ANASE vaʼekue 1934-pe. Upérõ ojapóma 20 áño che tuakuéra Fred ha Edna Molohan haʼe hague kuri Estudiánte de la Biblia, péicha oñehenói vaʼekue yma umi testígo de Jehovápe. Aagradeseterei chupekuéra chepytyvõ haguére ikatu hag̃uáicha ahayhu Jehovápe. Ore roiko vaʼekue Pársonspe, peteĩ puevloʼi opytáva suréste gotyo Kánsaspe. Haimete kompletoite ore kongregasiongua haʼe vaʼekue unhído. Che rógape enterovéva roho meme rreunionhápe ha predikasiónpe. Sábado kaʼarukue katu ropredika jepi kállere, koʼág̃arupi upévape oñehenói predikasión púvlika. Sapyʼánte orekaneʼõ, péro ropredikapa rire papa siémpre oregueraha vaʼekue roʼu hag̃ua eládo.

Pe kongregasión roimeháme ningo michĩ ha la ore território katu tuicha, oĩ unos kuánto puevloʼi ha heta gránha. Umi granhéro omeʼẽ rangue pláta umi puvlikasiónre heta vése omeʼẽ oréve verdúra ogueru ramóva uértagui, ryguasu rupiʼa ombyaty ramoitéva ha sapyʼánte katu ryguasu. Papa omeʼẽma voi ikontrivusión umi puvlikasiónre, upévare umi hiʼupy ideprovechopaite oréve.

Che túa umía okonsegi vaʼekue peteĩ fonógrafo oipuru hag̃ua predikasiónpe. Che ningo chemichĩeterei gueteri aipuru hag̃ua pe fonógrafo, péro avyʼa oheja haguére aipytyvõ chupekuéra amoĩ hag̃ua umi dísko orekóva ermáno Rutherford diskursokuéra. Ajapo jepi upéva roho jave umi rrevisíta ha estúdio bíblicope.

Roguereko vaʼekue peteĩ áuto Ford modélo 1936 ha papa omoĩ pe áuto técho ári peteĩ parlánte. Upéva ideprovechoiterei vaʼekue oréve ore servísiope. Hetave vése rombopúmi peteĩ músika umi hénte ojesareko hag̃ua orerehe, ha upéi romoĩma peteĩ diskúrso bíblico. Upe rire, roofrese umi puvlikasión umi oñeinteresávape.

 Peteĩ puevloʼi héravape Cherryvale oĩva Kánsaspe, papa omoinge ore áuto peteĩ párkepe pórke upépe heta la hénte domingokue. Upérõ umi polisía heʼi chupe ndaikatuiha omoĩ hiʼáuto pe párke ryepýpe péro ikatuha omoĩ okápe. Upévare papa onohẽ jey hiʼáuto kállepe pe párke kóstape. Upéicharõ jepe umi hénte ikatu gueteri ohendu porã pe prográma ipúva. Koʼãicha jave avyʼaiterei che túa ha che ermáno majór Jérryndi.

Áño 1940 mboyve, ropartisipa avei umi kampáña de predikasión ojejapóva ojekuvri pyaʼe hag̃ua umi território oĩhápe heta oposisión. Amombeʼu haguéicha ñepyrũrã, ropuʼã roho pyharepyte ha kirirĩhaitépe roheja tratádo ha folléto umi óga rokẽ guýpe. Upéi, roñembyaty pe siuda okárape roikuaa hag̃ua umi polisíapa noiméi ojagarra raʼe algúnope.

Iñemosionanteterei avei oiko jave umi márcha de informasión. Péicha jave romoĩ jepi kartél orejehe ha roguata ojoapykuéri pe siudáre. Ndacheresaráiri peteĩ jey umi ermáno oúrõ guare ore puévlope ha omoĩ ijehe umi kartél heʼihápe “Pe rrelihión ikatu nemoñuhã ha nembotavy”. Osẽ hikuái ógagui ha oguata 1 kilómetro imédio rupi ha upéi ou jey. Iporãveha katu avave ndojokói chupekuéra, upéva rangue heta hénte oikuaase mbaʼépa la oĩva.

Roho meme vaʼekue Téxaspe roasisti hag̃ua asambleahápe. Papa ombaʼapo kuri peteĩ emprésa de trénpe. Upéva ou porã oréve pórke ikatu roviaha grátis asamblearã ha rovisita hag̃ua ore héntepe. Mama ermáno majór hérava Fred Wismar ha hembireko Eulalie oiko vaʼekue Témplepe, Texas. Che tio Fred oaprende vaʼekue pe añetegua imitãrõ guare oñepyrũmíre síglo 20, upéi ojevautisa ha omombeʼu avei la oaprendéva che sýpe ha umi ótro iñermanokuérape. Heta ermáno oikóva Téxaspe oikuaa porã tiópe, pórke haʼe oservi vaʼekue kómo siérvo de sóna ojekuaáva koʼág̃arupi kómo superintendénte de sirkuíto. Haʼe ningo iñamávle, hory ha ikyreʼỹ vaʼekue Ñandejára servísiope, upévare ehémplo porã kuri chéve g̃uarã.

Áño 1941-pe, aviaha trénpe aasisti hag̃ua peteĩ asambléa tuichávape oikótava kuri San Luíspe, Misuri. Entéro oremitãitiva roñeinvita roguapy hag̃ua oñondive pe platafórma ypýpe. Upépe rohendu ermáno Rutherford diskúrso hérava “Hijos del Rey”. Opa rire pe diskúrso, mas de 15.000 oremitãva rorresivi peteĩ rregálo iporãitereíva. Ermáno Rutherford ha umi iñajudánte omeʼẽ káda únope pe lívro pyahu oñepresentáva hérava Hijos.

Abril de 1943-pe roho pe asambléa héravape “Llamada a la Acción” oikóva kuri Coffeyvíllepe, Kansas. Upérõ oñeanunsia entéro kongregasiónpe oñepyrũtaha peteĩ eskuéla pyahu oñembohérava Eskuéla Jaipurukuaa Hag̃ua la Biblia. Avei rorresivi peteĩ folléto orekóva 52 leksión ha ojepurútava  upe eskuélape. Péicha, upe áñope gueteri, areko che primer diskúrso upe eskuélape. Pe asambléa iñimportánte avei kuri chéve g̃uarã, pórke upérõ ajevautisa unos kuánto che rapichándi peteĩ piléta hoʼysã asývape oĩva peteĩ gránha opytáva namombyryiete upégui.

Atermina che sekundária 1951-pe, ha tekotevẽ kuri adesidi mbaʼépa ajapóta. Che ermáno Jerry oservi vaʼekue Betélpe. Che ningo ahase avei aservi upépe, upévare amondo che solisitu. Upe riremi añeinvita aha hag̃ua ha añepyrũ ambaʼapo Betélpe el 10 de marzo de 1952. Adesidi porã kuri pórke upe ajapóva chepytyvõ aservi porãve hag̃ua Ñandejárape.

Apensa kuri ikatutaha ambaʼapo pe impréntape, ojejapohápe umi rrevísta ha umi ótra puvlikasión. Péro arakaʼeve nambaʼapói upépe. Upéva rangue añeasigna kómo móso ha upe rire ambaʼapo kosináme. Avyʼa che asignasiónpe ha heta mbaʼe aaprende. Rombaʼapo vaʼekue por túrno ha areko jepi tiémpo lívre de día asegún la che túrno. Che lívre jave, pyʼỹinte aha pe vivliotékape ha ajapo che estúdio personál. Upéva chepytyvõ ajeroviave ha añemoag̃uive hag̃ua Jehováre. Péicha avei aĩve desidído aservívo Betélpe ikatuha peve. Jerry osẽ vaʼekue Betélgui 1949-pe ha omenda Patríciare, péro oiko hikuái ag̃ui Broóklyngui. Upévare ikatu vaʼekue chepytyvõ ha chemokyreʼỹ hikuái chepyahúrõ guare gueteri Betélpe.

Aike riremi, ojeporavo umi betelita ikatútava oñemoĩ pe lísta de diskursántepe orekóva Betel. Umi ermáno oĩva upe lístape oñeasigna jepi ovisita hag̃ua umi kongregasión oĩva 320 kilómetro peve Broóklyngui. Umi visítape umi betelita ojapo vaʼerã peteĩ diskúrso púvliko ha osẽ opredika pe kongregasióndi. Cheporavo kuri hikuái areko hag̃ua pe priviléhio. Ajepyʼapyeterei vaʼekue añepyrũ ramóme ajapo koʼã visíta. Upérõ, umi diskúrso púvliko ojejapóva odura 1 óra. Pyʼỹinte aviaha trénpe ag̃uahẽ hag̃ua umi kongregasiónpe. Chemanduʼa porãiterei la oiko vaʼekuére peteĩ domingo kaʼaru 1954-pe, inviérnorõ guare. Aviaha hína kuri trénpe Nueva York gotyo ha akalkula aime jeytamaha Betélpe pytũmbýrupi. Péro hoʼa peteĩ torménta, yvytu atã ha niéve reheve. Upéicha rupi, oñembyai pe párte eléktrika pe trenpegua ha ipahápe rog̃uahẽ Nueva Yórkpe la 5 de la mañána. Aha hag̃ua Broóklynpe ajagarra pe subte. Ag̃uahẽre, dirékto aike ambaʼapo kosináme pórke ja tárdema kuri, hiʼarive chekaneʼõ pórke ndaikatúi kuri apytuʼu porã upe pyharépe. Péro avyʼa ikatu haguére avisita umi kongregasiónpe ha aikuaa rupi heta ermáno ha ermánape. Koʼã mbaʼe ningo iñimportanteve oimeraẽ sakrifísio ikatúvagui ajapo.

Umi áño añepyrũrõ guare aservi Betélpe apartisipa pe prográma de estúdio bíblicope oñetransmitíva káda semána ñande estasión de rrádio WBBR guive. Upéva ojejapo kuri pe edifísio opytáva kálle Columbia Héightspe 124, pe segundo písope. Ermáno Alexander Macmillan opartisipa avei umi prográma de rrádiope. Upérõ g̃uarã, ermáno Macmillan oservíma vaʼekue Betélpe heta áñore. Ko ermánope rohenóimi kariñósamente ermáno Mac. Haʼe ningo peteĩ ehémplo neporãva umi oremitãitivape g̃uarã, pórke osegi vaʼekue ifiél ohasáramo jepe heta mbaʼe ijetuʼúva.

Áño 1958 guive akambia de asignasión ha añepyrũ ambaʼapo pe Eskuéla de Galaádpe g̃uarã. Aipytyvõ vaʼerã koʼã ermáno ha ermána ikyreʼỹetévape okonsegi hag̃ua ivisakuéra, ha aorganisa chupekuéra la iviáhe. Upe tiémpope hepy vaʼekue pe pasáhe de avión. Upévare la majoría umi ojegraduáva Galaádgui ha ohóva Áfricape térã Ásiape oviaha várkope. Tiémpo rire, umi pasáhe de avión ivaratomiéma ha hetaiteve misionéro oviaha aviónpentema.

Áño 1960-pe, aorganisa umi viáhe por avión ojeho hag̃ua Európape. Upépe oikóta 1961-pe umi asambléa internasionál. Che aviaha avei peteĩva umi asambléape oikóva Hambúrgope,  Alemania. Pe asambléa rire, mbohapy betelita roalkila peteĩ áuto ha roviaha Italia peve. Upépe rovisita pe sukursál de Roma. Upéi roho Fránciape, rokrusa pe kordilléra de los Pirineos ha roike Espáñape. Ko tetãme ojeproivi Testigokuéragui pe predikasión. Upépe romeʼẽ umi ermáno Barcelonaguápe unas kuánta puvlikasión rombohyrúva haʼeramoguáicha peteĩ rregálo. Rovyʼaiterei ikatu haguére roikuaa chupekuéra. Upéi, roho Ámsterdampe roviaha jey hag̃ua Nueva York gotyo.

Áño 1962-pe, añeasigna ajapo hag̃ua umi arréglo de viáhe 583 ermáno ha ermánape g̃uarã. Haʼekuéra oasistíta peteĩ série espesiál de asambléa internasionálpe oikótava heta hendárupi. Umi asambléa oiko kuri 1963-pe ha héra “Buenas Nuevas Eternas”. Umi ermáno ohóva kómo delegádo oasisti umi asambléa ojeguerekóva Európape, Asia, Pacífico Sur, Honolulu ha ipahápe Pasadénape, California. Pe viáhepe og̃uahẽ avei hikuái Líbano ha Jordániape oikuaa hag̃ua umi yvy ha lugár oiko haguépe umi mbaʼe oñemombeʼúva la Bíbliape. Ore departaménto orreserva umi otél ha pasáhe de avión, ha avei otramita vísa umi lugár oñekotevẽtahápe g̃uarã.

Pe áño 1963 iñimportánte avei kuri chéve ambue mbaʼére. El 29 de junio amenda Lila Rógersre. Haʼe ningo Misurigua ha oservi Betélpe 1960 guive. Una semána romenda rire, rojotopa umi ermáno ojapóvandi pe viáhe pukuete umi asamblearã ha rovisita Grecia, Egipto ha Líbano. Upégui roviaha aviónpe Jerusalénpe. Péro upe lugárpe umi autorida nopermitíri ojepredika lívremente ha nomeʼẽi vísa umi Testígope. Upévare ndoroikuaái ikatútapa roike kuri. Peñeimahinamína mbaʼeichaite pevépa rovyʼa ha roñesorprende rohechávo peteĩ grúpo de ermáno oĩha yvatete pe aeropuérto michĩetévape. Haʼekuéra oreko peteĩ kartél heʼíva: “Peg̃uahẽ porãite testígo de Jehová”. Rovyʼaiterei ningo ikatu haguére rohecha pe yvy ha umi lugár oñemensionáva la Bíbliape, ha umi párte oiko haguépe Abrahán, Isaac ha Jacob. Avei Jesús ha ijapostolkuéra opredika haguépe, ha oñepyrũ haguégui iñasarambi pe enseñánsa kristiána “yvy paha peve” (Hech. 13:47).

Ojapóma 55 áño Lila chemoirũ hague fiélmente tahaʼe haʼéva asignasiónpe. Por ehémplo, rovisita vaʼekue heta vése España ha Portugal pe predikasión ojeproivírõ guare upérupi. Umícha jave, romokyreʼỹ umi ermáno ha ermánape ha rogueraha chupekuéra puvlikasión ha ambue mbaʼe oikotevẽva. Ikatu kuri avei rovisita unos kuánto ñane ermáno oĩva kárselpe Cádizpe, España. Avyʼaiterei ikatu rupi ameʼẽ peteĩ diskúrso amokyreʼỹ hag̃ua chupekuéra.

Pe áño 1963 guive, aipytyvõ ikatu hag̃uáicha oñeorganisa umi viáhe ojeho hag̃ua umi asambléa internasionálpe. Umíva ojejapo kuri Áfricape,  Australia, Centroamérica, Sudamérica, Europa, Lejano Oriente, Hawái, Nueva Zelanda ha Puerto Rícope. Che ha Lila roasisti heta asambléape núnka ndaoreresaraimoʼãivagui. Por ehémplo pe oiko vaʼekue 1989-pe Varsóviape, Polonia. Heta ermáno oúva Rúsiagui oasisti kuri pe asambléa guasuetépe. Upérõ primera ves oasisti kuri hikuái peteĩ asambléape. Roikuaa heta ermáno ha ermánape oĩ vaʼekue heta áño préso Unión Soviéticape ifiél rupi Jehovápe.

Ótra asignasión chembovyʼaitereíva avei haʼe kuri avisitárõ guare amokyreʼỹ hag̃ua umi betelita ha misionéro oĩvape ko yvy tuichakuére. Pe última visíta rojapo vaʼekuépe roho Corea del Súrpe, ha roikuaa 50 ermánope oĩva kárselpe pe siuda de Suwónpe. Enterovéva ojeroviaiterei Jehováre, ha hiʼãitereíma chupekuéra oservi jey Ñandejárape lívremente. Pe experiénsia oremokyreʼỹeterei kuri (Rom. 1:11, 12).

Añepyrũ guive aservi Ñandejárape, ahechakuaa mbaʼeichaitépa haʼe ovendesi ipuévlope. Ajevautisárõ guare 1943-pe oĩ vaʼekue 100.000 puvlikadór. Koʼág̃a katu ñaĩ mas de 8 millón de Testígo jaservíva Jehovápe 240 tetã ha territóriope. Umi ojegradua vaʼekue Eskuéla de Galaádpe tuicha oipytyvõ hetave hag̃ua ohóvo umi oservíva Jehovápe. Avyʼaiterei ikatu haguére ambaʼapo umi misionérondi ha aipytyvõ rupi chupekuéra oho hag̃ua iñasignasiónpe.

Amombaʼeterei ikatu haguére chemitã reheve ajedesidi añemeʼẽmbaite Jehová servísiope ha amondo haguére che solisitu Betélpe. Jehová tuichaiterei chevendesi umi áño aservívape chupe. Ndahaʼéi pe servísio rojapóva Betélpente la orembovyʼáva, che ha Lila rovyʼa avei pórke mas de 50 áñorema ropredika heta kongregasióndi Broóklynpe. Hiʼarive, umi kongregasiónpe rojuhu heta amígo teete.

Aservi gueteri Betélpe, ha Lila siémpre chepytyvõ. Koʼág̃a arekóma mas de 84 áño. Upéicharõ jepe, chembovyʼa ikatúiti haguére ambaʼapo. Koʼág̃arupi añenkarga umi kárta og̃uahẽvare sukursálpe.

Ñanembovyʼaiterei ningo ikatu haguére ñaime Jehová organisasión ijojahaʼỹvape ha ikatúgui jahecha oñekumpliha Malaquías 3:18 heʼíva: “Peẽ pehechakuaa jeýta idiferenteha peteĩ persóna ihústova ha peteĩ iñañáva, peteĩ oadoráva Ñandejárape ha peteĩ ndoadoráiva chupe”. Káda día ahechakuaa mbaʼéichapa Satanás múndo oho vaive, ha umi hénte nohaʼarõi mbaʼeve iporãva ha ndovyʼaguasúi. Péro umi jahayhu ha jaservíva Jehovápe javyʼa, jaikóramo jepe koʼã tiémpo ijetuʼuetévape. Ñande jaikuaa jahupytytaha heta mbaʼe porã amo gotyove. Upéicha rupi, ñamombaʼe pe priviléhio porãite jarekóva ñamombeʼúvo ñande rapichápe koʼã notísia oporomokyreʼỹetéva (Mat. 24:14). Ñandejára Rréino koʼẽrõitéma ojapóta ko múndo tujágui peteĩ paraíso. ¡Hiʼãitéma ningo og̃uahẽ upe día! Upéva oiko vove, entéro oĩva ko yvy ape ári hesãita, ovyʼáta ha oikovéta opa árare.