NUKPINKPLƆN 19
Be Kunnuɖetɔ́ Jehovah Tɔn lɛ Nyí Klistiani Nǔgbó lɛ Ya?
Mǐwu Kunnuɖetɔ́ Jehovah tɔn lɛ yise ɖɔ Klistiani nǔgbó lɛ wɛ mǐ nyí. Etɛ́wutu? Kpɔ́n dǒdónu xe jí nuyise mǐtɔn lɛ sínai dó, nyǐkɔ mǐtɔn xe hɛn mǐ gbɔnvo, gɔna owǎnyi xe mǐ tindó ná oɖe awetɔ.
1. Dǒdónu tɛ́ jí wɛ nuyise Kunnuɖetɔ́ Jehovah tɔn lɛ tɔn sínai dó?
Jesu ɖɔmɔ: “Oxó [Jixwéyɛxwe tɔn] wɛ nǔgbó.” (Joxanu 17:17) Tayiɖi Jesu, Kunnuɖetɔ́ Jehovah tɔn lɛ nɔ zé nuyise yětɔn lɛ sínai dó Oxó Jixwéyɛxwe tɔn jí to hwekpókpónu. Lɛnnukpɔ́ndó hwenuxó mǐtɔn egbezangbe tɔn jí. To nǔɖi oxwe 1870, kpíkpli Biblu Kplɔ́ntɔ lɛ tɔn ɖé yí sɔxwixwe dó jɛ dogbakpɔ́nna Biblu jí. Yé nɔ zé nuyise yětɔn lɛ sínai dó nǔxe Biblu ɖɔ lɛ jí, ɖilě etlɛ nyíɖɔ nuyise enɛlɛ gbɔnvona nukplɔ́nmɛ sinsɛ̀n ɖevo lɛ tɔn. Enɛgodo, yé jɛ nǔgbó Biblu tɔn xe yé kplɔ́n lɛ má xɛ́ mɛɖévo lɛ jí. a
2. Naegbɔ̌n mǐ dó nɔ ylɔ mǐɖe ɖɔ Kunnuɖetɔ́ Jehovah tɔn lɛ?
Jehovah nɔ ylɔ sinsɛ̀n-basítɔ etɔn lɛ ɖɔ kunnuɖetɔ́ etɔn lɛ, ná yé nɔ ɖɔ nǔgbó gandó ewɔ go wutu. (Xeblu lɛ 11:4–12:1) Ði akpajlɛ̌, Jixwéyɛxwe ɖɔna omɛ etɔn lɛ to xóxóhwenu ɖɔ: “Mìwlɛ wɛ kunnuɖetɔ́ cie lɛ.” (Xya Izaya 43:10.) Jesu nyí yiylɔ́ɖɔ “Kunnuɖetɔ́ Nǔgbónɔ lɔ.” (Osɔ́xya 1:5) Enɛwutu, to 1931 mǐ kɛalɔyi nyǐkɔ lɔ Kunnuɖetɔ́ Jehovah tɔn lɛ. É nɔ vivi ná mǐ tawun nadó tindó onyǐ enɛ to ota.
3. Nawɛ Kunnuɖetɔ́ Jehovah tɔn lɛ nɔ dó owǎnyi xya tayiɖi Jesu gbɔn?
Jesu yiwǎnna devi etɔn lɛ sɔmɔ bɔ yé tayiɖi hwɛndo etɔn. (Xya Malku 3:35.) Mɔɖokpólɔ, Kunnuɖetɔ́ Jehovah tɔn lɛ nyí hwɛndo xe to kɔndókpɔ́ mɛ lɛdó ayihɔ́n kpé ɖé. Enɛ wɛ zɔ́n bɔ mǐ nɔ ylɔ oɖe awetɔ mǐtɔn ɖɔ mɛmɛsunnu kpó mɛmɛnyɔnu kpó. (Filemɔni 1, 2) Mǐ sɔ́ nɔ setonuna gbeɖiɖe lɔ xe ɖɔmɔ: “Mì tindó owǎnyi ná kpíkpli mɛmɛsunnu lɛ tɔn kpéte.” (1 Pita 2:17) Kunnuɖetɔ́ Jehovah tɔn lɛ nɔ dó owǎnyi enɛ xya to alixo susu mɛ, tayiɖi alɔgigɔna yisenɔ hatɔ mǐtɔn lɛ lɛdó ayihɔ́n kpé to ojlɛ̌ nuhudó tɔn lɛ mɛ.
DINDONANǓ DÓGƆ́
Yí sɔxwixwe dó gbadokpɔ́nna hwenuxó Kunnudetɔ́ Jehovah tɔn lɛ tɔn, bo kpɔ́n kunnuɖenu ɖevo lɛ he dóxya ɖɔ Klistiani nǔgbó lɛ wɛ mǐ nyí.
Klistiani nǔgbó lɛ nɔ zé nuyise yětɔn lɛ sínai dó Biblu jí bo nɔ má yé xɛ́ mɛɖévo lɛ
4. Biblu jí wɛ mǐ nɔ zé nuyise mǐtɔn lɛ sínai dó
Jehovah ko ɖɔ jɛnukɔn ɖɔ nǔgbó Biblu tɔn lɛ ná wá hɔnwun dógɔ́ to nukɔn mɛ. Xya Daniɛlì 12:4, kpó nuɖɔnamɛ odò tɔn kpó, enɛgodo ɖɔxodó kanbyɔ́ exe jí:
-
Etɛ́wɛ ná “lɛzun susugégé” to omɛ Jixwéyɛxwe tɔn lɛ cɛncɛn ɖilě yé ná zindónukɔn nadó to dogbakpɔ́nna Biblu kpó sɔxwixwe kpó?
Kpɔ́n lěxe kpíkpli Biblu kplɔ́ntɔ lɛ tɔn ɖé, xe mɛ Charles Russell tíin te gbadokpɔ́nna Oxó Jixwéyɛxwe tɔn ɖó. Xò VIDEO lɔ, enɛgodo ɖɔxodó kanbyɔ́ xe bɔdego jí.
-
To video lɔ mɛ, nawɛ Charles Russell kpó Biblu Kplɔ́ntɔ hatɔ etɔn lɛ kpó nɔ kplɔ́n Biblu gbɔn?
Be a nywɛ ya?
To ojlɛ̌ ɖélɛ mɛ, mǐ ko vɔ́ ɖélɛ to nuyise mǐtɔn lɛ mɛ jlaɖo. Etɛ́wutu? Kɛɖɛɖile nǔxe to ayigba jí lɛ nɔ to wunhɔ́n vuɖevuɖe ɖilě ohwè to zizɛ ɖó, mɔ wɛ Jixwéyɛxwe nɔ gɔ́alɔna mǐ nadó to nukúnnumɔjɛ Oxó etɔn mɛ vuɖevuɖe ɖó ninyɛ. (Xya Xóhwinhwɛ́n lɛ 4:18.) Enɛwutu, ɖilě etlɛ nyíɖɔ Biblu ma nɔ ɖyɔ́, mǐ nɔ ɖyɔ́ nuyise mǐtɔn ɖilě nukúnnumɔjɛnumɛ xe mǐ tindó gandó Biblu go to wunhɔ́n dógɔ́ ɖó.
5. Mǐ nɔ yinuwa sɔgbe xɛ́ nyǐkɔ xe mǐ tindó to ota
Naegbɔ̌n mǐ dó kɛalɔyi nyǐkɔ lɔ Kunnuɖetɔ́ Jehovah tɔn lɛ? Xò VIDEO lɔ, enɛgodo ɖɔxodó kanbyɔ́ xe bɔdego jí.
-
Naegbɔ̌n nyǐkɔ lɔ Kunnuɖetɔ́ Jehovah tɔn lɛ dó jɛna mǐ?
Naegbɔ̌n Jehovah dó ɖe mɛɖélɛ nadó nyí kunnuɖetɔ́ etɔn lɛ? É wàmɔ, ná omɛ enɛlɛ nidó nɔ dó ewɔ xya tayiɖi Jixwéyɛxwe nǔgbó lɔ, ná lalo susu wɛ ko nyí ɖiɖó dókɔna ɛn wutu. Kpɔ́n awe kpoun to lalo enɛlɛ mɛ.
Sinsɛ̀n ɖélɛ nɔ kplɔ́n sinsɛ̀nvi yětɔn lɛ ɖɔ Jixwéyɛxwe jlo ɖɔ yé ni nɔ yí yɛɖiɖe lɛ zán to sinsɛ̀n-bibasí yětɔn mɛ. Be nǔgbó wɛ enɛ ya? Xya Levitiku 26:1, enɛgodo ɖɔxodó kanbyɔ́ exelɛ jí:
-
Etɛ́wɛ nyí nǔgbó lɔ? Numɔtolanmɛ tɛ́wɛ Jehovah nɔ tindó gandó bocyɔ lɛ go?
Sinsɛ̀ngán ɖélɛ nɔ kplɔ́nmɛ ɖɔ Jesu wɛ nyí Jixwéyɛxwe. Be nǔgbó wɛ enɛ ya? Xya Joxanu 20:17, enɛgodo ɖɔxodó kanbyɔ́ exelɛ jí:
-
Etɛ́wɛ nyí nǔgbó lɔ? Be Jixwéyɛxwe kpó Jesu kpó nyí omɛ ɖokpólɔ́ lɛ wɛ ya?
-
Numɔtolanmɛ tɛ́wɛ a tindó todin xe a ko wá nywɛ ɖɔ Jehovah dó Kunnuɖetɔ́ etɔn lɛ hlán nadó lá nǔgbó gandó ewɔ kpó Vǐsúnnu etɔn kpó go?
6. Mǐ nɔ yiwǎnna oɖe awetɔ
Biblu ɖɔ ɖɔ Klistiani lɛ ɖóná nɔ nɔkpɔ́ kɛɖɛɖile awutugonu mǐtɔn lɛ nɔ nɔkpɔ́ ɖó. Xya 1 Kɔlintinu lɛ 12:25, 26, enɛgodo ɖɔxodó kanbyɔ́ exelɛ jí:
-
Nawɛ Klistiani nǔgbó lɛ ɖóná nɔ yinuwa gbɔn to hwenue Klistiani ɖevo lɛ to yaji?
-
Etɛ go wɛ a ɖoayi gandó owǎnyi xe tíin to omɛ Jehovah tɔn lɛ cɛncɛn go?
Enyí Kunnuɖetɔ́ Jehovah tɔn lɛ to yaji to awà ayigba tɔn ɖé jí, Kunnuɖetɔ́ hatɔ lɛ lɛdó ayihɔ́n kpé wɛ nɔ wá alɔgɔ ná yé to afɔɖokpólɔji. Nadó mɔ akpajlɛ̌ ɖokpó, xò VIDEO lɔ. Enɛgodo ɖɔxodó kanbyɔ́ xe bɔdego jí.
-
Nawɛ alɔgɔ kɔgbɔ tɔn Kunnuɖetɔ́ Jehovah tɔn lɛ tɔn dó owǎnyi xe yé tindó ná oɖe awetɔ xya gbɔn?
Klistiani nǔgbó lɛ nɔ dó owǎnyi xya mɛxe to nuhudó mɛ lɛ
MƐÐÉLƐ NƆ ÐƆ ÐƆ: “Sinsɛ̀n yɔ́yɔ́ ɖé kpoun wɛ Kunnuɖetɔ́ Jehovah tɔn lɛ nyí.”
-
Hwetɛnu gbɔ́n wɛ Jehovah ko nɔ ylɔ sinsɛ̀n-basítɔ etɔn lɛ ɖɔ kunnuɖetɔ́ lɛ?
BLADÓKPƆ́
Klistiani nǔgbó lɛ wɛ Kunnuɖetɔ́ Jehovah tɔn lɛ nyí. Hwɛndo mɛmɛsunnu kpó mɛmɛnyɔnu kpó tɔn ɖé wɛ mǐ nyí lɛdó ayihɔ́n kpé, bo nɔ zé nuyise mǐtɔn lɛ sínai dó Biblu jí, kpóɖɔ mǐ nɔ lá nǔgbó lɔ gandó Jehovah go.
Dogbakpɔ́n
-
Naegbɔ̌n mǐ dó kɛalɔyi nyǐkɔ lɔ Kunnuɖetɔ́ Jehovah tɔn lɛ?
-
Nawɛ mǐ nɔ yinuwa xɛ́ oɖe awetɔ gbɔn?
-
Naegbɔ̌n a dó lɛnɖɔ Kunnuɖetɔ́ Jehovah tɔn lɛ nyí Klistiani nǔgbó lɛ?
KPƆ́N NUÐƆNAMƐ ÐEVO LƐ
Gbadokpɔ́nna hwenuxó mǐtɔn yinukɔn dógɔ́.
Kunnuɖetɔ́ Jehovah Tɔn Lɛ—Azɔ̌n Yise Tɔn Lɛ, Akpá 1: Tintɔ́n sɔ́n Zinvlu Mɛ (1:00:53)
Kpɔ́n akpajlɛ̌ ɖé nadó mɔ lěxe Kunnuɖetɔ́ Jehovah tɔn lɛ ko ɖe nukplɔ́nmɛ lalo lɛ gbà ɖó.
Dǐn gblɔndó ná kanbyɔ́ ɖélɛ xe a sɔgǎn kanse gandó Kunnuɖetɔ́ Jehovah tɔn lɛ go.
“Kanbyɔ́ Xe Mɛsusu Nɔ Kanse Gandó Kunnuɖetɔ́ Jehovah Tɔn lɛ Go Lɛ” (Adà Intɛnɛt jí tɔn)
Stephen ɖoalɔ to sɛ́nhɛngba susu mɛ, ná é nɔ cinnya akɔ̀ wutu. Kpɔ́n nǔxe é mɔ to Kunnuɖetɔ́ Jehovah tɔn lɛ dè, exe gɔ́alɔna ɛn nadó ɖyɔ́.
“Gbɛzǎn Cie Fɔ́n bo to Nyinyla Deji” (Atɔ̀xɔ̀-Nuxixɔ́ lɔ Tɔn, juillet-septembre 2015 tɔn)
a Linlinwe tangan mǐtɔn, Atɔ̀xɔ̀-Nuxixɔ́ lɔ Tɔn, xe ko to nyínyí zinzinjɛgbonu sɔ́n 1879 gbɔ́n nɔ kplɔ́nmɛ nǔgbó Biblu tɔn lɛ kpó gbesisɔ kpó.
