Aayi. Baabule la basɛ ti la niɛ peelum ti Naayinɛ yuun naam la nɛresaaleba la dusi la bunbula “buuri” to’ore to’ore. (Pin’ileŋɔ 1:12, 21, 25, 27; Liligere 4:11) Ku pa’alɛ ti nɛresaaleba woo ze’ele la Adam la Hawa poan. (Pin’ileŋɔ 3:20; 4:1) Baabule la ka pa’alɛ ti Naayinɛ doose la lebege lebege poan naam bunvɔɔsi. Ge Baabule la ka tɔɣɛ sɛla giisɛ naaŋɔ lɔɣɔrɔ zamesegɔdoma n yeti, bunvɔɔsi n boi buuri kayima poan boi la to’ore to’ore. a

•  Naayinɛ doose la lebege lebege poan naam bunvɔɔsi?

•  Lebege lebege pa’alegɔ yɛla makɛ mɛ la Baabule yelesum la?

•  Bunbula la dusi n ni tee se’em ta’an vɔna ba boi zɛ’an la dela lebege lebege?

 Nɛresɛba n sakɛ ti Naayinɛ doose la lebege lebege poan naam bunvɔɔsi la n pa’alɛ yele wa se’em boi la to’ore to’ore. Encyclopædia Britannica la pa’alɛ ti nɛreba basɛba sakɛ ti “Naayinɛ maasum yɛla mɛ ti bunvɔɔsi sɛba n ka tari paŋa la kiira ge basɛ sɛba n tari paŋa la.”

 Nɛreba n ti’isɛ ti Naayinɛ doose la lebege lebege poan naam bunvɔɔsi la pa’ali ti:

•   Bunvɔɔsi woo ze’ele la bunvɔa kayima n yuun boi yuuma zo’e zo’e n tole poan.

•   Bunvɔa kayima ta’an lebege ta dɛna bunvɔa n kɔ’ɔn bɔna a to’ore.

•   Naayinɛ n basɛ ti wana wa za’a ita.

 Nɛreba n ti’isɛ ti Naayinɛ doose la lebege lebege poan naam bunvɔɔsi la, pa’alɛ ti Baabule la n tɔɣɛ naaŋɔ yele se’em Pin’ileŋɔ gɔŋɔ la poan la daɣɛ yelemɛŋɛrɛ. Ge Yezu yuun basɛ ti la niɛ peelum ti Pin’ileŋɔ gɔŋɔ la n yele sɛla la dela yelemɛŋɛrɛ. (Pin’ileŋɔ 1:26, 27; 2:18-24; Matu 19:4-6) Baabule la yeti, ge ti Yezu yuun wa’an tingɔŋɔ la zuo na la, a yuun boi la saazuo. Eŋa n yuun soŋɛ Naayinɛ ti a naam “sɛla woo.” (Yon 1:3) Bala, nɛreba n yeti Naayinɛ doose la lebege lebege poan naam bɔnvɔɔsi woo la ka makɛ la Baabule la pa’alegɔ.

 Baabule la ka pa’alɛ bunvɔɔsi n wan ta’an bɔna to’ore to’ore se’em buuri kayima poan. Bala mea nɔɔ ti Baabule la ka ŋmɛ nɔkpe’ene la dusi la bunbula n ni ta’an tee se’em ti la makɛ la ba bɔŋa la. Bala ka pa’alɛ ti bunvɔa la ni kɔ’ɔn lebege mɛ ta dɛna bunvɔa kayima.