ENOC oikóma kuri heta tiémpore, orekómane 365 áñorupi. Ñandéve g̃uarã ijetuʼu lénto jaguerovia hag̃ua oĩne hague orekóva upe eda, pórke koʼág̃arupi hetaitérõ jaiko 80 áño rupíntema. Péro ojapo 5.000 áño atrás, peteĩ persóna ndaitujaietéiti kuri orekóramo upe eda. Upérõ ningo umi hénte oiko vaʼekue hetaiteve áño ñandehegui. Por ehémplo, Adán orekóma kuri mas de 600 áño Enoc onasérõ guare, ha upe rire osegi oiko 300 áño. Oĩ voi Adán familiare oiko vaʼekue hetaiteve chugui. Upévare ikatu jaʼe Enoc imbaretéiti hague orekóramo jepe 365 áño. Péro añetehápe ndaipukuveietéma kuri la hekovemi.

Amalisia Enoc rekove oĩ kuri en pelígro. Ikatu ñañeimahina mbaʼeichaitépa oiméne odipara ohóvo ha ndaikatúi oipeʼa iñakãgui umi hénte orreaksiona lája omombeʼúrõ guare chupekuéra Ñandejára mensáhe. Hova ñekambiapaite hikuái ha ipochy rendy voi. Umi hénte ndaijaʼéi Enoc rehe, nohenduséi hikuái pe mensáhe ha ndoikuaaséi mbaʼeve Ñandejáragui. Jaikuaaháicha, haʼekuéra ndaikatúi oataka Jehovápe voi, péro ikatu oataka imensahérope. Enoc oiméne ojepyʼapy ifamíliare ha opensa ohóvo ohecha jeýnepa chupekuéra. Por ehémplo hembireko, itajyrakuéra, itaʼýra Matusalén térã iniéto Lamécpe (Génesis 5:21-23, 25). Péro, ¿upepevéntemapa og̃uahẽta Enoc?

La Bíbliape ningo tres hendápente oñemensiona Enócpe ha oĩ heta mbaʼe ndaikatúiva ñantendepa hekovekuégui (Génesis 5:21-24; Hebreos 11:5; Judas 14, 15). Upéicharamo jepe, koʼã versíkulo ñanepytyvõma jaikuaa hag̃ua mbaʼéichapa rakaʼe ko kuimbaʼe ojerovia mbaretetéva. ¿Erekópa nde peteĩ família rekuida vaʼerã? ¿Ndépa redefendémava peteĩ mbaʼe regueroviáva oĩ porãha? Upéicharõ tuichaiterei nepytyvõta Enoc ehémplo.

Enoc ningo pe ñemoñare sieteha Adán guive. Upérõ umi hénte oiko are kuri hiʼag̃uive rupi pe perfeksióngui, upéicharamo jepe upérõ umi hénte desastretéma kuri. Oñepyrũma hikuái hekokyʼa, ja ndoikuaasevéima mbaʼeve Ñandejáragui ha iviolentoiterei avei. Ojogua hikuái Caínpe, upe ojuka vaʼekue iñermáno Abélpe. Péro amalisia Caín rire oĩ vaʼekue peteĩ ifamiliare iviolentove jey vaʼekue chugui ha iñañaiteve. Upe guive umi hénte iñaña de ótro voi. Haʼekuéra oñepyrũ oipuru Jehová réra, péro ndahaʼéi omombaʼeguasu hag̃ua chupe, síno omongyʼa hag̃ua (Génesis 4:8, 23-26).

Upe tiémpope la majoría umi hénte ndorrespetaiete voi Ñandejárape, upévare Enoc odesidi vaʼerã kuri osegítapa chupekuéra térãpa oservíta Ñandejára Jehovápe añoite, upe ojapo vaʼekue pe yvága ha yvy. ¿Mbaʼépa odesidíta? Génesis 5:22 heʼi: “Enoc osegi ojapo Ñandejára rembipota” [TNM]. Oime vaʼerã oipytyvõiterei raʼe chupe Abel ehémplo, haʼe ningo siémpre ifiél vaʼekue Jehovápe ha omano voi ojapo haguére hembipota. Péicha jahechakuaa Enoc ndojoguaiete hague umi hénte itiempopeguápe, pórke haʼe oñehaʼã meme vaʼekue oiko Ñandejára oipotaháicha. Haʼe hína pe primera persóna oñemensionáva la Bíbliape ojapo hague upéva.

 La Biblia heʼi avei Enoc osegi hague ojapo Ñandejára rembipota onase rire itaʼýra Matusalén. Haʼe orekópe 65 áñorupi onase ifamília. Ha noñemensionáiramo jepe mbaʼéichapa héra hembireko ni mboýpa ifamília, jaikuaa omenda hague ha heta itaʼýra ha itajýra hague. Enoc okuida porãne raʼe ifamíliare Jehová oipotahaichaite, upévarente ojeʼe kuri hese ojapoha Ñandejára rembipota. Haʼe oikuaa porã vaʼekue Jehová oipotaha ifiél hembirekópe (Génesis 2:24). Ha oiméne oñehaʼãmbaite vaʼekue avei omboʼe ifamíliape ohayhu hag̃ua Jehovápe. Péro, ¿mbaʼépa jaikuaave chuguikuéra?

La Bíbliape noñeñeʼẽguasúi hesekuéra. Noñemombeʼúi ñandéve oimépa itaʼýra Matusalén ojerovia raʼe Ñandejárare, ojeʼénte hese oiko areve hague entéro ótro yvypóragui ha omano hague pe áño oiko haguépe pe Dilúvio. La jaikuaáva Enoc niéto hérava Lamec ojerovia mbarete hague Jehováre, ha haʼe ojevale hague hese oprofetisa hag̃ua mbaʼépa oikóta itaʼýra Noégui pe Dilúvio rire. Péro Lamec orekórõ guare 100 áño rasami omano vaʼekue ijavuélo Enoc. ¿Ha mbaʼépa oiko raʼe Noégui? Haʼe ojapo vaʼekue avei Ñandejára rembipota ojapo haguéicha ivisavuélo Enoc. ¡Ajépa ehémplo porãite oheja Enoc ifamiliakuérape! Noé ningo ndoikuaajepéi vaʼekue chupe, péro oime vaʼerã katuete ihentekuéra omombeʼu chupe mbaʼéichapa rakaʼe haʼe. Ikatu oime ojapo raʼe upéva itúa Lamec, térã ijavuélo Matusalén, o ikatu voi Enoc túa hérava Jared, haʼe omano vaʼekue Noé orekórõ guare 366 áño (Génesis 5:25-29; 6:9; 9:1).

¡Enoc idiferénte vaʼekue Adángui! Haʼe perféktoramo jepe opeka Ñandejára kóntrape, ha upéva káusare ifamiliakuéra oiko peteĩ múndo ivaipa jepévape, oĩháme violénsia ha miséria. Enoc katu iñimperféktoramo jepe osegi ojapo Ñandejára rembipota ha upéicha oheja peteĩ ehémplo iporãitereíva ifamiliakuérape. Adán katu opensa vaʼekue ijehénte ha omano Enoc orekórõ guare 308 áño. ¿Ombyasýpa raʼe ifamiliakuéra haʼe omanórõ guare? Ndajaikuaái añete upéva, péro la jaikuaa porãva Enoc osegi hague ojapo Ñandejára rembipota (Génesis 5:24).

Oiméramo nde eguereko peteĩ família rekuida vaʼerã, ideprovechoitereíta ndéve Enoc ehémplo. Añetehápe ningo iñimportánte rehupytyka ne famíliape umi mbaʼe oikotevẽva, péro iñimportanteve hína reipytyvõ chupekuéra oñemoag̃ui hag̃ua Ñandejárare (1 Timoteo 5:8). Ani erénte chupekuéra ojapo hag̃ua peteĩ mbaʼe, síno nde voi rejapo vaʼerã umi mbaʼe eréva. Ha rejeroviáramo Jehováre Enoc ojapo haguéicha, rehejáta peteĩ ehémplo iporãitereíva ne famíliape.

Enoc tiémpope ningo umi hénte ndojeroviái Ñandejárare, ha upévare haʼe oñeñandúne raʼe haʼeño peteĩ. ¿Péro ohechakuaápa raʼe Jehová upéva? Si ohechakuaa. Peteĩ jey haʼe ojevale ko isiérvo ijerovia mbaretetévare omeʼẽ hag̃ua peteĩ mensáhe umi hénte itiempopeguápe. Péicha Jehová oiporavo chupe iprofetarã. Enoc haʼe pe primer proféta oñemensionáva la Bíbliape opyta vaʼekue rrehistrádo la heʼi vaʼekue. ¿Mbaʼéichapa jaikuaa upéva? Pórke heta áño upe rire, Jesús ermáno hérava Judas  oskrivi vaʼekue ikártape umi mbaʼe heʼi vaʼekue Enoc. *

¿Mbaʼépa la oprofetisa vaʼekue Enoc? Haʼe heʼi: “¡Péina! Jehová ou hetaiterei ánhel imarangatúva reheve, ohusgávo opavavépe, ha okastiga hag̃ua entéro iñañávape hembiapo vai haguére. Ñandejára ojapóta upéicha hembiapo vai haguére hikuái. Haʼekuéra ningo pekadór nomombaʼéiva chupe ha oiko okopi hese” (Judas 14, 15). Enoc ningo oĩ vaʼekue segúro koʼã mbaʼe heʼíva oikotaha katuete. Chupe g̃uarã ningo Ñandejára ja okumplipaitéma ko profesía. Enoc ha hetave proféta ontendeka vaʼekue upe heʼíva hikuái katuete oñekumplitaha ha upévare oprofetisa jave oñeʼẽ ku oikoramoguáichama voi (Isaías 46:10).

Ikatu oime Enoc heʼi vaʼerã kuri ko mensáhe entéro umi héntepe. ¿Ifásilnepa raʼe chupe upéva? Ñanemanduʼami jeýna la heʼi vaʼekuére, haʼe heʼi chupekuéra iñañaha, hembiapo vaiha ha okopiha Ñandejárare. Ko profesía ohechauka porã umi hénte opuʼã guive Ñandejárare oho vaipaitemaha hese. Upévare Jehová ohundietéta kuri chupekuéra hiʼanhelkuéra imarangatúva ndive. ¡Ajépa ipyʼaguasuete Enoc ajeve heʼi koʼã mbaʼe! Hiʼarive haʼeñoite ojapo upéva. Ha ikatu jaʼe iniéto Lamec oiméne hag̃ua orrespeta ha oguerohoryeterei chupe upévare.

Ha ñande, ¿jahechápa hína ko múndo Ñandejára ohechaháicha? Haʼe ningo heʼika vaʼekue umi hénte añáme Enoc rupive ohundipaitetaha chupekuéra hembiapo vaieterei haguére. Ha ikatu jaʼe koʼag̃aite peve Ñandejára opensaha upéicha. Enoc heʼi vaʼekue ningo oñekumplíma kuri Jehová oguerúrõ guare pe Dilúvio ha ohundipaite umi hénte añáme Noé tiempopeguápe. Péro upéva añetehápe michĩmínte ohechauka la ojapótavagui koʼẽrõite (Mateo 24:38, 39; 2 Pedro 2:4-6). Koʼág̃a Ñandejára oĩma avei preparádo hiʼanhelkuéra imarangatúvandi ou hag̃ua ohundi umi hénte añáme. Upévare tekotevẽ pyaʼe jaha jaavisa umi héntepe la oikótava. Ha oiméramo reñeñandu neaño pórke ne família nandeapojái, nemanduʼa vaʼerã Jehová arakaʼeve ndohejareíri hague Enócpe. Haʼe núnka ndofallamoʼãi umi ifiélvape chupe.

¿Mbaʼéichapa omano rakaʼe Enoc? Ikatu jaʼe noñentendeporãiha mbaʼeichaitépa añetehápe oiko raʼe upéva. Génesis 5:24-pe heʼínte: “Enoc osegi ojapo Ñandejára rembipota. Upéi Enoc odesaparese pórke Ñandejára odesidi upéicha”. ¿Mbaʼépa heʼise Enoc “odesaparese” hague? Tiémpo rire apóstol Pablo omyesakãmie upéva heʼívo: “Enoc ojerovia rupi, Ñandejára ogueraha vaʼekue chupe ani hag̃ua ohasa asy omanóvo, ha ndojetopái vaʼekue mamove hendápe, Ñandejára ogueraha rupi chupe. Péro upe mboyve Ñandejára ohechauka vaʼekue Enócpe oguerohoryha chupe” (Hebreos 11:5). ¿Mbaʼépa heʼise raʼe Pablo heʼívo Ñandejára ogueraha hague chupe? Oĩ Biblia otradusíva ko párte heʼívo Ñandejára ogueraha hague Enócpe yvágape. Péro upéva ndahaʼéi siérto. ¿Mbaʼérepa? La Biblia omombeʼu rupi Jesús haʼe hague pe primera persóna oñemoinge jey vaʼekue oho hag̃ua oiko yvágape (Juan 3:13).

Upéicharõ, ¿mbaʼépa añetehápe heʼise Enócpe ojegueraha hague “ani hag̃ua ohasa asy omanóvo”? Amalisia Jehová oipeʼánte chugui hekove pono omano asy ikontrariokuéra pópe. Péro, ¿mbaʼéichapa Enoc oikuaa raʼe Ñandejára “oguerohoryha chupe”? Omano mboyvemi, ikatu oime Jehová ohechauka raʼe chupe peteĩ visión rupive mbaʼéichatapa  hína ko yvy, oiko rire chugui peteĩ paraíso. Ha ohechakuaa porã rire Jehová oguerohoryha chupe, Enoc omano. Pablo oñeʼẽrõ guare hese ha umi ótro kuña ha kuimbaʼe ijerovia mbaretévare, heʼi voi: “Enterove haʼekuéra ojerovia omano meve” (Hebreos 11:13). Enoc omano rire, oiméne umi ikontrário ojeporeka raʼe hetekuére, péro ndotopái mamove hendápe, pórke Ñandejára ombodesaparese la hetekue. Ikatu oime ojapo raʼe upéva pono oñemboharái hese hikuái, térã ojepuru oñemombaʼeguasu hag̃ua chupe. *

Jaikuaa rire koʼã mbaʼe, ñañeimahinamína mbaʼéichapa oiméne omano rakaʼe Enoc. Ñanemanduʼa vaʼerã ndajaikuaaiha añetehápe mbaʼeichaitépa rakaʼe oiko upéva, péro ikatu por ehémplo ñañeimahina Enoc hatã odiparaha ohóvo. Haʼe ja ikaneʼõitereíma anga ha nomeʼẽveietéma. Umi hénte ipochyeterei umi mbaʼe haʼe heʼi vaʼekuére ha ojukase voi chupe. Hasypeve anga Enoc ojuhu peteĩ lugár okañy ha opytuʼuʼimi hag̃ua avei, péro haʼe oikuaa porã ndaikatumoʼãiha okañy are upépe. Upémarõ opytuʼu aja oñepyrũ oñemboʼe asy Ñandejárape. Upepete oñepyrũ oñandu peteĩ pyʼaguapy ndaijojaháiva, ha mbeguekatúpe oñandu oĩramoguáicha peteĩ lugár iporãitereívape.

Ko lugár idiferentete pe haʼe oikohágui. Chupe g̃uarã iporã pe hardín de Edén iporã haguéicha, péro ndaipórinte umi keruvín oñatendéva pono ojeike upépe. Ohecha avei hetaiterei kuimbaʼe ha kuña hesãi asýva ha ovyʼaitereíva. Ndaiporivéima umi ndaijaʼéiva hapicháre ha ivioléntova, síno entéronte oiko pyʼaguapýpe. Ko visión rupive, haʼe ohechakuaa Ñandejára ohayhu ha oguerohoryha chupe. Enócpe ogustaiterei upe lugár porãite ha oĩse voi upépe pára siémpre. Saʼi saʼípe oñandu ohóvo peteĩ pyʼaguapy noñandúiva arakaʼeve, omboty hesa ha omano.

Enoc ningo aretereíma omano hague, péro jaikuaa porã Ñandejára arakaʼeve ndahesaraimoʼãiha chugui. Ha Jesús opromete haguéicha tiémpo rire, og̃uahẽta peteĩ día umi omano vaʼekue ohendutaha Cristo ñeʼẽ ha osẽta pe sepultúragui. Péicha oikove jeýta hikuái peteĩ múndo pyahu neporãmba jepévape oĩháme pyʼaguapy (Juan 5:28, 29).

¿Ha nde, ¿reĩsépa avei upépe? Eñeimahinamína mbaʼéichapa reñeñandúta reikuaa vove Enócpe. ¡Ajépa igustoitéta! Epensamíntena umi mbaʼe ikatútava reporandu chupe. Upépe haʼete voi omombeʼúta ñandéve umi mbaʼe ohasa vaʼekue omano mboyve, ha oikópa raʼe ñande ñañeimahina haguéicha. Péro upearã tekotevẽ jajapo avei Enoc ojapo haguéicha. Oñeʼẽ rire Enoc rehe, apóstol Pablo heʼi: “Ndajajeroviáirõ, Ñandejára ni mbaʼevéicharõ nañandeguerohorymoʼãi” (Hebreos 11:6). ¡Ajépa upéva ñanemokyreʼỹ jajerovia hag̃ua avei Enoc ojerovia haguéicha!