Pe marandu porã oñemog̃uahẽ mombyryvehápe jepe

PETEĨ lugár hérava República rusa de Tuva opyta súr gotyo Sibériape, ha oja Mongolia rehe. Heta upepegua ningo oiko mombyrymbyry. Upévare hasy oñemog̃uahẽ hag̃ua chupekuéra pe marandu porã. Péro ndaʼareguasúi heta upérupi oikóva oho peteĩ kursohápe táva guasu Kyzyl-pe. Ha upe távape ningo oiko peteĩ prekursóra hérava María, ha haʼe oikuaávo outaha umi hénte heʼi iporãtaha oaprovecháramo opredika hag̃ua chupekuéra.

María omombeʼu la oikovaʼekue: “Che ningo amboʼe peteĩ eskuélape, ha upépe ojeprepara peteĩ kúrso ojehecha hag̃ua mbaʼéichapa ikatu oñepytyvõ umi ivísio vaívape. Ha oñehaʼarõ ou cincuenta tapicha oikóva amo Tuva ruguápe. Umíva apytépe profesór, psicólogo, umi inspector de servicios de protección de menores ha ambue tapicha”. Upévare, María heʼi opyta porãtaha opredika hag̃ua chupekuéra, péro hasy chupe ojapo hag̃ua upéva. Mbaʼérepa? María heʼi: “Che ningo chekogua ha hasyeterei chéve apredika hag̃ua oimehápe. Upémarõ, ajerure Jehovápe chembopyaguasumi hag̃ua ha upéicha apredika hag̃ua umi héntepe”. Mbaʼépa ojapo upéi?

María heʼi: “Atopa peteĩ ¡Despertad! omombeʼúva mbaʼépa ikatu jajapo jakyhyjetereíramo peteĩ mbaʼégui. Ha apensa ikatuha oleese upéva peteĩ psicólogo, upémaramo agueraha eskuélape. Upe árape oho che ofisínape peteĩ profesóra oĩva pe kursohápe, ha aikuaveʼẽ chupe upe rrevísta. Haʼe oguerohoryeterei voi ha omombeʼu oipytyvõtaha chupe. Upéi ótro día agueraha chupe pe lívro Lo que los jóvenes preguntan. Respuestas prácticas (volumen 1), ha ojagarra avei chehegui. Upévare apensa umi ambue profesór oipotáne hag̃ua avei. Upéicha rupi agueraha peteĩ káha renyhẽ pe lívro Los jóvenes preguntan ha ambue puvlikasión”. Ha sapyʼaitérõ g̃uarã omonandíma hikuái pe káha. María omombeʼu: “Pe profesóra añemongeta hague irũnguéra ohojoa avei che ofisínape ha oporandu chéve: ‘Moõ piko oñemeʼẽhína la livrokuéra’”. Ha péicha ogueraha avei hikuái la ilivrorã.

Pe kúrso ningo opa peteĩ sábadope. Péro María nombaʼapói upe díape, upévare haʼe oheja heta lívro, rrevísta ha folléto iñofisínape mesa ári. Ha omoĩ pisarrónpe: “Che irũnguéra mboʼehára: Peguerahakuaa koʼã lívro ha rrevistakuéra penembaʼerã ha pene hentekuérape g̃uarã. Koʼãva ningo penepytyvõta pende traváhope ha penderogapýpe pejoayhuve hag̃ua”. Mbaʼépa ojapo hikuái? María heʼi: “Aha upe díape che ofisínape ha ahecha oguerahapalentomaha hikuái. Upévare pyaʼe porã voi agueraha amoĩve upépe lívro ha rrevistakuéra”. Opárõ g̃uarã pe kúrso ningo María omeʼẽma 380 rrevísta, 173 lívro ha 34 folléto. Umi ohovaʼekue pe kursohápe ogueraha umi puvlikasionkuéra hógape. María heʼi omohuʼãvo: “Avyʼaiterei oñemog̃uahẽ haguére pe marandu porã amo Tuva rugua rehe jepe” (Ecl. 11:6).

[Mápa oĩva páhina 32-pe]

(Emaña pe kuatiañeʼẽre rehecha hag̃ua osẽ hagueichaite ko párte)

RUSIA

REPÚBLICA DE TUVA