Yemboe 7
¿Mbaepa Tumpa Irreino?
1. ¿Mbaepa Tumpa Irreino?
¿Maerapa Jesús Mburuvicha ikaviete vae? (MARCOS 1:40-42)
Tumpa Irreino jaeko metei gobierno ɨvate pegua vae. Kuae Reino oïta opaete gobierno ɨvɨ pegua ipoepɨkape. Kuae Reino rupi oyeapota Tumpa oipota vae ɨvatepe jare ɨvɨpe. Tumpa Irreino ou ñotaiko yande yaiko vaerä metei rami ɨvɨpe. ¡Kuaeko ñee ikavi yae vae! Emongeta Daniel 2:44; Mateo 6:9, 10 jare 24:14.
Metei gobiernope oime kia ombotenonde vae, jaeramo Jehová oñonoma Taɨ Jesucristo Mburuvicharä Irreinope. Emongeta Apocalipsis 11:15.
Emae video ¿Mbaepa Tumpa Irreino?
2. ¿Maerapa Jesús Mburuvicha ikaviete vae?
Tumpa Taɨ jaeko Mburuvicha ikaviete vae ipɨakavi jare oyapoñoi jupigüe vae ramo (Mateo 11:28-30). Imbaepuere yae omborɨ vaerä tëtara retape, körai oyapota omogobierna yave ɨvɨ ɨvategüi. Jesús oñemoingoveyema yave, ojo ɨvate jare oäro Tumpa iyakatu kotɨ oñeñono regua Mburuvicharä (Hebreos 10:12, 13). Jaɨkue rupi, Tumpa omeema chupe mbaepuere omogobierna vaerä. Emongeta Daniel 7:13, 14.
3. ¿Kia reta ndive omogobierna Jesús?
Tumpa oiparavo metei atɨ omogobierna vaerä Jesús ndive. Daniel 7:27 pe oyeenɨi chupe reta oñeñono tee vae reta ani oyeparavo vae reta. Tenonde Jehová oiparavo vae jaeko Jesús jemimondo reta. Ërei jae retañoiäko, oime jeta kuimbae jare kuña iñeerendu vae oyeparavo omogobierna vaerä Jesús ndive. Jesús rami, kuae reta ojo oiko ɨvate omano güire. Emongeta Juan 14:1-3 jare 1 Corintios 15:42-44.
¿Mbovɨpa ojota arape? Jesús jei mbovɨño (Lucas 12:32). Oime 144.000 ojota omogobierna vaerä ɨvɨ Jesús ndive. Emongeta Apocalipsis 14:1.
4. ¿Mbaepa oasa Jesús oïma Mburuvicharä yave?
Jesús omboɨpɨ omogobierna 1914 pe. * Tenonde oyapo vae jaeko omombo aragüi Satanás jare aña reta ɨvɨpe. Iyarasɨ yae reve, Satanás ou oyapo mbaesusere reta (Apocalipsis 12:7-10, 12). Jókuae güive, jeta yae mbae ikaviä ou oasa. Oime ñeraro, karuai, mbaerasɨ jare ɨvɨkana reta. Biblia jeima kuae reta oasata vae jare oechauka michiñoma oata Tumpa Irreino omogobierna vaerä ɨvɨ. Emongeta Lucas 21:7, 10, 11, 31.
5. ¿Mbaepa oyapo oï Tumpa Irreino jare mbaera oyapota kuri?
Opaete ɨvɨ rupi oñemoërakua oï Tumpa Irreinore jare kuae rupi oyemboatɨ “jeta yeyé vae” opaete tëta guasugüi. Jeta yeyé ipɨakavi vae oñeñonoma Jesús ipope. Tumpa Irreino opa omokañɨ pochɨ vae reta yave, ipɨakavi vae reta oasata jare ipuereta oiko avei. Jayave ¿mbae yayapota yaiko vaerä Tumpa Irreino ipope? Yayapotako Jesús jei vae. Emongeta Apocalipsis 7:9, 14, 16, 17.
Jesús oïta Mburuvicharä mil año pegua, jókuae ramboeve ɨvɨ oyeapota metei paraíso Tumpa oipota iyɨpɨ güive rami. Javoi, Jesús oeyata Tu ipope kuae Reino (1 Corintios 15:24-26). ¿Oimepa kia reipota remombeu chupe kuae Reino regua? Emongeta Salmo 37:10, 11, 29.
^ párr. 6 Reipota reikuaa kërai kuae profecía Biblia pegua oyembopo año 1914 pe yave, eecha ñeerɨru ¿Qué enseña realmente la Biblia?, páginas 215-218.
