NUKPINKPLƆN 38
Nɔ Nyɔ́ Kpinkpɛn Nunina Ogbɛ̀ Tɔn
Onǔ ɖagbeɖagbe susu lɛ wɛ mǐ sɔgǎn wà bosɔ ɖǔvivi yětɔn ná mǐ togbɛ̀ wutu. Etlɛ nyí to hwenue mǐ to kpíkpéxɛ́ nuxahun lɛ, mǐ gbɛ́ sɔgǎn nɔ ɖǔvivi nuɖélɛ tɔn to gbɛ̀mɛ. Nawɛ mǐ sɔgǎn dóxya ɖɔ mǐ nyɔ́ kpinkpɛn nunina ogbɛ̀ tɔn gbɔn? Kpóɖɔ hwɛhwinhwɛ́n titewungbe húgǎn tɛ́wɛ mǐ tindó nadó nɔ wàmɔ?
1. Naegbɔ̌n mǐ ɖóná nɔ nyɔ́ kpinkpɛn ogbɛ̀ tɔn?
Mǐ ɖóná nɔ nyɔ́ kpinkpɛn ogbɛ̀ tɔn ná nunina ɖé wɛ é nyí sɔ́n Otɔ́ owǎnyinɔ mǐtɔn Jehovah dè. Ewɔ wɛ “asisa ogbɛ̀ tɔn,” yèɖɔ mɛxe dá nutogbɛ̀ lɛkpó. (Salmu lɛ 36:9) “Ewɔ lɔsu wɛ nɔ ná gbɛtɔ́ lɛkpó ogbɛ̀, gbɔfufu kpó nulɛkpó kpó.” (Owalɔ lɛ 17:25, 28) Jehovah nɔ ná mǐ nǔxe sín hudó mǐ ɖó nadó to gbɛnɔ zɔnmii lɛ. Cigbǎ húgǎn mɔ, é sɔ́ wleawuna onǔ enɛlɛ to alixo voovo mɛ ná gbɛninɔ nidó nyí awuvivinu ná mǐ.—Xya Owalɔ lɛ 14:17.
2. Nawɛ mǐ gán dóxya Jehovah ɖɔ mǐ nɔ nyɔ́ kpinkpɛn ogbɛ̀ xe é ná mǐ tɔn gbɔn?
Sɔ́n hwenue gbɔ́n a gbɛ́ to adɔ̀ onɔ̀ towe tɔn mɛ wɛ Jehovah nɔ kpénukúndó gowe. To gbɔdó glɔ, Davidi xe nyí ɖokpó to sinsɛ̀n-basítɔ Jixwéyɛxwe tɔn lɛ mɛ ɖɔna ɛn ɖɔmɔ: “Nukún towe lɛ tlɛ mɔ mi to hwenue n’gbɛ́ kpò to adɔ̀mɛ.” (Salmu lɛ 139:16) Ogbɛ̀ towe xɔakwɛ́ tawun to nukún Jehovah tɔn mɛ. (Xya Matiu 10:29-31.) É nɔ vɛna Jehovah sísosíso enyí mɛɖékpókpé ɖesɔn ojlǒ mɛ bo hù mɛɖévo, kavǐ etlɛ nyí eɖetiti. a (Eksɔɖusí 20:13) Mɔɖokpólɔ, xomɛ Jehovah tɔn ma nɔ hùn kpaali, enyí mǐ zé ogbɛ̀ mǐtɔn dó owù mɛ to alixo xe ma nyí dandan tɔn ɖé mɛ, kavǐ gbɔn vɔdónanu dali gboawukpo nadó basí xixɔ́na ogbɛ̀ mɛɖévo lɛ tɔn. Hwenue mǐ ylɔ ogbɛ̀ mǐtɔn ɖɔ nǔjɔnǔ bosɔ nɔ ná sísí ogbɛ̀ mɛɖévo lɛ tɔn, mǐ nɔ dóxya ɖɔ mǐ nyɔ́ kpinkpɛn ogbɛ̀ xɔakwɛ́ xe nyí nina mǐ lɔ tɔn.
DINDONANǓ DÓGƆ́
Gbadokpɔ́nna alixo ɖélɛ xe mɛ a gán nɔ dóxya ɖɔ a nyɔ́ kpinkpɛn nunina ogbɛ̀ tɔn lɔ tɔn te.
3. Nɔ kpénukúndó agbasalilo towe go
Klistiani xe ko klan yeɖe dó wíwé lɛ nɔ yí adà gbɛzǎn yětɔn tɔn lɛkpó zán nadó sɛ̀n Jehovah. To linlɛn ɖé mɛ, mǐ nɔ yí agbasa mǐtɔn dó basí avɔ́sínsan ná Jixwéyɛxwe. Xya Lomunu lɛ 12:1, 2, enɛgodo ɖɔxodó kanbyɔ́ exelɛ jí:
-
Etɛ́wɛ ɖóná nɔ hwàn we nadó nɔ kpénukúndó agbasalilo towe go?
-
Alixo tɛlɛ mɛ wɛ a gán nɔ wàmɔ te?
4. Nɔ zé afɔɖiɖe xe jɛ lɛ ma nadó hɛn awugble kavǐ okú wá
Biblu ná mǐ tuli nadó nɔ dakpana nuyiwa ɖékpókpé xe ɖó owù. Xò VIDEO lɔ nadó mɔ nuɖélɛ xe a gán wà nadó basí xixɔ́na ogbɛ̀ towe kpó mɛɖévo lɛ tɔn kpó.
Xya Xóhwinhwɛ́n lɛ 22:3, enɛgodo ɖɔxodó lěxe hyɛ kpó mɛɖévo lɛ kpó sɔgǎn tíin to xixɔ́ glɔ ɖó jí . . .
-
to oxwé towe gbè.
-
to azɔ́nwatɛn towe.
-
to ayihun lanmɛyiya tɔn didà hwenu.
-
enyí a to mɔto mɛ kavǐ to kɛkɛ jí.
5. Nɔ yí nukún nǔjɔnǔ tɔn dó kpɔ́n ogbɛ̀ ovi xe kpò to adɔ̀mɛ ɖé tɔn
Davidi yí xogbe milomilo lɛ dó basí zɛɛmɛ lěxe Jehovah nɔ ná ayiɖonugo nǔjɔnǔ tɔn ogbɛ̀ ovi xe ma ko nyí jiji ɖé tɔn gɔna lěxe ovi-kɛ́n lɔ to hwinhwɛ́n to oxò onɔ̀ etɔn tɔn mɛ ɖó tɔn. Xya Salmu lɛ 139:13-17, enɛgodo ɖɔxodó kanbyɔ́ exe jí:
-
To nukún Jehovah tɔn mɛ, hwetɛnu wɛ ogbɛ̀ mɛɖé tɔn nɔ bɛ́jɛeji—to hwenue onɔ̀ etɔn mɔxò etɔn wɛ ya kavǐ to hwenue é nyí jiji godo?
Osɛ́n xe Jehovah ná akɔta Islaeli xóxóhwenu tɔn nɔ basí xixɔ́na onɔ̀ lɛ kpó ovi xe kpò to adɔ̀mɛ lɛ kpó. Xya Eksɔɖusí 21:22, 23, enɛgodo ɖɔxodó kanbyɔ́ exelɛ jí:
-
Sɔgbe xɛ́ wěfɔ exelɛ, nawɛ é nɔ cí ná Jehovah enyí to manywɛ mɛ mɛɖé hɛn okú wá ná ovi xe kpò to adɔ̀mɛ ɖé?
-
Etɛ́wɛ a lɛnɖɔ é ná nyí numɔtolanmɛ Jehovah tɔn, enyí mɛɖé nywɛ gàn-an bo wàmɔ? b
-
Etɛ́wɛ a lɛn gandó nukún xe Jixwéyɛxwe nɔ yí dó kpɔ́n hwɛxo exe go?
Etlɛ gán wá jɔ bɔ nyɔnu ɖé xe nɔ ná sísí ogbɛ̀ tawun ná mɔɖɔ xòɖiɖe wɛ nyí kpɔ́ngbɔ ɖokpó gee xe emi ɖó. Xya Izaya 41:10, enɛgodo ɖɔxodó kanbyɔ́ exelɛ jí:
-
Enyí yè to nyɔnu ɖé hɛn gánnugánnu nadó ɖexò, mɛnu dè wɛ é sɔgǎn mɔ alɔgɔ yí te? Naegbɔ̌n a dó ɖɔ mɔ?
MƐÐÉLƐ NƆ ÐƆ ÐƆ: “Nyɔnu xe ɖexò ma hùhwɛ ɖé, agbasa etɔn wɛ.”
-
Etɛ́wɛ hɛn we kudeji ɖɔ ogbɛ̀ onɔ̀ ɖé kpó ovi xe to xomɛ ná ɛn kpó tɔn xɔakwɛ́ to nukún Jehovah tɔn mɛ?
BLADÓKPƆ́
Biblu kplɔ́n mǐ nadó nɔ yiwǎnna ogbɛ̀ xe Jehovah ná mǐ, nɔ nyɔ́ kpinkpɛn etɔn bosɔ nɔ basí xixɔ́na ɛn. Mǐ ɖóná nɔ wàmɔ ná ogbɛ̀ mǐtɔn titi kpó mɛɖévo lɛ tɔn kpó.
Dogbakpɔ́n
-
Naegbɔ̌n ogbɛ̀ gbɛtɔvi tɔn dó xɔakwɛ́ to nukún Jehovah tɔn mɛ?
-
Nawɛ é nɔ cí ná Jehovah enyí mɛɖé ɖesɔn ojlǒ mɛ bo hù gbɛtɔvi hatɔ etɔn?
-
Naegbɔ̌n a mɔɖɔ a ɖóná nɔ dókpɛ́ ná ogbɛ̀ xe nyí nina we?
KPƆ́N NUÐƆNAMƐ ÐEVO LƐ
Alixo tɛ́ mɛ wɛ mǐ sɔgǎn nɔ dókpɛna Jehovah te ná ogbɛ̀ xe é ná mǐ?
Be Jixwéyɛxwe ná jona nyɔnu xe ko ɖexò kpɔ́n ɖé ya? Kpɔ́n gblɔndó kanbyɔ́ exe tɔn.
Kpɔ́n lěxe kpɔ́ndóhlan Jixwéyɛxwe tɔn nkɔ tintindó gandó ogbɛ̀ go ɖóná gɔ́alɔna mǐ nadó nɔ ɖe ayiɖeɖayǐ mǐtɔn lɛ ɖó.
Etɛ́wɛ mɛɖé sɔgǎn wà enyí é nɔ lɛn nadó hù eɖe? Gbadokpɔ́nna lěxe Biblu gán gɔ́alɔna ɛn ɖó.
“N’Jlo Ná Kú—Be Biblu Gán Gɔ́alɔna Mi Enyí N’Nɔ Lɛn Nadó Hù Ðee Ya?” (Xósɔ́ Intɛnɛt jí tɔn)
a Jehovah nɔ tindó awuvɛmɛ sísosíso ná mɛxe ahun yětɔn jɛflumɛ lɛ. (Salmu lɛ 34:18) É nɔ mɔnukúnnujɛemɛ ɖɔ awufiɛsà sínsínnyɛ gán zɔ́n bɔ mɛɖé ná lɛn nadó hù eɖe, kpóɖɔ é jlo ná gɔ́alɔna omɛ mɔnkɔ lɛ. Nadó mɔ lěxe ewɔ nɔ gɔalɔnamɛ nadó ɖuto ojlǒ nylakan mɔnkɔ lɛ jí ɖó, xya xósɔ́ lɔ “N’Jlo Ná Kú—Be Biblu Gán Gɔ́alɔna Mi Enyí N’Nɔ Lɛn Nadó Hù Ðee Ya?,” xe nyí síslɛ to adà lɔ Kpɔ́n Nuɖɔnamɛ Ðevo Lɛ glɔ to nukpínkplɔ́n exe mɛ.
b Mɛxe ko ɖexò kpɔ́n lɛ ma ɖóná nɔ to hwɛgbledó yeɖe zɛjlɛgo, ná Jehovah sɔgǎn jona yé. Nadó mɔ nuɖɔnamɛ susu dógɔ́, kpɔ́n xósɔ́ lɔ “Etɛ́wɛ Biblu Ðɔ Gandó Xòɖiɖe Go?” to adà lɔ Kpɔ́n Nuɖɔnamɛ Ðevo Lɛ glɔ to nukpínkplɔ́n exe mɛ.
