1-2. Nɛreba basɛba ti’isɛ lɛka yele la wani?

 HO SAN lɛɣera nɛra, la ni dɛna la pupeelum paa. Ho san dɛna la mina n nan lɛɣeri nɛra, nɔkpe’ene kai ti ho boti la ho nyaŋɛ ta di bii ele en. Nɛreba zo’e zo’e me nyaŋɛ eŋɛ la bala. Mabipɔka ayima n ze’ele Ethiopia ti a yu’urɛ dɛna Tsion, a yeti: “Mam puurɛ ka tabelɛ pee wuu se’em ma’a ti mam sira yuun lɛɣera mam la. To yuun ni sɔsera la ninmɔ’ɔrɛ yɛla ge me la’ara. Mam puurɛ n yuun pee la mam nyɛ mina ti n nɔŋɛ ge ti a me nɔŋɛ mam la.”

² Ge mabia n ze’ele Netherlands yu’urɛ n de Alessio me yeti, “Se’em ma’a ti mam yuun lɛɣera n pɔɣa la, la yuun dela pupeelum ge daaŋɔ me n yuun boi.” Zaseŋɔ wa poan to wan sɔsɛ daaŋɔ se’a n wan ta’an paɛ sɛba n lɛɣeri taaba, la Baabule naresum yelese’a n wan soŋɛ ba ti ba nyaŋɛ ta di bii ele taaba. To me wan geele bisɛ mabiisi n wan eŋɛ sɛla ta’an soŋɛ ba.

BENI N SƆI TI LƐKA YELE PAKƐ?

3. Beni n sɔi ti lɛka yele pakɛ? (Magaha 20:25)

³ Hon la nɛra san lɛɣera taaba, la boi bim ti la dela pupeelum ge la me dela ninmɔ’ɔrɛ yele n wan ta’an basɛ ti ya ta di bii ele taaba. Pɔɣedire daarɛ la, nɛra la a pɔɣa ni biŋe la nɔɔrɛ Yehowa nɛŋan ti ba wan nɔŋɛ taaba ge bɔ’ɔra taaba gilema ta paɛ kum. To san yeti to biŋe nɔɔrɛ woo, la nari ti to geele de soŋa soŋa. (Kaalɛ Magaha 20:25.) Pɔɣedire nɔbiŋere me dela ninmɔ’ɔrɛ yele. Lɛka saŋa la ni soŋɛ ya mɛ ti ya ta’an sɔsɛ baŋɛ taaba soŋa  soŋa ge kɔ’ɛ ya puti’irɛ. Saŋa ase’a ya ta’an ni kɔ’ɛ ya puti’irɛ ti lan paɛ se’em la ya di taaba. Saŋa ase’a me ya ta’an kɔ’ɛ ya puti’irɛ ti ya basɛ taaba. Ho san lɛɣɛ nɛra ge ka nyaŋɛ ta di bii ele en, la ka pa’alɛ ti ya lɛka la ka tari vuurɛ. La tari vuurɛ se’ere n sɔi la, la soŋɛ ya mɛ ti ya ta’an kɔ’ɛ ya puti’irɛ soŋa.

4. Beni n sɔi ti la yele pakɛ ti to malum geele tomam n ti’iseri lɛka yele se’em la?

⁴ Beni n sɔi ti la yele pakɛ ti to malum geele tomam n ti’iseri lɛka yele se’em la? Nɛreyone san mina lɛka vuurɛ, a kan lɛɣera nɛra ge ka tara puti’irɛ ti a wan ta di bii ele en. La daɣɛ nɛreyɔna ma’a n nari ti ba mina lɛka vuurɛ. To za’a n nari ti to bɔkɛ lɛkɛ vuurɛ. Makerɛ, nɛreba basɛba ti’isɛ ti ho san lɛɣera nɛra see ti ho kɔ’ɔn di bii ele en. Yele wa basɛ ti la ana Kristakɔma n de nɛreyɔna la wani? Melissa n de nɛreyone bɔna United States yeti: “Hon la nɛra san lɛɣera taaba, nɛra woo nini ni kɔ’ɔn bɔna la ya poan. Bala la, ho san lɛɣera nɛra ge ti yɛla ka kena soŋa la ni kpe’em bo ho mɛ ti ya basɛ taaba. Wana wa zuo la, nɛreyɔna basɛba puɣum ka ti’isa lɛka yele.”

SƆSƐ YA BAŊƐ TAABA SOŊA SOŊA

5-6. Nɛreba san lɛɣera taaba, bem yɛla n nari ti ba sɔsɛ baŋɛ taaba soŋa soŋa? (1 Peter 3:4)

⁵ Ho san lɛɣera nɛra, bem n wan soŋɛ hɔ ti ho baŋɛ nyaa ho di en bii ho basɛ en? Ya nari ti ya sɔsɛ baŋɛ taaba soŋa soŋa. Daanse’ere ho puɣum mina nɛra la mɛ ge nyaa pɔsɛ lɛɣera en. Ge lɛka saŋa wa dela yɔ’ɔ ti ho wan ta’an baŋɛ ‘eŋa n de nɛresɛka taaba a suuren.’ (Kaalɛ 1 Peter 3:4.) Bala pa’alɛ ti ho ta’an baŋɛ a halɛ, a ti’isegɔ la eŋa n ani se’em vo’osum poan. Wana wan basɛ ti ho nyɛ soke ana wa lebesego: ‘Nɛra wa wan ta’an dɛna pɔɣesonkɔ bii siresonkɔ?’ (Mag. 31:​26, 27, 30; Ep. 5:33; 1 Tim. 5:8) ‘To wan ta’an nɔŋɛ ge me bisa taaba soŋa? Hali la to tuure yɛla la za’a, to wan ta’an kelum naɛ taaba kɛ̃’ɛra?’ b (Arom 3:23) Ya san pɔsɛ sɔsera baŋera taaba, tɛ̃ra ti: Yan laɣum nɔŋɛ sɛla ma’a ka pa’alɛ ti ya wan ta’an naɛ taaba bɔna ge la dela yamam n wan ta’an ŋmɛresɛ yamea se’em ti la makɛ la ya bɔŋa la.

 ⁶ Ho san lɛɣera nɛra, bem yɛla ti ho wan ta’an le baŋɛ pa’asɛ? Ninmɔ’ɔrɛ yɛla ase’a n nari ti ho mina ge ti ho suure nyaa kɛ̃ nɛra la. Makerɛ, nɛra la n boti a eŋɛ sɛla a vom poan. Ya me wan bɔta ti ya sɔsɛ yamea yɛla n de wuu ya imma’asum yɛla, ya ligeri yɛla, la yelese’a n tabelɛ paɛ ya. Ho san nan pɔsɛ lɛɣera nɛra, daɣɛ yɛla woo n nari ti ya sɔsɛ de yele. (Dekɛ makɛ Yon 16:12.) Ho san ti’isɛ ti ho nan ka boti ho sɔsɛ homea yɛla ase’a, basɛ ti ho tadaana la baŋɛ. Ge pooren la yele pakɛ mɛ ti ho basɛ ti a baŋɛ, lan wan eŋɛ se’em ti a ta’an kɔ’ɛ a puti’irɛ soŋa. Wana wa pa’alɛ ti ho ka nari ti ho suɣɛ sɛla ge ho tuɣum yele en sɛla woo.

7. Sɛba n lɛɣeri taaba wan eŋɛ la wani ta’an sɔsɛ baŋɛ taaba soŋa soŋa? (Bisɛ daka la zuo n de “ Ho San Lɛɣera Nɛra N Boi Zɛ’an N Zaaɛ.”) (Bisɛ fɔɔra la.)

⁷ Ho wan eŋɛ la wani baŋɛ nɛra n ani se’em a suuren? Yelese’a n wan soŋɛ ho dela ni yele en sɛla n boi ho suuren, sɔkera en yɛla ge me ni ana kɛli kɛlesa en. (Mag. 20:5; Yam. 1:19) Ya nari ti ya naɛ taaba ita yelese’a n wan basɛ ti ya sɔsera maɣesɛ wuu yan wan naɛ taaba dita, kena zɛ’an ti nɛreba bɔna bim bii naɛ taaba mɔɔla. Ya me san naɛ la ya zɔdoma la ya yidoma sɔsera, la wan soŋɛ ya ti ya baŋɛ taaba soŋa. Leyɛ’ɛsa, ya nari ti ya ni naɛ taaba ita yelese’a n wan soŋɛ hɔ ti ho baŋɛ nɛra la n wan ta’an naɛ la nɛreba n boi to’ore to’ore tuna se’em. Mabia Aschwin n ze’ele Netherlands yeti: “Se’em ma’a ti mam yuun lɛɣera Alicia la, to yuun ni naɛ taaba ita la yelese’a n wan soŋɛ tɔ ti to ta’an baŋɛ taaba soŋa. Yele ana ta’an dɛna ti to naɛ taaba duɣera, pɛɛra laasi bii piisa. Ton yuun naɛ taaba ita yele ana wa la yuun soŋɛ to mɛ ti to baŋɛ taaba soŋa.”

8. Sɛba n lɛɣeri taaba san naɛ taaba zamesa, ba wan nyɛ la bem nyuurɔ?

⁸ Ya san naɛ taaba zamesa vo’osum poan yɛla, la wan soŋɛ ya ti ya ta’an baŋɛ taaba soŋa soŋa. Ya san ta di taaba ya nari ti ya ita deodoma pu’usegɔ, lan wan eŋɛ se’em ti Naayinɛ soŋɛ ya pɔɣedire la. (Pa. 4:12) Bala la, yan nan lɛɣeri taaba la n nari ti ya pɔsɛ ita bala. La boi bim ti sɛba n lɛɣeri taaba nan ka di bii ele taaba.  Mabipɔka la me zuodaana nan daɣɛ mabia la. Ge ya san naɛ taaba zamesa, la wan basɛ ti ya baŋɛ yan bi vo’osum poan se’em. Max la Laysa n ze’ele United States yeti: “Nyuurɔ boi bim mɛ ya san naɛ taaba zamesa. Tomam n yuun pɔsɛ lɛɣera taaba la, to yuun zamesɛ la gɔnseto n tɔɣeri lɛka la pɔɣedire yɛla. Gɔnɔ ana wa n yuun soŋɛ tɔ ti to pɔsɛ sɔsera ninmɔ’ɔrɛ yelese’a ti to yuun nan ka sɔsɛ de yele la.”

YELESE’A N NARI TI YA MALUM GEELE A BISƐ

9. Sɛba n lɛɣeri taaba nari ti ba geele la yele ani ge nyaŋɛ baŋɛ nɛresɛba n nari ti ba yele?

⁹ Bani n nari ti ba baŋɛ ti ho lɛɣeri la nɛra? Yele ana dela yamea loe. Yan pɔsɛ lɛɣera taaba la, daanse’ere ya wan bɔta ti ya yele nɛreba fii wa. (Mag. 17:27) Ya san eŋɛ bala, ya ta’an kan basɛ ti nɛreba zo’e zo’e nini bɔna ya poan. Ge ya me san ka yele nɛnɛra, ya yeti ya pɔsɛ tara de suɣera mɛ, ka bɔta ti nɛra baŋɛ. Wana wa me ta’an dɛna dɛŋa. Bala la, yɛm boi bim ti ya yele sɛba n wan ta’an bo ya ka’aŋɔ ge soŋɛ ya. (Mag. 15:22) Makerɛ, ya ta’an yele ya yidoma, ya zɔdoma basɛba bii keendoma la.

10. Sɛba n lɛɣeri taaba wan eŋɛ la wani basɛ ti Yehowa puurɛ pee? (Magaha 22:3)

¹⁰ Sɛba n lɛɣeri taaba wan eŋɛ la wani basɛ ti Yehowa puurɛ pee? Ya suure san pɔsɛ kɛ̃’ɛra taaba, la wan basɛ ti ya pɔsɛ lɛna taaba. Ge bem n wan soŋɛ ya ti ya kelum tara sarensoŋɔ? (1 Ko. 6:18) Ya ka nari ti ya sɔsera yalum sɔsega, bɔna ya ma’a bii ya nyuura daam zɔ’ɔra. (Ep. 5:3) Yele ana ta’an basɛ ti ya pɔsɛ ti’isa yalum yɛla nyaa ta tum be’em. Yɛm wan bɔna bim ti ya te’ele sɔsɛ yelese’a ti ya wan ita ti la pa’alɛ ti ya tari gilema bɔ’ɔra taaba ge me nana Yehowa sareŋɔ pa’alegɔ la. (Kaalɛ Magaha 22:3.) Bisɛ sɛla n soŋɛ Dawit la Almaz n ze’ele Ethiopia. Ba yeti: “Tomam ni naɛ taaba bɔna la zɛse’esi ti to zɔdoma bii nɛrekuuŋɔ bɔna. Tomam ka tabelɛ bɔna to ma’a loore poan bii yire poan. Bala basɛ ti to ka ti’isa yalum tuuma yɛla.”

11. Sɛba n lɛɣeri taaba nari ti ba geele la bem yɛla, ba san ita pa’ala ti ba nɔŋɛ taaba?

¹¹ Sɛba n lɛɣeri taaba nari ti ba eŋɛ pa’alɛ ti ba nɔŋɛ taaba yoi? Ya suure san pɔsɛ kɛ̃’ɛra taaba, ya ta’an doose sarɔsoŋɔ poan ita pa’ala ti ya nɔŋɛ taaba. Ge ya san pɔsɛ tara gã’aregɔ kunkoma’asum, la wan kpe’em bo ya ti ya tum sɛla n ani soŋa. (Sol. 1:2; 2:6) Yan doli sarɔse’a poan pa’ala ti ya nɔŋɛ taaba la ta’an basɛ ti ya kan ta’an nyɔkɛ yamea. (Mag. 6:27) Bala la, ya san kɔ’ɔn pɔsɛ lɛɣera taaba ya nari ti ya basɛ ti Baabule naresum yɛla pa’alɛ ya, yan nari ti ya ita yelese’a la yelese’a n ka nari ti ya ita. c (1 Tes. 4:​3-7) Yamam yayi la za’a nari ti ya soke yamea yeti: ‘Nɛresɛba n boi to gingilega la poan la san nyɛ tomam n iti yelese’a pa’ala ti to nɔŋɛ taaba, ba wan geele to la wani? Ton iti yelese’a la ta’an basɛ ti to tara gã’aregɔ kunkoma’asum yoi?’

12. Nɛreba n lɛɣeri taaba san ka bɔkera taaba, la nari ti ba eŋɛ la bem?

¹² Ya wan eŋɛ la wani ya san ka bɔkera taaba? Ya san ni ka bɔkera taaba saŋa ase’a, la pa’alɛ ti ya lɛka la ka keni soŋa yoi? La daɣɛ bala la fii me. Saŋa ase’a,  nɛra la a pɔɣa ta’an ni ka bɔkɛ taaba. Pɔɣedire dela nɛreba bayi n tiregeri ti ba bɔkɛ taaba. Bala la, yamam n maali yɛla se’em nananawa la wan pa’alɛ ya pɔɣedire la n wan ta ana se’em. Ya san lɛɣera taaba, soke yamea yeti: ‘To san ka bɔkɛ taaba yele poan, to ni nyaŋɛ maalɛ yele la baalam ti gilema bɔna bim? Tomam ni sakɛ to tuure ge eŋɛ teere? Yele san bɔna, to ni di sugeri ge basɛ ti la ba’asɛ?’ (Ep. 4:​31, 32) Ya san nan lɛɣera taaba ge ti saŋa woo ya ka bɔkera taaba, la pa’alɛ ti ya san ta di taaba la wan ana la bala. Ho san ta baŋɛ ti ayima ka tari halesoma, la wan ana soŋa ti ya basɛ taaba. La wan soŋɛ yamam yayi la za’a. d

13. Bem n wan soŋɛ hɔ ti ho baŋɛ hon wan lɛɣɛ nɛra ti la yue paɛ se’em?

¹³ Ho nari ti ho lɛɣɛ nɛra yue paɛ la wani? To san ka ma’ɛ tomea kɔ’ɛ to puti’irɛ soŋa, yɛla ni ka keŋɛ soŋa. (Mag. 21:5) Bala la, ho nari ti ho lɛɣɛ nɛra yue fii ta’an baŋɛ en soŋa soŋa. Ge bala me ka pa’alɛ ti ho kɔ’ɔn lɛɣera nɛra la yuura. Baabule la yeti: ‘Nɛra san tara puti’irɛ ti sɛla n yeti la eŋɛ ge ti la ka tum, la dela bã’a.’ (Mag. 13:12) Leyɛ’ɛsa ho san lɛɣɛ nɛra yue, la ta’an ni kpe’em bo ho ti ho zaɣesɛ yalumtuuma. (1 Ko. 7:9) Hon tuɣum wan bisa hon lɛɣɛ nɛra la ti la yue se’em la, tuɣum soke homea yeti, ‘Mam le ɛɛra ti n baŋɛ la bem ge ta’an kɔ’ɛ n puti’irɛ?’

MABIISI WAN EŊƐ LA WANI TA’AN SOŊƐ SƐBA N LƐƔERI TAABA?

14. Bem yɛla ti mabiisi wan ta’an eŋɛ soŋɛ sɛba n lɛɣeri taaba? (Bisɛ foote la.)

¹⁴ To san mina mabiisi n lɛɣeri taaba, to wan eŋɛ la wani ta’an soŋɛ ba? To ta’an beem ba ti ba naɛ la to di, laɣum eŋɛ deodoma pu’usegɔ bii to naɛ taaba sɔsɛ. (Arom 12:13) Yele ana ta’an basɛ ti ba baŋɛ taaba soŋa. To ta’an kɔlegɛ ba bii doose ba keŋɛ zɛ’an. To me ta’an beem ba ti ba wa’an to yire na. (Ga. 6:10) Alicia ti to puɣum tɔɣɛ a yele la pa’alɛ la sɛla n basɛ ti eŋa la Aschwin puurɛ yuun pee paa. A yeti, “Mabiisi la yuun yeti to san ɛɛra zɛ’an ti to zi’ire sɔsɛ, to ta’an wa’an ba zɛ’an na.” La dela yɔ’ɔ ti nɛreba n lɛɣeri taaba yele ho ti ho kɔlegɛ  ba. Ho san doose ba keŋɛ zɛ’an, da basɛ ti ba ni kɔ’ɔn bɔna ba ma’a ge la me nari ti ho bo ba yɔ’ɔ ti ba ta’an sɔsɛ ba suɣelum yɛla.—Flp. 2:4.

15. Sɛba n lɛɣeri taaba zɔdoma wan eŋɛ la wani ta’an soŋɛ? (Magaha 12:18)

¹⁵ To me ta’an basɛ ti to yetɔɣum la to itigɔ soŋɛ sɛba n lɛɣeri taaba. Saŋa ase’a, la yele ni pakɛ mɛ ti to nyɔkera tomea. (Kaalɛ Magaha 12:18.) Makerɛ, to inya ta’an kita ti to yele nɛreba ti to zɔdoma la pɔsɛ lɛɣera la taaba ge daanse’ere sɛba n lɛɣeri taaba la nan ka boti ba yele nɛreba. To ka nari ti to tara sɛba n lɛɣeri taaba la yɛla tɔɣera bɔ’ɔra nɛreba bii to zɛregera ba. (Mag. 20:19; Arom 14:10; 1 Tes. 4:11) Leyɛ’ɛsa, la ka nari ti to sɔsera bii sɔkera ba yɛla ti la ana wuu la dela ba di bii ele taaba. Mabipɔka ayima yu’urɛ n de Elise la a sira yeti, “Nɛreba yuun san sɔkera to dabese’ere daarɛ ti to wan eŋɛ to pɔɣedire la ge ti tomam mea nan puɣum ka maasum, la ni basɛ ti valum n tara tɔ.”

16. Sɛba n lɛɣeri taaba san basɛ taaba, to nari ti to eŋɛ la bem ge bem n ka nari ti to eŋɛ?

¹⁶ To wan eŋɛ la wani sɛba n lɛɣeri taaba san kɔ’ɛ ba puti’irɛ ti ba basɛ taaba? La ka nari ti to dekɛ to nɛŋa kɛ̃’ɛsa ba yɛla poan bii to nyɔ̃na ayima ti eŋa n ta’asɛ. (1 Pe. 4:15) Mabia ayima yu’urɛ n de Lea yeti: “Mam n yuun wum ti nɛreba tɔɣeri sɛla n sɔi ti mam la mabia ayima basɛ taaba la, yele la yuun daam mam mɛ paa.” Wuu ton puɣum tɔɣɛ sɛla yia la, sɛba n lɛɣeri taaba san ka nyaŋɛ di bii ele taaba, la ka pa’alɛ ti ba lɛka la ka tari vuurɛ. Ge la tuɣum soŋɛ ba ti bamam bayi la ta’an kɔ’ɛ ba puti’irɛ soŋa. Ba san basɛ taaba, ba suure n ni sa’am ti ba bɔna ba ma’a. Bala la, to ta’an bisɛ ton wan eŋɛ se’em soŋɛ.—Mag. 17:17.

17. Sɛba n lɛɣeri taaba nari ti ba kelum ita la bem?

¹⁷ Wuu ton zamesɛ baŋɛ se’em la, nɛreba san lɛɣera taaba la dela pupeelum ge daaŋɔ me boi bini. Jessica yeti: “Yelemɛŋɛrɛ, hon la nɛra san lɛɣera taaba la dela tuunkãtɛ. Ge tomam puurɛ pee mɛ la ton yuun dekɛ to saŋa, la to paŋa sɔsɛ baŋɛ taaba soŋa se’em la.” Hon la nɛra san lɛɣera taaba, tiregɛ ya sɔsɛ baŋɛ taaba soŋa lan wan eŋɛ se’em ti ya ta’an kɔ’ɛ ya puti’irɛ soŋa.