Yelebibisa ase’a ka ani soŋa la fii me. Makerɛ dela pumpɔreŋɔ n wan ta’an sa’am ho yu’urɛ. Hali yelebibisa la san ka ba’ɛ dɛna ninmɔ’ɔrɛ, la ta’an daam ho mɛ, yele yele wuu la san dɛna la nɛra ti ho ba’ɛ lɛm en n bibisi ho yele bala!​​—⁠Yooma 55:12-​14.

 “Mam daa ta wum ti mam zɔ n tɔɣeri mam yele bɔ’ɔra nɛreba yɛta ti mam ka ti’iseri nɛreba yele. Yele la daa dela sunsɔa! Mam daa ka bɔkɛ sɛla n sɔi ti a daa tɔɣɛ bala.”​​—Ashley.

 Yelemɛŋɛrɛ: Nɛresɛka n bibisi ho yele la san dɛna ho zɔ bii a daɣɛ ho zɔ woo, la daɣɛ de’eŋo bunɔ ti ho ta baŋɛ ti nɛra n bibisi ho yele.

 Yɛla zo’e zo’e n sɔi ti nɛreba bibisa yɛla. Ase’a dela:

 Ton nɔŋɛ taaba yele la zuo. Naayinɛ n naam asaaleba se’em la basɛ ti to nɔŋɛ la sɔsega. Bala la, to nɔŋɛ la to sɔsera to yɛla bɔ’ɔra taaba. Yelemɛŋɛrɛ, Baabule la kpemese to giila ti to bisera ‘basɛba me n boti sɛla.’​​—⁠Filipi 2:4.

 “Nɛreba ni bɔta la ba sɔsa nɛreba yɛla!”​​—Bianca.

 “Mam nɔŋɛ la n baŋɛ sɛla n iti nɛreba vom poan ge me ni nɔŋɛ n sɔsa de yele la nɛreba. Mam ka mi sɛla n sɔi ge mam yeen nɔŋɛ de mɛ.”​​—Katie.

 Insĩirɛ. Baabule saŋa la, nɛreba basɛba yuun boti la ba ‘tara nɛŋa sɔsera yelepaala bɔ’ɔra nɛreba ge kɛlesa yelepaala me nɛreba zɛ’an.’ (Tooma 17:21) La dela bala nɔɔ zina beere wa!

 “Sɛla san puɣum ka eŋɛ, nɛreba ni ŋmaɛ la yele biŋe sɔsa de yele.”​​—Joanna.

 Ho san bisɛ ti nɛreba ka boti ho yele. Yelesonɛ la dela, Baabule la kaɣɛ tɔ ti to da tara tomea makera la basɛba. (Galatia 6:4) Ge ninbãalega la dela, sɛba n bisɛ ti nɛreba ka boti ba yele la ni bibisa la nɛreba yɛla.

 “Nɛra san bibisa a tadaana yele n ka ani soŋa, la ni basɛ ti nɛreba baŋɛ la eŋa n de nɛresɛka taaba. Lan pa’alɛ sɛla dela, a suure poan a nini n tɛ̃ti la nɛresɛka ti a bibisa a yele la. Nɛra la ta’an parena bɔ’ɔra nɛreba la wan eŋɛ se’em ti la ana en mama. A ni eŋɛ bala pa’alɛ ti eŋa nyani nɛresɛka ti a bibisa a yele la mɛ.”​​—⁠Phil.

 Yelemɛŋɛrɛ: Ho boti woo ho ka boti woo, nɛreba wan tɔɣɛ nɛreba yele, hali la hon me yele.

 Ho kan ta’an gu ti nɛreba kan bibisa ho yele ge ho wan ta’an loe hon wan eŋɛ se’em yele la poan. Ho san wum ti nɛreba tɔɣeri la ho yɛla, ho ta’an loe yɛla ayi wa eŋɛ.

 1: Tamɛ de yele. Saŋa zo’e zo’e la, bala ni ana soŋa mɛ paa yele yele wuu ban tɔɣeri ho yele se’em la san daɣɛ ninmɔ’ɔrɛ yele. Dekɛ Baabule ka’aŋɔ wa tum tuuma: ‘Da ita sunsɔa kalam kalam.’​​—⁠Pa’ala 7:9.

 “Ba daa bibisi mam yele mɛ ti mam boti la budibila ayima, hali ti mam puɣum ka nyɛ budibila wa kurum! La daa dela sia sia bɔ’ɔra mam ti mam daa la ge tamɛ de yele.”​​—⁠Elise.

 “Ho halesoma n wan ta’an basɛ ti ho zabɛ nyaŋɛ yelebibisa. Ho san tara halesoma ge ti nɛreba bibisa ho yɛla, nɛreba zo’e zo’e puɣum kan sakɛ. Ho halesoma la puɣum basɛ ti ho di buurɔ mɛ.”​​—⁠Allison.

 Sɛla n wan soŋɛ hɔ: Gulesɛ (1) ban bibisi ho yelese’a la biŋe (2) lan basɛ ti la ana ho se’em. Ho san ti’isɛ yele la soŋa soŋa ho ‘suure poan,’ la kan kpe’em bo ho ti ho tamɛ de yele.​​—⁠Yooma 4:4.

 2: Sɔsɛ la nɛresɛka n pɔsɛ bibisa ho yele la. Yɛla ase’a poan, ban bibisi ho yele se’em la ta’an dɛna ninmɔ’ɔrɛ ti la wan nara ti ho sɔsɛ la se’em n pɔsɛ bibisa ho yele la.

 “Ho san sɔsɛ la sɛba n bibisi ho yele la, ba ta’an ta baŋɛ ti ho wum ban bibisi ho yele la mɛ. Leyɛ’ɛsa, yelemɛŋɛrɛ la wan niɛ peelumi ti ya ta’an maalɛ yele la.”​​—⁠Elise.

 Ge ti ho nyaa sɔsɛ la nɛresɛka n bibisi ho yele la, geele Baabule naresum yɛla wa ge soke homea soke ana wa.

•   ‘Nɛra san ka wum yele soŋa ge pɔsɛ tɔɣera, la dela gberetuuma la nyanɛ.’ (Magaha 18:13) ‘Mam wum yele la soŋa soŋa? La ta’an dɛna ti nɛresɛka n bibisi yele la bo mam la ka bɔkɛ yele la bii a ka wum de soŋa?’

•   ‘Kɛlesa yetɔɣum kalam ge da zɛɛra yetɔɣum ge me da ita sunsɔa kalam.’ (Yames 1:​19) ‘Mam bisɛ ti sankana wa nari ti n sɔsɛ la se’em n bibisi mam yele la? Mam bisɛ ti mam san sɔsɛ la en, yele la wan maalɛ? Bii la wan nara ti n gura fii ti n suure ta ma’ɛ ge nyaa sɔsɛ la en?’

•   ‘Sɛla woo ti ya bɔta ti nɛreba ita bɔ’ɔra ya la, yamam me nari ti ya ita bala bɔ’ɔra ba.’ (Matu 7:​12, NET Bible) ‘La san deni mam n bibisi nɛra yele, mam wan boti ni ti ba sɔsɛ la wani bo mam? Bɔnkani taaba poan ti mam wan bɔta ti to sɔsɛ yele la? Mam wan tɔɣɛ ge eŋɛ n mea la wani ti la ana soŋa?’

 Sɛla n wan soŋɛ hɔ: Ge ti ho sɔsɛ la se’em n bibisi ho yele la, gulesɛ hon wan tɔɣɛ sɛla la biŋe ge maasum. Nyaa gura bakwai ayina bii bayi, malum kaalɛ hon gulesɛ sɛla la ge bisɛ, la yele san pakɛ ti ho eŋɛ teere. Leyɛ’ɛsa, sɔsɛ hon maasum se’em la bo ho dɔɣereba bii ho zɔ n kumesɛ ge soke en ti a bo ho ka’aŋɔ.

 Yelemɛŋɛrɛ: Wuu hon kan ta’an gu yɛla zo’e zo’e se’em la, bala mea nɔɔ ti ho kan ta’an gu ti nɛreba kan bibisa ho yele. Ge bala ka pa’alɛ ti ho basɛ ti yelebibisa la nyaŋɛ hɔ!