1, 2. a) ¿Mbaʼépa tekotevẽ jajapo ñañamiga hag̃ua peteĩ persónare? b) ¿Mbaʼépa jahecháta ko artíkulope?

 EPENSAMÍNA peteĩ ne amigoitére, ¿mbaʼéichapa oiko raʼe pendehegui oñoamigoite? Katuete ehasáne raʼe tiémpo hendive, eikuaa umi provléma ohasáva ha avei umi mbaʼe ogustáva ha ndogustáiva chupe. Oiméne rehechakuaa orekoha umi kualida iporãva ha rejoguase avei chupe. Upéi rehayhu ha remombaʼetereíma voi ne amígope.

² Legálmente ndahaʼéi la péicha péichante jajúva ñañamigaite peteĩ persónare, síno upearã jahasa vaʼerã tiémpo hendive. Upéicha avei tekotevẽ ñañehaʼãmbaite jaikuaa porã hag̃ua Jehovápe oiko hag̃ua ñandehegui iñamigoite. Upévare ko artíkulope jahecháta mbaʼéichapa ikatu ñañemoag̃uive Jehováre, ha mbaʼéichapa ideprovécho ñandéve upéva. Ñaanalisami raẽna mbaʼérepa iporã ñañemoag̃ui Jehováre. ¡Haʼe ningo pe mehór amígo ikatúva jareko!

3. ¿Mbaʼérepa jajepyʼamongeta vaʼerã umi mbaʼe porã jahupytývare ñañemoag̃uírõ Jehováre?

³ Katuete nde reikuaa iporãitereiha reñemoag̃ui Jehováre. Péro rejepyʼamongetárõ mbaʼeichaite pevépa iporã upéva resegíta reñemoag̃ui hese (Sal. 63:​6-8). Epensamíntena ko ehémplore: Enterovéva jaikuaa ojapo porãitereiha ñanderehe ñañalimenta porãramo, jajapóramo ehersísio, japytuʼu porãramo ha jayʼu meméramo. Upéicharamo jepe oĩ hénte nopensaguasúiva koʼã mbaʼére, upévare ndorekói koʼã kostúmbre iporãva ha ndokuidái ijehe. Péro oĩ umi persóna ojepyʼamongetáva mbaʼeichaitépa ideprovécho koʼã kostúmbre iporãva,  upévare ifasilve chupekuéra osegi hag̃ua ojapo umíva. Upéicha avei ikatu oime jaikuaa iporãha ñañemoag̃ui Jehováre. Péro jajepyʼamongetávo mbaʼeichaite pevépa upéva ideprovécho ñandéve, ñanepytyvõta jasegi hag̃ua ñañemoag̃ui hese (Sal. 119:​27-30).

4. Ohechaukaháicha Salmo 73:​28, ¿mbaʼépa opensa vaʼekue pe salmísta?

⁴ (Elee Salmo 73:28). Pe salmísta oskrivíva Salmo 73 haʼe vaʼekue peteĩ levita ha músiko Jehová témplope. Haʼe ningo ifiél vaʼekue Jehovápe heta áñorema. Upéicharamo jepe haʼe ohechakuaa iñimportanteha imanduʼa iporãha oñemoag̃ui Jehováre, ha oipota avei umi ótro imanduʼa upévare. Upéicharõ, ¿mbaʼérepa iporã jaikuaave Jehovápe ha ñamombarete ñane amista hendive?

ÑAÑEMOAG̃UÍVO ÑANDEJÁRARE JAVYʼAITEREI

5. a) ¿Mbaʼérepa jaʼekuaa javyʼaha ñañemoag̃uivévo Jehováre? b) Ohechaukaháicha Proverbios 2:​6-16, ¿mbaʼéichapa pe arandu omeʼẽva ñandéve Jehová ñandeprotehe ha ñanepytyvõ?

⁵ Amáske ñañemoag̃uive Jehováre javyʼave (Sal. 65:4). Heta mbaʼére voi ikatu jaʼe javyʼaha. Por ehémplo jasegi jave umi konsého oĩva la Bíbliape ñanearandu ha oho porã ñandéve. Pe arandu ñandeprotehe ani hag̃ua jajapo umi mbaʼe ñandeperhudikátava, ha pono jajapo peteĩ mbaʼe ivaietereíva (elee Proverbios 2:​6-16). Upévare voi la Biblia heʼi: “Ovyʼa pe persóna oaprendéva arandu, pe oaprendéva odiferensia hag̃ua iporãva ha ivaíva” (Prov. 3:13).

6. ¿Mbaʼérepa pe salmísta ou vaʼekue ndovyʼavéi?

⁶ Jaikuaa ningo Jehová amigokuéra jepe sapyʼánte ou ndovyʼavéi ha oñembyasy. Por ehémplo pe oskrivi vaʼekue Salmo 73 ou vaʼekue ndovyʼavéi openságui oĩha hetaiterei inhustísia. Haʼe oñepyrũ vaʼekue opensa umi hénte iñañáva oiko porãitereiha naiñeʼẽrendúiramo jepe Ñandejárape. Upévare haʼe ipochy ha oenvidia umi mbaʼe oguerekóva umi hénte. Pe salmístape g̃uarã umi hénte ivioléntova ha oñemombaʼeguasúva irrikove rei, hesãive ha haʼete voi ndojehúiva chupekuéra mbaʼeve (Sal. 73:​3-7, 12). Pe salmísta ojepyʼapyeterei vaʼekue, upévare opensa voi ndovaleiha la péna oservi Jehovápe. Haʼe oñembyasyetereírõ guare heʼi: “Maʼerã rei piko che añehaʼã chekorasõ potĩ ha ajepohéi ahechauka hag̃ua cheinosenteha” (Sal. 73:13).

7. ¿Mbaʼépa ikatu jajapo jajúramo ndajavyʼavéi? (Ehecha pe taʼanga).

⁷ Pe salmísta ndovyʼavéiramo jepe ndohejái upéva ojoko chupe. Upéva rangue haʼe ojapo álgo okambia hag̃ua la opensáva. Haʼe oho “Ñandejára rógape, pe lugár sagrádope”, ha upépe Jehová okorrehi haʼe opensa lája (Sal. 73:​17-19). Ñande avei ñañembyasy jave, ñane amigoite Jehová oikuaa la jahasáva, upévare ikatu ñañemboʼe Jehovápe ha jajerure chupe ñandegia hag̃ua. Jaaseptáramo umi konsého oĩva Iñeʼẽme ha pe ajúda omeʼẽva umi ermáno kongregasionpegua, katuete ñanembaretevéta ñaaguanta hag̃ua ñañembyasýramo jepe. Oĩramo jepe heta mbaʼe ñanekevrantáva Jehová ñanekonsoláta ha ñanembopyʼaguapýta (Sal. 94:19). a

ÑAÑEMOAG̃UÍVO ÑANDEJÁRARE ISENTÍDO ÑANDE REKOVE HA JAREKO ESPERÁNSA

8. ¿Mbaʼe mbaʼérepa iñimportánte ñañemoag̃ui Ñandejárare?

⁸ Hetave mbaʼére ikatu jaʼe iporãitereiha ñañemoag̃ui Ñandejárare. Primero, pórke péicha isentído la ñande rekove. Ha segundo, jareko peteĩ esperánsa isegúrova amo gotyove  g̃uarã (Jer. 29:11). Ñaanalisa porãmína koʼã mokõi mbaʼe.

9. ¿Mbaʼéicha rupípa isentído ñande rekove ha javyʼa?

⁹ Ñañemoag̃ui rupi Ñandejárare, ñande rekove isentído. Oĩ ningo heta ndogueroviáiva Ñandejára oexistiha, upévare nontendéi hikuái mbaʼérepa ñaĩ ko yvy ape ári ha opensa voi amo gotyove la hénte oñehundipataha. Péro ñande jastudia rupi Ñandejára Ñeʼẽ jaikuaa porã Ñandejára “oexistiha ha omyengovia porãha umi oñehaʼãvape ipyʼaite guive oadora chupe” (Heb. 11:6). Avei jaikuaa porã Jehová ñandeapo hague jaservi hag̃ua chupe, upévare koʼág̃ama voi javyʼa jajapóvo upéva (Deut. 10:​12, 13).

10. ¿Mbaʼe esperánsapa Jehová omeʼẽ umi ojeroviávape hese? (Salmo 37:29).

¹⁰ Heta persóna ndorekói esperánsa amo gotyove g̃uarã. Haʼekuéra oikove sólamente ombaʼapo hag̃ua, omenda hag̃ua, ifamília hag̃ua ha oaorra oreko hag̃ua álgo ijeda rire. Koʼã hénte ndoikuaái mbaʼépa Ñandejára opromete. Péro umi oservíva Jehovápe ojerovia haʼe oñangarekotaha hesekuéra (Sal. 25:​3-5; 1 Tim. 6:17). Ñandejára ningo ñane amigoite ha jajerovia hese, avei jaikuaa haʼe okumplitaha umi mbaʼe oprometéva ñandéve. Oĩ hetaiterei mbaʼe porã ñaneraʼarõva amo gotyove. Ha javyʼaiterei voi ikatúta haguére jaservi Jehovápe pára siémpre pe múndo pyahúpe (elee Salmo 37:29).

11. ¿Mbaʼérepa avei iporã ñañemoag̃ui Ñandejárare, ha mbaʼéichapa haʼe oñeñandu?

¹¹ Hetaitereive mbaʼére ikatu jaʼe iporãha ñañemoag̃ui Ñandejárare. Por ehémplo Jehová opromete operdonataha ñande pekadokuéra ñañarrepentíramo (Is. 1:18). Upévare natekotevẽi jasegi ñañembyasy umi mbaʼe vai jajapo vaʼekuére yma (Sal. 32:​1-5). Ha oĩ peteĩ mbaʼe iporãiterei rasáva, ñañemoag̃ui rupi Ñandejárare ñambovyʼa chupe (Prov. 23:15). Katuete oiméne ou ne akãme hetave mbaʼe rehupytýva Jehová haʼe rupi ne amigoite. ¿Péro mbaʼéichapa ikatu esegi reñemoag̃ui Ñandejárare?

¿MBAʼÉICHAPA IKATU JASEGI ÑAÑEMOAG̃UI ÑANDEJÁRARE?

12. ¿Mbaʼe mbaʼépa rejapóma reñemoag̃uive hag̃ua Ñandejárare?

¹² Rejevautisa mboyve katuete rejapóma raʼe heta mbaʼe reñemoag̃ui hag̃ua Jehováre. Por ehémplo eñehaʼã eikuaa la verda Jehová ha Jesúsgui, reñarrepenti nde pekadokuéragui, ehechauka ejeroviaha Ñandejárare ha eñehaʼãmbaite neñeʼẽrendu chupe. Péro eñemoag̃uive hag̃ua Ñandejárare tekotevẽ esegi ejapo koʼã mbaʼe (Col. 2:6).

13. ¿Mbaʼe mbaʼépa ñanepytyvõta jasegi hag̃ua ñañemoag̃ui Ñandejárare?

¹³ ¿Mbaʼépa ñanepytyvõta jasegi hag̃ua ñañemoag̃ui Jehováre? Primero, jalee ha jastudia meme vaʼerã la Biblia. Jalee vaʼerã la Biblia ndahaʼéi ñaaprende hag̃uánte unas kuánta kósa Ñandejáragui. Síno ñañehaʼã vaʼerã ñantende mbaʼéichapa haʼe opensa ha mbaʼépa haʼe oipota jajapo, ha upéi ñañehaʼã jaiko haʼe oipotaháicha (Efes. 5:​15-17). Segundo, ñamombarete vaʼerã ñande jerovia. Upearã jajepyʼamongeta vaʼerã entéro umi mbaʼe porã Jehová ojapo vaʼekuére ñanderehehápe ñanderayhúgui. Ha tercero, jasegi vaʼerã ndajachaʼéi umi mbaʼe ivaívare Jehovápe ndogustáiva ha ndajajeheʼái vaʼerã umi hembiapo vaívare (Sal. 1:1; 101:3).

14. ¿Mbaʼépa ikatu jajapo káda día ñambovyʼa hag̃ua Jehovápe? (1 Corintios 10:31). (Ehecha pe taʼanga).

¹⁴ (Elee 1 Corintios 10:31). Iñimportanteterei jasegi jajapo umi mbaʼe Jehová oguerohorýva. Péro upéva ndeʼiséi ovalemaha jahárõ rreunionhápe ha ñasẽrõ japredika, síno  káda día voi jajapo vaʼerã umi mbaʼe Jehová oguerohorýva. Por ehémplo ñande ñambovyʼa chupe ñaneonrrádoramo entéro mbaʼépe, ha ñakompartívo ótrondi umi mbaʼe jarekóva (2 Cor. 8:21; 9:7). Avei Ñandejára oipota jahechauka ñamombaʼeha ñande rekove, pórke haʼe omeʼẽ ñandéve la vída. Upévare ñañatende mbaʼépa jaʼu ha noiméipa hína jahasáma la rrája. Avei ñañehaʼã jajapo umi mbaʼe ñanepytyvõtava ñaneresãi hag̃ua. Entéro mbaʼe jajapóvape jareko enkuénta umi mbaʼe Jehová oguerohorýva, ha haʼe ohechávo upéva ñanderayhuetereivéta (Luc. 16:10).

15. ¿Mbaʼéichapa Jehová oipota jatrata ótrope?

¹⁵ Jehová ningo imbaʼeporã umi ihústo ha umi iñinhústovandi (Mat. 5:45). Upévare haʼe oipota ñande avei jatrata porã ñande rapichápe. Por ehémplo ‘ndovaléi ñañeʼẽ vai avavére, ndajaikói vaʼerã jajeplagea ha siémpre jahechauka vaʼerã ñandepyʼaguapyha enterovéndi’ (Tito 3:2). Upéicha rupi oĩramo jepe umi ndojeroviáiva Jehováre, ñande ni mbaʼevéicharõ ndajaʼapoʼíri chupekuéra (2 Tim. 2:​23-25). Ñanembaʼeporãvo enterovéndi ñañemoag̃uivéta Ñandejárare.

IKATU ÑAÑEMOAG̃UI ÑANDEJÁRARE JAJAVÝRAMO JEPE

16. ¿Mbaʼéichapa oñeñandu vaʼekue pe salmísta ojapóramo jepe un tiémpo oservíma hague Jehovápe?

¹⁶ Oimérõ yma rejavy raʼe, sapyʼánte ikatu repensa neremereseiha Jehová nderayhu. Pe salmísta oskrivi vaʼekue Salmo 73 oñeñandu vaʼekue avei péicha lénto. Haʼe heʼi vaʼekue: “Che katu haimetete ajei pe tape porãgui, haʼa potaitéma kuri mbaʼe vaípe” (Sal. 73:2). Pe salmísta voi orrekonose vaʼekue oñepyrũ hague ‘oñamarga’, ‘ndoikuaaiha la oikóva’ ha ‘ojoguaha umi animálpe’ (Sal. 73:​21, 22).  Upéicharõ, ¿opensápa raʼe pe salmísta naipohãveimaha, ha Jehová núnka ndohayhumoʼãveimaha chupe?

17. a) ¿Mbaʼépa ojapo vaʼekue pe salmísta oñeñandu vaietereíramo jepe? b) ¿Mbaʼépa ikatu ñaaprende upe ehémplogui? (Ehecha pe taʼanga).

¹⁷ Oimérõ pe salmísta oñandu raʼe Jehová omboyke hague chupe, haʼe oñandu vaʼekue upéva peteĩ tiémpo mbykymívarente. Pe haʼe oĩ vaivérõ guare ohechakuaa tekotevẽha oñemoag̃uive Jehováre. Haʼe heʼi vaʼekue Ñandejárape: “Koʼág̃a kontinuadoite añemoag̃ui nderehe, nde chegueraha che po deréchagui. Nde remeʼẽ chéve konsého chegia hag̃ua. Ñandejára, nde ningo cheguerohorýta” (Sal. 73:​23, 24). Ñande avei ikatu jajerure Jehovápe ñanemombarete hag̃ua ñandejerovia kangýramo, térã ñañedesanimárõ jajavy haguére (Sal. 73:26; 94:18). Oiméramo jepe peteĩ tiémpore jajei raʼe pe tape porãgui, ikatu hína ñañemoag̃ui jey Jehováre jaikuaágui haʼe ‘oĩha ñaneperdona hag̃uáicha’ (Sal. 86:5). Koʼytevéntema tekotevẽ ñañemoag̃uive Ñandejárare ñañedesanimaiterei jave, térã ñañeñandu jave yvýre (Sal. 103:​13, 14).

ÑAÑEMOAG̃UÍKENA ÑANDEJÁRARE PÁRA SIÉMPRE

18. ¿Mbaʼérepa jaʼekuaa jasegitaha ñañemoag̃ui Ñandejárare opa árare?

¹⁸ Ñande jasegíta ñañemoag̃ui Ñandejárare opa árare pórke siémpre oĩta heta mbaʼe ikatútava ñaaprende chugui. La Biblia heʼi voi Ñandejára iñaranduetereiha, oikuaaha entéro mbaʼe ha ‘ñande ndaikatuiha jaikuaapa umi mbaʼe haʼe ojapóva’ (Rom. 11:33).

19. Ohechaukaháicha umi Salmo, ¿mbaʼépa ikatúta jasegi jajapo?

¹⁹ Salmo 79:13 heʼi: “Ore ningo nde puévlo ha nde ovecha mimi, ha nde reñangareko orerehe, ore roagradeséta ndéve pára siémpre, ohasáta heta henerasión ha rosegíta romombaʼeguasu”. Nde avei ikatu esegi eñemoag̃ui Jehováre ha erresivi umi vendisión haʼe omeʼẽtava ndéve pára siémpre. Péicha ikatúta ere: “Ñandejára, nde remombarete che korasõ, nde hína che Ita Guasu. Nde hína pe párte otokáva chéve opa ára g̃uarã” (Sal. 73:26).