1. To zo’e zo’e tiregeri ti to eŋɛ la bem?

 HON puɣum loe vo’osum poan tuunɛ mɛ ge nyaa tiregera ti ho tum dɛ? b La san dɛna bala, la daɣɛ hon ma’a. Makerɛ, Philip boti a zusa tabela mɛ ti a zusega la tara paŋa ge a ka nyɛti nɛŋa zusa. Erika me boti la a ni kɔ’ɔn eŋɛ kalam paɛ na’am mɔɔlegɔ maaseŋɔ sɔsega ge a ni kɔ’ɔn yee la pooren. Tomáš me ni tiregera saŋa woo ti a kaalɛ Baabule la za’a. A yeti: “Mam yeen ka nɔŋɛ la Baabule la kaalegɔ, mam tiregɛ pɔsɛ la sugumnɔɔrɛ butã ge saŋa woo mam ni ta paɛ la Malema gɔŋɔ la ge teke.”

2. Beni n sɔi ti la ka nara ti to giila kɔ’ɔsɛ to san tara vo’osum poan tuunɛ ge ka nyaŋɛ tum dɛ?

² Ho san tara la vo’osum poan tuunɛ ge ka nyaŋɛ tum dɛ nananawa, da basɛ ti ho giila kɔ’ɔsɛ. Hali ho san puɣum yeti ho tum tuun pika, la dela ho nyɛ tɛm ge tiregɛ. Ge hon kelum tiregera ti ho tum ho vo’osum poan tuunɛ la pa’alɛ ti ho tari la bɔnsoŋa la Yehowa ge me bɔta ti ho tum ho paŋa tɛka beene. Yehowa puurɛ ni pee mɛ la hon nyaŋɛ eŋɛ sɛla la. Yelemɛŋɛrɛ, a ka boti ho tum zɔɛ ho paŋa tɛka beene. (Ym. 103:14; Mik. 6:8) Loe sɛla ti ho wan ta’an tum ti la makɛ la ho bɔŋa la n ani se’em la. Ho san loe vo’osum poan tuunɛ, ho wan eŋɛ la bem ta’an tum dɛ? Basɛ ya ti to sɔsɛ ya yelese’a n wan soŋɛ tɔ.

3. Beni n sɔi ti inkpeŋere yele pakɛ?

³ To inya san kpeŋe to wan ta’an tum to vo’osum poan tuuma. Nɛra inya san kpeŋe, la wan basɛ ti a eŋɛ eŋa n boti a tum sɛla la. To ta’an dekɛ inkpeŋere makɛ la komi’isi n za’ari ɔɔreŋɔ ye’a zɛ’an ti a ye’a la. Komi’isi la san kelum ŋmɛ’ɛra, la wan soŋɛ mina n biseri ɔɔreŋɔ la ti a paɛ zɛ’an ti a ye’a la. Komi’isi la san ŋmɛ’ɛra zɔ’ɔra, a wan paɛ kalam. Bala la, to san tara inkpeŋere, to wan ta’an tum to vo’osum poan tuuma la. David n de mabia ze’ele El Salvador yeti: “Ho san tara inkpeŋere, ho wan tiregɛ tum, ho kan bo yɔ’ɔ ti sɛla gu ho ti ho kan tum ho vo’osum poan tuunɛ la.” Bala, ho wan eŋɛ la wani ta’an tara inkpeŋere?

4. To wan zusa ɛɛra la bem? (Filipi 2:13) (Bisɛ foote la.)

⁴ Zusɛ ta’an tara inkpeŋere. Yehowa vo’osum la wan ta’an soŋɛ ho ti ho tara inkpeŋere ta’an tum ho vo’osum poan tuunɛ la. (Kaalɛ Filipi 2:13.) Saŋa ase’a to ni bisɛ ti la nari mɛ ti to loe vo’osum poan tuunɛ tum ge bala mɛ dela yelesonɛ. Ge to inya ta’an kan kita ti to tum dɛ. La ani mabipɔka ayima yu’urɛ n de Norina n ze’ele Uganda tiŋa la bala. “A daa boti a pa’alɛ nɛreba la Baabule la ge daa ka tara inkpeŋere tuunɛ la poan. Beni n daa soŋɛ en? A yeti: “Mam daa zuseri la Yehowa daarewoo ti a soŋɛ mam ti n tara inkpeŋere ta’an pa’ala nɛreba Baabule la. Mam zusɛ ti n ta’an eŋɛ sɛla la, mam me kɔ’ɔn tiregera mɛ ti n ta’an pa’ala soŋa. Ŋmaresi fii pooren ti mam baŋɛ ti mam inya kpeŋe mɛ, la mam boti n eŋɛ sɛla la. Yuun kaŋa mea nɔɔ ti mam nyɛ nɛreba bayi pɔsɛ zamesa ba Baabule.”

5. To wan ti’isa taɣesa la bem yele ti to inya ta’an kpeŋe?

⁵ Ti’isa taɣesa Yehowa n eŋɛ sɛla bo ho. (Ym. 143:5) Tuuntuna Paul yuun ti’isɛ taɣesɛ Yehowa nimbɔ̃zore la yele mɛ. Bala n basɛ ti a yuun tara inkpeŋere tuna bɔ’ɔra en. (1 Ko. 15:9, 10; 1 Tim. 1:12-14) Bala mea nɔɔ, ho san ti’isɛ taɣesɛ sɛla ti Yehowa eŋɛ bo ho la, bala n wan basɛ ti ho inya kpeŋe ti ho ta’an tum ho vo’osum poan tuunɛ la. (Ym. 116:12) Geele to mabipɔka ayima n boi Honduras tiŋa n dekɛ vo’osum tuunɛ biŋe a nɛŋan nyaa ta dɛna tɛm woo sore ŋmɛ’adaana la n yele se’em. A yeti: “Eŋa ti’isɛ la Yehowa n nɔŋɛ en se’em. A dekɛ mam pa’asɛ la a nɛreba poan. A fabeli mam yele mɛ ge tɛ’ɛla mam. Mam ti’isɛ bala taɣesɛ la, basɛ ti mam nɔŋɛ en mɛ ti mam inya me kpeŋe.”

6. Bem leyɛ’ɛsa n wan ta’an soŋɛ tɔ ti to inya kpeŋe?

⁶ Ti’isa hon wan nyɛ kã’a se’em ho san tum ho vo’osum poan tuunɛ la. Tɛ̃ra sɛla n soŋɛ Erika ti to puɣum tɔɣɛ a yele la, n daa ka boti a yɛɛra pooren la. A yeti:  “Mam daa baŋɛ ti sɛla n ni pĩɛ mam nu’usin mam san yee pooren na’am mɔɔlegɔ sɔsega poan. Ge mam daa ni keŋɛ kalam la, mam daa ni nyɛ nɛŋa pu’usɛ mabiisi la mɛ ge naɛ la ba sɔsɛ. Mam daa ni ta’an kelese itipa’alegɔ sɔsega la mɛ ti la soŋɛ mam ti n tara pupeelum ge kumesɛ mam, na’am mɔɔlegɔ poan.” Erika daa ti’isɛ la eŋa n wan nyɛ nyuurɔ se’em a san bɔna bim tɔtɔ. A me daa eŋɛ la bala. Hon puti’irɛ boi la bem kã’a poan? Ho san bɔta ti ho kaala la Baabule bii ho zusa, ti’isɛ bisɛ hon la Yehowa zɔtɔ nyɔka la n wan kpe’em se’em. (Ym. 145:18, 19) Ho san bɔta ti ho tara la Krista hala la, ti’isɛ bisɛ la wan basɛ ti hon la nɛreba tara bɔnsoŋa se’em. (Kol. 3:14) Ho kan bɔta ti ho gulesɛ yelese’a zuo n sɔi ti ho bɔta ti ho tum vo’osum poan tuunɛ wa? Ni bisera yelese’a ti ho gulesɛ la. Tomáš ti to puɣum tɔɣɛ a yele la yeti: “Mam san mina sɛla n sɔi ti mam tuna vo’osum poan tuunɛ, mam ni ka bɔta ti n pisegɛ basɛ.”

7. Beni n soŋɛ Julio la a pɔɣa ti ba ta’an tum ba vo’osum poan tuunɛ la?

⁷ Nyɛta nɛŋa sɔsera la sɛba n wan ta’an basɛ ti ho inya kpeŋe. (Mag. 13:20) Ti’isɛ bisɛ sɛla n soŋɛ Julio la a pɔɣa ti ba ta’an tum ba vo’osum poan tuuma la n de, ba yalegɛ ba na’am tuuma la. A yeti: “To nyɔɣɛ la zɔdoma n wan soŋɛ tɔ ti to ta’an tum to vo’osum poan tuunɛ la ge ni naɛ la ba sɔsɛ de yele. Ba zo’e zo’e tabelɛ tum vo’osum poan tuun dinɛ mɛ. Bala la, ba ni nyaŋɛ pa’alɛ to mɛ soŋa. To zɔdoma ni soke to la ton maasum se’em ge ni kpemese to giila.”

8. Beni n wan eŋɛ to san bɔta ti to tara inkpeŋere ge nyaa tum vo’osum poan tuunɛ? (Bisɛ foote la.)

⁸ La dela yelemɛŋɛrɛ ti saŋa ase’a to ni ka tara inkpeŋere. Bala pa’alɛ ti to kan ta’an tum to vo’osum poan tuunɛ la? Aayi. Makerɛ: Komi’isi n tari paŋa wan ta’an za’ɛ ɔɔreŋɔ keŋɛ eŋa n ye zɛ’an. Ge komi’isi paŋa boi la tɔka tɔka. Dabesa ase’a, ko’om la ta’an ani siim. Bala pa’alɛ ti ɔɔreŋɔ la kan ta’an vurege? Daɣɛ bala la fii me. Mina n biseri ɔɔreŋɔ la ta’an dekɛ vugere mɔna ti la tara en ta paɛ zɛ’an ti a ye’a la. Ton tari inkpeŋere se’em la ta’an ana wuu komi’isi la ge to inkpeŋere la ta’an bɔna tɔka tɔka mɛ. Dabesa ase’a, to ta’an ni ka tara inkpeŋere ti to tum to vo’osum poan tuunɛ la. Bala to san gura ti to ta tara inkpeŋere ge nyaa tum to vo’osum poan tuunɛ la, to kan malum tum dɛ. Wuu mina n biseri ɔɔreŋɔ n ni doose sarɔtɔ toseto poan ta’an paɛ zɛ’an ti a ye’a la, tomam me ta’an tum to vo’osum poan tuunɛ la to san ka tara inkpeŋere. La boi bim ti la daɣɛ naana ge to san nyaŋɛ tum to vo’osum  poan tuunɛ la, to wan tara pupeelum. Ge ti to nyaa sɔsɛ to wan ta’an eŋɛ sɛla la, basɛ ya ti to bisɛ ya sokere wa.

9. La dela be’em ti to kɔ’ɔn tiregɛ tum to vo’osum poan tuunɛ la to san ka tara inkpeŋere? Tɔɣɛ pa’alɛ.

⁹ Yehowa boti la to yese to suuren pu’usa en la pupeelum. (Ym. 100:2; 2 Ko. 9:7) Bala la, la nari ti to kɔ’ɔn tiregɛ tum to vo’osum poan tuunɛ to san ti’isa ti to kan nyaŋɛ tum dɛ? To geele tuuntuna Paul makerɛ la bisɛ. A yuun yeti: ‘Mam pɛregɛ n inya la mɛ ti ku dɛna yameŋa bɔ’ɔra mam.’ (1 Ko. 9:25-27) Hali Paul yuun ka tari inkpeŋere ti a tum sɛla ti Yehowa bɔta la ge a yuun pɛregɛ amea mɛ tum dɛ. Yehowa yuun nam Paul tuuma la? Ɛɛ! Yehowa me yuun kã bo en la eŋa n tiregɛ se’em la.​—2 Tim. 4:7, 8.

10. To wan nyɛ kã’a la wani to san ka tara inkpeŋere ge tiregɛ tuna to vo’osum poan tuunɛ?

¹⁰ Bala mea nɔɔ, Yehowa puurɛ ni pee mɛ a san nyɛ tɔ ti to kɔ’ɔn tiregera tuna to vo’osum poan tuunɛ la hali to san ka tara inkpeŋere ti to eŋɛ bala. A puurɛ ni pee mɛ hali to san ka nɔŋɛ tuunɛ la ti to tuna la. Ge eŋa n mi ti to nɔŋɛ en mɛ la n sɔi ti to tuna la, wuu eŋa n yuun kã bo Paul se’em la, a me wan kã bo to la ton tiregeri se’em la. (Ym. 126:5) To san nyɛta Yehowa kã’a, la wan kpɛŋera to inya. Mabipɔka ayima n ze’ele Poland ti a yu’urɛ dɛna Lucyna yeti: “Saŋa ase’a mam ni ka bɔta ti n keŋɛ na’am mɔɔlegɔ yele yele wuu mam san ni taregɛ. Ge mam ni keŋɛ na’am mɔɔlegɔ ta tara pupeelum se’em la dela yelekirega bɔ’ɔra mam.” Bala la, basɛ ya ti to bisɛ to wan eŋɛ sɛla to san ka tara inkpeŋere.

11. Yehowa wan soŋɛ to la wani ti to ta’an tara nyɔkɛ n mea?

¹¹ Zusɛ ta’an nyɔkera homea. Nyɔkɛ n mea dela nɛra n tã amea tara a yetɔɣum la a itigɔ poan. La pa’alɛ la to wan eŋɛ se’em ta’an gu tomea be’em poan. Ge la me nari ti to tara nyɔkɛ n mea ta’an tum tuunsonɛ yele yele wuu tuunɛ la san kpe’em bo to bii to san ka tara inkpeŋere. Tɛra ti nyɔkɛ n mea laɣum pa’asɛ la vo’osum biila la poan, bala la zusɛ Yehowa ti a soŋɛ hɔ ti ho ta’an tara halɛ dena wa. (Lu. 11:13; Ga. 5:22, 23) David ti to puɣum tɔɣɛ a yele la, pa’alɛ zusega n soŋɛ en se’em mɛ. A boti la a ita amea zamesegɔ saŋa woo. A yeti: “Mam ni zusɛ la Yehowa ti a soŋɛ mam ti mam ta’an nyɔkera n mea. Yehowa soŋerɛ zuo, mam daa nyaŋɛ pɔsɛ n mea zamesegɔ mɛ ge ka vĩ’ira.”

12. Naresum yele la n boi Pa’ala 11:4 wan soŋɛ to la wani ti to ta’an tum to vo’osum poan tuuma?

¹² Da gura ti ho bɔŋa la ta ana soŋa. Tingɔŋɔ wa poan, daanse’ere to kan ta’an nyɛ bɔnsoŋa. To san ɛɛra bɔnsoŋa, daanse’ere to kan ta’an tum to vo’osum poan tuunɛ la. (Kaalɛ Pa’ala 11:4.) Mabia ayima yu’urɛ n de Dayniel yeti: “Bɔnsoŋa ka boi. Bala la, la daɣɛ ti to gura, to yeen pɔsɛ tuunɛ la.” Mabia ayima n ze’ele Uganda ti a yu’urɛ dɛna Paul le pa’alɛ sɛla n sɔi ti la ka nara ti to gu’una: A yeti: “La san puɣum kpe’em ge ti to pɔsɛ tuunɛ la, Yehowa wan soŋɛ tɔ.”​—Ma. 3:10.

13. Beni n sɔi ti la ana soŋa ti to ni pɔsɛ tuunɛ tuna fii fii?

¹³ Ho ta’an pɔsɛ de fii. Tuunɛ la san kpe’em bo to ti to tum bala ta’an basɛ ti to ka tara inkpeŋere. La san ana ho bala, ho wan ta’an pu tuunɛ la fii fii? Ho san bɔta ti ho tara halɛ se’ere wana mɔpi, hon kan bɔta ti ho ita fii fii pa’ala hon tari halɛ  dena wa se’em? Ho san bɔta ti ho kaalɛ Baabule la za’a, hon kan bɔta ti ho nyɛta nɛŋa kaala ku fii fii? Tomáš ti to puɣum tɔɣɛ a yele pɔsega la, yuun tiregeri mɛ ti a kaalɛ Baabule la yuunɛ poan ba’asɛ. A yeti: “Mam yuun baŋɛ ti mam yuun ba’ɛ kaala zɔ’ɔra mɛ. Bala la, mam yuun le malum pɔsɛ mɛ ge sankaŋa la, mam maasum mɛ kaala fii fii dabeserɛ woo poan ge ti’isa taɣesa. Bala basɛ ti mam tara la pupeelum la n kaalegɔ la.” Tomáš’ n daa nyɛti pupeelum a Baabule kaalegɔ la poan zuo, ti a daa kɔ’ɔn bɔta ti a kaala zɔ’ɔra dabeserɛ woo poan. Bala la, a daa nyaŋɛ kaalɛ Baabule la za’a ba’asɛ mɛ. c

14. Bem n wan ta’an giŋɛ tɔ?

¹⁴ To san tara inkpeŋere ge tana tomea tara la se’em me yɛla wa ta’an kelum giŋera to mɛ. Makerɛ, ‘yeledi’ima’ ta’an paɛ tɔ ti to puti’irɛ ka le bɔna to vo’osum tuuma la poan. (Pa. 9:11) Yele ta’an paɛ tɔ ti to giila kɔ’ɔsɛ ti to paŋa pɔ’ɛ. (Mag. 24:10) To ka di mi’a la zuo, to tuure ta’an basɛ ti la kpe’em bo to ti to kan ta’an tum to vo’osum poan tuunɛ la. (Arom 7:23) Bii tɔregɔ ta’an kɛ̃ tɔ. (Mt. 26:43) Beni n wan soŋɛ tɔ ti to ta’an ŋmibe sɛla san giŋera tɔ?

15. Sɛla san giŋɛ tɔ bala pa’alɛ ti to koŋe mɛ? Tɔɣɛ pa’alɛ. (Yooma 145:14)

¹⁵ Tɛra ti sɛla san giŋɛ hɔ bala ka pa’alɛ ti ho koŋe mɛ. Baabule la basɛ ti to baŋɛ ti yɛla ta’an paara tɔ ti la kpe’em bo to. Ge Baabule le basɛ ti to baŋɛ ti to wan ta’an tiresum ze’ele Yehowa san soŋɛ tɔ. (Kaalɛ Yooma 145:14.) Mabia la yu’urɛ n de Philip ti to puɣum tɔɣɛ a yele la, tɔɣɛ nɛra n ta’an nyɛta nɛŋa tɔlega se’em la wana: “Mam n koŋe yelese’a la ka pakɛ mam nyɛti nɛŋa tɔlega se’em. Ge la pa’alɛ la sugumnɔɔrɛ se’em ti mam malum tiresum  tum tuunɛ la.” David ti to puɣum tɔɣɛ a yele la yeti: “Mam ni geele yelese’a n paari mam la ti la daɣɛ yelese’a n giŋeri mam ge la dela yɔ’ɔ bɔ’ɔra mam ti n eŋɛ pa’alɛ ti mam tari nɔŋerɛ bɔ’ɔra Yehowa.” Sira, hali la san kpe’em bo to ge ti to kelum mɔɔra ti to tum tuunɛ la, to ni eŋɛ pa’alɛ ti to boti la Yehowa puurɛ n pee. Bisɛ Yehowa puurɛ n wan pee se’em a san nyɛ ti ho kɔ’ɔn tiregera mɛ ti ho tum ho vo’osum poan tuunɛ la!

16. To wan eŋɛ la bem yele san giŋɛ tɔ ti to ka nyaŋɛ tum to vo’osum poan tuunɛ la?

¹⁶ Basɛ ti yele la kumesɛ hɔ. Ti’isɛ bisɛ sɛla n ta’asɛ yele la ge soke homea yeti, ‘N wan ta’an eŋɛ sɛla ti yele wa da le paɛ mam?’ (Mag. 27:12) Saŋa ase’a yɛla la ta’an basɛ ti la niɛ peelumi ti vo’osum poan tuunɛ la to kan ta’an tum dɛ wuu to ti’iseri se’em la. La san ana ho bala, le bisɛ ho vo’osum poan tuunɛ la ge bisɛ nyaa ho wan nyaŋɛ tum dɛ. d Yehowa kan bisɛ ho yoo la hon ka nyaŋɛ tum ho vo’osum poan tuunɛ la.​—2 Ko. 8:12.

17. Beni n sɔi ti la nara ti to tɛ̃ra tuunse’a ti to puɣum nyaŋɛ tum la?

¹⁷ Tɛ̃ra yelese’a ti ho puɣum tum la. Baabule la yeti, ‘Naayinɛ dela tontɔɔdaana, bala a kan tamɛ tuunse’a ti ho tum la.’ (Heb. 6:10) La me ka nari ti ho tamɛ. Ti’isɛ taɣesɛ yelese’a ti ho puɣum tum la, n de wuu zɔtɔ nyɔka la Yehowa, hon tɔɣeri a yelesum la bɔ’ɔra nɛreba bii hon muse ko’om la. Hon daa mɔ se’em ge daa nyaŋɛ tum ho vo’osum poan tuunɛ la, kelum mɔɔra bala ti ho wan nyaŋɛ tum ho vo’osum poan tuunse’ere ti ho tara nananawa la.​—Flp. 3:16.

18. La nari ti to tɛ̃ra la bem to san tuna to vo’osum poan tuunɛ la? (Bisɛ foote la.)

¹⁸ Yehowa wan soŋɛ hɔ ti ho ta’an tum ho vo’osum poan tuunɛ la wuu ɔɔreŋɔdaana n ni ta paɛ zɛ’an ti a ye’a la. Tɛ̃ra ti ɔɔrenɔdoma puurɛ ni pee mɛ la ban boi sore zuo la. Bala mea nɔɔ, ni bisɛ Yehowa n soŋeri ho se’em ti ho ta’an tara pupeelum. Bala n wan soŋɛ ho ti ho ta’an tum ho vo’osum poan tuunɛ la. (2 Ko. 4:7) Ho san ka pisegɛ basɛ, ho wan nyɛ kã’a zo’e zo’e.​—Ga. 6:9.