¿Mbaʼérepa la Biblia heʼi: “Jehovápe g̃uarã iporã ohechávo omano umi hese ojeroviáva”?

▪ Añetehápe Jehová omombaʼeterei isiervokuéra iñeʼẽrendúva rekove. Koʼã mbaʼe Haʼe ohaikavaʼekue ijespíritu rupive Salmo 116:15-pe, noñeʼẽi peteĩ tapicha omanóvarente.

Oĩ jave omanóva ojejapo jepi peteĩ diskúrso, ha upévape ndovaléi ojeporu ko versíkulo oñeñeʼẽ hag̃ua pe omanóvare, tahaʼe jepe raʼe peteĩ kristiáno iñeʼẽrendúva Jehovápe. ¿Mbaʼérepa? Hetave mbaʼe heʼise rupi ko téysto. Pe salmísta ontendekasevaʼekue Jehovápe g̃uarã tuichaiterei mbaʼeha enterove isiérvo rekove ha omanombárõ hikuái tuichaiterei operdetaha. Upéicha rupi arakaʼeve ndohejamoʼãi oiko upéva (ehecha Sal. 72:14 ha 116:8).

Ko téysto ohechauka porã Ñandejára ndohejamoʼãiha avave ohundi enterove isiérvo iñeʼẽrendúvape. Upéva ojehechakuaa umi testígo de Jehová rembiasakue rehe. Oĩramo jepe heta ñandepersegi ha ñanembohasa asýva, jagueropuʼaka. Upéva ohechauka Jehová oñangarekoha ñanderehe ani hag̃ua ñañehundipa.

Jehová ningo pe Ñandejára ipuʼakapáva, ha katuete oñekumplíta hembipota. Upévare arakaʼeve ndohejamoʼãi oñehundi ipuévlo. Péro ohejáramo oiko umi mbaʼe, haʼetéta umi iñenemígo ipoderosovéva chugui, ha upéva ndaupeichaiete. Jehová oipota ko yvy henyhẽ umi tapicha iñeʼẽrendúvagui, ha ohejárõ oñehundipa isiervokuéra ningo ndoikomoʼãi upéva (Isa. 45:18; 55:10, 11). Ha ko yvy ape ári ndopytamoʼãi ni peteĩ yvypóra omombaʼeguasúva Jehovápe ha oservíva chupe iñorganisasiónpe. Ndaiporimoʼãi avei tapicha omoñepyrũva pe “yvy pyahu”, térã umi tapicha hekojojáva oikovaʼerã pe “yvága pyahu” poguýpe (Rev. 21:1, BNP). Ñahaʼarõ reíta avei Ñandejára Rréino, ndaipóriramo oikovaʼerã ko yvy ape ári Jesucristo poguýpe ogoverna vove mil áño pukukue (Rev. 20:4, 5). Péro Jehová arakaʼeve ndohejamoʼãi oiko koʼã mbaʼe.

Upéicha avei, Jehová ohejáramo iñenemigokuéra ohundi ipuévlo oĩva ko yvy ape ári, oñepensáta ndorekoiha autorida ni derécho oisãmbyhývo ha oñeñeʼẽ vaíta hese. Péro, héra marangatu rehehápe arakaʼeve ndohejamoʼãi oiko upéva. Ñapensami ko mbaʼére: Ñandejára ndive “ndaipóri inhustísia”, upévare jaʼekuaa haʼe katuete oñangarekotaha enterovete isiérvo iñeʼẽrendúvare (Deu. 32:4, NM; Gén. 18:25). Upéva jahechakuaa la Bíbliape heʼívare: ‘Héra marangatu rehehápe, Jehová ndohejamoʼãi hetãyguápe’ (1 Sam. 12:22). Heʼi avei: “Ñandejára ndahesaraimoʼãi hetãyguágui, ndohejamoʼãi haʼeño umi imbaʼévape” (Sal. 94:14).

¡Ajépa ñanembovyʼaite jaikuaávo Ñandejára siervokuéra ndopamoʼãiha ko yvy ape árigui! Upévare akóintekena ñaneñeʼẽrendu ñande pyʼaite guive Jehovápe ha jajerovia ko promésare: ‘Tahaʼe haʼéva umi opuʼãva nderehe nosẽporãmoʼãi, ha rejuru mbotýta oñeʼẽ vaívape nderehe. Ko mbaʼe ningo ameʼẽta che rembiguaikuérape, ha pe hustísia ou chehegui’ (Isa. 54:17, NM).

[Komentário oĩva páhina 22-pe]

Ñandejára ni mbaʼevéicharõ ndohejamoʼãi oñehundi ipuévlo