YEMBOE 59
Nde ndepuere remoaguanta persecución
Opaete cristiano reta oiporarata ko amogüe yemboavai ani persecución. ¿Yakɨɨyeta pa jókuae güi?
1. ¿Maera pa mbaetɨ ñanemopɨ̈akañɨ persecución?
Biblia omoësaka kavi “opaete Cristo Jesús re oipota oiko jupi rupi vae oiporara yaeta ko” (2 Timoteo 3:12). Amogüe kia reta omboavai Jesús oyeokuai vaerä Jehová pe jare oiporarauka chupe, echa jae ɨvɨ peguaä ko. Yande mbaetɨ vi ko, jáeramo mbaetɨ ñanemopɨ̈akañɨ gobierno reta jare organización religión pegua yandemboavai yave (Juan 15:18, 19).
2. ¿Kërai pa ñaïndaivi kavita persecución peguarä?
Añave voi ñañemomɨ̈ratata ko yarovia katu vaerä Jehová re. ¿Kërai pa yayapo jókuae? Ara ñavo yayerureta jare yamongetata Iñee. Jaeramiño vi, yajata yemboatɨ reta congregación pe. Jókuae omeeta ndeve mɨ̈rata remonecesita vae remoamɨri vaerä oipotagüe yemboavai ani persecución, yepe tëi ndemboavai vae jae ko nerëtara reta. Apóstol Pablo, oiporara avei vae, oikuatía: Jehová ko “chemborɨ vae. Ngaraa akɨɨye mbae oyapota cheve vae güi” (Hebreos 13:6).
Ïru mbae má yandemborɨ vae ñaneräta ngatu vaerä jae ko ñamoërakua ñoi Tumpa Iñee re vae. Jókuae yandemboe yarovia katu vaerä Jehová re jare ñamoamɨri vaerä kɨɨye kia reta güi (Proverbios 29:25). Añave neräta ngatu yave, reïndaivi kavita reï jekuaeño remoërakua vaerä, yepe tëi gobierno oipota omombɨta yandembaravɨkɨ (1 Tesalonicenses 2:2).
3. ¿Yandemborɨ ra ko ñamoaguanta vae persecución?
Mbaetɨ ko ikavi ñanoi persecución. Ërei, ñamoaguanta yave persecución, yandeporogüɨrovia má oñemomɨ̈rata. Jare yayemboya katu Jehová re yaecha yave jae yandemborɨ ko yarovia yave mbaetɨ ma ko ñamoaguanta vae (emongeta Santiago 1:2-4). Jehová pe jasɨ katu yaiporara yave, ërei oyerovia oecha mbaetɨ ñañemoamɨriuka yave. Biblia jei: “peiporara yave ikavi vae peyapo jeko pegua, jókuae ko omboyeroviata Tumpa” (1 Pedro 2:20). Opaete omoaguanta vae jare jupi oiko vae reta pe, Jehová omeeta tekove opambae vae ɨvɨ ipöra vae pe (Mateo 24:13).
YAIKUAA KATU VAERÄ
Yaecha kërai pa yandepuere yaiko jupi Jehová pe yepe tëi oime persecución. Jare kërai Jehová omboekovia yandeve ñamoaguanta yave.
4. Nde ndepuere remoaguanta nerëtara reta ndemboavai yave
Jesús jei amogüe ñanerëtara reta ipuere ko yandemboavai yamboete vaerä Jehová. Pemongeta Mateo 10:34-36 jare peyemongeta jese:
-
Kia oiparavo oyeokuai vaerä Jehová pe yave, ¿mbae pa ipuere oyapo jëtara reta?
Peikuaa vaerä amogüe kia oasa körai vae, pemae VIDEO re. Javoi peyemongeta jese:
-
¿Mbae pa reyapota metei tëtara ani metei amigo nemokɨ̈reɨ yave agüɨye mo reyeokuai vaerä Jehová pe?
Pemongeta Salmo 27:10 jare Marcos 10:29, 30. Pemongeta ma yave texto reta, peyemongeta jese:
-
¿Kërai pa ipuere ndemborɨ kuae promesa reta remoamɨri vaerä nerëtara ani neamigo reta ndemboavai yave?
5. Agüɨye emaeño persecución ndeopia jekuaeño remboete vaerä Jehová
Ñaneräta ngatuta ko yayeokuai vaerä Jehová pe ïru kia reta oipota yandeopia yave. Pemae VIDEO re jare peyemongeta jese:
-
¿Mbae mbae reta video pegua omee ndeve mɨ̈rata neräta ngatu vaerä?
Pemongeta Hechos 5:27-29 jare Hebreos 10:24, 25. Pemongeta ma yave texto reta, peyemongeta jese:
-
¿Maera pa ikavi ete yae jekuaeño yayeokuai Jehová pe, yepe tëi mburuvicha reta oipotaä ñamoërakua ani yayemboatɨ?
6. Jehová ndemborɨta remoaguanta vaerä
Testigos de Jehová ambuaembuae año güɨnoi vae jare ïru tëta tëta guasu güi oiko jupi reve Jehová pe, yepe tëi oiporara persecución. Peikuaa vaerä kërai oyapo jókuae, pemae VIDEO re. Javoi peyemongeta jese:
-
¿Mbae pa omborɨ kuae testigo reta omoaguanta vaerä persecución?
Pemongeta Romanos 8:35 jare 37-39, jare vi 2 Corintios 4:7. Pemongeta ma yave texto reta, peyemongeta jese:
-
¿Kërai pa ndemborɨ kuae versículo reta rerovia katu vaerä ndepuere ko remoaguanta oipotagüe yemboavai?
Pemongeta Mateo 5:10-12 jare peyemongeta jese:
-
¿Maera pa ndepuere ko reyerovia katu, yepe tëi reiporara persecución?
Jeta kia reta oyeokuai Jehová pe vae omoaguanta yemboavai reta. ¡Nde ndepuere vi ko!
AMOGÜE RETA JEI VAE: “Che ngaraa ko chepuere amoguanta persecución”.
-
¿Mbae versículo reta pa ndepuere reechauka jökorai oyemongeta vae pe?
YAYEMBOE MA VAE
Jehová oaɨu ñañemomɨ̈rata vae yayeokuai vaerä chupe, yepe tëi oime yemboavai reta. ¡Iyemborɨ rupi yandepuere ko ñamoaguanta!
Emoësaka
-
¿Cristiano reta maera pa mbaetɨ ñanemopɨ̈akañɨ kia reta oiporarauka yave yandeve?
-
¿Kërai pa ndepuere reïndaivi kavi persecución peguarä?
-
¿Mbae pa ndemborɨ rerovia katu vaerä ndepuere ko reyeokuai Jehová pe, yepe tëi oime yemboavai reta?
EEKA KUAE
Vea cómo ayudó Jehová a un hermano joven cuando estuvo preso por ser neutral.
Descubra qué le ayudó a un matrimonio a servir fielmente a Jehová por muchos años a pesar de la oposición.
Aprenda a enfrentarse a la persecución con valor.
“Preparémonos ahora para la persecución” (La Atalaya, julio de 2019)
¿Qué debemos saber sobre la oposición de la familia? ¿Y cómo podemos mantener la paz y ser leales a Jehová?
“La verdad no trae ‘paz, sino espada’” (La Atalaya, octubre de 2017)
