Omombeʼu Lois Didur

Sapyʼánte ñambyasy jadesidi haguére peteĩ mbaʼe. Che katu 50 áñoma aservi Jehovápe de tiémpo kompléto ha avyʼaiterei adesidi haguére upéva, nambyasyiete voi. Tamombeʼumína peẽme mbaʼérepa.

ANASE áño 1939-pe ha akakuaa kampañaháre, Saskátchewanpe (Canadá). Vyʼápe roiko ore gránhape, cuatro che ermána ha peteĩ che ermánondi. Peteĩ jey, umi testígo de Jehová ovisita che túvape, ha che aporandu chupekuéra mbaʼéichapa héra Ñandejára. Haʼekuéra ohechauka chéve Salmo 83:18-pe haʼeha Jehová, ha upe guive aikuaasevéma Chupe ha mbaʼépa heʼi Iñeʼẽ.

Upérõ umi mitã oikóva gránhape, oike umi eskuéla oĩva kampáñape, oreko peve 13 áño. Upearã ohómi kavaju ári térã oguata mombyrymbyry. Umi hénte uperupiguánte omeʼẽ umi mboʼehárape opa mbaʼe oikotevẽva. Peteĩ jey ou oiko ógape un áño aja peteĩ mboʼehára pyahu, hérava John Didur.

Chéngo ndaikuaáikuri ko kariaʼýpe ogustaitereiha la Biblia omboʼéva. Peteĩ jey añeʼẽ porã pe comunismo ha socialismo rehe, che túva omombaʼetéva, péro John pyʼaguapýpente heʼi chéve: “Peteĩ yvypóra ndorekói derécho oisãmbyhývo ótrope. Ñandejára añoite ojapovaʼerã upéva”. Upe guive heta vése roñemongeta umichagua témare.

Haʼe onasevaʼekue áño 1931-pe, ha ohendu umi mbaʼe vai oikovaʼekue gerrahápe. Áño 1950-pe, oñepyrũrõ guare pe gérra Coréape, haʼe oporandu umi rrelihión omoakãvape mbaʼérepa oñentremete upépe. Ha haʼekuéra heʼi chupe ndaivairiha kristianokuéra oho gerrahápe. Upe rire oporandu avei umi testígo de Jehovápe, ha ohechauka chupe hikuái la Biblia rupive umi kristiáno ypykue ndojapói hague upéva. John ojevautisa áño 1955-pe, ha che katu un áño haguépe. Mokõivévante roservise Jehovápe ore pyʼaite guive (Sal. 37:3, 4). Ha julio 1957-pe romenda.

 Heta vése umi aty guasu hoʼa ore aniversário díape. Ha rovyʼaiterei ikatu haguére roĩ hetaite hénte apytépe omombaʼéva avei pe ñemenda. Áño 1958-pe primera vés roho peteĩ asambléa internasionálpe. Upérõ éntre cinco roho peteĩ áutope Saskatchewan guive, Nueva York peve. Una semána roviaha, ha pyharekue ropyta roke ore kárpa guýpe. Rohokuévo, roikuaa peteĩ ermánope oikóva Béthlehempe (Pensilvania), ha rovyʼaiterei oreinvitárõ guare ropyta hag̃ua upe pyharépe hógape. Imbaʼeporã rupi ko ermáno, rog̃uahẽ Nueva Yórkpe potĩ asy. Upe aty guasúpe rohechakuaa mbaʼeichaitépa javyʼa jaservívo Jehovápe. Heʼi haguéicha pe salmísta Ñandejárape: ‘Nde ypýpe akóinte avyʼa’ (Sal. 16:11).

ROÑEPYRŨ ROJAPO ORE PREKURSORÁDO

Áño 1959-pe roñepyrũ rojapo ore prekursorádo ha roiko sérro ári peteĩ kása rrodántepe, Saskátchewanpe. Upe guive mombyryeterei peve ojekuaa umi kámpo, ha heta umíva apytépe ore território predikasionrã.

Peteĩ árape og̃uahẽ oréve sukursálgui peteĩ kárta. Upérõ John omyatyrõhína pe traktór, ha adipara aha hendápe. Upe kártape heʼi roñeinvitaha roservi hag̃ua de prekursór espesiál Red Lákepe (Ontario). Ore ni ndoroikuaái moõpa opyta upe lugár, upémarõ roguenohẽ ore mápa ha roñepyrũ roheka.

Idiferenteterei ningo upe lugár ore vállegui! Oĩ kaʼaguy tuichaicháva ha heta táva mimi umi mína de óro ypýpe. Upe rog̃uahẽha díape, peteĩ mitãkuñaʼi ohendu roʼérõ ivesínape rohekaha peteĩ óga ropyta hag̃ua. Pe mitãkuñaʼi odipara oho omombeʼu isýpe, ha haʼe imbaʼeporãgui heʼi oréve ropyta hag̃ua upe pyharépe hógape. Pe tupa oiporukáva oréve oĩ peteĩ sótanope. Koʼẽ rire rotopa peteĩ óga ojejapóva madéragui, orekóva mokõi koty ha peteĩ estúfa a léña. Ko óga ndorekói água korriénte ni muévle, upémarõ roho rojogua roikotevẽmíva peteĩ lugár oñevendehápe mbaʼe usádo, ha rovyʼáma umívare.

Pe kongregasión hiʼag̃uivéva opyta 209 kilometrohápe. Heta umi ombaʼapóva mína de órope ou Európagui, ha ojerure oréve ivivliarã. Sapyʼaitépe rojapóma treinta estúdio oñakãrapuʼã porãva, ha seis mése haguépe oĩma peteĩ kongregasión michĩva.

Peteĩ jey, ore estudiánte ména ohenói pór teléfono peteĩ paʼípe ou hag̃ua “ohesapeʼami hembirekópe”. Upe rire pe paʼi ou ha heʼi oréve romboʼe hag̃ua Trinidad ha ambue mbaʼe. Ore estudiánte oguenohẽ ivívlia católica ha ojerure pe paʼípe ohechauka hag̃ua chupe upépe umi mbaʼe heʼíva. Haʼe ojagarra ivívlia ha omombo pe mesa ári ha heʼi natekovẽiha ohechauka chupe mbaʼeve. Osẽnguévo, heʼi ucraniánope, patádape oremosẽvaʼerãha ha anivete hag̃ua oremog̃uahẽ hógape. Pe paʼi ndoikuaaiete John oñeʼẽkuaaha avei ucraniáno!

Tiémpo riremi rova Red Lákegui, oñembokatupyry hag̃ua Jóhnpe oservi hag̃ua superintendénte de sirkuítoramo. Péro un áño haguépe, John ojapo aja pe diskúrso umi ojevautisátavape peteĩ aty guasúpe, ohechakuaa sapyʼa pe estudiánte ména oĩha umi kandidáto apytépe! Amalisia upe oikovaʼekue pe paʼíndi omomýi chupe ohesaʼỹijo hag̃ua la Biblia ijeheguiete voi.

HETA ROMBAʼAPO PE SIRKUÍTOPE

Roimévo pe sirkuítope rovyʼaiterei ikatu haguére ropyta umi ermáno rógape. Umi família ropyta haguépe oreamigoite upe rire. Peteĩ jey ropyta  peteĩ ermána ijedáva rógape, ha omeʼẽ oréve ore kotyrã pe oĩva yvate, péro ndorekóiva kalefaksión. Upérõ roʼyeterei, ha pyharevete pe ermána mbeguekatu asy oike ore kotýpe omyendy hag̃ua tata peteĩ estufaʼípe. Upe riremínte ogueraháma oréve ytaku peteĩ palangánape roñemopotĩ hag̃ua. Ko ermána ehémplo chemboʼe mbaʼéichapa chepasiénsia ha chembaʼeporãvaʼerã.

Ko asignasión chepytyvõ añemoag̃uive hag̃ua Jehováre. Táva Albértape oĩvaʼekue peteĩ sirkuíto oĩháme peteĩ tavaʼi oñembaʼapohápe mínape, opytáva nórte gotyo mombyry pe siudágui, ha upépe oĩ peteĩ ermána añoite. Jehová organisasión omombaʼeterei chupe, upévare káda seis mése katuete roho hendápe ropredika hag̃ua hendive una semána ha rojapo avei umi rreunión, rojapoháicha jepi voi rovisita jave umi kongregasión tuicháva. Upépe rohechakuaa mbaʼeichaitépa Jehová ohayhu ha oñangareko ijovecha mimíre.

Pyʼỹinte roñekomunikámi umi família oreinvitavaʼekuéndi ropyta hag̃ua hógape. Upéva chemomanduʼa John orregala hague chéve peteĩ káha de diferénte kolór, orekóva heta kuatia ojehai hag̃ua kárta. Oregustaitereími vaʼekue roskrivi ermanokuérape roikuaa hag̃ua chuguikuéra, ha koʼag̃aite peve añongatu upe káha peteĩ tesóroicha.

Roservi aja peteĩ sirkuítope Toróntope, peteĩ ermáno ombaʼapóva Betel de Canadápe orerenói ha oporandu ndorohoséipa rombaʼapo Betélpe. Ha heʼi oréve ikatúramo rombohováima hag̃ua chupe upe koʼẽme mbaʼépa rodesidi. Ha upeichaite ningo rojapo!

ROMBAʼAPO BETÉLPE

Tahaʼe haʼéva pe tembiapo oñemeʼẽva oréve, roʼekuaa akóinte rovyʼaha roimévo Jehová ypýpe. Ha upéicha avei roñeñandu rog̃uahẽrõ guare Betélpe, áño 1977-pe. Upépe rombaʼapo umi ermáno unhído ndive, ha upéva orepytyvõ roikuaave hag̃ua chupekuéra ha rohechakuaa mbaʼeichaitépa omombaʼe hikuái Ñandejára Ñeʼẽ.

Rovyʼaiterei ningo Betélpe! Koʼág̃a roñongatúma ore ao rropérope valíhape rangue, ha avei roguereko peteĩ kongregasión. Chegusta che rembiapo Betélpe, ha avei ou jave umi hénte orevisita. Avyʼa ikatu haguére ahechauka chupekuéra mbaʼéichapa oñembaʼapo upépe, ahendu heʼíva hikuái ha ambohovái ombaʼeporandu jave chéve.

Áño 1997-pe oñeinvita Jóhnpe oho hag̃ua pe Eskuéla umi Oĩvape g̃uarã Comité de Sukursálpe, ojejapóva Páttersonpe (Nueva York). Upe riremínte oñeporandu oréve ikatútapa rova Ucrániape, ha ojeʼe oréve ropensa porã ha roñemboʼe hag̃ua rodesidi mboyve. Upe pyharépe rodesidíma rohotaha.

ROHO UCRÁNIAPE

Roho mokõi asambléa internasionálpe, áño 1992-pe San Petersbúrgope (Rusia) ha 1993-pe roho Kiévpe (Ucrania). Upépe roikuaa heta ermáno oikóva Europa orientálpe ha rohayhueterei chupekuéra. Roikovaʼekue Lvívpe (Ucrania), peteĩ óga tujápe, ha ore roĩ segundo písope. Pe ventána guive ojekuaa pe korapy orekóva peteĩ hardín, avei peteĩ gállo guasu pytãva ha heta ryguasu. Haʼetévaicha voi roĩva ore gránhape, Saskátchewanpe. Upe ógape roikovaʼekue éntre doce, ha káda pyhareve rokrusapaitevaʼerã pe táva roho hag̃ua rombaʼapo Betélpe.

Ucrániape rovyʼaiterei rombaʼapóvo umi ermáno ohasavaʼekuéndi heta mbaʼe ijetuʼúva oservívo Jehovápe. Pór ehémplo, ojeproivi chuguikuéra predikasión ha ojegueraha kárselpe, upéicharamo  jepe akóinte ojepytaso hikuái Jehová ykére. Ha roguerohory jave koʼã ermánope iñeʼẽrendu haguére, haʼekuéra heʼi: “Jehová rupive ningo roaguanta”. Arakaʼeve noñeñandúiva haʼeño hikuái. Koʼag̃aite peve ojeagradeséramo chupekuéra peteĩ mbaʼe porã ojapóvare, ikatuhína heʼi hikuái: “Eagradese Jehovápe”. Upéicha ohechauka hikuái opa mbaʼe porã ouha Chugui.

Ucrániape, heta ermáno oho rreunionhápe yvýrupi. Oguata jepi hikuái una óra rupi, ha oiporu upe tiémpo oñemongeta ha oñomokyreʼỹ hag̃ua. Táva Lvívpe oĩ 50 kongregasión rasa, ha umíva apytégui 21 ojapo irreunión peteĩ komplého guasúpe, oĩháme heta Salón del Reino. Iporãiterei ningo jahecha domingokue umi ermánope ohojoárõ upépe rreunionrã.

Sapyʼaitépe ningo roñeñandu ore rogapeguáicha, umi ermáno hory ha imbaʼeporãitévandi. Avei heta ipasiénsia cherehe nantendéi jave peteĩ mbaʼe ucraniánope. Umi ermanokuéra rováre ha umi mbaʼe heʼívare, ojekuaa ipasiensiaha hikuái.

Áño 2003-pe ojejapo peteĩ asambléa internasionál peteĩ estádio oĩva Kiévpe, upépe ahechakuaa Jehová rembiguaikuéra ojeroviaha ojuehe. Roguejymíre pe trén subterráneogui, peteĩ mitãkuñaʼi oñemboja ore rendápe ha mbeguekatu asy heʼi oréve: “Akañy. Ndajuhúi che avuelítape”. Ohecha rupi pe tarhéta de solápa roguerekóva oikuaa ore Testigoha, upévare ndokyhyjéi ni nahasẽi. Peteĩ superintendénte de sirkuíto rembireko oĩva orendive, oraha ko mitãkuñaʼíme Departamento de Objetos Perdídospe oĩva pe aty guasúpe ha upépe ijavuéla otopa chupe. Ahecharamoiterei mbaʼéichapa ko mitãkuñaʼi ojerovia Jehováre oĩramo jepe hetaiterei hénte apytépe.

Mayo 2001-pe hetaiterei ermáno tetã ambuegua ou Ucrániape ojededikárõ guare pe sukursál pyahu. Upe domingo pyhareve, opa rire pe diskúrso espesiál ojejapovaʼekue pe estádiope, hetaiterei Testígo oho yvýrupi ovisita hag̃ua Betel. Ndacheresaráiva upévagui! Ahecharamoiterei mbaʼéichapa umi ermáno og̃uahẽ ohóvo trankílo ha pyʼaguapýpe porã. Upépe koʼýte ahechakuaa Ñandejára siervokuéra ovyʼaha oservívo chupe.

AHASA PETEĨ MBAʼE IJETUʼUETEREÍVA

Áño 2004-pe umi doktór heʼi Jóhnpe orekoha kánser, upémarõ roho jey Canadápe osegi hag̃ua tratamiénto. Apenaite ogueropuʼaka umi kimioterápia ojejapo ypýva chupe, ha heta semána opyta terápia intensívape. Ojerrekuperaʼimírõ guare apenaite oñeʼẽ, péro hesáre ojekuaa oagradeseha umi ovisitávape chupe.

Ipahápe ndojerrekuperavéi, ha omano upe áño pahápe. Ha upéva cherejavaiete! Heta ningo avyʼavaʼekue hendive aservívo Jehovápe. Upe rire adesidi aha jey Betel de Ucrániape, ha aagradeseterei umi ermáno ombaʼapóvape upépe ha kongregasionguápe, chepytyvõ ha imbaʼeporã haguére chendive.

John ha che arakaʼeve norombyasýiva rodesidi haguére roiporupaite ore tiémpo Jehová servísiope. Hetaiterei mbaʼe porã ningo rohasa, ha avei heta oreamígo. Aikuaa oĩha gueteri heta mbaʼe ikatúva aaprende Jehovágui, ha hiʼãite aservi chupe opa ára g̃uarã. Ha haʼekuaa akóinte avyʼaha ijykére!

[Komentário oĩva páhina 6-pe]

“John ha che arakaʼeve norombyasýiva rodesidi haguére roiporupaite ore tiémpo Jehová servísiope”

[Nóta oĩva taʼanga ndive páhina 3]

Romendárõ guare John ndive

[Nóta oĩva taʼanga ndive páhina 4]

Aservírõ guare de prekursóra espesiál Red Lákepe (Ontario)

[Nóta oĩva taʼanga ndive páhina 5]

John ha che Ucrániape, áño 2002-pe