Jehová hova rory omañávo hesekuéra

ÑANDE rova ningo oreko treinta múskulo rupi. Japuka hag̃uánte voi ñaikotevẽ catorce múskulo. Ajépa hasýta ñañemongeta kyreʼỹ hag̃ua ndajarekói mbaʼéramo umi múskulo. Péro umi tapicha ohenduʼỹva ningo oiporu umi múskulo ndahaʼéi oñemongeta hag̃uánte. Ñande rova ha ñande rete rupive ningo ikatu voi jaʼe heta mbaʼe. Heta tapicha ohecharamoiterei mbaʼéichapa pe lenguaje de señas rupive ikatu ojeʼe porã umi mbaʼe ijetuʼuvéva jepe.

Ramoite guivénte oparupigua tapicha ohenduʼỹva ohechaváicha Jehová rova ha ndahaʼéi yvypóra rovánte (Lam. 2:19). Péro upéva ndahaʼéi péicha péichante oikovaʼekue. Jehová ningo ymaite guive ohechauka ohayhuha umi ñande rapicha ohenduʼỹvape. Ha yma Israel tiémpo guivéma voi heta hendáicha ohechauka upéva (Lev. 19:14). Koʼág̃a rupi avei jahechakuaa Jehová ohayhuha umi ohenduʼỹvape. “Haʼe ningo oipota opavave ojesalva ha oikuaa pe añetegua” (1 Tim. 2:​4, ÑÑB). Umi ohenduʼỹva ningo oikuaávo Jehová rembipota, haʼeteváicha ohecháva chupe. Péro haʼekuéra ndaikatúi ohendu pe marandu porã. Ha mbaʼéicha piko upéicharõ oikuaa hikuái Jehovápe? Ñambohovái hag̃ua ko porandu, jahechami raẽ mbaʼérepa tekotevẽte pe lenguaje de señas umi ohenduʼỹvape.

Ohendu hikuái

Heta mbaʼe ningo ojeʼe rei umi sórdo ha iñidióma rehe. Péro umi ohenduʼỹva ningo ikatu omaneha mbaʼyruguata jepe. Ha chupekuéra hasy opilla hag̃ua ñande juru rehe mbaʼépa jaʼe. Lenguaje de señas ningo ndahaʼeihína braille ni ñehaʼangánte. Ndaipóri avei peteĩ lenguaje de señas oñentendéva oparupiete. Káda tetãme ningo ojeguereko peteĩ lenguaje de señas.

Umi sórdo piko oleekuaa? Oĩ umi oleekuaáva, péro hetaitereive oĩ ndoleekuaáiva. Mbaʼérepa upéva? Umi ñeʼẽ jahaíva orrepresenta rupi pe idióma ñande ñañeʼẽva. Ñapensamínte mbaʼéichapa peteĩ mitã ohendúva oaprende iñidióma. Michĩmi guive oñeñeʼẽ chupe ha sapyʼaitérõ g̃uarã oñepyrũma oñeʼẽ ha mbeguekatúpe hetave mbaʼéma heʼi. Oaprende ijeheguínte voi, ohendúvo mbaʼéichapa oñeʼẽ la hénte. Upévare, pe mitã oleekuaa hag̃ua ohechakuaantevaʼerã umi létra orrepresentaha umi ñeʼẽ haʼe oikuaámava.

Koʼág̃a epensamíntena rejeguerahaha ambue tetãme ha nerentendéi pe idióma upépe oñeñeʼẽva. Upéi nemboty hikuái peteĩ koty ipare de vídriovape, ha nerehendúi mbaʼevete. Kada día ou umi hénte oñeʼẽse ndéve oka guive, péro nde nerehendúi chupekuéra, rehechánte mbaʼéichapa omonguʼe ijuru. Ha ohechakuaávo hikuái nerentendeiha la heʼíva, ohai ndéve peteĩ kuatiáre. Upéi ohechauka ndéve oimoʼãgui upéicha rentendetaha reñemongeta hag̃ua hendivekuéra. Ndépa ere rentendetaha chupekuéra ojapóramo upéicha? Nahániri. Mbaʼérepa  nerentendemoʼãi? Pórke pe kuatiáre ojehaivaʼekue ningo orrepresentahína peteĩ idióma nde neʼirãva gueteri ni rehendu. Ha péva pe situasiónpe ningo oĩ hetaiterei sórdo.

Lenguaje de señas rupive ningo umi sórdo oñemongeta hapicha ndive. Haʼekuéra oiporu umi mbaʼe ijerére oĩva ontendeuka hag̃ua heʼíva. Upéicha hete ha hova rupive oñeʼẽ hikuái ha jahecha orekoha avei mbaʼéichapa oñeʼẽvaʼerã iñidiómape. Péicha haʼekuéra oiporu lenguaje de señas omombeʼu hag̃ua opa mbaʼe ambue hapichakuérape.

Peteĩ sórdo oñemongeta jave ningo opa mbaʼe ojapóva hóva, ipo ha hete rupive heʼisehína peteĩ mbaʼe. Ñande rova rupive ikatu jahechauka iñimportántepa peteĩ mbaʼe, pórke lenguaje de séñaspe péicha vaʼerã voi. Pór ehémplo, peteĩ lenguaje de séñaspe jajetyvytarupivaʼerã ñaponderátaramo peteĩ mbaʼére. Térã jaipotáramo oñembohovái ñandéve sí térã no. Péro ñaporandu hag̃ua “mávapa”, “mbaʼépa”, “moõpa”, “arakaʼépa”, “mbaʼérepa” ha “mbaʼéichapa” ñamochaʼĩvaʼerã ñande tyvyta. Ha ñande juru ñamomýi lájare jahechaukakuaa tuichápa peteĩ mbaʼe térã ñamombaʼetereípa peteĩ mbaʼe oikóva. Umi sórdo omonguʼe lájare iñakã, ijatiʼy, hova, hopepi ha hesa omombeʼuhína ñandéve heta mbaʼe.

Koʼã mbaʼe ohechauka pe lenguaje de señas iporãitereiha. Ha ikatu voi jaiporu ñañeʼẽ hag̃ua heta mbaʼére. Ikatu jaʼe peteĩ ñeʼẽpoty, peteĩ pukarã, ñamombeʼu umi mbaʼe ñañandúva, jahecháva térã jahechaʼỹva ha ñañeʼẽ hag̃ua traváhore jepe.

Tuichaiterei mbaʼe umi puvlikasión oĩva lenguaje de séñaspe

Jaiporuvaʼerã pe lenguaje de señas ñamombeʼu hag̃ua Jehová marandu umi ohenduʼỹvape. Upéicharõ haʼekuéra ikatúta “ohendu” ha ojerovia Ñandejárare. Upévare ñande testigos de Jehová ñañehaʼãmbaite japredika oparupigua ohenduʼỹvape ha jajapo umi puvlikasión oipytyvõtava chupekuéra (Rom. 10:14). Koʼág̃a rupi ko múndo tuichakue javeve ojetradusi 58 lenguaje de séñaspe, ha 40-pe ojeguereko umi puvlikasión en DVD. Mbaʼépa ojehupytýma ojejapo haguére péicha?

Jeremy sy ha túva ningo sórdo. Ha haʼe heʼi: “Chemanduʼa yma arekórõ guare 12 áño, peteĩ árape che ru oike hague ikotýpe ostudia hag̃ua Ñemañaha. Órare ningo oĩ upépe ontende hag̃ua michĩmi jepe. Upéi osẽ sapyʼa ikotýgui ha ovyʼaiterei voi heʼívo chéve séñape: ‘Antendéma katu che raʼy! Antende porãiterei!’. Ha oñepyrũ omombeʼu chéve mbaʼépa heʼi umi párrafope. Upémarõ ajagarra ahecha la rrevísta ha haʼe chupe séñape avei: ‘Papa, chéverõ g̃uarã ndeʼíri koʼápe upéva’. Ha añepyrũtavo amyesakã chupe la heʼíva upépe, cheñeʼẽjoko. Upéi ojere oike jey ikotýpe ha oñehaʼã ontende ijeheguínte pe artíkulo. Ndacheresaraichéne  voi mbaʼeichaitépa oñembyasy upe haguére. Ha amombaʼeterei avei chupe ahechávo noñentregaiha. Koʼág̃a hetáma oĩ puvlikasión lenguaje de séñaspe ha ojejapo en DVD. Upévare che ru tuicha ontende porãve umi informasión. Chéve g̃uarã tuichaiterei mbaʼe ahecha mbaʼeichaitépa hova rory asy oñeʼẽvo Jehováre”.

Jahechamína koʼág̃a mbaʼépa oikovaʼekue peteĩ ermáno ha hembireko oñeʼẽrõ guare Jessenia ndive. Ko mitãkuña ningo peteĩ sórda oikóva Chílepe. Umi ermáno ningo oho hógape ha ojerure permíso Jessenia sýpe ohechauka hag̃ua chupe peteĩ DVD hérava Che lívro omombeʼúva istória oĩva Ñandejára Ñeʼẽme lengua de señas chilénape. Haʼekuéra omombeʼu la oikovaʼekue: “Jessenia oñepyrũvo ohecha pe vidéo, opuka ha upéi katu hasẽ. Isy oporandu chupe mbaʼérepa hasẽ, ha haʼe katu heʼi ogustaitereiha chupe upe ohechavahína. Upépe isy ohechakuaa hese ontendepaiteha upe ohecháva”.

Venezuélape katu, kampáñape oiko peteĩ karai ha kuñakarai ifamília peteĩva. Pe kuñakarai ningo sórda ha imboriahúgui hikuái hyeguasu jeýrõ guare oitykase la imemby. Upérõ ñane ermanokuéra og̃uahẽ hogapekuéra opredika hag̃ua. Ha oikuaaʼỹre hikuái la oikóva upépe, ohechauka chupekuéra pe leksión 12 oĩva pe vidéo Mbaʼépa ojerure Ñandejára ñandehegui?-pe. Upéva ningo oĩ lengua de señas venezolánape ha upe leksiónpe omombeʼu mbaʼépa Ñandejára heʼi oĩramo oitykáva imemby ha oporojukáva. Upe rire, pe kuñakarai heʼi oagradeseha ojehechauka haguére chupe upe leksión. Ha heʼi upévare odesidi hague hikuái ndoitykamoʼãiha imemby. Ha péicha ningo, ojesalva peteĩ mitã ojeguereko rupi peteĩ puvlikasión lenguaje de séñaspe.

Lorraine ningo peteĩ Testígo sórda. Ha haʼe heʼi: “La Biblia jestudía ningo ijetuʼueterei chéve. Che ningo ndaikuaái heta mbaʼe, upévare oĩ umi mbaʼe nantendéiva ha ndaikuaái mbaʼépa heʼise. Péro oñemeʼẽ ñepyrũrõ guare chéve umi puvlikasión lenguaje de séñaspe oĩva, antende sapyʼa heta mbaʼe ndaikuaaivaʼekue”. Peteĩ ermáno hérava George ningo sórdo avei. Ha ojapóma treinta y ocho áño oiko hague chugui testigo de Jehová. Haʼe heʼi: “Jajeroviave ningo ñandejehe ha javyʼaiterei voi ñantendéramo peteĩ mbaʼe ñandejeheguínte. Che haʼe voi umi DVD oĩva lenguaje de séñaspe tuichaiterei chepytyvõha ajeroviave hag̃ua Jehováre”.

“Peteĩ rreunión che ñeʼẽtépe!”

Testigos de Jehová ningo omoguahẽ hapichakuéra pópe umi puvlikasión oĩva lenguaje de séñaspe. Omoñepyrũ avei hikuái heta kongregasión ojapóva umi aty lenguaje de séñaspe. Koʼág̃a peichagua kongregasión oĩma voi mil cien rupi ko yvy ape ári. Umi rreunionhápe ningo oñemog̃uahẽ Ñandejára  Ñeʼẽ ñane ermanokuérape iñeʼẽtépe. Ha iporãveha ojeporu pe idióma ohechaukáva mbaʼéichapa haʼekuéra opensa, ojepokuaa ha oiko.

Mbaʼépa ojehupyty oñemoñepyrũ rupi kongregasión lenguaje de séñaspe? Jaikuaa hag̃ua jahechami Cyril rembiasakue. Ko ermáno ningo ojevautisavaʼekue 1955-pe ha áñore oiko oñehaʼã ontende hag̃ua ñande rrevísta, lívro ha folletokuéra. Sapyʼánte ndaipóri otradusivaʼerã chupe ojeʼéva umi rreuniónpe, péro haʼe katuete oho. Upéicha jave ningo umi ermanokuéra ohai chupe peteĩ kuatiáre umi diskursánte heʼíva. Cyril ningo 1989-pe ojapóma treinta y cuatro áño oservi hague Jehovápe. Upérõ raẽ ningo oñemoñepyrũvaʼekue pe primera kongregasión lenguaje de séñaspe Nueva Yórkpe. Mbaʼéichapa oñeñandu Cyril oĩ rire upe kongregasión? Haʼe heʼi: “Haʼete voi ningo asẽ mbaʼéva peteĩ kaʼaguy ypytũgui, térã asẽva peteĩ yvykua pypukúgui. Eguatána ekalkula: Peteĩ rreunión che ñeʼẽtépe!”.

Umi kongregasión lenguaje de séñaspe oñembyaty jepi umi ohenduʼỹva omombaʼeguasu hag̃ua Jehovápe ha oikuaave hag̃ua chupe. Ko múndope ningo ojeapoʼi umi ohenduʼỹvape. Upévare umi kongregasiónpe haʼekuéra oho ohechakuaágui upépe ojehayhuha chupekuéra, oñeʼẽ hapichakuéra ndive ha otopa iñamigoiterã. Peichahápe haʼekuéra ikatúta oaprende, oñembokatupyryve ha oservi porãve Ñandejárape. Heta ohenduʼỹva ningo ojapo avei iprekursorádo. Oĩ avei umi ovavaʼekue tetã ambuére oipytyvõ hag̃ua hapichakuéra ohenduʼỹvape oikuaa hag̃ua Jehovápe. Oĩ avei umi oikóva chugui mboʼehára katupyry, ha oñemeʼẽ chupe tuicha rresponsavilida kongregasiónpe.

Estados Unídospe ohasáma cien kongregasión ha 80 grúpo rupi lenguaje de séñaspe. Brasílpe oĩ 300 kongregasión rupi ha ohasáma avei 400 grúpo. Méxicope haimetéma ojehupyty 300 kongregasión, ha Rúsiape katu oĩma 30 ári kongregasión ha 113 grúpo. Koʼãva ohechauka ñandéve mbaʼeichaitépa osẽ porã ko tembiapo ojejapóva oparupiete. *

Ojejapo avei umi aty guasu lenguaje de séñaspe. Akokuehe áño ningo ojejapo 120 ári aty guasu tres diaguáva ko yvy ape ári. Koʼã aty guasúpe umi testígo sórdo ohechakuaa haʼekuéra oserviha avei Jehovápe entéro isiervokuéra ndive. Ha ohechakuaa avei hikuái Jehová organisasión ohekomboʼe porãitereiha chupekuéra.

Peteĩ ermáno ohenduʼỹva ningo héra Leonard ha ojapóma veinticinco áño ojevautisa hague. Haʼe heʼi: “Chéngo agueroviáva voínte Jehová haʼeha Ñandejára añetegua. Péro nantendeporãiva mbaʼérepa oheja jahasa asy. Ha sapyʼánte katu arrenega voi hese upévare. Upéi peteĩ aty guasu de tres diaguávape, peteĩ diskúrso chepytyvõ antende porã hag̃ua upéva. Opávo upe diskúrso ningo chemanduʼa che rembireko chekodeaʼimi hague ha opukavy heʼívo chéve: ‘Entende porãmapa koʼág̃a?’. Ha upérõ raẽ ikatu vaʼekue haʼe antendemaha. Che ningo akóinte ahayhúva Jahovápe, péro nantendéi mbaʼérepa oheja oĩ hetaite iñañáva. Koʼág̃a aikuaáma mbaʼérepa. Ha avyʼáite ningo ndahejái haguére Jehovápe!”.

Ipyʼaite guive oagradese hikuái

Mbaʼépa ohecha Jehová rehe umi ohenduʼỹva oikuaávo chupe? Ohecha hese mborayhu, poriahuvereko, tekojoja, jerovia, pyʼaporã ha hetave mbaʼe porã.

Ñane ermanokuéra ohenduʼỹva ha oĩva opa tetã rupi ohechavaichahína Jehová rova ha koʼẽ koʼẽre ohecha porãvétantema chupe. Jehová ohayhuetereígui umi ohenduʼỹvape ‘hova rory omañávo hesekuéra’ (Núm. 6:​25, ÑÑB). Haʼekuéra ningo ipyʼaite guive oagradese Jehovápe oheja haguére oikuaa chupe!

[Nóta]

[Nóta oĩva taʼanga ndive páhina 25]

Ohasáma 1.100 kongregasión oĩva lenguaje de séñaspe ko yvy ape ári

[Nóta oĩva taʼanga ndive páhina 26]

Jehová hova rory omañávo umi ohenduʼỹvare