Ko porandu ningo iñimportanteterei, koʼýte umi viúdo térã viúdape g̃uarã ohechase jeýva pe múndo pyahúpe imborayhu járape. Peteĩ viúdo heʼi: “Che ha che rembireko rodesidi kuri roimetaha oñondive opa árare. Ha ore pyʼaite guive roservise oñondive Jehovápe roikove aja pukukue. Che koʼag̃aite peve apensa upéicha”. Péro, ¿ikatútapa omenda jey umi orresusitáva? Añetehápe ningo ndajaikuaái upéva.

Ñane puvlikasionkuérape heta áñore ojeʼe Jesús oñeʼẽ hague umi oikove jeýtavare ko yvy ape ári heʼírõ guare umi orresusitáva nomendamoʼãveimaha (Mat. 22:29, 30; Mar. 12:24, 25; Luc. 20:34-36). * Péro, ¿noiméi piko Jesús oñeʼẽ raʼe umi oikove jeýtavare yvágape? Ñahesaʼỹijomína umi mbaʼe heʼi vaʼekue.

¿Mbaʼérõ guarépa Jesús oñeʼẽ ko témare? (Elee Lucas 20:27-33). Umi saduséo ningo ndoroviái vaʼekue oikove jeytaha umi omanóva, upéicharõ jepe oporandu guaʼu hikuái Jesúspe pe rresurreksión ha umi omendávare iñermáno rembirekore rehe. * Jesús osẽ heʼi chupekuéra: “Umi hénte ko mundopegua omendajoa, péro umi kuña ha kuimbaʼe omereséva oiko pe múndo oútavape ha omereséva oikove jey omanóva apytégui, umíva nomendamoʼãvéima. Añetehápe, ndaikatumoʼãvéima omano, haʼekuéra oikóta umi ánhel oikoháicha, ha oñemoingove jey rupi chupekuéra, oikóta chuguikuéra Ñandejára raʼy” (Luc. 20:34-36).

Ñane puvlikasionkuérape ojeʼe vaʼekue Jesús upérõ oñeʼẽne hague umi oikove jeýtavare ko yvy ape ári. ¿Mbaʼérepa oñepensa raʼe upéicha? Primero, oñepensákuri umi saduséo oporandu hague umi oikove jeýtavare ko yvy ape ári, ha Jesús upérõ orresponde hague chupekuéra jalee haguéicha pe téxto oĩvape iñepyrũme. Segundo, Jesús ombohovái riremi chupekuéra, osegi oñeʼẽ Jehová siervokuéra iñeʼẽrendúvare ha orresusitátava ko yvy ape ári, Abrahán, Isaac ha Jacob (Luc. 20:37, 38).

Péro ikatu oime Jesús oñeʼẽ raʼe upérõ umi oikove jeýtavare yvágape ha ndahaʼéi umi orresusitátavare ko yvy ape ári. ¿Mbaʼérepa ikatu ñapensa upéicha? Jahecha porãmína mokõi mbaʼe Jesús heʼi vaʼekue.

“Umi kuña ha kuimbaʼe omereséva [...] oikove jey omanóva apytégui.” Umi unhído iñeʼẽrendúvare ningo ojeʼe ‘omereseha orresivi Ñandejára Rréino’ (2 Tes. 1:5, 11). Jesucristo sakrifísio rupive, Jehovápe g̃uarã haʼekuéra hekojoja ha omerese oikove opa ára g̃uarã. Ha upéicha rupi haʼekuéra omanóvo opytáma pekadoʼỹetére Ñandejára renondépe (Rom. 5:1, 18; 8:1). Káda unhídore la Biblia heʼi ‘ovyʼa ha imarangatuha’. Upéicha rupi haʼekuéra omerese orresusita yvágape (Apoc. 20:5, 6). Péro umi oikove jeýtava ko yvy ape ári apytépe oĩta “hekojojaʼỹva” (Hech. 24:15). ¿Ikatúpa jaʼe koʼãva iñinhústoramo jepe ‘omereseha’ avei orresusita?

 “Ndaikatumoʼãvéima omano.” Jesús ndeʼíri kuri: “Nomanomoʼãvéima”, síno: “Ndaikatumoʼãvéima omano”. Umi unhído iñeʼẽrendúva omohuʼãva hekove ko yvy ape ári, orresusita yvágape ha oñemeʼẽ chupekuéra tekove ikatuʼỹva oñehundi ha ndopamoʼãiva arakaʼeve (1 Cor. 15:53, 54). Pe ñemano ndaipuʼakavéima umi orresusitávare yvágape. *

¿Mávarepa upéicharõ jaʼekuaa Jesús oñeʼẽ hague heʼívo umi orresusitáva nomendamoʼãveimaha? Ikatu jaʼe oiméne hague oñeʼẽ umi oikove jeýtavare yvágape. Ha oiméramo upéicha, hesakã ñandéve mbohapy mbaʼe umi orresusitátavagui yvágape: 1) haʼekuéra nomendaveimaha, 2) ndaikatuiha omano, ha 3) heta mbaʼépe ojoguaha umi ánhelpe. Péro oĩ gueteri mbohapy porandu tekotevẽva ñambohovái ñantende porãve hag̃ua.

Primero: ¿mbaʼérepa Jesús oñeʼẽ umi oikove jeýtavare yvágape, oikuaáramo umi saduséo opensataha pe rresurreksión oikótavare ko yvy ape ári? Jesús ningo nameméi orresponde umi iñenemígope haʼekuéra opensaháicha. Por ehémplo, peteĩ jey unos kuánto hudío ojerure chupe peteĩ milágro, péro haʼe osẽ heʼi: “Peitýna ko témplo ha che amopuʼã jeýta tres díape”. Katuete Jesús oikuaáne raʼe haʼekuéra opensaha pe témplo oĩvare Jerusalénpe, “péro Jesús heʼívo témplo oñeʼẽ [kuri] hetére” (Juan 2:18-21). Umi saduséo ningo hovamokõi, ndoroviái voi ikatuha oñemoingove jey umi omanóvape ni oexistiha umi ánhel. Oime vaʼerã upévare Jesús norrespondéi raʼe chupekuéra upe porandu (Prov. 23:9; Mat. 7:6; Hech. 23:8). Péro idisipulokuéra ndaupéichai, ha chupekuéra ohupytýta pe rresurreksión yvagapegua. Upévare oiméne oaprovechase raʼe omboʼe hag̃ua idisipulokuérape heta mbaʼe upe rresurreksióngui.

Segundo: ¿mbaʼérepa Jesús omohuʼãvo upe konversasión osẽ oñeʼẽ Abrahán, Isaac ha Jacob rehe, ko haʼekuéra oikove jeýtava ko yvy ape ári? (Elee Mateo 22:31, 32.) Jesús oñepyrũtarõ guare oñeʼẽ koʼã kuimbaʼére heʼi: ‘Péro umi omanóva oikove jeýtavare katu...’. Ko fráse heʼi vaʼekue ikatu hína ohechauka oñepyrũtamaha oñeʼẽ ótra kósare: pe rresurreksión oikótavare ko yvy ape ári. Avei Jesús oikuaa umi saduséo oaseptaha Moisés ohai vaʼekue, upéicha rupi oipuru Jehová heʼi vaʼekue ko profétape oñeʼẽrõ guare pe sársa hendývagui. Ha péicha ohechauka Ñandejára omoingove jeytaha ko yvy ape ári umi omano vaʼekuépe, ha katuete okumplitaha upéva (Éx. 3:1-6).

Tercero: Oimérõ Jesús oñeʼẽ umi oikove jeýtavare yvágape heʼírõ guare nomendamoʼãveimaha hikuái, ¿heʼisépa upéva umi orresusitátava ko yvy ape ári ikatutaha omenda? Ñandejára Ñeʼẽ nombohovái direktoite ko porandu. Oiméramo Jesús oñeʼẽ raʼe umi orresusitátavare yvágape, jaʼekuaa ndeʼíri hague mbaʼeve umi oikove jeýtavare ko yvy ape ári, por ehémplo ikatútapa omenda térã nahániri.

La jaikuaa porãva ningo la Biblia heʼiha pe matrimónio opamaha omanóramo pe ména térã tembireko. Upévare peteĩ viúdo térã viúda odesidíramo omenda jey, nopensái vaʼerã ojapo vaiha hína. Káda uno odesidi vaʼerã upéva, ha avave ndoikói vaʼerã oñeʼẽ vai peteĩ persónare oheka jeýramo iñirũrã (Rom. 7:2, 3; 1 Cor. 7:39).

Oime vaʼerã jaikuaase heta mbaʼe oikótava Ñandejára múndo pyahúpe, upéicharõ jepe ndajaikói vaʼerã jakalkulapa rei umi mbaʼe ndajaikuaaporãivare. Ñaime vove upépemante jaikuaáta heta mbaʼe. Péro la jaikuaa porãva, opavave yvypóra iñeʼẽrendúva ovyʼataha. Jehová omeʼẽta enterovévape opa mbaʼe oikotevẽva ha omoñeñandu porãtava chupekuéra (Sal. 145:16).