Akóintekena ‘ñañeʼẽ pyʼaporã’ ha mborayhúpe

‘Arandúpe oñeʼẽ ha pyʼaporã reheve oporomboʼe.’ (PRO. 31:26, ÑÑB)

1, 2. a) Mbaʼépa ojapovaʼerã opavave heʼíva ijehe kristianoha? b) Mbaʼépa ñahesaʼỹijóta ko artíkulope?

 YMA rréi Lemuélpe, isy oguerahauka peteĩ kuatiañeʼẽ ha upépe heʼi chupe mbaʼéicha vaʼerãpa peteĩ tembireko ikatupyrýva. Ha heʼi chupe: ‘Arandúpe oñeʼẽ ha pyʼaporã reheve oporomboʼe’ (Pro. 31:1, 10, 26 *, ÑÑB). Péro péva ndeʼiséi umi kuña iñarandúvante oñeʼẽvaʼerãha pyʼaporãme, síno opavave oĩ porãséva Ñandejára renondépe (jaleemína Proverbios 19:22). Añetehápe opavave heʼíva ijehe kristianoha ojapovaʼerã upéicha.

² Mbaʼépa heʼise ñandepyʼaporã japorohayhúgui, térã “bondad amorosa”? Mbaʼéichapa ikatu akóinte ñañeʼẽ pyʼaporã ha mborayhúpe? Máva mávandipa ñandepyʼaporãvaʼerã? Mbaʼéichapa ikatu upéva ñanepytyvõ jajogueraha porãve hag̃ua ñande rogapýpe ha kongregasiónpe?

Mbaʼépa heʼise ñandepyʼaporã japorohayhúgui?

3, 4. a) Mbaʼépa heʼise ñandepyʼaporã japorohayhúgui? b) Mbaʼépepa idiferénte ñanembaʼeporã opavavéndi ha ñandepyʼaporã japorohayhúgui?

³ Jahechami mbaʼépa heʼise ñandepyʼaporã japorohayhúgui. Ñandepyʼaporã heʼise jajepyʼapyha ñande pyʼaite guive ñande rapicháre ha upéva jahechauka jaʼe ha jajapóva rupive. Ha jaipota iporãvante ñande rapichápe g̃uarã jahayhúgui chupe. La Bíbliape ojeʼévo ñandepyʼaporã japorohayhúgui, heʼise avei japytaha ñande rapicha ykére ñaipytyvõ hag̃ua chupe toiko la oikóva.

⁴ Péro ñandepyʼaporã japorohayhúgui ndeʼiséi ñanembaʼeporãnte opavavéndi. Entéro yvypóra ikatu voínte ivuéno ha imbaʼeporã hapichándi. Pór ehémplo la Bíbliape heʼi umi hénte oikóva ísla Máltape imbaʼeporã hague apóstol Páblondi, ha umi ótro 275 tapicha ndive ndoikuaáiramo jepe chupekuéra (Hech. 27:37–28:2). Upéicharõ jahechauka hag̃ua ñandepyʼaporãha japorohayhúgui tekotevẽ jaikuaa raẽ ñande rapichápe ha jaiko iñamígoramo. * Upéicha ojapovaʼekue umi quenita ‘umi Israelgua oúramo guare Egíptogui’ (1 Sam. 15:6).

Tekotevẽ jajepyʼamongeta ha ñañemboʼe

5. Mbaʼépa ñanepytyvõta jajokokuaa hag̃ua ñande juru?

⁵ Añetehápe ijetuʼu ñañeʼẽ hag̃ua pyʼaporãme, upévare Santiago heʼivaʼekue: ‘Ijurúre  katu ndaipóri ipuʼakáva. Upéva peteĩ mbaʼe vai ojejokokuaaʼỹva, henyhẽtéva venénogui’ (Sant. 3:8). Upéicharõ mbaʼépa ñanepytyvõta jajokokuaa hag̃ua ñande juru? Jesús heʼi porã vaʼekue umi rrelihión omoakãvape: “Pe ñande jurúko heʼi ñande pyʼapýpe henyhẽvante” (Mat. 12:34, JMP). Upévare akóinte ñañeʼẽ hag̃ua pyʼaporãme ñamyenyhẽvaʼerã mbaʼe porãgui ñande pyʼapy. Upearã tekotevẽ jajepyʼamongeta ha ñañemboʼe. Koʼág̃a jahechamíta mbaʼéichapa jajapovaʼerã upéva.

6. Mbaʼérepa iporã jajepyʼamongeta mbaʼéichapa Jehová otrata isiervokuérape?

⁶ La Bíbliape heʼi Jehová ‘oporohayhuetereiha’ (Éxo. 34:6). Ha Sálmope katu heʼi voi ‘ko yvy henyhẽha Ñandejára mborayhúgui’ (Sal. 119:64). Ñandejára Ñeʼẽme oĩ heta ehémplo ohechaukáva mbaʼéichapa Jehová imbaʼeporã isiervokuérandi. Iporã ñañemotiémpo jajepyʼamongeta hag̃ua mbaʼéichapa Haʼe otrata porã isiervokuérape, péicha ñamombaʼevéta chupe ha jasegiséta iñehémplo (jaleemína Salmo 77:12).

7, 8. a) Mbaʼéichapa Jehová ohechauka imbaʼeporãha Lot ha ifamíliandi? b) Mbaʼéichapa David oñeñandu Jehová imbaʼeporã haguére hendive?

⁷ Pór ehémplo ñanemanduʼami mbaʼéichapa Jehová otrata porã vaʼekue Lot ha ifamíliape osalvátarõ guare chupekuéra. Jehová omondo hiʼanhelkuérape heʼi hag̃ua chupekuéra tosẽ Sodómagui. Ha ohundipotaitévoma upe táva umi ánhel heʼi jey jey oheja hag̃ua hikuái hóga ha pyaʼe porã tosẽ upégui. La Biblia heʼi: ‘Lot imbegue ha Ñandejára oiporiahuverekógui chupe umi ánhel oguenohẽ ipógui Lot, hembireko ha itajyrakuérape upe távagui’. Ajépa opoko ñanderehe jahechávo mbaʼeichaitépa Jehová imbaʼeporã osalvávo chupekuéra (Gén. 19:16, 19).

⁸ Ñapensami avei David heʼivaʼekuére opurahéirõ guare: “[Jehová] oheja rei chéve che rembiapo vaikue ha chemonguera opaichagua mbaʼasýgui”. Rréi David ovyʼaiterei Jehová operdona haguére chupe hembiapo vaikue Bat-seba ndive. Upévare omombaʼeguasu chupe heʼívo: “Yvága oĩ mombyryháicha yvýgui, upeichaite tuicha imborayhu umi hese ojeroviávare” (Sal. 103:3, 11). Jajepyʼamongetávo koʼã mbaʼére, ñamombaʼeterei mbaʼéichapa Jehová ohechauka ipyʼaporãha. Upéva ñanemomýi ñamombaʼeguasu ha jaagradese hag̃ua chupe. Ha jaguerohorýramo Jehová ojapóva, katuete ñanekyreʼỹvéta jasegi hag̃ua iñehémplo (Efe. 5:1).

9. Mbaʼépa ñanemokyreʼỹ ára ha ára jahechauka hag̃ua ñanembaʼeporãha?

⁹ Koʼãva ha hetave ehémplo oĩva la Bíbliape ohechauka Ñandejára imbaʼeporãha isiervokuéra iñeʼẽrendúva ndive. Péro mbaʼéichapa otrata umi ndojapóivape haʼe heʼíva? Otrata vaípa chupekuéra? Ni mbaʼevéicharõ. La Biblia heʼi Jehová ‘imbaʼeporãha umi imalagradesído ha iñañávandi’, ha upévare ‘oheja kuarahy ojope iñaña ha hekopotĩvape g̃uarã; ha omongy hekojoja ha ndahekojojáivape g̃uarã’ (Luc. 6:35; Mat. 5:45, NM). Jastudia mboyvéma voi la Biblia Jehová ipyʼaporã ñanendive. Ha upéi ñañemeʼẽvo chupe katu koʼýte ohechauka imbaʼeporãha ñanendive ñanderayhu rupi (jaleemína Isaías 54:10). Ajépa jaagradesete chupe upévare! Ko mbaʼe ñanemokyreʼỹ ñañeʼẽ hag̃ua pyʼaporãme ha opa mbaʼe jajapóvape jahechauka hag̃ua ára ha ára ñanembaʼeporãha.

10. Mbaʼérepa tekotevẽ ñañemboʼe ñanembaʼeporã hag̃ua?

¹⁰ Ñanembaʼeporã hag̃ua tekotevẽ ñañemboʼe meme. Ñanemanduʼavaʼerã pe  mbaʼeporã ha mborayhu ouha Ñandejára espíritugui (Gál. 5:22). Upévare jahejáramo Ñandejára espíritu sánto ñanesãmbyhy, ñanembaʼeporãta ñande pyʼaite guive ñande rapichándi. Ajépa iñimportantete jajerure jey jey Jehovápe ijespíritu sánto ha jaiko ipoguýpe. Upéicharõ, jajerurékena Jehovápe tomeʼẽ ñandéve ijespíritu (Luc. 11:13). Péicha jahecha akóinte ñañeʼẽ hag̃ua pyʼaporãme tekotevẽha jajepyʼamongeta ha ñañemboʼe.

Ména ha tembireko pyʼaporãme oñeʼẽvaʼerã ojupe

11. a) Mbaʼérepa jaʼekuaa Jehová oipotaha ména otrata porã hembirekópe? b) Mbaʼéichapa ména ohechaukáta imbaʼeporãha hembirekóndi?

¹¹ Apóstol Pablo heʼi menakuérape: ‘Pehayhúke pene rembirekópe Cristo ohayhu haguéicha kongregasiónpe ha omeʼẽ hese hekove’ (Efe. 5:25). Pablo omomanduʼa avei menakuérape Jehová heʼivaʼekuére Adán ha Évape: ‘Kuimbaʼe ohejavaʼerã itúva ha isýpe, ojoaju hembireko ndive ha oiko mokõivégui peteĩnte’ (Efe. 5:31). Jahechakuaa Ñandejára oipotaha ména otrata pyʼaporãme hembirekópe, akóinte ohayhu chupe ha opyta ijykére. Ndoikoivaʼerã oñeʼẽ vai térã otaky hese, upéva rangue oñeʼẽvaʼerã pyʼaporãme hembirekópe ha oguerohory umi mbaʼe porã heʼi ha ojapóva (Pro. 31:28). Ha sapyʼánte ojoavýramo jepe hikuái, pe ména imbaʼeporãramo ndoikomoʼãi oapoʼi hembirekópe.

12. Mbaʼéichapa tembireko ohechaukavaʼerã oñeʼẽha pyʼaporãme?

¹² Tembireko avei oñeʼẽvaʼerã pyʼaporãme ha ani oiko ko múndope ojeikoháicha. Tohechauka ‘omombaʼeha iménape’ oñeʼẽ porãvo hese opavave rovake, upéicha umi hénte omombaʼéta avei iménape (Efe. 5:33). Pe tembireko oipotáramo imembykuéra orrespeta itúvape ndodiskutimoʼãi iménape henondepekuéra. Upéva rangue oñemongetavaʼerã iménandi haʼeñoháme umi provlémare. La Biblia heʼi voi: “Pe tembireko arandu omopuʼã hóga” (Pro. 14:1, ÑÑB). Péicha ojapóramo oikóta hikuái pyʼaguapy ha vyʼápe oñondivepa.

13. Moõpa umi omendáva ohechaukavaʼerã avei ipyʼaporãha, ha mbaʼéichapa ikatu ojapo upéva?

¹³ Umi omendáva ojorrespeta ha ojotrata porã vaʼerã oĩramo jepe haʼeñoháme. Apóstol Pablo heʼi haguéicha ndovaléi oiko hikuái ‘pochy, ñaña, jejaʼo ha ñeʼẽ tieʼỹme’. Avei ‘oñemondevaʼerã hikuái poriahuvereko, pyʼaporã, jejapoʼỹ, tekopochyʼỹ ha ñehaʼarõkuaápe’. Ha koʼýte ‘oñemondevaʼerã pe mborayhúpe, upe mbaʼe oporombojoaju porãva’ (Col. 3:8, 12-14). Mitãnguéra ohendúramo isy ha itúvape oñeʼẽha ojupe pyʼaporãme, katuete ovyʼavéta ha iporãveha katu osegíta hikuái iñehémplo.

14. Mbaʼéichapa umi túva ikatu omokyreʼỹ hogayguakuérape?

¹⁴ Pe salmísta ojerure asy vaʼekue Jehovápe: ‘Chembopyʼaguapymína ne mborayhúpe’  (Sal. 119:76). Ñandejára ñanemokyreʼỹ ha ohechauka ñandéve ñande raperã, péicha tuicha ñanembopyʼaguapy (Sal. 119:105). Iporãta tuvakuéra osegi avei Jehová ehémplo. Mbaʼéichapa umi túva ikatu omokyreʼỹ hogayguakuérape? Oguerohorývo umi mbaʼe porã ojapóva hikuái ha ohekomboʼévo chupekuéra. Upearã oaprovechavaʼerã pe Aty Jastudia Hag̃ua Ñande Rogayguándi omombareteve hag̃ua hikuái ijerovia (Pro. 24:4).

Jahayhúkena ñande pyʼaite guive ñane ermanokuérape

15. Mbaʼéichapa umi ansiáno ha ambue ermáno ikatu osegi Jehová ehémplo?

¹⁵ Rréi David oñemboʼevaʼekue Jehovápe ha heʼi: ‘Ne mborayhu ha pe añetegua tapia toñangareko cherehe’ (Sal. 40:11, ÑÑB). Mbaʼéichapa umi ansiáno ha ambue ermáno ikatu osegi Jehová ehémplo? Mborayhúpe otratávo ermanokuérape ha oñemoñeʼẽvo pyʼaporãme chupekuéra (Pro. 17:17).

16, 17. Mbaʼéichapa avei ikatu jahechauka jahayhuha ñane ermanokuérape?

¹⁶ Mbaʼépa jajapovaʼerã jahecháramo peteĩ ermáno opiaha Jehová rapégui? Jahayhúramo añetehápe chupe, ñañeʼẽta hendive ohechakuaa hag̃ua tekotevẽha okambia (Sal. 141:5). Ha jaikuaáramo peteĩ ermáno ojapoha peteĩ mbaʼe ivaietereíva, ñamokyreʼỹta chupe ‘ohenói hag̃ua ansianokuérape ha haʼekuéra toñemboʼe hese, ha tomona hese aséite Jehová rérape’ (Sant. 5:14, ÑÑB). Péro pe ermáno ndojapóiramo upéicha, naiporãmoʼãi jaguerokirirĩnte, ñañeʼẽvaʼerã jahechauka hag̃ua jahayhuha chupe. Kongregasiónpe oĩ avei heta ermáno oñeñandúva haʼeño, ndovyʼavéiva, oñembyasýva térã oimoʼãva ndovaleiha voi mbaʼeverã. Ajépa péicha jave opyta porãitéta ñandéve jahechauka hag̃ua ñañeʼẽha pyʼaporãme ‘ñamokyreʼỹvo umi ikangývape’ (1 Tes. 5:14, ÑÑB).

¹⁷ Sapyʼánte katu oĩ tapicha omosarambíva japu omoĩ vai hag̃ua ñane ermanokuérape. Mbaʼépa jajapóta péicha jave? Jaiko rangue ñapensa vai ñane ermanokuérare, iporãvéta nañahendúi umi oñeʼẽ reívape. Térã opyta porãramo ikatu ñaporandu chupe: Nde piko rehecha mbaʼe raʼe? Ha umi ndaijaʼéiva Jehová siervokuérare oikuaaséramo moõpa oĩ ambue ermáno ojapo hag̃ua hese mbaʼe vai, japorohayhúgui  ni mbaʼevéicharõ nañamombeʼumoʼãi chupekuéra (Pro. 18:24).

Umi oporohayhúva oikovéta opa ára g̃uarã

18, 19. Mbaʼérepa iporã ñañeʼẽ pyʼaporãme ñane ermanokuérape?

¹⁸ Opa mbaʼe jaʼe ha jajapóvare jahechaukavaʼerã jahayhuha ñane ermanokuérape. Akóinte ñañeʼẽvaʼerã pyʼaporãme ijetuʼúramo jepe sapyʼánte jajapo upéva. Ñanemanduʼavaʼerã Jehová oñeñandu vaieterei hague ohechávo umi Israelgua mborayhu ha pyʼaporã opa reiha, “ku ysapy koʼẽjumeguáicha” (Ose. 6:4, 6, ÑÑB). Péro ovyʼaiterei ohechávo isiervokuéra akóinte ipyʼaporã ha ohovasa chupekuéra upévare.

¹⁹ Proverbios 21:21-pe Jehová opromete: ‘Upe oikóva tekojoja ha mborayhúpe, ojuhuvaʼerã pe tekove, hustísia ha terakuãporã’. Jahechaháicha Jehová ohovasáta umi ipyʼaporãvape omeʼẽvo chupekuéra jeikove opaveʼỹva. Ha Jehová voi ñanepytyvõta jahupyty hag̃ua pe “jeikove añeteguáva” (1 Tim. 6:12, 19). Upéicharõ opavave ñañehaʼãvaʼerã ‘ñandepyʼaporã ha jaiporiahuvereko ñande rapichápe’ (Zac. 7:9).

[Nóta]

Ñambohovaimi koʼã porandu

• Mbaʼépa heʼise ñandepyʼaporã japorohayhúgui?

• Mbaʼépa ñanepytyvõta jajokokuaa hag̃ua ñande juru?

• Mbaʼéichapa ména ha tembireko ohechauka pyʼaporãme oñeʼẽha ojupe?

• Mbaʼéichapa jahechaukáta ñañeʼẽha pyʼaporãme ñane ermanokuérape?

[Porandu ñahesaʼỹijóva]

[Nóta oĩva taʼanga ndive páhina 23]

David ovyʼa Jehová ipyʼaporã haguére hendive

[Nóta oĩva taʼanga ndive páhina 24]

Jajapópa káda semána pe Aty Jastudia Hag̃ua Ñande Rogayguándi?