẹn ni suahọ we. Kavi eyin a jlo, dike ma yí vẹngle devo na we do otẹn etọn mẹ.’ Amọ́ ewọ dọ dọ, ‘Yẹn ma na jo vẹngle ṣie na we.’”
7 Jezebẹli asi etọn dọna ẹn dọmọ: “Be e ma yin hiẹ wẹ to gandu di ahọlu do Islaeli ji ya? Fọ́n bo dùnú bosọ gbọ ahun towe ni jaya. Yẹn na yí vẹngle Naboti Jezleẹlinu+ lọ tọn na we.”
8 Enẹwutu, ewọ kàn wekanhlanmẹ lẹ do oyín Ahabi tọn mẹ bo yí hiadonu+ ahọlu tọn do tlẹ́ yé bosọ do yé hlan mẹho lẹ+ po omẹ nukundeji lẹ po to tòdaho he mẹ Naboti nọ nọ̀.
9 Nuhe e kàn do wekanhlanmẹ lọ lẹ mẹ die: “Mì lá nùbibla de bo hẹn Naboti sinai to gbẹtọ lọ lẹ nukọn.
10 Mì sọ hẹn sunnu nuvọ́nọ awe nado sinai to nukọn etọn bo dekunnu sọta ẹ+ dọmọ, ‘Hiẹ ko zánnu do Jiwheyẹwhe po ahọlu po go!’+ Enẹgodo, mì plan ẹn jẹgbonu bo dlan zannu do e hù.”+
11 Sunnu tòdaho etọn tọn lẹ, mẹho lẹ po omẹ nukundeji he nọ nọ̀ tòdaho etọn mẹ lẹ po sọ basi kẹdẹdile e ko yin kinkan do wekanhlanmẹ he Jezebẹli ko dohlan yé lọ lẹ mẹ do.
12 Yé lá nùbibla de bo hẹn Naboti sinai to gbẹtọ lọ lẹ nukọn.
13 Sunnu awe sọn nuvọ́nọ lẹ mẹ sọ wá bo sinai to nukọn etọn bosọ jẹ kunnude sọta Naboti ji to gbẹtọ lọ lẹ nukọn dọmọ: “Naboti ko zánnu do Jiwheyẹwhe po ahọlu po go!”+ Yé sọ plan ẹn jẹ gbonu tòdaho lọ tọn bo dlan zannu do e hù.+
14 Yé sọ dowẹn hlan Jezebẹli dọmọ: “Naboti ko yin zannu dlan do hù.”+
15 Tlolo he Jezebẹli sè dọ Naboti ko yin zannu dlan do hù, e dọna Ahabi dọmọ: “Fọ́n, yí vẹngle Naboti Jezleẹlinu+ lọ tọn, ehe ewọ ko gbẹ́ dọ hiẹ ma na suahọ do yí, na Naboti masọ togbẹ̀ ba. E ko kú.”
16 Tlolo he Ahabi sè dọ Naboti ko kú, Ahabi fọ́n nado jẹte yì vẹngle Naboti Jezleẹlinu lọ tọn mẹ nado yí i.
17 Ṣigba, ohó Jehovah tọn wá Elija+ Tiṣbinu lọ dè dọmọ:
18 “Fọ́n bo jẹte yì pé Ahabi ahọlu Islaeli tọn he to Samalia.+ Ewọ to vẹngle Naboti tọn mẹ, e ko yì dọ́n nado yí i.
19 Hiẹ ni dọna ẹn dọ, ‘Nuhe Jehovah dọ die: “A hùmẹ+ bosọ to nutindo mẹlọ tọn yí wẹ ya?”’+ Enẹgodo, dọna ẹn dọ, ‘Nuhe Jehovah dọ die: “Fie avún lẹ didọ́ ohùn Naboti tọn te, finẹ wẹ avún lẹ na didọ́ ohùn hiẹ lọsu tọn te ga.”’”+
20 Ahabi dọna Elija dọmọ: “A dín mi mọ janwẹ, hiẹ kẹntọ ṣie E!”+ E sọ gblọn dọmọ: “N’dín we mọ. Nuhe Jiwheyẹwhe dọ die, ‘Na a magbe* nado wà nuhe ylan to nukun Jehovah tọn mẹ wutu,+
21 yẹn na hẹn nugbajẹmẹji wá ji we, yẹn nasọ zà we sẹ̀ mlẹnmlẹn bo na sukúndona sunnu* lẹpo sọn whédo Ahabi tọn mẹ,+ etlẹ yin agbátọnọ po madogánnọ lẹ po to Islaeli.+
22 Yẹn na hẹn whédo towe tin taidi whédo Jeloboami+ visunnu Nebati tọn podọ taidi whédo Baaṣa+ visunnu Ahija tọn, na hiẹ ko doadihomẹna mi bosọ hẹn Islaeli nado waylando.’
23 Humọ, na nuhe dù Jezebẹli, Jehovah ko dọmọ: ‘Avún lẹ wẹ na dù Jezebẹli to aigba he to Jezleẹli lọ ji.+
24 Omẹ Ahabi tọn depope he kú to tòdaho lọ mẹ, avún lẹ wẹ na dù i, podọ mẹdepope he kú to danji, ohẹ̀ agahomẹ tọn lẹ wẹ na dù i.+
25 Na nugbo tọn, mẹdepope ma ko magbe* nado wà nuhe ylan to nukun Jehovah tọn mẹ sọ Ahabi,+ bọ Jezebẹli+ asi etọn nọ to ṣọ̀ṣọ̀ do na ẹn.
26 E ko wà osùnú he ylan hugan gbọn boṣiọ he hiọawu* lẹ hihodo dali, kẹdẹdile Amolinu lẹpo ko wà do, mẹhe Jehovah ko yàn sẹ̀ sọn Islaelivi lẹ nukọn.’”+
27 Tlolo he Ahabi sè ohó ehelẹ, e tlẹ́n awù etọn lẹ bo ze odẹ́vọ̀ do; e sọ jẹ nùbla ji bo nọ mlọnai to odẹ́vọ̀ mẹ bosọ nọ to zọnlinzin po awubla po.
28 Ohó Jehovah tọn sọ wá Elija Tiṣbinu lọ dè dọmọ:
29 “A mọ lehe Ahabi ko whiwhẹ ede na yẹn tọn wutu do ya?+ Na ewọ ko whiwhẹ ede to nukọn ṣie wutu, yẹn ma na hẹn nugbajẹmẹji lọ wá to gbẹwhenu etọn. Whédo etọn ji wẹ yẹn na hẹn nugbajẹmẹji lọ wá to gbẹwhenu visunnu etọn tọn.”+
Nudọnamẹ Odò Tọn
^ To paa mẹ, “ayiha towe.”
^ To paa mẹ, “a ko sà dewe.”
^ To paa mẹ, “mẹdepope he nọ hú adọ́ do adó go.” Hogbe vlẹko tọn de to Heblugbe mẹ he nọ dlẹnalọdo sunnu.
^ To paa mẹ, “ma ko sà ede.”
^ Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
