BƆBERƐ 5
Hon Wan Tara Suma’asum La Ho Suurɔ Se’em
“Tara nɛreba ninbɔn’ɔn, ge sirihe ya mɛhe, ge bɔ’ɔra nɛreba na’ahegɔ, ge me tara sugure bɔ’ɔra nɛreba.”—Kolose 3:12
Pɔɣedire ni basɛ ti ho le malum nyɛ la deodoma. Ho daa dela mina n tari nɔŋerɛ la gilema bɔ’ɔra ho dɔɣereba ge nananawa ho pɔɣa bii ho sira yele n pakɛ ho gana za’a. Wana ta’an daana ho suurɔ mɛ. Ge ho san ita ania tara Baabule naresum yɛla tuna tuuma, la wan basɛ ti suma’asum bɔna ho deodoma la ho suurɔ teŋasuka.
1 TARA PUTƐSONƐ LA HO SUURƆ
BAABULE LA N YELE SE’EM: “Na’aha ho sɔ la ho ma.” (Epesus 6:2) La ka pakɛ la hon de bunkutɛ se’em, la dela ho na’asa ge bɔ’ɔra ho dɔɣereba gilema. La nari ti ho mina ti ho pɔɣa bii ho sira n de a dɔɣereba dayɔa bii ba bipugula la, me nari ti a kɛlesa a dɔɣereba. Nɔŋerɛ “ka nyuune la nɛreba,” bala da basɛ ti ho pɔɣa bii ho sira n tari nɔɣerɛ bɔ’ɔra a suurɔ la dɛna daaŋɔ bo ho.—1 Korint 13:4; Galatia 5:26.
HON WAN TA’AN EŊƐ SƐLA:
-
Da ni kɔ’ɔn tɔɣɛ pɔ̃ yeti, “Ho dɔɣereba kɔ’ɔn zɛregera mam mɛ” bii “Mam ka malum ita sɛla ti ho ma puurɛ peera”
-
Nana sɛla ti ho pɔɣa bii ho sira mɛ tɔɣera bɔ’ɔra ho la
2 KƆ’ƆN ZEA KANKAŊI HO SAN BISƐ TI LA NARI
BAABULE LA N YELE SE’EM: “Yele dena wa zuo, boraa wan bahɛ ka sɔ la ka ma, ge dekɛ ka mɛŋa naɛ boyena la ka pɔga, te ba bayi la lebege bonyenɛ.” (Pin’ileŋɔ 2:24) Ho san di pɔɣa, ho dɔɣereba ta’an ti’isa ti bamam n kelum sɔna hɔ hali ba ta’an bɔta ba kɛ̃’ɛra ho pɔɣedire yɛla poan.
La dela hon la ho pɔɣa bii ho sira bisɛ yelese’a ti ya ka bɔta ge doose nɔŋerɛ sore poan basɛ ti ba baŋɛ. Da zɔ ya vi, kɔ’ɔn doose ya gilema sore poan yele ba. (Magaha 15:1) Sirege n mea la nyɔkɛ n mea wan soŋɛ hɔ ti ho giile kɛ̃ ho suurɔ ge “me tara suguru daarɛ woo . . . la taaba nɔŋerɛ zuo.”—Epesus 4:2.
HON WAN TA’AN EŊƐ SƐLA:
-
Ho suurɔ san kɛ̃’ɛra ya yɛla poan ti la daana hɔ, sɔsɛ de bo ho pɔɣa bii ho sira
-
Nam ya sɛla ti ya wan eŋɛ ta’an maalɛ yele la soŋa
