1, 2. ¿Mbaʼépa iñimportanteterei Jehovápe g̃uarã, ha mbaʼépa oipota jajapo?

 JEHOVÁ ojesareko mbaʼéichapa jatrata ñande rapichakuérape, pórke upéva iñimportanteterei chupe g̃uarã. Jesús omboʼe vaʼekue voi ‘jahayhu vaʼerãha ñande rapichápe ñande voi jajehayhuháicha’ (Mat. 22:​37-39). Upéva heʼise jatrata porã vaʼerãha avei umi ndoadoráivape Jehovápe. Jajapo jave upéicha, jasegi Jehová ehémplo, pórke “haʼe ningo oheja osẽ kuarahy iñañáva ha ivuénovape g̃uarã, ha omongy ihústova ha iñinhústovape g̃uarã” (Mat. 5:45).

² Jehová ohayhueterei enterovépe, péro koʼýte ohayhu umi persóna oñehaʼãvape ojapo iporãva (Juan 14:21). Haʼe oipota jasegi iñehémplo, upévare ñanemokyreʼỹ ‘jahayhu hag̃ua ñande pyʼaite guive’ ñane ermáno ha ermanakuérape, ha jatrata hag̃ua chupekuéra ‘ñane ermáno teéicha’ (1 Ped. 4:8; Rom. 12:10). Jaikuaávo japorohayhu vaʼerãha péicha, ikatu ñapensa la ñañandúvare peteĩ ñane hénte jahayhuetereívare térã peteĩ ñane amigoitére.

3. ¿Mbaʼe rehepa ñanemanduʼa vaʼerã?

³ Jaikuaa ningo peteĩ plánta ndokakuaamoʼãiha ijehegui reínte, síno ñañehaʼãmante vaʼerã hese. Péicha avei ñanemanduʼa vaʼerã japorohayhuve hag̃ua ñañehaʼãmante vaʼerãha. Apóstol Pablo heʼi vaʼekue voi umi kristiánope: “Pesegíkena pehechauka pejoayhuha oñoermánoicha” (Heb. 13:1). Jehová oipota jasegi ñañehaʼã japorohayhu hag̃ua. Ko artíkulope jahecháta mbaʼérepa ñañemoag̃uive vaʼerã ñane ermanokuérare, ha mbaʼéichapa ikatu jasegi jajapo upéva.

¿MBAʼÉREPA ÑAÑEMOAG̃UIVE VAʼERÃ OJUEHE?

4. Ohechaukaháicha Salmo 133:​1, ¿mbaʼéichapa ikatu jasegi ñamombaʼe pe unida oĩva ermanokuéra apytépe? (Ehecha pe taʼanga).

⁴ (Elee Salmo 133:1). Katuete ningo ñapensa pe salmísta  opensa haguéicha. Haʼe heʼi vaʼekue ‘iporã ha igustoha’ ñañamiga umi ohayhúvare Jehovápe. Péro ikatu hína oiko ñanderehe peteĩ mbaʼe. Sapyʼánte ikatu hína nañamombaʼevéi ha ndajahecharamovéi pe unida oĩva ermanokuéra apytépe. Haʼete ku jahecháva peteĩ yvyramáta iporãitereíva, péro jahecha rupi káda día ndajahecharamovéima. Ñande avei pyʼỹi jahecha ñane ermanokuérape, ikatu voi heta vése káda semána. ¿Mbaʼéichapa upéicharõ ikatu jasegi ñamombaʼe ñane ermanokuérape? Jahayhuvéta chupekuéra ñañemotiémporamo jajepyʼamongeta hag̃ua mbaʼéichapa káda uno iñimportánte ñandéve g̃uarã ha kongregasiónpe g̃uarã.

5. ¿Mbaʼépa ikatu oiko umi hénte ohecha jave jajoayhuha Jehová puévlope?

⁵ Oĩ umi hénte ohóva primera ves ñane rreunionhápe ha opyta ijurujái ohechávo mbaʼeichaitépa jajoayhu. Ohecha haguérente upéva ikatu oĩ heʼímava otopa hague pe rrelihión verdadéra. Jesús heʼi vaʼekue voi: “Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:35). Jahechamína la omombeʼu vaʼekue peteĩ mitãkuña hérava Chaitra. Haʼe ningo ostudia vaʼekue Testigokuérandi, ha upéi oñeinvita chupe oho hag̃ua peteĩ aty guasu tres diaguápe. Haʼe oho, ha pe primer díapema voi heʼi pe ermána ombostudiávape chupe: “Che tuakuéra ningo núnka nacheañuái vaʼekue, péro ko asambléape un díapentema voi 52 vésema la hénte cheañuã. Che añandu Jehová ohechaukaseha chéve cherayhuha, ha upearã ojevale penderehe. Che aĩse avei Jehová família apytépe”. Chaitra osegi ostudia, ojapo umi kámbio tekotevẽva ha ojevautisa 2024-pe. Umi hénte ohecha jave umi mbaʼe porã jajapóva, por ehémplo  ohechávo mbaʼéichapa jajoayhu, pyʼỹinte upéva omomýi chupekuéra oservi hag̃ua Jehovápe (Mat. 5:16).

6. ¿Mbaʼérepa ikatu jaʼe jajeproteheha ñañemoag̃uivévo ñane ermanokuérare?

⁶ Ikatu ningo jaʼe jajeproteheha avei ñañemoag̃uivévo ñane ermáno ha ñane ermanakuérare. Pablo heʼi vaʼekue umi kristiánope: ‘Pesegi peñomokyreʼỹ káda día. Ani peichahágui pe pekádo penembotavy ha pemohatã pene korasõ’ (Heb. 3:13). Sapyʼánte ikatu jaju ñañedesanima ha ijetuʼueterei ñandéve jasegi hag̃ua pe tape porãre. Péicha jave ikatu oĩ peteĩ ermáno ohechakuaáva la jahasáva, ha Jehová ojevalekuaa hese ñanepytyvõ hag̃ua ñaikotevẽháicha (Sal. 73:​2, 17, 23). Ojapo porãiterei ningo ñanderehe oĩ jave péicha ñanemokyreʼỹva.

7. ¿Mbaʼérepa japorohayhu rupi ikatu ñaĩ unído? (Colosenses 3:​13, 14).

⁷ Enterove jaservíva Jehovápe ñañehaʼãmbaite japorohayhu hag̃ua, upévare jarresivi heta vendisión (1 Juan 4:11). Por ehémplo japorohayhu rupi jasegi ñañoaguanta ha upéva ñanepytyvõ ñaĩme hag̃ua unído ermanokuéra apytépe (elee Colosenses 3:​13, 14; Efes. 4:​2-6). Upéicha rupi ñane rreunionhápe javyʼaiterei, ha ndaipóri voi ótro lugár ikatuhápe javyʼa peichaite peve.

JAHECHAUKÁKE ÑAMOMBAʼEHA ÑANDE RAPICHÁPE

8. ¿Mbaʼéichapa Jehová ñanepytyvõ ñaime hag̃ua unído ñane ermanokuérandi?

⁸ Ñande ningo ñaneimperfékto, péro ñaĩ unído ñane ermanokuérandi ko yvy tuichakuére. Upéva peteĩ milágro ojehupytýva Jehová rupive añoite (1 Cor. 12:25). La Biblia heʼi voi ‘Ñandejára ñanemboʼemaha voi jajoayhu vaʼerãha’ (1 Tes. 4:9). ¿Mbaʼéichapa Jehová ojapo upéva? Iñeʼẽ rupive haʼe ñanemboʼe mbaʼépa jajapo vaʼerã ñañemoag̃ui hag̃ua ñane ermanokuérare. Ha jahejáta Jehová ñanemboʼe jastudia porãramo Iñeʼẽ ha jajapóramo la haʼe heʼíva (Heb. 4:12; Sant. 1:25). Upevaite ningo la entéro testígo de Jehová oñehaʼãva ojapo.

9. ¿Mbaʼéichapa ikatu jajapo la heʼíva Romanos 12:​9-13?

⁹ ¿Mbaʼéichapa Ñandejára Ñeʼẽ ñanepytyvõ ñañemoag̃ui hag̃ua ojuehe? Jahechamína mbaʼépa heʼi vaʼekue apóstol Pablo Romanos 12:​9-13-pe (elee). Jareko vaʼerã enkuénta haʼe heʼi hague ñande ‘púntape jahechauka vaʼerãha ñamombaʼeha ñande rapichápe’. ¿Mbaʼéichapa ikatu jajapo upéva? Upearã ñande voi jaheka vaʼerã oportunida jahechauka hag̃ua jajoayhuha ñande pyʼaite guive oñoermáno teéicha. Por ehémplo ñaperdona vaʼerã ñande rapichápe, japororresivi porã ha ñanembaʼeporã vaʼerã (Efes. 4:32). Natekotevẽi ñahaʼarõ ñane ermanokuéra raẽ oñemoag̃ui ñanderehe, síno ñande voi púntape jajapo vaʼerã upéva. Jajapóramo péicha jahecháta siertoha la Jesús heʼíva heʼírõ guare: “Javyʼaiteve ñameʼẽvo, ñandéve oñemeʼẽ rangue” (Hech. 20:35).

10. Ñaipytyvõta jave ótrope, ¿mbaʼéichapa ikatu jahechauka ñandetravahadór ha nañaneateʼỹiha? (Ehecha pe taʼanga).

¹⁰ Apóstol Pablo heʼi riremi púntape ñamombaʼe vaʼerãha ñande rapichápe, heʼi avei: “Peẽ pendetravahadór vaʼerã ha ani peneateʼỹ”. ¿Mbaʼérepa heʼi vaʼekue upéva? Ñapensamína mbaʼeichaguápa peteĩ persóna itravahadór ha naiñateʼỹiva. Peichagua persóna ikyreʼỹ, iguápo ha oñemeʼẽ jave chupe peteĩ traváho pyaʼe voi ojapo porã. Proverbios 3:​27, 28 ñanemokyreʼỹ voi péicha: “Rehecháramo nde rapicha oikotevẽha ajúda, reipytyvõ vaʼerã chupe, ani rejejoko rejapo hag̃ua iporãva. Nde ikatúramo rejapo álgo hesehápe, rejapo vaʼerã”. Upéicharõ jahecha jave álgien oikotevẽha ajúda, ñande pyaʼe voi ñañehaʼã ñaipytyvõ chupe. Ndajaikói  jajereterei jajapo hag̃ua la iporãva ha nañapensái oĩtaha ótra persóna ojapótava upéva ñande vése (1 Juan 3:​17, 18).

11. ¿Mbaʼépa ikatu avei ñanepytyvõ ñañemoag̃ui hag̃ua ojuehe?

¹¹ ¿Mbaʼépa ikatu avei jajapo jahechauka hag̃ua ñamombaʼeha ñande rapichápe? Upearã oĩ jave ñaneofendéva, ensegída voi ñaperdona vaʼerã chupe. Efesios 4:26 heʼi ñandéve: “Ani pesegi pendepochy kuarahy oike peve”. ¿Mbaʼérepa? Versíkulo 27 heʼi ‘ani hag̃ua ñameʼẽ oportunida pe Diáblope ojapoka hag̃ua ñandéve mbaʼeve’. Jehová ningo Iñeʼẽme heʼi jey jey ñandéve ñaporoperdona vaʼerãha. Colosenses 3:13 heʼi voi: “Pesegíkena peñoperdona pende pyʼaite guive”. Iporãitereíta ningo ñambohasánterõ la ótro ojapóva ñanderehe, pórke upéva tuichaiterei ñanepytyvõta ñañemoag̃uive hag̃ua ojuehe. Ñaporoperdona jave jajapo ñande párte ikatu hag̃uáicha ‘ñaĩ siémpre peteĩ ñeʼẽme, ha upéva jahupyty pe espíritu sánto rupive’ (Efes. 4:3). Jahechaháicha, ñaperdona jave ñane ermanokuérape ñaipytyvõ hína Jehová puévlo osegi hag̃ua unído ha pyʼaguapýpe.

12. ¿Mbaʼéichapa Jehová ñanepytyvõ ñaporoperdona hag̃ua?

¹² Jaikuaa ningo sapyʼánte ikatuha ijetuʼu ñaperdona peteĩ persóna ñaneofende vaʼekuépe. Péro ikatu ñaporoperdona Ñandejára espíritu sánto ñanepytyvõ rupi. Ñanemanduʼami jeýna la heʼívare Romanos. Upépe heʼi ñandéve ‘jajoayhu vaʼerãha ñande pyʼaite guive oñoermáno teéicha’, ha upéi heʼi ‘ñandetravahadór vaʼerãha’. ¿Mbaʼépa heʼi upe rire? Heʼi avei: “Pehejáke pe espíritu sánto tapenemombarete”. Upéva heʼise Ñandejára espíritu sánto ikatuha ñanemokyreʼỹ ha ñanemomýi jajapo hag̃ua iporãva. Por ehémplo, jajoayhu hag̃ua ñande pyʼaite guive oñoermáno teéicha ha ñañoperdona hag̃ua (Rom. 12:11). Upévare jasegi jajerure Jehovápe ñande pyʼaite guive tañanepytyvõ (Luc. 11:13).

“ANI OĨ DIVISIÓN PENDE APYTÉPE”

13. ¿Mbaʼérepa ikatu oĩ división ñande apytépe?

¹³ Kongregasiónpe ningo oĩ “opaichagua persóna” oúva diferénte lugárgui (1 Tim. 2:​3, 4). Upévare káda uno ikatu jadesidi diferentepa heta mbaʼépe. Por ehémplo mbaʼéichapa ñañemondéta ha jajarregláta, mbaʼépa  jajapóta jakuida hag̃ua ñande salúre ha mbaʼéichapa jajedivertíta. Nañañatendéiramo, koʼã mbaʼe káusare ikatu oĩ división kongregasiónpe (Rom. 14:4; 1 Cor. 1:10). Péro Ñandejára ñanemboʼéma jajoayhu vaʼerãha. Upévare ñañatende vaʼerã ani hag̃ua jaiko jaʼe umi mbaʼe ñande jadesidíva iporãveha ótro odesidívagui (Filip. 2:3).

14. ¿Mbaʼépa siémpre ñañehaʼã vaʼerã jajapo ha mbaʼérepa?

¹⁴ ¿Mbaʼépa ikatu jajapo avei ani hag̃ua oĩ división kongregasiónpe? Upearã siémpre ñañehaʼã vaʼerã ñamokyreʼỹ ha ñamombarete ñane ermanokuérape (1 Tes. 5:11). Koʼág̃arupi oĩ heta inaktívo ha heta oñenohẽ vaʼekuépe kongregasióngui oñemoag̃ui jeýva Jehováre. Ñande ningo mborayhúpe jarresivi chupekuéra (2 Cor. 2:8). Jahechamína la oiko vaʼekue peteĩ ermánare. Haʼe ningo oĩ kuri inaktíva 10 áñore ha upéi oho jey rreunionhápe. Pe ermána heʼi: “Entéronte opukavy chéve ha ou ombohasa chéve ipo chesaluda hag̃ua” (Hech. 3:19). Koʼã mbaʼe haʼete la sonseraitereíva, ¿péro mbaʼéichapa oipytyvõ pe ermánape? Haʼe heʼi: “Haʼete voi chéve Jehová oñakaramáva che póre ha chepytyvõva avyʼa jey hag̃ua”. Ñande avei ñañehaʼã vaʼerã ñamokyreʼỹ enterovépe. Péicha Cristo ikatu ojevale ñanderehe ñambopiroʼy hag̃ua umi ‘ikaneʼõva ha ikárga pohýivape’ (Mat. 11:​28, 29).

15. ¿Mbaʼéichapa ikatu avei ñaipytyvõ oĩ hag̃ua unida kongregasiónpe? (Ehecha pe taʼanga).

¹⁵ Umi mbaʼe jaʼéva rupive ikatu avei ñaipytyvõ oĩ hag̃ua unida kongregasiónpe. Job 12:11  heʼi: “Ñane kũ otanteaháicha umi tembiʼu, ñande apysa otantea umi palávra”. Ñapensamína peteĩ kosinéro ivalévare. Haʼe ningo oservi mboyve la hembiʼu, siémpre otantea raẽta ojasegura hag̃ua hépa hína la okosina vaʼekue. Péicha avei jaʼe mboyve peteĩ mbaʼe, ñapensa porã raẽ vaʼerã la jaʼétavare (Sal. 141:3). Siémpre jajasegura vaʼerã la jaʼétava oporomokyreʼỹtapa, oporomombaretétapa ha ‘ideprovéchotapa umi ñanerendúvape’ g̃uarã (Efes. 4:29).

16. ¿Máva mávapa koʼýte oñatende vaʼerã umi mbaʼe heʼívare?

¹⁶ Umi ména, umi sy ha túa koʼýte oñatende vaʼerã la heʼívare ojasegura hag̃ua oporomokyreʼỹpa hína (Col. 3:​19, 21; Tito 2:4). Ansianokuéra avei oñehaʼã vaʼerã omombarete ha okonsola umi Jehová ovechakuéra mimíme (Is. 32:​1, 2; Gál. 6:1). La Biblia ningo heʼi voi: “Igustoite peteĩ persóna oikuaáramo la heʼi vaʼerã oñekotevẽve jave” (Prov. 15:23).

JAPOROHAYHÚKENA “UMI MBAʼE JAJAPÓVA RUPIVE HA ÑANESINSÉRO”

17. ¿Mbaʼépa jajapo vaʼerã jahayhu hag̃ua ñane ermáno ha ermanakuérape ñande pyʼaite guive?

¹⁷ Apóstol Juan heʼi vaʼekue: “Aníkena ñande jurúpente jaʼe japorohayhuha, síno jahechauka vaʼerã upéva umi mbaʼe jajapóva rupive ha ñanesinséro vaʼerã” (1 Juan 3:18). Ñande ningo ñañehaʼã vaʼerã jahayhu ñane ermáno ha ermanakuérape ñande pyʼaite guive. ¿Mbaʼéichapa ikatu jajapo upéva? Amáske jahasa tiémpo ñane ermáno ha ermanakuérandi ñañemoag̃uivéta ojuehe ha jajoayhuvéta. Upévare jahekákena oportunida ñaĩ hag̃ua hendivekuéra, por ehémplo rreunionhápe ha predikasiónpe. Ñañemotiémpokena avei javisita hag̃ua ñane ermanokuérape. Jajapórõ koʼã mbaʼe jahechaukáta ‘Ñandejára ñanemboʼemaha voi jajoayhu vaʼerãha’ (1 Tes. 4:9). Péicha ñande voi jasegíta jahecha mbaʼeichaitépa “iporã ha igustoite umi ermáno oiko porãrõ oñondivepa peteĩ famíliaicha” (Sal. 133:1).