“Peẽ katu peteĩ ñemoñare ojeporavopyre, rréi ha saserdóte, peteĩ tetã marangatu, peteĩ puévlo Ñandejára mbaʼe teéva.” (1 PED. 2:9, NM)

1. Mbaʼérepa testígo de Jehová oĩva opárupi ojapo káda áño Conmemoración?

 JESUCRISTO ha umi 12 apóstol oñembyaty última vés pe Pascuarã 14 de nisán pyhare, áño 33-pe. Omondo rire Judas Iscariótepe, Jesús ojapo peteĩ “séna” ha heʼi chupekuéra akóinte ogueromanduʼa hag̃ua upéva (1 Cor. 11:20, BNP). Upe pyharépe, dos vése Jesús heʼi: “Pesegíkena pejapo kóva penemanduʼa hag̃ua cherehe.” Haʼe oipotavaʼekue ojegueromanduʼa omano hague ára. Upévape oñehenói avei Conmemoración (1 Cor. 11:24, 25, NM). Upévare entéro testígo de Jehová oĩva opárupi, katuete ojapo káda áño pe Conmemoración Jesús oipota haguéicha. Ohechaukaháicha pe kalendário hudío, 2012-pe, 14 de nisán hoʼáta jueves 5 de abril kuarahy oike rire.

2. Mbaʼépa heʼi Jesús orrepresentaha pe pán ha víno?

² Lucas omombeʼu mbaʼépa heʼi ha ojapo Jesús upérõ guare: “Ojagarra peteĩ pán, oñemboʼe rire, ombojaʼo ha ombohasávo chupekuéra heʼi: ‘Kóva orrepresenta che rete ameʼẽtava penderehehápe. Pesegíkena pejapo kóva penemanduʼa hag̃ua cherehe’. Upéi osenamba rire hikuái ojagarra pe kópa, ha heʼi: ‘Kóva orrepresenta pe kompromíso pyahu ojejapóva che ruguy rupive, añohẽtavahína penderehehápe’” (Luc. 22:19, 20, NM). Mbaʼéichapa ontendéraʼe umi apóstol koʼã mbaʼe?

3. Mbaʼépa heʼisevaʼekue pe pán ha víno umi apóstolpe g̃uarã?

³ Umi apóstol hudío vaʼekue, upévare oikuaa porã maʼerãpa ojejapo umi sakrifísio Jerusalén témplope. Umi mymba oñekuaveʼẽ oñemoĩ porã hag̃ua hikuái Jehovándi ha ikatu hag̃uáicha oñembohasa rei chuguikuéra hembiapo vaikue (Lev. 1:4; 22:17-29). Upéicha rupi, Jesús heʼírõ guare omeʼẽtaha hete ha oñohẽtaha huguy hemimboʼekuéra rehehápe, umi apóstol ontende porã vaʼekue haʼe omeʼẽtaha hekove perfékto sakrifísioramo. Upéva ningo tuichaiteve mbaʼe umi mymba oñekuaveʼẽvagui.

4. Mbaʼépa ontendéraʼe umi apóstol Jesús heʼírõ guare “Kóva orrepresenta pe kompromíso pyahu ojejapóva che ruguy rupive”?

⁴ Mbaʼépa ontendéraʼe umi apóstol Jesús heʼírõ guare “Kóva  orrepresenta pe kompromíso pyahu ojejapóva che ruguy rupive”? Haʼekuéra oikuaa porã vaʼekue pe profesía oñeʼẽva pe kompromíso pyahúre, oĩva Jeremías 31:31-33-pe (elee). Upérõ guare Jesús ohechauka oñepyrũtaha peteĩ kompromíso pyahu omyengoviátava pe kompromíso Jehová ojapovaʼekuépe umi isrraelíta ndive Moisés Léi rupive. Ojojoguápa koʼã mokõi kompromíso?

5. Mbaʼépa ohupytýta umi isrraelíta okumplíramo pe kompromíso ojapovaʼekue Jehovándi?

⁵ Koʼã mokõi kompromíso ojejapovaʼekue ojehupytységui peteĩ mbaʼénte. Jehová ojapórõ guare pe kompromíso umi Israelguándi pe Léi rupive, heʼi: “Pejapóramo añetehápe che haʼehaichaite, ha ñaĩramo oñoñeʼẽme, upéicharõ poiporavóta che retã teerã opa tetã apytégui, chembaʼéramo jepe ko yvy tuichakue. Ha oĩta oservíva rréi ha saserdóteramo chéve g̃uarã ha oikóta pendehegui tetã imarangatúva” (Éxo. 19:5, 6, NM). Mbaʼépa heʼiserakaʼe koʼã mbaʼe umi isrraelítape g̃uarã?

OÑEPROMETE OĨTAHA OSERVÍVA RRÉI HA SASERDÓTERAMO

6. Mbaʼe promésapa oñekumpli Jehová ojapo rupi pe kompromíso Israel ndive?

⁶ Jehová ojapomavaʼekue kompromíso Noé ha Abrahán ndive, upévare umi isrraelíta oikuaa porã mbaʼépa heʼise peteĩ kompromíso (Gén. 6:18; 9:8-17; 15:18; 17:1-9). Pór ehémplo, Ñandejára oprometevaʼekue Abrahánpe: “Opa tetã ko yvy arigua [oñevendesíta] ne ñemoñare rupi, rejapo haguére haʼevaʼekue ndéve” (Gén. 22:18). Jehová ojapo rupi pe kompromíso umi isrraelítandi, ikatu oñekumpli ko promésa. Avei, upéicha Israélgui ikatúta oiko Jehová ‘retã opa tetã apytégui’. Maʼerãpa upéva? Ikatu hag̃uáicha oĩ upépe umi oservíva Jehovápe “rréi ha saserdóteramo”.

7. Mbaʼépa heʼise oĩtaha oservíva “rréi ha saserdóteramo”?

⁷ Umi Israelgua oikuaavaʼekue oĩtaha oservíva rréi ha saserdóteramo. Péro Melquisedec añoite oservivaʼekue mokõive hendáicha, ha Jehová ovendesi chupe (Gén. 14:18). Upe rire Jehová omeʼẽ Israélpe peteĩ mbaʼe iporãva: ikatútama oĩ hetãme oservíva “rréi ha saserdóteramo”. Oñemyesakã haguéicha Ñandejára Ñeʼẽme, upéva heʼise oĩta hague rréi haʼéva avei saserdóte (1 Ped. 2:9).

8. Mbaʼépa ojapo umi saserdóte Jehová oiporavóva?

⁸ Jaikuaaháicha, peteĩ rréi oisãmbyhyvaʼerã. Péro, mbaʼépa ojapo peteĩ saserdóte? Hebreos 5:1 omombeʼu: ‘Opavave saserdóte guasu ojeporavóva yvypóra apytégui oñemoĩ ombaʼapo hag̃ua yvypóra rehehápe Ñandejára renondépe, ha omog̃uahẽ hag̃ua kuaveʼẽmby ha sakrifísio yvypóra rembiapo vaikuére’. Upéicharõ, peteĩ saserdóte Jehová oiporavóva orrepresenta pekadorkuérape ha ojerure Ñandejárape ombohasa rei hag̃ua chuguikuéra hembiapo vaikue. Ha upéva ojapo sakrifísio rupive, pe Léi ojerureháicha. Avei omboʼe pe puévlope Ñandejára Léi, upéicha orrepresenta Jehovápe (Lev. 10:8-11; Mal. 2:7). Umi saserdóte Jehová oiporavóva, iservísio rupive oipytyvõ hentekuérape oñemoag̃ui jey hag̃ua Ñandejárare.

9. a) Mbaʼépa ojapovaʼerã umi Israelgua oĩ hag̃ua hetãme oservíva “rréi ha saserdóteramo”? b) Mbaʼérepa Jehová omoĩ saserdóte Israélpe? c) Mbaʼérepa Israélpe ndaiporivaʼekue oservíva “rréi ha saserdóteramo” ojapóramo jepe kompromíso Jehovándi?

⁹ Jehová ojapovaʼekue peteĩ kompromíso Israel ndive pe Léi rupive ha upéicha rupi ikatúkuri osẽ upe tetãgui umi oservítava rréi ha saserdóteramo, oipytyvõ hag̃ua ‘opa tetãme’. Péro ohupyty hag̃ua ko mbaʼe porãite haʼekuéra ojapovaʼerã Jehová ojeruréva: ‘Pejapovaʼerã añetehápe che  haʼehaichaite, ha ñaĩvaʼerã oñondive oñoñeʼẽme’. Ikatúparaʼe umi isrraelíta ojapo Jehová heʼihaichaite? Ikatu, upéicharamo jepe haʼekuéra ndahaʼéi perfékto ha ojavýtante voi (Rom. 3:19, 20). Upévare Jehová omoĩ chupekuéra g̃uarã umi saserdóte ndojeheʼáiva goviérnore oikuaveʼẽ hag̃ua mymba ipekadokuérare (Lev. 4:1–6:7). Avei umi saserdóte oikuaveʼẽvaʼerã sakrifísio hembiapo vaikuére (Heb. 5:1-3; 8:3). Jehová oguerohory upéva, péro umi sakrifísio ndaikatúi omoʼãmba umi isrraelíta rembiapo vaikue. Umi saserdóte oĩva Moisés léi poguýpe ndaikatúi oipytyvõ porã ni umi isrraelíta iñeʼẽrendúvape oñemoag̃ui jey hag̃ua Ñandejárare. Apóstol Pablo heʼi haguéicha: “Umi tóro ha kavara ruguykue ndaikatúi oheja reívo tembiapo vaikue” (Heb. 10:1-4). Avei umi isrraelíta nopenái rupi pe Léire ojereko chupekuéra mbaʼe vai apoháramo (Gál. 3:10). Naiñeʼẽrendúigui, Israélgui ndoikomoʼãi peteĩ tetã oĩhápe oservíva rréi ha saserdóteramo oipytyvõtava yvyporakuérape.

10. Mbaʼépa ojehupyty Jehová ojapo rupi pe kompromíso Israel ndive Léi rupive?

¹⁰ Upéicharõ, ikatúpa jaʼe opyta rei hague pe promésa Jehová ojapovaʼekue umi isrraelítape, oĩtaha hetãme oservíva “rréi ha saserdóteramo”? Nahániri. Haʼekuéra oñehaʼãmbaitérire iñeʼẽrendu, ikatuvaʼerãmoʼã ohupyty upéva, ndahaʼéiramo jepe pe Léi poguýpe. Mbaʼérepa? (Elee Gálatas 3:19-25.) Umi oñehaʼãmbaitéva okumpli pe Léi ohechakuaa ndovaleiha omombaʼeguasu taʼanga ni ambue mbaʼe, síno Jehovápe añoite. Pe Léi oipytyvõ umi hudíope ohechakuaa hag̃ua ojavyha heta mbaʼépe ha oikotevẽha peteĩ sakrifísio tuichavéva pe saserdóte guasu oikuaveʼẽvagui. Pe Léi oipytyvõ chupekuéra oikuaa ha ojerovia hag̃ua Cristo térã Mesías rehe. Péro pe Mesías ou vove ojapóta hendivekuéra pe kompromíso pyahu Jeremías oñeʼẽ hague. Opavave oguerohorýva Crístope ikatúta oike pe kompromíso pyahúpe ha oikóta chuguikuéra “rréi ha saserdóte”. Jahechamína mbaʼéichapa oiko upéva.

PE KOMPROMÍSO PYAHU RUPIVE OĨ OSERVÍVA RRÉI HA SASERDÓTERAMO

11. Mbaʼéicha rupípa Jesús omoakã umi oservívape rréi ha saserdóteramo?

¹¹ Áño 29-pe ojehechakuaa Jesús Nazaretgua haʼeha pe Mesías. Orekórõ guare 30 áño rupi ojevautisa, ha upéicha ohechauka oñemeʼẽmaha Jehovápe ojapo hag̃ua hembipota. Jehová heʼi: “Kóva hína che Raʼy ahayhuetéva”. Avei ohechauka oiporavoha chupe espíritu sánto rupive, ndahaʼéi oiporúva aséitepe upearã (Mat. 3:13-17; Hech. 10:38, NM). Upéicha Jehová ohechauka oiporavoha Jesúspe oservi hag̃ua Saserdóte Guasúramo, ha omoĩha chupe Rréiramo oisãmbyhy hag̃ua opavave yvypóra ojeroviávape Ñandejárare (Heb. 1:8, 9; 5:5, 6). Jesucristo rupi oĩ oservíva rréi ha saserdóteramo ha haʼe omoakã chupekuéra.

12. Mbaʼépa ojehupyty Jesús sakrifísio rupive?

¹² Mbaʼe sakrifísiopa ojapo Jesús, pe Saserdóte Guasu omoʼãmbaite hag̃ua umi yvypóra ojeroviáva pekádo? Haʼe omeʼẽ hekove perfékto, heʼi haguéicha omoñepyrũrõ guare pe séna oipotavaʼekue ojegueromanduʼa (elee Hebreos 9:11, 12). Ojevautisávo áño 29-pe, ojeporavo avei chupe oservi hag̃ua Saserdóte Guasúramo. Upe guive ohasa heta mbaʼe ijetuʼúva omano meve; koʼã mbaʼe oipytyvõ chupe ojapo porã hag̃ua upe tembiapo (Heb. 4:15; 5:7-10). Oñemoingove jey rire chupe, oho yvágape ha omeʼẽ Jehovápe isakrifísio repykue (Heb. 9:24). Upe guive Jesús oipytyvõ opavave ojeroviávape isakrifísiore ikatu hag̃uáicha omombaʼeguasu Ñandejárape ha ohupyty jeikove opaveʼỹva (Heb. 7:25). Avei upe sakrifísio rupive ikatúta oñepyrũ pe kompromíso pyahu (Heb. 8:6; 9:15).

13. Mbaʼépa ohupytýta umi oikéva pe kompromíso pyahúpe?

 ¹³ Oñemeʼẽ avei espíritu sánto opavave tapicha oikévape pe kompromíso pyahúpe (2 Cor. 1:21). Ñepyrũrã oñemoinge pe kompromíso pyahúpe umi hudío iñeʼẽrendúvape ha upe rire umi tetã ambueguápe (Efe. 3:5, 6). Mbaʼépa ohupytýta hikuái? Oñeperdonambaitéta chupekuéra hembiapo vaikue. Jehová heʼi voi kuri: “Che aheja reíta hembiapo vaikue ha nachemanduʼamoʼãvéi iñañanguére” (Jer. 31:34). Ojeheja reívo chupekuéra hembiapo vaikue, ikatútama oservi “rréi ha saserdóteramo”. Pedro ohaivaʼekue umi unhídope: “Peẽ katu peteĩ ñemoñare ojeporavopyre, rréi ha saserdóte, peteĩ tetã marangatu, peteĩ puévlo Ñandejára mbaʼe teéva, pemombeʼu hag̃ua enterovépe umi mbaʼe porãita haʼe orekóva. Haʼe penerenohẽ pytũmbýgui, ha penderesape imbaʼe rendy ijojahaʼỹvape” (1 Ped. 2:9). Koʼã mbaʼe Jehová heʼimavaʼekue umi Israelguápe omoĩrõ guare pe Léi, ha Pedro omomanduʼa jey umi kristiáno oikévape pe kompromíso pyahúpe (Éxo. 19:5, 6).

RRÉI HA SASERDÓTE OIPYTYVÕTAVA YVYPORAKUÉRAPE

14. Moõpa oservi umi oikéva pe kompromíso pyahúpe?

¹⁴ Moõpa oservi umi oikéva pe kompromíso pyahúpe? Oñondivepa haʼekuéra oservi saserdóteramo ko yvy ári oñeʼẽ rupi Ñandejára rérape. Omombeʼu hikuái Jehová haʼeha pe ipuʼakapáva ha omeʼẽ ñandéve tembiʼu hiʼoraitépe (Mat. 24:45; 1 Ped. 2:4, 5). Omano ha oñemoingove jey rire oservíma hikuái rréi ha saserdóteramo Jesúsndi yvágape (Luc. 22:29; 1 Ped. 1:3-5; Rev. 1:6). Mbaʼéichapa jaikuaa upéva? Peteĩ visión rupive, Juan ohechákuri Jehová oguapyha jerére hetaiterei tekove ojoguáva ánhelpe ha opurahéi hikuái peteĩ ‘purahéi pyahu’ pe “ovecha Raʼy renondépe”, ha heʼi: ‘Nde ruguýre orejoguavaʼekue Ñandejárape g̃uarã, opaichagua trívu, ñeʼẽ, táva ha tetãyguápe, ha rejapo orehegui rréi ha saserdóte Ñandejárape g̃uarã, ha roisãmbyhýta pe yvy’ (Rev. 5:8-10, BNP). Upe rireve, Juan ohecha mbaʼépa ojapóta koʼa oisãmbyhýtava: ‘Haʼekuéra Ñandejára ha Cristo saserdóteta, ha oisãmbyhýta hendive mil áñore’ (Rev. 20:6).  Upeichaite, oservíta hikuái Jesucristo ndive rréi ha saserdóteramo oipytyvõ hag̃ua opaite yvypórape.

15, 16. Mbaʼépa oguerúta yvyporakuérape umi rréi ha saserdóte?

¹⁵ Mbaʼéichapa oipytyvõta umi 144.000 unhído ko yvy ape ári? Revelación kapítulo 21-pe oñehenói chupekuéra: táva yvagapegua, Jerusalén pyahu, ha “Ovecharaʼy rembireko” (Rev. 21:9). Versíkulo 2 guive 4 peve heʼi: ‘Ahecha pe táva marangatu, Jerusalén pyahu, oguejy pe yvágagui, Ñandejára renondégui ha oñemonde tembirekorã ojeguávaicha imenarãme g̃uarã. Ha ahendu peteĩ ñeʼẽ hatã pe tróno oĩhágui heʼíva: “Péina koʼág̃a pe tavernákulo oĩ tetãnguéra apytépe, Ñandejára voi oĩta hendivekuéra, ha tetãyguakuéra oikóta hetã teéramo. Ñandejára voi omokãta tetãnguéra resay. Ndaiporimoʼãvéima ñemano, tasẽ, jaheʼo ha temimbyasy. Opa mbaʼe oĩvaʼekue yma ndaiporimoʼãvéima”’. Ajépa iporãite koʼã mbaʼe! Opávo pe ñemano, ndaiporimoʼãvéima oñembyasy, hasẽ ha ojaheʼóva. Opavave yvypóra iñeʼẽrendúva ohupytýta perfeksión ha ndojavyvéima Ñandejára renondépe, oĩ porãtama hendive opaite mbaʼépe.

¹⁶ Revelación 22:1, 2 omombeʼuve umi mbaʼe porã oguerútava umi rréi ha saserdóte: ‘Ohechauka chéve peteĩ rrío hiʼy oporomoingovéva, kristálcha hesakã asýva, osẽva Ñandejára ha Ovecharaʼy guapyhágui, osyrýva pe kálle mbyte rupi [Jerusalén pyahu táva rupi]. Ha pe rrío rembeʼýre ojovái oĩ umi yvyramáta oporomoingovéva, doce vése hiʼáva ha omeʼẽva hiʼa káda més, ha umi hoguekue katu tetãnguérape omonguera’ (BNP). Ko visión ohechauka ñandéve umi “tetãnguéra” térã opavave yvypóra oĩva ko yvy ape ári, okueraitetaha pe imperfeksióngui, ohupytýva opavave Adán ñemoñarépe. Añetehápe opa mbaʼe oĩvaʼekue yma ndaiporimoʼãvéima.

UMI RRÉI HA SASERDÓTE OMOHUʼÃ HEMBIAPO

17. Mbaʼépa ohupytýta yvyporakuéra umi oservíva rréi ha saserdóteramo omohuʼã vove hembiapo?

¹⁷ Og̃uahẽ rire huʼãme pe mil áño, umi oservíva rréi ha saserdóteramo ohupytykátama yvyporakuérape perfeksión. Upe rire Cristo, haʼéva Rréi ha Saserdóte Guasu, omeʼẽta Jehovápe potĩ asy opavave yvypóra oĩvaʼekue igoviérno guýpe (elee 1 Corintios 15:22-26). Upépe umi rréi ha saserdóte omohuʼãtama pe tembiapo oñemeʼẽvaʼekue chupekuéra.

18. Mbaʼéichapa Jehová oiporúta umi rréi ha saserdótepe oisãmbyhy rire Jesús ndive umi mil áñore?

¹⁸ Mbaʼéichapa Jehová oiporúta chupekuéra upe rire? Revelación 22: 5 heʼi hesekuéra ‘oisãmbyhytaha opa árare’. Ha mávapepa oisãmbyhýta? La Biblia nomombeʼúi. Péro jaikuaa oñemeʼẽha chupekuéra jeikove opaʼỹva ha ikatupyryha oipytyvõ rupi heta yvypóra imperféktope. Upévare jaʼekuaa Jehová osegitaha oiporu chupekuéra ojapo hag̃ua umi mbaʼe iñimportánteva okumpli hag̃ua hembipota.

19. Mbaʼe rehépa ñanemanduʼavaʼerã opavave jaháva pe Conmemoraciónpe?

¹⁹ Ág̃a 5 de abril de 2012 ñañembyaty vove Conmemoracionrã, katuete ñanemanduʼáta koʼã mbaʼe ñahesaʼỹijovaʼekuére. Upépe umi kristiáno unhído oĩva gueteri ko yvy ape ári hoʼúta pe pán ha víno tínto, ha upéicha ohechaukáta oĩha pe kompromíso pyahúpe. Koʼã mbaʼe orrepresentáva Cristo sakrifísio omomanduʼáta chupekuéra orekoha tuicha rresponsavilida ha peteĩ priviléhio ijojahaʼỹva oipytyvõ rupi oñekumpli hag̃ua Ñandejára rembipota. Jahákena ñande avei pe Conmemoraciónpe ha jahechauka jaagradeseha Jehovápe ñande pyʼaite guive omeʼẽ haguére ñandéve umi rréi ha saserdóte oipytyvõ hag̃ua opa yvypórape.

[Porandu ñahesaʼỹijóva]

[Nóta oĩva taʼanga ndive páhina 29]

Umi rréi ha saserdóte oguerúta heta mbaʼe porã yvyporakuérape opa ára g̃uarã