Ñaipytyvõkena umi sy ha túva haʼeñóvape

NDÉPA rehechakuaa mbaʼeichaitépa ijetuʼu peteĩ túva térã sýpe g̃uarã omongakuaa haʼeño ifamília? Haʼekuéra ningo oiporukuaavaʼerã itiémpo ha imbaretekue ojapo hag̃ua umi mbaʼe oñehaʼarõva chuguikuéra: osẽvaʼerã ombaʼapo, omopotĩ hóga, ombaʼejogua, oñekosina ha ojapo hetave mbaʼe ogapypegua. Hiʼarive oñangarekovaʼerã ifamíliare ikatu hag̃uáicha hesãi ha ovyʼa. Tekotevẽ avei oñembosarái hendivekuéra ha ijáramo omboyke tiémpo ijupe g̃uarã.

Koʼág̃a rupi heta hetavéma umi ojetopáva haʼeño omongakuaa hag̃ua ifamília, ha hiʼarive ndaiporiguasúi oipytyvõséva chupekuéra. Peteĩ kuñakarai heʼi: “Amongakuaa rire cheaño che membýpe ae amombaʼe umi sy haʼeñóvape”. Ha ñande, noiméipa ñanderesarái mbaʼe umi túva térã sýgui omongakuaáva haʼeño ifamília? Jahechamína mbohapy mbaʼe ñanemomýitava ñaipytyvõ hag̃ua chupekuéra.

Mbaʼérepa ñaipytyvõvaʼerã chupekuéra

Oikotevẽ hikuái ñanderehe. Peteĩ viúda orekóva 41 áño ha mokõi imembýva heʼi: “Sapyʼánte hetaiterei mbaʼe areko ajapovaʼerã ha ndaikuaái ni moõguipa añepyrũta. Ipohýima chéve g̃uarã”. Jahechaháicha, umi omongakuaáva haʼeño ifamiliakuérape (tahaʼe omano haguére iména térã hembireko, oheja reígui chupe, térã ambue mbaʼére) ikatu oñeñandu vaieterei. Peteĩ sy heʼi péicha: “Ore rohasáva ningo ijetuʼueterei. Roikotevẽ peteĩ orepytyvõvaʼerã”.

Javyʼavéta ñaipytyvõramo chupekuéra. Ajépa ñañeñandu porã ñaipytyvõramo ñande rapichápe ohupi hag̃ua peteĩ mbaʼe ipohýiva. Umi túva térã sy haʼeñóva ogueropuʼakavaʼerã koʼẽ koʼẽre heta mbaʼe ipohýiva. Ñaipytyvõramo chupekuéra jahecháta añeteha Ñandejára Ñeʼẽ heʼíva: “Ovyʼaite upe oipytyvõva imboriahúvape” (Salmo 41:1, ÑÑB).

Ñandejára oipota ñaipytyvõ chupekuéra. Ñandejára Ñeʼẽ heʼi: “Pe ñemombaʼeguasu ipotĩva, [ha Ñandejára] ohayhúva ningo kóva: ñaipytyvõ umi ityreʼỹvape ha imenaveʼỹvape” (Santiago 1:27, ÑÑB). Péicha jahecha umi sy ha túva omongakuaáva haʼeño ifamília oikotevẽha ñaipytyvõ chupekuéra. *  Hebreos 13:16 heʼi avei: “Ani penderesarái pejapo hag̃ua iporãva ha pembojaʼo hag̃ua pende rapichápe opa perekóva. Koʼã mbaʼe koʼãva hína pe [Ñandejára] oguerohorýva”.

Jahecháma upéicharõ umi sy ha túva haʼeñóva oikotevẽha ñanderehe. Péro, mbaʼéichapa ikatu ñaipytyvõ porãve chupekuéra? Jahechamína.

Jahechakuaákena mbaʼépa oikotevẽ

Ikatu ñaimoʼã iporãha jaʼe chupekuéra: “Mbaʼépepa ikatu roipytyvõ?”. Péro jaʼe porãséramo g̃uarã, saʼi nunga umi túva térã sy omombeʼupaitétava ñandéve mbaʼépa oikotevẽ. Jahecha haguéicha, Salmo 41:1 ñanemokyreʼỹ ñaipytyvõ hag̃ua chupekuéra ha upearã jakuʼevaʼerã. Peteĩ lívro omyesakãvo ko téysto heʼi: “Péva heʼise ñapensa porã vaʼerãha, jahechakuaa hag̃ua mbaʼépa oñekotevẽ ha upéi jajapo”.

Upévare ñaipytyvõ porã hag̃ua ñande rapichápe tekotevẽ jajepyʼamongeta ha jahecha mbaʼépa oikotevẽ. Ñapensavaʼerã mbaʼépa oiméne ijetuʼuve chupekuéra ha ñañeporandu: “Ahasárire umi mbaʼe haʼe ohasáva, mbaʼépa aikotevẽvaʼerãmoʼã?”. Heta oĩ heʼíva umi omongakuaáva haʼeño ifamíliapemante oikuaaha mbaʼeichaitépa ijetuʼu. Ha añetéramo jepe upéva, ñañehaʼãramo jahechakuaa umi mbaʼe ohasáva hikuái ikatúta ñaipytyvõ porãve chupekuéra.

Ñahaʼanga Ñandejárape

Jehová ohechauka ñandéve mbaʼéichapa ñaipytyvõvaʼerã umi túva térã sy haʼeñóvape. La Bíbliape heʼi heta hendápe Ñandejára ojepyʼapyha umi viúda ha ityreʼỹvare, ha katuete péicha avei oiméne ojepyʼapy umi sy ha túva haʼeñóvare. Ndaipóri Ñandejáraicha oñangareko porãva hesekuéra. Upévare, jahechamína mbaʼéichapa Haʼe oñatende koʼãichagua túvare ha mbaʼéichapa ñande ikatu ñahaʼanga chupe.

Ñahendu chupekuéra

Ñandejára omeʼẽrõ guare iléi umi isrraelítape heʼi umi viúda ha ityreʼỹva rehe: “Che ahendúta imbaʼejerure” (Éxodo 22:22, 23, ÑÑB). Mbaʼéichapa ikatu jahechauka jajepyʼapyha hesekuéra? Ñanemanduʼavaʼerã koʼã túva térã sy ndorekoiha mávapepa omombeʼúta hemiandu. Peteĩ sy heʼi: “Oĩ vése che membykuéra oke rire, añeñandu cheañoiterei ha añepyrũ cherasẽ nakirirĩvéi”. Upévare opyta porãtaramo, ikatu ñañemboja koʼãichagua sy térã túva rendápe ha ñahendu chupekuéra oiméramo omombeʼuse ñandéve imbaʼembyasy. Katuete oñeñandu porãvéta hikuái omombeʼu rire pe ojopýva chupekuéra.

Ñamokyreʼỹ chupekuéra

Ijespíritu rupive Jehová ohaika heta purahéi oñemombaʼeguasu hag̃ua chupe. Mbaʼéichapa nde ere oñeñandúne hague umi viúda ha ityreʼỹva opurahéi jave? Oimevaʼerã ovyʼáraʼe omomanduʼágui chupekuéra Jehová haʼeha “ityreʼỹva ru” ha “imenaveʼỹva ñangarekohára” (Salmo 68:5; 146:9). Ñande avei ikatu ñamokyreʼỹ umi túva térã sy haʼeñóvape. Ha ikatu voi akóinte imanduʼa hikuái umi mbaʼe jaʼevaʼekuére chupekuéra. Upéicha oikovaʼekue Ruth rehe. Ojapóma 20 áño peteĩ ermáno omendáva ha omoakã porãva ifamília heʼi hague chupe: “Aikuaa ningo mbaʼeichaitépa reñehaʼã rehekomboʼe umi mokõi ne membýpe. Iporãiterei upéva, ejapo memékena upéicha”. Ruth heʼi: “Opokoite che korasõre ahendúvo peichagua túva omombaʼeha ajapóva”. Ñandejára Ñeʼẽ heʼi voi: ‘Ipyʼaguapýva juru ningo oporomoingove’ (Proverbios 15:4, ÑÑB). Upéicharõ, iporãitéta ñañehaʼãramo jaguerohory ñande pyʼaite guive umi túva térã sy haʼeñóvape.

 Ñaipytyvõ ohupyty hag̃ua hemikotevẽ

Yma Israélpe Ñandejára léi heʼi oñemonoʼõ jave hiʼupy ojehejavaʼerãha umi viúda ha ityreʼỹvape g̃uarã. Oñekumplívo ko léi, koʼã tapicha akóinte orekóta oikotevẽmíva ha ndojeapoʼimoʼãi chupekuéra (Deuteronomio 24:19-21; 26:12, 13). Iporãiterei ñaipytyvõramo umi sy ha túva haʼeñóvape oikotevẽ jave, péro ñañatendevaʼerã ani jaiko ñamombeʼu upérupi. Ñande ndajaipotái oñeñandu vai hikuái. Ikatu jagueraha hiʼupy, ao ideprovéchotava chupe térã platami ojogua hag̃ua oikotevẽva.

Ñainvita chupekuéra ñanemoirũ hag̃ua

Yma Israélpe ojejapo jave umi arete Jehová heʼi ohovaʼerãha avei umi viúda ha ityreʼỹva, péicha haʼekuéra ojeheʼáta ha ovyʼáta ambue Ñandejára siérvo ndive. Jehová heʼi voi chupekuéra: “Pevyʼa” (Deuteronomio 16:10-15). Koʼág̃a avei kristianokuéra imbaʼeporãvaʼerã opavavéndi. Upéicha okumplíta 1 Pedro 4:9 heʼíva [BNP]: “Peñomog̃uahẽkena ojohogapekuéra torypápe”. Upéicharõ, mbaʼérepa ndajaʼéi peteĩ família koichaguápe oho hag̃ua okaru ñande rógape? Natekotevẽi jajapo peteĩ karu guasu. Jesús ohórõ guare ovisita iñamigokuérape heʼivaʼekue: ‘Natekotevẽi ningo hetaiterei mbaʼe, peteĩnte jepe ovaléma’ (Lucas 10:42, NM).

Ojeguerohorýta umi mbaʼe jajapóva

Umi túva térã sy haʼeñóva oikuaa porã haʼekuéra omongakuaavaʼerãha ifamília ha nohaʼarõi ambue ojapo upéva hesekuéra. Upéicharamo jepe ipyʼaite guive oguerohorýta ñaipytyvõramo chupekuéra oimeraẽ mbaʼépe. Peteĩ kuñakarai hérava Kathleen omongakuaáva haʼeño mbohapy mitã heʼi: “Jaagradeseterei ningo pe mbaʼe porã oúva ñahaʼarõʼỹre”. Upévare, aníkena ñanderesarái umi omongakuaávagui haʼeño ifamília. Upéicha haʼekuéra ovyʼavéta ha ñande avei. Hiʼarive Jehová opromete ‘pe mbaʼe porã jajapóva oñemyengovia jey vaʼerãha ñandéve’ (Proverbios 19:17, ÑÑB).

[Nóta]

[Nóta oĩva taʼanga ndive páhina 31]

Ikatúnepa ñainvita koʼãichagua famíliape okaru hag̃ua ñande rógape?