Anase vaʼekue áño 1948-pe, peteĩ puevloʼi opytávape suroéste gotyo Nigériape. Upe tiémpope che túa ermáno imitãvéva hérava Moustapha, ha Wahabi che ermáno majór ojevautisa ha oiko chuguikuéra testígo de Jehová. Arekópe 9 áño che túa ou omano ha ambyasyeterei. Wahabi heʼi chéve ikatuha rohecha jey papápe orresusita vove. Upéva chekonsola ha añepyrũ astudia la Biblia ha ajevautisa 1963-pe. Umi ótro mbohapy che ermáno ojevautisa avei.

Áño 1965-pe aha che ermáno Wilson rendápe Lágospe, ha upépe ajeheʼa meme unos kuánto prekursór rregulár rehe oĩva kongregasión Igbóbipe. Haʼekuéra ovyʼa ha iguapoiterei. Upéva chemokyreʼỹ amoñepyrũ hag̃ua avei che prekursorádo enero de 1968-pe.

Peteĩ ermáno oservíva Betélpe hérava Albert Olugbebi oorganisa peteĩ rreunión espesiál umi imitãvandi. Haʼe heʼi oréve oñekotevẽha prekursór espesiál oho vaʼerã oservi nórte gotyo Nigériape. Koʼág̃a peve chemanduʼa mbaʼéichapa ermáno Albert kyreʼỹme heʼi vaʼekue oréve: “Peẽ ningo penemitã ha ikatu peipuru pene tiémpo ha pene mbaretekue Jehová servísiope. Hetaiterei mbaʼe ningo oĩ pejapo vaʼerã”. Che asegise proféta Isaías ehémplo ha ahase aservi Jehová oipotahápe.  Upévare amyenyhẽ la che solisitu aservi hag̃ua kómo prekursór espesiál (Is. 6:8).

Mayo de 1968-pe añeasigna aservi hag̃ua de prekursór espesiál siuda de Kánope, opytáva nórte gotyo Nigériape. Upérõ oiko vaʼekue pe gérra de Biafra ipukúva 1967 guive 1970 peve. Upe gérra heta oporombosufri vaʼekue ha hetaiterei oñemano nórte gotyo Nigériape. Upéi upe gérra osegi éste gotyo. Upe tiémpope peteĩ ermáno iñintensión porãva heʼi chéve ani hag̃ua aha la che asignasiónpe, péro che haʼe chupe: “Grásiamante la ejepyʼapy haguére cherehe. Péro Jehová oipotáma guive aháta la che asignasiónpe, ha ndadudái haʼe oĩtaha chendive”.

Ijetuʼueterei vaʼekue la situasión Kánope. Pe gérra káusare desástre opyta kuri pe siuda. Ropredika jave sapyʼánte rohecha umi hénte ojejuka vaʼekue retekue. Oĩ vaʼekue heta kongregasión Kánope, péro la majoría umi ermáno ohopáma upégui. Opyta vaʼekue ménos de 15 ermáno, ha haʼekuéra okyhyjeterei ha oñedesanima. Umi ermáno ha ermána ovyʼaiterei vaʼekue rog̃uahẽrõ guare éntre 6 prekursór espesiál. Roñehaʼã romokyreʼỹ chupekuéra ha oñeñandu porãve hikuái. Roipytyvõ umi ermánope oorganisa jey hag̃ua umi rreunión ha predikasión, ha omondo hag̃ua iñinfórme ha umi pedído de puvlikasión pe sukursálpe.

La roservíva de prekursór espesiál roñepyrũ vaʼekue roaprende pe idióma hausa. Umi hénte ohenduse vaʼekue umi notísia porã opillávo roñeʼẽha chupekuéra iñidiómape. Péro umi hénte oĩva pe rrelihión tuichavévape upe siudápe ndoipotái vaʼekue ropredika, upévare roñatendeterei vaʼerã. Por ehémplo peteĩ vuéltape, chéve ha ótro ermánope oremuña peteĩ karai kyse reheve. Haʼetépe ningo la oreakuãve chugui ha ndaorerupytýi. Oĩramo jepe heta pelígro roikuaa ‘Jehová oñangarekoha orerehe’, ha upéi hetave ohóvo umi puvlikadór (Sal. 4:8). Koʼág̃a mas de 500 ermáno oservi 11 kongregasión oĩvape Kánope.

Tiémpo rire agosto de 1968-pe, aĩ rire unos kuánto mése Kánope, che ha mokõi prekursór espesiál roñemondo roservi hag̃ua pe siuda héravape Niamey, upéva hína República de  Níger kapitál. Ensegída ropilla Níger, opytáva África oéste gotyo haʼeha peteĩva umi sóna hakuvéva oĩva ko yvy ape ári. Upévare rojepokuaa vaʼerã ropredika hakuetereíramo jepe, ha hiʼarive roaprende vaʼerã avei pe idióma ofisiál haʼéva francés. Koʼã mbaʼe ijetuʼúramo jepe oréve, rojerovia Jehováre ha roñepyrũ ropredika pe kapitálpe unos kuánto umi ermáno upepeguándi. Ha ensegidamínte, haimete enterove oikóva upe siudápe ha umi oleéva guive orekóma pe lívro ojepurúva ojestudia hag̃ua la Biblia hérava La verdad que lleva a vida eterna. Oĩ vaʼekue hénte orerekáva voi romeʼẽ hag̃ua chupe peteĩ lívro.

Upe riremínte rohechakuaa pe goviérno ndaijaʼeiha testígo de Jehováre. Julio de 1969-pe roñembyaty kuri ojejapo hag̃ua pe primera asambléa upe paíspe. Roĩ kuri éntre 20 rupi, ha rovyʼaiterei kuri, pórke ojevautisáta mokõi persóna. Péro pe primer díapema voi, oike umi polisía pe roĩhápe ha ndohejái osegi la asambléa. Umi polisía ojagarra ha oraha komisaríape entéro prekursór espesiálpe ha pe superintendénte de sirkuítope. Upépe ojapo oréve heta pregúnta, ha upéi heʼi oréve rojerreporta jey hag̃ua al día sigiénte. Rohecha rupi ikatuha oĩ jey hína provléma, roorganisa pe diskúrso de vautísmo peteĩ ógape. Upéi kirirĩhaitépe ojevautisa umi mokõi persónape peteĩ rríope.

Unas kuánta semána upe rire, pe minístro del interiór chemosẽ upe paísgui ha 5 prekursór espesiálpe avei. Oñemeʼẽ oréve 48 óra rosẽ hag̃ua upe paísgui, ha ore rohecha vaʼerã mbaʼéichapa rohóta upégui. Rojapo la ojeʼéva oréve ha dirékto roho pe sukursál de Nigériape. Ha upépe oñemeʼẽ oréve asignasión pyahu.

Che añeasigna aha hag̃ua peteĩ puévlo oĩvape Nigériape hérava Orisunbare. Upépe oiko unos kuánto ermánonte, péro che avyʼaiterei ikatu haguére apredika ha ajapo estúdio bíblico hendivekuéra. Upéi 6 mése haguépe, pe sukursál cheinvita jey aha hag̃ua Nígerpe. Primerorã añesorprende ha akyhyjeʼi, péro upéi avyʼa ahecha jeýta haguére umi ermáno oĩvape Nígerpe.

Aha jey pe siuda héravape Niamey. Ag̃uahẽ rire al día sigiénte, peteĩ empresário Nigeriagua cherechávo imanduʼa che haʼeha testígo de Jehová, ha oñepyrũ ojapo chéve unas kuánta pregúnta la Bíbliare. Rostudia rire oñondive, haʼe opoi ivísiogui ha ndokaʼuvéi ni ndopitavéi ha upéi ojevautisa. Avyʼaiterei vaʼekue apredikávo umi ermanokuérandi heta sónape Nígerpe, ha ahecha mbaʼéichapa heta áño rire umi hénte oñepyrũ oservi Ñandejárape. Ag̃uahẽrõ guare upe paíspe oĩ vaʼekue 31 Testígonte, ha asẽrõ guare upégui oĩma 69.

Áño 1977 pahárupi, aha jey Nigériape arresivi hag̃ua peteĩ entrenamiénto. Opávo pe kúrso de 3 semána, pe koordinadór del komite de sukursál  hérava Malcolm Vigo omeʼẽ chéve peteĩ kárta omondóva pe sukursál de Sierra Leona. Haʼekuéra oheka oikóvo peteĩ prekursór soltéro hesãiva, oñeʼẽva inglés ha francés ikatu hag̃uáicha oservi de superintendénte de sirkuíto Guinéape. Ermáno Vigo omombeʼu chéve upearã chentrena hague hikuái, ha cheavisa porãma voi upe asignasión ijetuʼutaha. Upévare heʼi chéve: “Epensa porãkena easepta mboyve”. Che katu upepete haʼe chupe: “Jehová ningo la chemondóva, upévare aháta”.

Aviaha Sierra Leónape ha ajotopa umi ermáno upe sukursalpeguándi. Peteĩva umi ermáno oĩva pe komite de sukursálpe heʼi chéve: “Ndoroikuaaguasúi mbaʼépa ojapo umi ermanokuéra Guinéape”. Pe sukursál oĩva Sierra Leónape oorganisa pe predikasión Guinéape, péro haʼekuéra ndaikatúi oñekomunika umi ermanokuéra oĩvandi upépe oĩ rupi heta provléma polítiko upe paíspe. Pe sukursál oñehaʼã kuri heta vése omondo álgienpe ovisita hag̃ua umi ermanokuéra oĩvape Guinéape péro ndaikatúi kuri. Upéi ojejerure chéve aha hag̃ua pe kapitál de Guinea héravape Conakry ajerure hag̃ua permíso apyta hag̃ua aiko upe paíspe.

Ag̃uahẽvo Conákrype aha pe embahadór rendápe pe embaháda de Nigériape. Amombeʼu chupe apytaseha Guinéape apredika hag̃ua. Ha haʼe heʼi chéve ani hag̃ua apyta upépe, pórke ikatu ojejapo cherehe álgo térã ajeraha kárselpe. Pe embahadór heʼi voi chéve: “Eho jeýnte Nigériape ha epredika upépe”. Péro haʼe chupe ajedesidimaha apytataha Guinéape. Upémarõ haʼe oskrivi peteĩ kárta pe minístro del interiór Guineapeguápe chepytyvõ hag̃ua, ha upe minístro tuicha chepytyvõ.

Upe riremínte aha jey pe sukursál oĩvape Sierra Leónape ha amombeʼu umi ermánope la odesidíva pe minístro. Haʼekuéra ningo osapukái ovyʼaiterei rupi ohechávo mbaʼéichapa Jehová ovendesi la che viáhe, pórke pe goviéro opermitíta chéve aiko Guinéape.

Áño 1978 guive 1989 peve aservi de superintendénte de sirkuíto Guinea ha Sierra Leónape, upéi aservi avei de superintendénte de sirkuíto sustitúto Libériape. Ñepyrũrã pyʼỹinte cherasy vaʼekue. Upéva sapyʼánte oiko jepi voi umi puévlo oĩvape mombyryvehápe. Péro umi ermanokuéra oñehaʼãmbaite chegueraha hag̃ua peteĩ ospitálpe.

Peteĩ jey cherasyete pórke chejagarra malária ha chesevoʼi heta. Upéi ajerrekupera ha umi ermanokuéra omombeʼu chéve opensa hague amanotamaha. Upévare ohecháma voi hikuái moõpa cheñotỹta. Ahasáramo jepe koʼã situasión ipeligrosoitéva, napensáiva ahejávo che asignasión. Aime segúro Ñandejára añoite ikatuha ñandeprotehe, pórke ñamanóramo jepe haʼe ikatu ñanemoingove jey.

Áño 1988-pe aikuaa Dórcaspe, peteĩ prekursóra iñumílde ha ohayhuetereíva Jehovápe. Upéi romenda, ha haʼe chemoirũ che asignasiónpe ha rosegi rombaʼapo pe sirkuítope. Dorcas ombaʼapo jejopy vaʼekue ore asignasiónpe ha oĩ vaʼekue  dispuésta ojesakrifikávo Jehová rehehápe. Sapyʼánte roguata vaʼerã 25 kilómetro rog̃uahẽ hag̃ua ótra kongregasiónpe ha rogueraha vaʼerã la ore kosakuéra. Ha rohóta jave umi kongregasión opytávape mombyryvehápe, roipuru opaichagua médio de transpórte ha roho umi tape vai ha itujúvare.

Dorcas ningo ipyʼaguasueterei, pórke sapyʼánte rokrusa vaʼerã umi y oĩhápe heta jakare. Peteĩ jey roviaha vaʼerã kuri 5 día, ha rokrusa vaʼerã kanóape peteĩ rrío, pórke la puénte de madéra hoʼa kuri. Dorcas oñemboʼývo osẽ hag̃ua pe kanóagui, hoʼa pe y ipypukuvehápe. Ha hiʼarive ore ni peteĩva ndoroytakuaái ha pe rríope oĩ kuri heta jakare. Haʼetépe oĩ upérupi unos kuánto mitãrusu ha ojepoi pe ýpe osalva hag̃ua chupe. Upéi un tiémpore mokõivéva ropyta orepesadillápa. Péro rosegi la ore asignasiónpe.

Oñepyrũvo áño 1992, roñesorprende roikuaávo Dorcas hyeguasuha. Upérõ rodesidi vaʼerã kuri rosegítapa roservi kómo prekursór espesiál, ha ropensa: “¡Jehová ningo omeʼẽ ñandéve peteĩ rregálo!”. Upévare la che rajýpe rombohéra Jahgift (upéva heʼise ingléspe “rregálo oúva Jehovágui”). Upéi 4 áño onase haguépe Jahgift, onase avei iñermáno Eric. Añetehápe koʼã mokõi ore família Jehová rregálo oréve g̃uarã. Jahgift oservi kuri peteĩ tiémpore pe ofisína rremóta de traduksiónpe Conákrype, ha Eric katu siérvo ministeriál.

Upéi Dorcas ndahaʼevéiramo jepe prekursóra espesiál, osegi ojapo iprekursórado rregulár. Ha hiʼarive romongakuaa vaʼerã ore familiakuéra. Jehová mediánte che asegi kuri aservi de prekursór espesiál. Upéi ore família okuakuaapa rire, Dorcas ikatu jey kuri oservi kómo prekursóra espesiál. Koʼág̃a mokõivéva roservi kómo misionéro del kámpo Conákrype.

Che ningo siémpre aháva la Jehová chemondosehápe. Heta vése che rembireko ha che roñandu mbaʼeichaitépa haʼe oreprotehe ha orevendesi. Rojei heta akãrasy ha kevrántogui, rojerovia rupi Jehováre rojerovia rangue umi mbaʼerepýre. Dorcas ha che rohechakuaa umi mbaʼe rohasáva rupive, Jehovándi añoite ñaimeha segúro ha haʼe haʼeha ‘Ñandejára ikatúva ñandesalva’ (1 Crón. 16:35). Aime segúro Jehová oproteheha enterove ojeroviávape hese. ‘Oñeñongatuháicha peteĩ mbaʼe hepy ha iporãva peteĩ mbaʼyrúpe, péicha avei Ñandejára oñangarekóta ñanderehe’ (1 Sam. 25:29).