NUKPINKPLƆN 06
Nawɛ Ogbɛ̀ Bɛjɛeji Gbɔn?
‘Jixwéyɛxwe dè wɛ asisa ogbɛ̀ tɔn te.’ (Salmu lɛ 36:9) Be a yí enɛ sè ya? Mɛɖélɛ nɔ ɖɔ ɖɔ mɛɖé ma dá ogbɛ̀ lɔ, ɖɔ nulɛ wá aimɛ ná yeɖe kpoun wɛ. Enyí enɛ nyí nǔgbó, be mǐ wá ogbɛ̀ gbɔn kosɔ dali ninyɛ. Amɔ́, enyí Jehovah Jixwéyɛxwe lɔsu wɛ dá ogbɛ̀ lɔ, be ogbɛ̀ ná ko tindó lɛnɖayǐ ɖé, kavǐ é ma nyí mɔ wɛ ya? a Gbɔ mǐ ni gbadokpɔ́nna nǔxe Biblu ɖɔ gandó lěxe ogbɛ̀ bɛ́jɛeji ɖó go kpó nuxewutu é dó sɔgbe kpó.
1. Nawɛ wɛkɛ lɔ wá aimɛ gbɔn?
Biblu ɖɔ ɖɔ: “To bɛ́jɛeji Jixwéyɛxwe dá olɔn lɛ kpó ayigba kpó.” (Jenɛsísí 1:1) Suhúgǎn lɛnunnunywɛtɔ lɛ tɔn wɛ kɛalɔyi ɖɔ wɛkɛ lɔ ɖó bɛ́jɛeji. Amɔ́, nawɛ Jixwéyɛxwe dá ɛ gbɔn? Ewɔ yí “xúhlɔn-yidó-wazɔ́n” etɔn, yèɖɔ gbigbɔ wíwé zán nadó dá nǔxe tíin to wɛkɛ lɔ mɛ lɛkpó, exe bɛ́ bɛ́kplidókpɔ́ sunhwlɛvu lɛ tɔn, sunhwlɛvu lɛ kpó planɛti lɛ kpó hɛn.—Jenɛsísí 1:2.
2. Naegbɔ̌n Jixwéyɛxwe dó dá ayigba?
Jehovah “ma dá [ayigba] to ovɔ́ mɛ, cigbǎ [É] dá ɛ ná yè nidó nɔ nɔ̀ é jí.” (Izaya 45:18) Ewɔ dá planɛti mǐtɔn, ná mǐ nidó vò to é jí kakadói. (Xya Izaya 40:28; 42:5.) Lɛnunnunywɛ dóxya ɖɔ ayigba gbɔnvona planɛti ɖevo ɖékpókpé. Planɛti exe kɛ́ɖɛ́ jí wɛ gbɛtɔ́vi lɛ gán nɔgbɛ̀ te.
3. Etɛ́wɛ gbɛtɔ́vi lɛ yí dó gbɔnvona kanlin lɛ?
Hwenue Jehovah ko dá ayigba godo, é dá nutogbɛ̀ lɛ dó é jí. Atín kpó kanlin lɛ kpó wɛ é dá deji jɛnukɔn. Enɛgodo, “Jixwéyɛxwe sɔ́ dá gbɛtɔ́ to akpajlɛ̌ etɔn mɛ.” (Xya Jenɛsísí 1:27.) Etɛ́wɛ gbɛtɔ́vi lɛ yí dó gbɔnvo? Ná mǐ nyí didá to akpajlɛ̌ Jixwéyɛxwe tɔn mɛ wutu, mǐ gán nɔ dó jɛxɛ́nu etɔn lɛ xya, tayiɖi owǎnyi kpó hwɛdida dódó kpó. Humɔ, é sɔ́ dá mǐ kpó nugokpíkpé lɔ kpó nadó nɔ kplɔ́n ogbè ɖevo lɛ, nyɔ́ kpinkpɛn anazɔ́n lɛ tɔn bosɔ ɖǔvivi nuxixo tɔn. Gbɔnvona kanlin lɛ, mǐ gán basí sinsɛ̀n hlán Mɛdatɔ mǐtɔn.
DINDONANǓ DÓGƆ́
Gbɔ mǐ ni gbadokpɔ́nna kunnuɖenu ɖélɛ xe dóxya ɖɔ ogbɛ̀ nyí didá, gɔna kanɖayǐ Biblu tɔn ɖélɛ xe dóxya ɖɔ nǔgbó wɛ. Kpɔ́n nǔxe jɛxɛ́nu xe gbɛtɔ́vi lɛ nɔ dóxya kplɔ́n mǐ gandó Jixwéyɛxwe go.
4. Ogbɛ̀ nyí didá
Gbɛtɔ́ lɛ nɔ mɔ kpikpà susu yí ná nǔxe yé kpɔ́n nudida lɛ dó basí lɛ. Enɛwutu, mɛnu wɛ ɖóná mɔ kpikpà nǔxe go yé kpɔ́n dó dó basí nuɖevo enɛlɛ tɔn yí? Xò VIDEO lɔ, enɛgodo ɖɔxodó kanbyɔ́ exe jí.
-
Etɛ́wɛ dodinnanutɔ lɛ kplɔ́n sɔ́n nudida lɛ dè nadó basí nuɖevo lɛ?
Oxɔ̀ lɛkpó wɛ nɔ nyí gbigbá gbɔn mɛɖé dali. Amɔ́, mɛnu wɛ dá nǔxe to wɛkɛ lɔ mɛ lɛ? Xya Xeblu lɛ 3:4, enɛgodo ɖɔxodó kanbyɔ́ exelɛ jí:
-
Nudida tɛ́wɛ nɔ hɛn awuji we húgǎn?
-
Be é sɔgbe nadó yise ɖɔ wɛkɛ lɔ kpó nǔxe tíin to é mɛ lɛkpó kpó nyí didá ya? Etɛ́wutu?
Be a nywɛ ya?
A gán mɔ xósɔ́ kpó video xe ɖɔxodó hwɛxo exe jí lɛ kpó to jw.org jí to adà lɔ “Be É Nyí Didá Wɛ Ya?” kpó “Kpɔ́ndóhlan lɛ Gandó Bɛ́jɛeji Ogbɛ̀ Tɔn Go” kpó glɔ.
5. Nǔxe Biblu ɖɔ gandó nudida lɛ go sɔgbe xɛ́ lɛnkpɔ́n ɖagbe
To Jenɛsísí weta 1 mɛ, Biblu basí zɛɛmɛ dó lěxe ayigba nyí didá ɖó, kpó lěxe ogbɛ̀ bɛ́jɛeji ɖó kpó jí. Be a gán ɖejidó kanɖayǐ enɛ go, kavǐ a lɛnɖɔ otàngblo ɖé kpoun wɛ ya?
Xò VIDEO lɔ, enɛgodo ɖɔxodó kanbyɔ́ exelɛ jí.
-
Be Biblu kplɔ́nmɛ ɖɔ ayigba kpó nǔxe tíin to é jí lɛ kpó nyí didá to azán gànxixo 24 tɔn dónù ciɖokpó gblamɛ wɛ ya?
-
Be a lɛnɖɔ kanɖayǐ Biblu tɔn gandó nudida lɛ go sɔgbe xɛ́ lɛnkpɔ́n ɖagbe ya? Naegbɔ̌n a dó lɛnmɔ?
Xya Jenɛsísí 1:1, enɛgodo ɖɔxodó kanbyɔ́ exe jí:
-
Lɛnunnunywɛtɔ lɛ yigbe ɖɔ wɛkɛ lɔ ɖó bɛ́jɛeji. Nawɛ gbèta xe kɔ̀n yé wá sɔgbe xɛ́ nǔxe a cɛcɛ xya to Biblu mɛ gbɔn?
Mɛɖélɛ nɔ lɛnɖɔ Jixwéyɛxwe basí nulɛ to alixo ɖé mɛ bɔ nudida lɛ nɔ wá aimɛ ná yeɖe. Xya Jenɛsísí 1:21, 25, 27, enɛgodo ɖɔxodó kanbyɔ́ exelɛ jí:
-
Be Biblu kplɔ́nmɛ ɖɔ Jixwéyɛxwe dá nutogbɛ̀ wunmɛ ɖé, xe wá ɖyɔ́ eɖe zun nutogbɛ̀ wunmɛ voovo lɛ, tayiɖi hwèvi, kanlin kpó gbɛtɔ́ lɛ kpó wɛ ya? Kavǐ be ewɔ lɔsu wɛ dá nutogbɛ̀ “wunmɛwunmɛ” xe tíin lɛ tlɔlɔ ya? b
6. Jixwéyɛxwe dá gbɛtɔ́ lɛ to alixo xe gbɔnvo mɛ
Mǐ gbɔnvona kanlin xe Jehovah dá lɛ. Xya Jenɛsísí 1:26, enɛgodo ɖɔxodó kanbyɔ́ exe jí:
-
Enyí mǐ kpénǔgo nadó nɔ dó owǎnyi kpó awuvɛmɛ kpó xya ná mǐ nyí didá to akpajlɛ̌ Jixwéyɛxwe tɔn mɛ wutu, etɛ́wɛ enɛ dóxya gandó omɛ nankɔ xe Jixwéyɛxwe nyí go?
MƐÐÉLƐ NƆ ÐƆ ÐƆ: “Nǔxe Biblu ɖɔ gandó nudida lɛ go nyí xókpàɖɔ ɖé kpoun.”
-
Etɛ́wɛ a lɛn? Naegbɔ̌n a dó lɛnmɔ?
BLADÓKPƆ́
Jehovah wɛ dá wɛkɛ lɔ kpó nutogbɛ̀ xe tíin to é mɛ lɛkpó kpó.
Dogbakpɔ́n
-
Etɛ́wɛ Biblu kplɔ́nmɛ gandó lěxe wɛkɛ lɔ bɛ́jɛeji ɖó go?
-
Be Jixwéyɛxwe basí bɔ nutogbɛ̀ wunmɛwunmɛ lɛ wá aimɛ ná yeɖe sɔ́n nutogbɛ̀ ɖokpó ɖé mɛ wɛ ya, kavǐ é dá yemɛkpó tlɔlɔ?
-
Nawɛ gbɛtɔ́vi lɛ gbɔnvona nudida xe kpò lɛ gbɔn?
KPƆ́N NUÐƆNAMƐ ÐEVO LƐ
Kpɔ́n nudida xe go gbɛtɔ́vi lɛ kpɔ́n dó dó wleawuna nuɖélɛ.
Kpɔ́n lěxe otɔ́ ɖé gán basí zɛɛmɛ nǔxe Biblu ɖɔ gandó nudida lɛ go tɔn ná vǐsúnnu etɔn ɖó.
Kpɔ́n enyí vlavo Biblu nɔgodona nukplɔ́nmɛ lɔ ɖɔ nulɛ wá aimɛ ná yeɖe.
“Be Jixwéyɛxwe Ðá Nutogbɛ̀ Voovo lɛ bɔ Yé Nɔ Wá Aimɛ Ná Yeɖe Wɛ Ya?” (Xósɔ́ Intɛnɛt jí tɔn)
Kpɔ́n enyí atín, oxú kavǐ nǔxoxo ɖevo xe nyí mimɔ to dòglɔ lɛ, kavǐ dodinnanu lɛnunnunywɛtɔ lɛ tɔn lɛ dóxya ɖɔ ogbɛ̀ nyí didá wɛ kavǐ ɖɔ é wá gbɔn kosɔ dali.
Cinq questions à se poser sur l’origine de la vie (Alɔnuwé Flansegbe tɔn)
a Nukpínkplɔ́n 25tɔ ná ɖɔxodó lɛnɖayǐ Jixwéyɛxwe tɔn ná gbɛtɔ́vi lɛ jí.
b To Biblu mɛ, xogbe lɔ “wunmɛ” nɔ dlɛnalɔdó kpíkpli xe bɛ́ nutogbɛ̀ susu lɛ hɛn.
