Jesús omboʼevaʼekue

Ikatúpa umi ánhel ñanepytyvõ térã ñandeperhudika?

Jesús oikomavaʼekue yvágape Itúva ndive “ko yvy ojejapo mboyve” (Juan 17:5). Upévare jajeroviakuaa haʼe ombohovái porãitereitaha ñandéve koʼã porandu.

Oipyʼapýpa umi ánhelpe ñande jajapóva?

▪ Jesús omombeʼuvaʼekue umi ánhel ojepyʼapyha ñanderehe. Haʼe heʼi: ‘Ñandejára anhelkuéra ovyʼa peteĩ hembiapo vaíva ojevýrõ’ (Lucas 15:10, NM).

Avei heʼi haʼekuéra ñanepytyvõvaʼerãha ñaĩ porã hag̃ua ñande Ru yvagapegua renondépe. Upévare heʼi hemimboʼekuérape ani hag̃ua ojapo mbaʼeve omoñepysangavaʼerã iñermanokuérape, orekógui hikuái ‘umi ánhel oñangarekóva hesekuéra ha oĩva tapiaite Itúva yvagapegua renondépe’ (Mateo 18:10, NM). Péro upéva ndeʼiséi umi omoirũva chupe oguerekoha peteĩ ánhel de la guárda. Síno ohechauka porã Ñandejára rembijokuái oĩva yvágape ojepyʼapyha opavave kristiáno teére.

 Mbaʼéichapa Satanás ikatu ñandeperhudika?

▪ Jesús heʼivaʼekue hemimboʼekuérape Satanás ndoipotaiha avave oikuaa Ñandejárape. Upévare heʼi: ‘Oĩ ningo umi ohendúva Ñandejára ñeʼẽ ha nontendéi mbaʼépa heʼise, ha upéi ou pe aña ha oipeʼa ipyʼapyguikuéra pe ñeʼẽ’ (Mateo 13:19, NM).

Jesús omombeʼu avei peteĩ ehémplo oñeʼẽva pe kuimbaʼe oñotỹvaʼekuére trígo ikokuépe. Upéicha omyesakã mbaʼépa Satanás oiporu ombotavy hag̃ua hetápe. Pe kuimbaʼe oñemitỹva orrepresenta Jesúspe, ha pe trígo umi kristiáno ohótava yvágape oisãmbyhy hag̃ua hendive. Ko ehémplope omombeʼu ou hague peteĩ ‘ndaijaʼéiva hese ha oñotỹ ñana pe trigotýpe’. Pe ñana térã sisáña orrepresenta umi kristiáno guaʼúpe, ha ‘pe ouvaʼekue oñotỹ ñana katu haʼehína Aña Ruvicha’ (Mateo 13:25, 39, NM). Pe trígo ha ñana ningo ojojogua okakuaa aja, upéicha avei umi kristiáno guaʼu ikatu ojogua umi kristiáno teépe. Péro koʼã kristiáno guaʼu ombotavy hapichakuérape, omboʼévo heta mbaʼe noĩriva la Bíbliape ha upevakuére umi hénte naiñeʼẽrendúi Ñandejárape. Upéicha Satanás oiporu umi rrelihión japu hetápe omomombyry hag̃ua Jehovágui.

Mbaʼéichapa ikatu ñañeñangareko Satanásgui?

▪ Juan 14:30-pe Jesucristo heʼivaʼekue Satanás haʼeha “ko múndo ruvicha”. Ha avei ñanemboʼe mbaʼéichapa ñañeñangarekovaʼerã chugui. Haʼe opensa hemimboʼekuérare ha oñemboʼe Itúvape kóicha: ‘Ajerure ndéve reñangareko hag̃ua hesekuéra mbaʼe vaígui. Haʼekuéra ningo ndoikovéima ko múndope ojeikoháicha, oiko guei tekopotĩ ha hekópe che aikoháicha. Ehekomboʼe porã chupekuéra pe añetegua, ne ñeʼẽ ningo pe añetegua’ (Juan 17:15-17, ÑÑB). Upéicharõ, tekotevẽterei jaikuaa Ñandejára Ñeʼẽ heʼíva ñañeñangareko hag̃ua ko múndo añágui.

Ñanepytyvõpa umi ánhel koʼã tiémpope?

▪ Jesús heʼivaʼekue ára pahápe ‘umi ánhel osẽtaha omboyke hag̃ua umi iñañávape hekopotĩva apytégui’ (Mateo 13:49, NM). Ñande koʼág̃a jaikoñaína pe ára pahápe ha hetaiterei hénte ohendu porã ha omombaʼe Ñandejára marandu oñeʼéva Irréino rehe (Mateo 24:3, 14).

Péro jaikuaavaʼerã Ñandejára ndoguerohoryiha peteĩ tapichápe oñepyrũ haguérente ostudia la Biblia. Jehová oiporu umi ánhelpe oipytyvõ hag̃ua hembiguaikuérape ha ohecha hag̃ua mávapa añete ohayhu Chupe ha mávapa ndojaposéi oaprendéva. Jesús heʼi porã vaʼekue Ñandejára Jehová oguerohoryha ‘umi ipyʼaporãvape, ohendúva Iñeʼẽ ha ogueroviáva. Koʼãva hiʼa porã ohasa asýramo jepe’ (Lucas 8:15, NM).

Reikuaasevéramo ehecha heʼíva ko lívro kapítulo 10-pe, Mbaʼépa añetehápe omboʼe la Biblia? ojapo testigos de Jehová.

[Nóta oĩva taʼanga ndive páhina 9]

Umi ánhel oipytyvõ heta tapicha ipyʼaporãvape oikuaa hag̃ua Ñandejárape