Be mɛvivɛ towe ɖé ko kú jo we dó kpɔ́n ya? To ninɔmɛ awufiɛsà tɔn mɔnkɔ mɛ, a gán kanse ɖewe ɖɔ: ‘Etɛ́wɛ nɔ jɔ dó mɛɖé go enyí é kú? Be mǐ gán ɖonukún ɖɔ mǐ ná vɔ́ mɛyiwǎnna mǐtɔn xe kú lɛ mɔ ya?’ Gbɔ mǐ ni kpɔ́n gblɔndó xomɛmiɔnnamɛ tɔn xe Biblu ná ná kanbyɔ́ enɛlɛ, to nukpínkplɔ́n exe kpó ɖexe bɔdego kpó mɛ.

1. Etɛ́wɛ nɔ jɔ dó mɛɖé go enyí é kú?

Jesu yí okú jlɛdó amlɔn yìkànmɛ ɖé go. Alixo tɛ́ mɛ wɛ okú nyí nuɖokpólɔ xɛ́ amlɔndidɔ te? Mɛxe damlɔn yìkànmɛ ma nɔ nyɔ́ nǔxe to jijɔ lɛdó é lɛ ɖékpókpé. Mɔɖokpólɔ, to hwenue mɛɖé ko kú, é masɔ nɔ mɔ awufiɛsà ɖékpókpé ba. Maxokpɔ́nna ɖékpókpé xe é tlɛ yiwǎnna xɔ́ntɔn kpó hɛnnumɛ etɔn lɛ kpó sɔ́, é ma gán ɖó numɔtolanmɛ lɔ ɖɔ emi to emiɖe co. Biblu ɖɔ ɖɔ, “ocyɔ lɛ ma nyɔ́ nuɖékpókpé.”—Xya Yɛxwexoɖɔtɔ 9:5.

2. Nawɛ nǔgbó lɔ nyinywɛ gandó okú go nɔ hɛn ale wá ná mǐ gbɔn?

Mɛsusu wɛ nɔ ɖibuna okú—kpóɖɔ etlɛ nyí ná ocyɔ lɛ! Amɔ́, nǔxe Biblu ɖɔ gandó okú go sɔgǎn miɔnxomɛna we. Jesu ɖɔmɔ: “Nǔgbó lɔ [ná] hɛn mì jɛ mɛɖékannu.” (Joxanu 8:32) To vogbingbɔn mɛ ná nǔxe sinsɛ̀n ɖélɛ nɔ to ɖiɖɔ, Biblu ma kplɔ́nmɛ ɖɔ gbɛtɔ́ ɖó alindɔn jɔmaku ɖé xe nɔ to gbɛnɔ zɔnmii to hwenue mɛɖé ko kú godo. Exe dóxya ɖɔ, mɛxe kú ma nɔ to yaji to fiɖe. Humɔ, ná ocyɔ lɛ ma nɔ nyɔ́ nuɖékpókpé wutu, yé ma sɔgǎn wadanu ɖé dó mǐ go. Enɛwutu, é ma byɔ́ ɖɔ yè ni nɔ sanvɔ́ nadó miɔnxomɛna ocyɔ lɛ kavǐ basí sinsɛ̀n hlán yé, mɔɖokpólɔ é ma byɔ́ ɖɔ mǐ ni nɔ xoɖɛ̀ ná ocyɔ lɛ.

Mɛɖélɛ nɔ ɖɔ ɖɔ emi sɔgǎn ɖɔxodókpɔ́ xɛ́ ocyɔ lɛ. Amɔ́, enɛ ma gán jɔ gbeɖe. Ðilě mǐ cɛcɛ kplɔ́n ɖó, ocyɔ lɛ “ma nyɔ́ nuɖékpókpé.” Nadó ɖɔ xójɔxó, mɛxe nɔ lɛnɖɔ emi nɔ ɖɔxodókpɔ́ xɛ́ ocyɔ lɛ, ma to xoɖɔ xɛ́ mɛvivɛ yětɔn xe ko kú lɛ nǔgbónǔgbó gba, amɔ́ xɛ́ aovi lɛ xe nɔ sɔawuxya ɖi mɛxe ko kú lɔ lɛ pɛpɛ. Enɛwutu, nǔgbó lɔ nyinywɛ gandó okú go nɔ zɔ́n bɔ mǐ ma nɔ jayǐ jɛ omɔ̀ aovi lɛ tɔn mɛ. Jehovah ná mǐ avase ɖɔ mǐ ni ma nɔ tɛnkpɔ́n nadó ɖɔxodókpɔ́ xɛ́ ocyɔ lɛ blo, ná é nywɛ ɖɔ nuwadókpɔ́ xɛ́ aovi lɛ to alixo exe mɛ ná hɛn kɔɖetɔn vɛaɖi lɛ wá mǐ jí.—Xya Deutelonomi 18:10-12.

3. Gbadokpɔ́nna nǔgbó lɔ gandó ninɔmɛ ocyɔ lɛ tɔn go

Lɛdó ayihɔ́n kpé, onǔ voovo wɛ mɛlɛ yise gandó nǔxe nɔ wà gbɛtɔ́ to okú godo go. Nadó ɖɔ xójɔxó, nuyise enɛ lɛkpó ma gán nyí nǔgbó.

• To lɛdó towe mɛ, ninɔmɛ tɛ́ mɛ wɛ mɛsusu nɔ ɖɔ ɖɔ ocyɔ lɛ tíin te?

 4. Ale xe nǔgbó lɔ nyinywɛ gandó okú go nɔ hɛnwa ná mǐ

Enyí yè nyɔ́ nǔgbó lɔ gandó okú go, yè ma nɔ to síjɔsíjɔ jí ná ocyɔ lɛ. Xya Yɛxwexoɖɔtɔ 9:10, enɛgodo ɖɔxodó kanbyɔ́ xe bɔdego jí:

• Be ocyɔ lɛ sɔgǎn wadanu dó mǐ go wɛ ya?

Nǔgbó Biblu tɔn sɔ́ nɔ basí xixɔ́na mǐ, ma nadó nyí yɛɖoklɔ ɖɔ mǐ ɖóná nɔ sanvɔ́ nadó miɔnxomɛna ocyɔ lɛ kavǐ tlɛ basí sinsɛ̀n hlán yé. Xya Izaya 8:19 kpó Osɔ́xya 4:11 kpó, enɛgodo ɖɔxodó kanbyɔ́ exe jí:

• Nukún tɛ́wɛ a lɛnɖɔ Jehovah nɔ yí dó kpɔ́n mɛxe nɔ basí sinsɛ̀n hlán ocyɔ lɛ kavǐ nɔ byɔ́ alɔgɔ mɛkúkú ɖé tɔn lɛ?

5. Nǔgbó lɔ nyinywɛ gandó okú go nɔ miɔnxomɛna mǐ

Yè ko kplɔ́n mɛsusu ɖɔ enyí yé kú, yé ná wá jiya nǔxe yé ciwà wayi lɛ tɔn. Amɔ́, é miɔnxomɛna mǐ nadó nywɛ ɖɔ mɛɖékpókpé ma nɔ jiya enyí é ko kú godo—kakajɛ mɛxe ko wà nǔxe nyla tawun lɛ jí. Xya Lomunu lɛ 6:7, enɛgodo ɖɔxodó kanbyɔ́ exe jí:

• Ðilě mǐ xya ɖó todin sɔ́n Biblu mɛ, enyí okú nɔ suhwɛna mɛɖé kavǐ tún in dote sɔ́n nyladó etɔn lɛ mɛ, be a lɛnɖɔ mɛxe kú ɖé sɔgǎn gbɛ́ to yaji ná nyladó xe é ko wà wayi lɛ wutu ya?

Lěxe mǐ to kpínkplɔ́n nadó nyɔ́ Jehovah ganji sɔ́, mɔ wɛ é ná hɔnwun ná mǐ dógɔ́ ɖó ninyɛ ɖɔ ewɔ ma ná ɖike gbeɖe mɛxe ko kú lɛ nisɔ wá nyí yasana. Xya Deutelonomi 32:4 gɔna 1 Joxanu 4:8, enɛgodo ɖɔxodó kanbyɔ́ exelɛ jí:

• Be a lɛnɖɔ Jixwéyɛxwe xe tindó jɛxɛ́nu voovo xe go wěfɔ exelɛ dónú lɛ, ná ɖike bo sayana mɛxe ko kú lɛ ya?

• Be nǔgbó xe a nywɛ todin gandó okú go miɔnxomɛna we ya? Etɛ́wutu?

 BLADÓKPƆ́

Enyí mɛɖé kú, ogbɛ̀ etɔn nɔ ɖoalɔte wɛ. Ocyɔ lɛ ma sɔgǎn jiya, mɔɖokpólɔ yé ma gán wadanu dó mɛxe togbɛ̀ lɛ go.

Dogbakpɔ́n

• Etɛ́wɛ nɔ jɔ dó mɛɖé go enyí é kú?

• Ale tɛ́wɛ nǔgbó lɔ nyinywɛ gandó okú go nɔ hɛnwa ná mǐ?

• Nawɛ nǔgbó lɔ nyinywɛ gandó okú go nɔ miɔnxomɛna mǐ gbɔn?