Heta mitãrusu ha mitãkuña heʼi oñemboʼeha Ñandejárape péro orrekonose avei ndojapoiha upéva káda día. Upévare algúno oikuaase, ¿pe ñemboʼe piko ñanepytyvõ ñañeñandu porã hag̃uánte, térã oservi ótra kosarã avei?

•  ¿Mbaʼépa heʼise ñañemboʼe?

•  ¿Añetehápepa ñanerendu Ñandejára ñañemboʼe jave?

•  ¿Mbaʼe mbaʼe rehepa ikatu ñañemboʼe?

•  Mbaʼépa heʼi umi mitãrusu

 Ñañemboʼe jave ñande ñañemongeta pe okrea vaʼekuéndi ko univérso ha entéro mbaʼe. ¡Impresionánte upéva ajépa! Ñande ningo ndaikatúi ñañekompara ni michĩmi Jehováre, upéicharamo jepe la Biblia heʼi haʼe ‘noĩriha mombyry ñandehegui’ (Hechos 17:27). Ha ndahaʼéi voi upévante, Santiago 4:8-pe jajuhu peteĩ invitasión iporãitereíva. Upépe heʼi: “Peñemoag̃uíkena Ñandejárare, ha haʼe oñemoag̃uíta penderehe”.

 ¿Mbaʼéichapa nde ikatu reñemoag̃ui Ñandejárare?

•   Primero reñemboʼévo chupe, péicha nde reñeʼẽ hína Ñandejárape.

•   Segundo ikatu restudia la Biblia, péicha Ñandejára oñeʼẽ ndéve.

 Péicha emombaretéta ne amista Ñandejárandi pórke reñemboʼévo emombeʼúta chupe mbaʼépa nde reñandu, ha releévo la Biblia rehendúta mbaʼépa haʼe heʼi ndéve.

 Jeremy heʼi: “Ñañeʼẽvo Jehovápe ñañekomunika hína pe persóna iñimportantevévandi oĩva ko univérsope. Ha péva haʼe peteĩva umi priviléhio tuichavéva ikatúva jahupyty”.

 Miranda heʼi: “Ahechakuaa añemoag̃uiveha Jehováre amombeʼúvo chupe mbaʼéichapa añeñandu”.

 Ikatu oime nde rejerovia Ñandejárare ha reñemboʼe avei chupe, ¿péro sera ke haʼe ohendu reñemboʼe jave chupe? Oĩ algúno ndogueroviáiva upéva, péro la Biblia oasegura ñandéve: “Ñandejára, nde ningo rehendu umi hénte ñemboʼe” (Salmo 65:2). Ha heʼi voi ikatuha remombeʼu chupe entéro mbaʼe ndepyʼapýva térã ndepreokupáva, ¿mbaʼérepa? ‘Pórke haʼe ojepyʼapy nderehe’ (1 Pedro 5:7).

 Epensamína ko mbaʼére: Oime vaʼerã nde pyʼỹi remboyke tiémpo reñemongeta hag̃ua ne amigokuérandi. Upeichaite avei ikatu rejapo Ñandejárandi, ikatu reñemongeta meme hendive pe ñemboʼe rupive. Ha iporãta voi reipurúramo héra tee Jehová (Salmo 86:5-7; 88:9). Ha la Bíbliape ojejapo voi ndéve peteĩ invitasión iporãitereíva. Upépe heʼi: ‘Eñemboʼékena kontinuadoite’ (1 Tesalonicenses 5:17).

 Moises heʼi: “Añemboʼe jave añemongeta hína che Túa yvagapeguándi, ha upéicha jave ikatu amombeʼupaite chupe mbaʼéichapa añeñandu”.

 Karen heʼi: “Amombeʼu Jehovápe umi mbaʼe iñimportánteva chéve g̃uarã amombeʼuháicha che sýpe térã peteĩ che amigaitépe”.

 La Biblia heʼi: “Oimeraẽ situasiónpe pejerure Ñandejárape penepytyvõ hag̃ua, peñemboʼe ha pejerure asývo chupe, ha peagradese avei chupe” (Filipenses 4:6).

 ¿Heʼisépa upéva ikatuha remombeʼu Ñandejárape ne provlemakuéra? Kláro ke si. La Biblia heʼi voi: “Emoĩ Jehová pópe umi mbaʼe ndepyʼapýva, ha haʼe katuete nepytyvõta” (Salmo 55:22).

 Péro ndahaʼéi sólamente ne provlemakuéra ikatúva remombeʼu Ñandejárape reñemboʼe jave. Peteĩ mitãkuña hérava Chantelle heʼi: “Aikóramo tódo el tiémpo ajerure Jehovápe chepytyvõ hag̃uánte, ndaikatumoʼãi haʼe che haʼeha iñamíga. Upévare chéverõ g̃uarã primeroite jaagradese vaʼerã Ñandejárape ñañemboʼe jave chupe, ha legálmente hetaiterei motívo jareko jaagradese hag̃ua”.

 Epensamína ko mbaʼére: ¿Mbaʼe mbaʼe rehepa ikatu reagradese? Epensamína mbohapy mbaʼe ikatúvare reagradese Jehovápe estedía.

 Anita heʼi: “Umi mbaʼe isensillomívare jepe ikatu jaagradese Jehovápe, por ehémplo jahechávo peteĩ yvoty jepe”.

 Brian heʼi: “Ikatu repensa Ñandejára kreasión porãitére térã peteĩ versíkulo de la Biblia ndegustaitereívare, ha upéi eagradese Jehovápe umívare”.