MBAʼÉREPA IÑIMPORTÁNTE JAJERRESPETA ÑANDEJUPE VOI

• Umi investigasión ohechauka umi persóna opensáva ndovaleiha mbaʼeverã ha ndojehayhúiva ijupe, upe rire orekoha jepi depresión, ansieda, ou okarueterei térã ndokaruiete. Avei koʼãichagua persóna majórmente upe rire omokõ rasa térã ojedroga.

• Umi ojerrespetáva ijupe noñekomparái ótrore, upévare ifasilve chupe ojegueraha porã hag̃ua hapichakuérandi ha oreko heta amígo ovaléva la péna. Péro umi saʼi ojerrespetáva ijupe majórmente oporokritika ha oñeʼẽ vai hapicháre, ha upévare ijetuʼu chupe ojogueraha porã hag̃ua ótrondi.

• Umi ojerrespetáva ijupe imbarete ha iñaguánte, ohasáramo jepe umi provléma ijetuʼúva. Ndohejái mbaʼeve ojoko chupekuéra ohupyty hag̃ua la ohupytyséva. Péro umi ndojerrespetaguasúiva ijupe voi, peteĩ provléma michĩva jepe, chupekuéra g̃uarã tuichaitereíma ha majórmente oñentregántema.

 MBAʼÉPA NDE IKATU REJAPO

Eiporavo ne amigorã umi nemokyreʼỹtava. Ehasa tiémpo umi persóna ohechaukávandi opororrespetaha, ojepyʼapy añetéva nderehe ha ikatúva nepytyvõ oiko hag̃ua ndehegui peteĩ mehór persóna.

Eipytyvõ nde rapichápe. Revyʼaitereíta ningo neamávleramo ha nembaʼeporãramo umi ótrondi, koʼýte umi ndaikatúivandi omyengovia ndéve pe favór rejapóva chupe. Legálmente, rejapóramo álgo nde rapicha rehehápe siémpre revyʼáta, oiméramo jepe avave ndohechái la rejapóva.

Eipytyvõ ne famíliape ojerrespeta hag̃ua ijupe voi. Por ehémplo, ijáma guive, eheja ne famíliape haʼe voi tosolusiona iprovléma. Upéva oipytyvõta chupe oaprende hag̃ua mbaʼépa ikatu ojapo oñepresenta jave peteĩ situasión ijetuʼúva ha ombohovaikuaa hag̃ua upéva. Avei upéicha ojerrespetáta ijupe voi ha upéva oipytyvõta chupe ág̃a okakuaapa rire.