Bisɛ budibila wa n boi foote la poan la. Dabeem tari en la n boi a ma’a la? La tabelɛ ana hon bala?​— Tɛm bo sebo la ni ana nɛra woo la bala. Baabule la me tɔɣɛ Yehowa zɔdoma n tabelɛ bɔna ba ma’a ti dabeem tara ba yele. Ba ayima dela Eliya. Basɛ ti to zamesɛ a yele.

Eliya yuun boi Israel teŋa yue mɛ ge ti ba dɔɣɛ Yezu. Israel teŋa naba Ahab yuun ka pu’usɛ yelemɛŋɛrɛ Naayinɛ, Yehowa. Ahab la a pɔɣa Yezebel yuun pu’useri la Baal pumpɔreŋɔ yenɛ la. Bala yuun basɛ ti Israel nɛreba zo’e zo’e pu’usa la Baal. Pɔɣenaba Yezebel yuun kɔ’ɔn mɔ’ɛ la nini ɛɛra ti a ku sɛba woo n pu’useri Yehowa, hali la Eliya! Hon mi Eliya n yuun eŋɛ sɛla?​—

Eliya yuun zɔ mɛ! A yuun zɔ kɛ̃ la goo ta suɣɛ taŋa yoko poan. Hon ti’isɛ ti bem zuo ti a yuun zɔ?​— Dabeem n yuun tari en.  Ge la yuun ka nari ti Eliya zɔ dabeem. Ho mi sɛla zuo? A yuun mi soŋa soŋa ti Yehowa wan nyaŋɛ soŋɛ en. Yehowa yuun tabelɛ eŋɛ yelekirisi mɛ pa’alɛ Eliya eŋa n tari paŋa se’em. Yehowa yuun kelese Eliya pu’usegɔ mɛ, basɛ ti bugum ze’ele saazuo sige na. Bala pa’alɛ ti Yehowa wan kelum soŋɛ ni en!

Eliya n yuun boi taŋa yoko poan la, Yehowa yuun soke en yeti: ‘Hon iti la bem kalam?’ Ti Eliya lebese yeti: ‘Mam ma’a n kelum pu’usa hɔ. Mam ma’a n gee ti mam ti’isa ti ba wan ku mam ti dabeem tara mam.’ Eliya yuun ti’isɛ ti ba ku sɛba woo n pu’useri Yehowa la za’a waabi mɛ. Ge Yehowa yuun yele Eliya yeti: ‘Bala daɣɛ yelemɛŋɛrɛ. Nɛreba 7,000 n kelum bɔna pu’usa mam. Tara sukpe’ene. Mam yeti n bo ho la tuunkatɛ!’ Hon ti’isɛ ti Eliya puurɛ yuun pee la sɛla ti a wum la?​—

Hon zamesɛ la bem yese sɛla n yuun eŋɛ Eliya la?​— La ka nari ti ho ti’isa ti ho boi la ho ma’a ti dabeem tara hɔ. Ho tari zɔdoma n nɔŋɛ ho mɛ la Yehowa. Leyɛ’ɛsa, Yehowa n de paŋa za’a daana ge wan soŋɛ ho tɛm woo! Ho puurɛ pee ya la hon mi ti daɣɛ ho ma’a n boi la?​—