1, 2. a) ¿Mbaʼépa haʼe vaʼekue pe traváho iñimportantevéva Jesús ojapo vaʼekue, ha mbaʼérepa? b) ¿Mbaʼépa jajapo vaʼerã oiko hag̃ua ñandehegui peteĩ “Ñandejára ajudánte” ikatupyrýva?

JESUCRISTO haʼe vaʼekue karpintéro ha avei opredika pe marandu porã (Mar. 6:3; Rom. 15:8). Haʼe ojapo vaʼekue koʼã tembiapo hekoitépe. Por ehémplo, ombaʼapórõ guare kómo karpintéro oaprende mbaʼéichapa oipuru vaʼerã umi erramiénta ojapo hag̃ua yvyrágui heta mbaʼe ideprovechoitereíva. Opredikárõ guare katu, oipuru umi mbaʼeta oikuaáva la Bíbliagui oipytyvõ hag̃ua umi héntepe ikatu hag̃uáicha ontende pe añetegua oĩva Ñandejára Ñeʼẽme (Mat. 7:28; Luc. 24:32, 45). Jesús orekórõ guare 30 áño nombaʼapovéi karpinteríape, ha oñepyrũ opredika pórke oikuaa upe tembiapo haʼeha la iñimportantevéva. Haʼe heʼi vaʼekue voi oñembou hague chupe ko yvy ape ári opredika hag̃ua pe marandu porã, péva haʼe peteĩva umi tembiapo Ñandejára omanda vaʼekue chupe (Mat. 20:28; Luc. 3:23; 4:43). Jesús omotenonde vaʼekue pe predikasión, ha oipota kuri avei umi ótro ojapo upéva (Mat. 9:35-38).

² La majoría umi kristiáno ndahaʼéi karpintéro, péro enterovéva oñehaʼã omboʼe hapichápe umi marandu porã. Ñandejára voi ningo ñanepytyvõ ñaporomboʼe hag̃ua ha upéva ohechauka mbaʼeichaite pevépa iñimportánte ko tembiapo. La Biblia heʼi voi ñande haʼeha “Ñandejára ajudánte” (1 Cor. 3:9; 2 Cor. 6:4). Ñande jahechakuaa siertoha la heʼíva peteĩ salmísta: “Opa mbaʼe nde eréva ningo siertogua memete” (Sal. 119:159, 160). Jehová Ñeʼẽ ningo pe añetegua. Upéicha rupi, ñañehaʼã ikatu hag̃uáicha jaipuru “Ñandejára Ñeʼẽ hekoitépe”  (elee 2 Timoteo 2:15). Jahechaháicha, iporãiterei ñandekatupyryve jahávo jaipuru hag̃ua la Biblia. Ñandejára Ñeʼẽ haʼe hína pe erramiénta iñimportantevéva jarekóva ñamboʼe hag̃ua umi héntepe mávapa Jehová, mávapa Jesús, ha avei mbaʼépa hína pe Rréino. Jehová organisasión omeʼẽ ñandéve hetave erramiénta ideprovechoitereíva ñaipytyvõ hag̃ua umi héntepe. Tekotevẽ jaikuaa mbaʼéichapa ikatu jaipuru porãve umíva. Koʼã mbaʼe hína umi erramiénta jarekóva ñaporomboʼe hag̃ua ha oñehenóiva kit de enseñanza.

3. ¿Mbaʼépa ñañehaʼã meme vaʼerã jajapo ñasẽ jave predikasiónpe, ha mbaʼéichapa Hechos 13:48 ñanepytyvõ jajapo hag̃ua upéva?

³ Ikatu oime ñañeporandu mbaʼérepa oñehenói kit de enseñanza oñehenói rangue kit de predikasión. Ojejapo upéicha pórke pe palávra “predikasión” térã japredika heʼise ñamombeʼuha peteĩ mensáhe. Péro pe palávra “enseñanza” térã ñamboʼe heʼise jaexplikaha pe mensáhe ikatu hag̃uáicha peteĩ persóna ontende la ohendúva ha ojapo umi mbaʼe oaprendéva. Saʼietereíma la tiémpo hembýva ko múndope, upévare tekotevẽ ñañehaʼã meme ñamoñepyrũ hag̃ua estúdio bíblico, ha ñamboʼe pe añetegua oiko hag̃ua umi héntegui Cristo disípulo. Upéva heʼise kyreʼỹme jaheka vaʼerãha opavave oñehaʼãvape “ohupyty jeikove opaveʼỹva” ha ñaipytyvõ chupekuéra oservi hag̃ua Jehovápe (elee Hechos 13:44-48).

4. ¿Mbaʼépa jajapo vaʼerã jatopa hag̃ua umi oñehaʼãvape “ohupyty jeikove opaveʼỹva”?

⁴ ¿Mbaʼéichapa ikatu jatopa opavave oñehaʼãvape “ohupyty jeikove opaveʼỹva”? Umi kristiáno ypykue ikatu kuri ojapo upéva opredikágui añoite umi héntepe. Jesús heʼi vaʼekue idisipulokuérape: “Oimeraẽ siuda térã puévlo peg̃uahẽhápe, peheka petopa peve mávapa omerese ohendu” (Mat. 10:11). Ñande avei tekotevẽ jajapo péicha. Péro umi persóna naisinséroiva, oñemombaʼeguasúva, ha noñeinteresáiva añetehápe Ñandejárare nohendusemoʼãi umi marandu porã. Upévare jaheka vaʼerã umi persóna isinsérova, iñumíldeva ha oikuaaséva pe añetegua. Pe traváho jajapóva jaheka hag̃ua umi hénte ipyʼaporãvape, ikatu ñakompara pe Jesús ojapo vaʼekuére ohekárõ guare umi yvyra oipurútava karpinteríape. Primero haʼe otopa raẽ vaʼerã yvyra iporãva, ikatu hag̃uáicha upéi ojapo chugui peteĩ muévle, okẽ, júgo térã ótra kósa. Upearã oipuru vaʼerã umi erramiénta orekóva ha umi mbaʼe oaprende vaʼekue ijofísiope. Upéicha avei, ñepyrũrã jatopa vaʼerã umi persóna isinsérovape. Upe rire katupyrýpe jaipuru vaʼerã umi erramiénta jarekóva ñaipytyvõ hag̃ua koʼã persónape oiko hag̃ua chuguikuéra Jesús disípulo (Mat. 28:19, 20).

5. ¿Mbaʼépa jaikuaa vaʼerã umi erramiénta jarekóvagui pe kit de enseñánzape? Emoĩ peteĩ ehémplo (ehecha pe taʼanga oĩva iñepyrũme).

⁵ Káda kósa oĩva peteĩ káha de erramiéntape ojepuru asegún pe traváho ojejapóva. Por ehémplo, ñapensamína umi erramiénta Jesús oipuru vaʼekuére ombaʼapórõ guare kómo karpintéro. * Haʼe oikotevẽ vaʼekue erramiénta omedi, omarka, oikytĩ, ombokua hag̃ua ha avei onivela ha omboja hag̃ua ojuehe umi piésa. Péicha avei, jaikuaa vaʼerã mbaʼéichapa ha moõpa jaipuru vaʼerã káda erramiénta jarekóva pe kit de enseñánzape. Jahechamína mbaʼéichapa ikatu jaipuru koʼã erramiénta ideprovechoitéva.

6, 7. a) ¿Mbaʼéichapa jaipuru jepi umi tarhéta de kontákto? b) ¿Maʼerãpa jaipuru umi invitasión ñane rreuniónpe g̃uarã?

⁶ Tarhéta de kontákto. Kóva ningo haʼe peteĩ erramiénta michĩva péro ideprovechoitereíva umi hénte oikuaa hag̃ua mávapa ñande ha avei oikuaaukáva chupekuéra ñande sítio jw.org. Umi hénte ikatu oike ñande sítiope oikuaave hag̃ua la jajapóva ha avei ojerure hag̃ua peteĩ estúdio bíblico. Mas de 400.000 persónama ojerure estúdio bíblico pe sítio jw.org-pe, ha hetave ohóvo la ojeruréva. Upévare, iporãta jagueraháramo unas kuánta tarhéta de kontákto  ñasẽ jave, péicha ikatúta jaipuru umíva ñañeʼẽ hag̃ua umi héntendi.

⁷ Umi invitasión. Umi invitasión ñane rreunionkuérape g̃uarã heʼi: “Roipotaite reaprende la Biblia omboʼéva testígo de Jehovándi”. Upéi heʼi peteĩ persóna ikatuha ojapo upéva “rreunionhápe” térã hogaitépe. Upéicharõ, ko invitasión omombeʼu umi héntepe mávapa ñande, ha avei oinvita ostudia hag̃ua la Biblia ñanendive umi ohechakuaávape “oikotevẽha Ñandejárare” (Mat. 5:3). Péro umi hénte ikatu oasisti rreunionhápe ostudia térã ndostudiáiramo jepe la Biblia. Haʼekuéra oúramo rreunionhápe ohechakuaáta ikatuha oaprende hetaiterei mbaʼe la Bíbliagui.

8. ¿Mbaʼérepa iñimportánte umi hénte oasisti unave jepe ñane rreuniónpe? Emoĩ peteĩ ehémplo.

⁸ Iñimportánte ningo jasegi ñainvita umi héntepe oho hag̃ua unave jepe ñane rreunionhápe. ¿Mbaʼérepa? Pórke haʼekuéra oúramo ñane rreuniónpe ohechakuaáta ñanediferenteha umi rrelihión japúgui. Umi hénte ikatúta ohecha Jehová puévlo omboʼeha pe añetegua oĩva la Bíbliape ha oikuaa porãta Ñandejárape (Is. 65:13). Por ehémplo, peteĩ matrimónio estadounidénse ojapo unos kuánto áño ohechakuaa hague la diferénsia. ¿Mbaʼéichapa oiko upéva? Koʼã persóna ningo héra Ray ha Linda. Haʼekuéra ojerovia Ñandejárare ha oikuaa porãseve chupe. Upéicha rupi odesidi oho entéro umi iglésia oĩvape isiudápe. Péro oñepyrũ mboyve oñerreuni peteĩva koʼã iglésiape ohechase raẽ hikuái mokõi mbaʼe. Primero, ohechase oaprendépa algúna kósa pe lugárpe. Ha segundo, ojekuaápa umi hénte oñemonde lájare oserviha hína Ñandejárape. Oñepyrũ ojeporeka, ha ohasa unos kuánto áño pórke heta iglésia oĩ upe siudápe. Amo ipahápe, ou oñedesepsiona hikuái pórke umi lugár ovisita haguépe noaprendéi mbaʼeve ha umi hénte avei naideséntei pe oñemonde lájape. Ovisita rire hikuái pe última iglésia orekóva la ilístape, Linda oho itraváhope ha Ray oho jey hógape. Ohokuévo hiʼáutope, Ray ohasa peteĩ Salón de Reino rupi. Upémarõ haʼe oñeporandu: “¿Mbaʼére piko ndaikéi ahecha mbaʼépa ojapo umi hénte?”. Ráype oimpresionaiterei la ohecháva pe Salón del Réinope, pórke entéronte hory, iñamávle ha oñemonde porã. Haʼe oike oguapy frentetépe voi, ha omombaʼe la oaprendéva. Oiko kuri apóstol Pablo heʼi hagueichaite oikoha umi persóna ohóvare primera ves rreunionhápe ha heʼíva: “Añetehápe Ñandejára oĩ pende apytépe” (1 Cor. 14:23-25). Upe rire, Ray oho rreunionhápe káda domingo; upéi oho avei umi rreunión éntre semanaguápe. Linda oñepyrũ avei oasisti, ha mokõive orekóramo jepe mas de 70 áño, ostudia la Biblia ha tiémpo rire ojevautisa.

9, 10. a) ¿Mbaʼérepa ndahasyiete jaipuru umi tratádo? b) Eexplikamína mbaʼéichapa ikatu jaipuru pe tratádo ¿Mbaʼépa hína Ñandejára Rréino?

⁹ Umi tratádo. Jaguereko 8 tratádo umi erramiénta ñaporomboʼe hag̃ua apytépe. Ifásil jaipuru umíva, ha ideprovechoiterei ñamoñepyrũ hag̃ua estúdio bíblico. Oñepyrũ guive ojepuru áño 2013-pe, oñeimprimíma 5.000 millón de tratádo. Umi mbaʼe oĩva káda tratádope oñeorganisa de la mísma fórma. Upévare, ñaaprendéramo mbaʼéichapa jaipuru vaʼerã peteĩva jepe, jaikuaátama avei mbaʼéichapa jaipurúta umi ótro. Upéicharõ, ¿mbaʼéichapa ikatu jaipuru peteĩ tratádo ñañepyrũ hag̃ua ñañemongeta oimeraẽvandi?

¹⁰ Ñamoĩ chupe jaipuruseha pe tratádo ¿Mbaʼépa hína Ñandejára Rréino? Ikatu jahechauka pe persónape pe pregúnta oĩva pe tratádo apére ha jaʼe: “¿Ndépa reñeporandúma sapyʼánte mbaʼépa hína Ñandejára Rréino?”. Upe rire ehechauka chupe umi mbohapy rrespuésta oĩva iguýpe ikatu hag̃uáicha oiporavo la ogustavéva chupe. Upéi jaʼe rangue pe persónape ombohovái porã térã ombohovái vai hague, ikatúnte jaavri la tratádo pe párte heʼihápe “Mbaʼépa heʼi la Biblia” ha jalee umi téxto ojesitáva upépe, umíva hína Daniel 2:44 ha Isaías 9:6. Ikatúma guive iporãta jasegi ñañemongeta pe persónandi. Jajedespedi mboyve, jajapo chupe peteĩ pregúnta oĩva pe última páhinape  pe tratádope, pe rrekuádro heʼihápe “Epensamína”. Upépe oñeporandu: ¿Mbaʼéichapa jaikóta Ñandejára Rréino ogoverna vove? Upe pregúnta ikatu ñambohovái ótro jajúvape. Upe rire, jaju jey vove hendápe, ñanemanduʼa vaʼerã pe ótra páhinape pe tratádo oñeʼẽha peteĩ téma oĩvare ñande folléto ¡Notísia porã oúva Ñandejáragui!, leksión 7-pe. Ko folléto haʼe peteĩva umi erramiénta jaipurúva ñamoñepyrũ hag̃ua estúdio bíblico.

11. ¿Maʼerãpa ojejapo umi rrevísta, ha mbaʼépa jaikuaa vaʼerã chuguikuéra?

¹¹ Umi rrevísta. Pe Ñemañaha ha ¡Despertad! haʼe hína umi rrevísta ojetradusivéva ha oñemosarambivéva ko yvy tuichakuére. Koʼã rrevísta ningo ojelee diferénte tetãme, upévare umi téma oñemoĩva ijapére ojeporavo ikatu hag̃uáicha ointeresa umi persóna oparupiguápe. Jaipuru vaʼerã koʼã erramiénta ñaipytyvõ hag̃ua ñande rapichápe ohechakuaa hag̃ua mbaʼépa añetehápe la iñimportantevéva koʼág̃arupi. Péro upearã jaikuaa raẽ vaʼerã mbaʼeichagua persónapepa ideprovechovéta káda téma osẽva umi rrevístape.

12. a) ¿Mbaʼeichagua persónape g̃uarãpa ojejapo pe rrevísta ¡Despertad!, ha mbaʼépa la ojehupytyséva ko rrevísta rupive? b) ¿Mbaʼe experiénsiapa reguereko eipurúvo ko rrevísta?

¹² Pe rrevísta ¡Despertad! ojejapo umi saʼi oikuaávape g̃uarã la Bíbliagui térã ndoikuaaietéva voi chugui mbaʼeve. Koʼã persóna ikatu ndoikuaái umi kristianokuéra omboʼéva, térã ndojeroviái umi rrelihiónre ỹrõ katu ndoikuaái la Biblia ikatuha oipytyvõ chupekuéra hekovépe. Umi téma orekóva pe rrevísta ¡Despertad! oñehaʼã okonvense umi oleévape ko rrevísta Ñandejára oexistiha (Rom. 1:20; Heb. 11:6). Avei, oñehaʼã oipytyvõ chupekuéra oguerovia hag̃ua la Biblia “añetehápe haʼeha Ñandejára Ñeʼẽ” (1 Tes. 2:13). Umi mbohapy artíkulo osẽva ko rrevísta apére 2018-pe haʼe: “El camino de la felicidad”, “12 claves para una familia feliz” ha “Ayuda para quienes están de duelo”.

13. a) ¿Mbaʼeichagua persónape g̃uarãpa ojejapo pe rrevísta Ñemañaha púvlika? b) ¿Mbaʼe experiénsiapa reguereko eipurúvo ko rrevísta?

¹³ Pe rrevísta Ñemañaha púvlika oexplika umi enseñánsa bíblica umi hénte orrespetávape Ñandejárape ha la Bíbliape. Koʼã persóna oikuaa algúna kósa la Bíbliagui, péro nontendeporãi la oĩva pype (Rom. 10:2; 1 Tim. 2:3, 4). Umi mbohapy artíkulo osẽva ko rrevísta apére 2018-pe ombohovái koʼã porandu: “¿Ideprovéchoitipa umi konsého oĩva la Bíbliape?” “¿Mbaʼépa ñaneraʼarõ amo gotyove?” ha “¿Ojepyʼapýpa Ñandejára nderehe?”.

14. a) ¿Mbaʼéicha javépa ikatu jaipuru umi 4 vidéo oĩva pe kit de enseñánzape? b) ¿Mbaʼe experiénsiapa reguereko eipurúvo koʼã vidéo?

¹⁴ Umi vidéo. Jesús tiémpope, umi karpintéro ndorekói vaʼekue umi erramiénta eléktrika. Péro koʼág̃a umi karpintéro oipuru umíva, por ehémplo umi siérra, taládro ha lihadóra eléktrika. Upéicha avei, koʼág̃arupi jareko umi puvlikasión oñeimprimíva, péro avei jareko umi vidéo neporãva jahechaukáva umi héntepe. Pe kit de enseñánzape oĩ 4 vidéo, ha umíva haʼe: ¿Mbaʼérepa restudia vaʼerã la Biblia?, ¿Mbaʼéichapa rojapo peteĩ estúdio bíblico?, ¿Mbaʼéichapa rojapo ore rreunionkuéra?, ha ¿Mávapa ore testígo de Jehová? Umi vidéo mbykyvéva oduráva méno de 2 minúto ikatu jaipuru ñañemongeta ñepyrũ hag̃ua umi persónandi. Umi vidéo ipukuvéva katu jaipurukuaa jajapo jave rrevisíta ha ñañemongeta jave umi persóna orekóvandi hetave tiémpo. Koʼã vidéo ideprovechoiterei pórke omokyreʼỹ heta tapichápe ostudia hag̃ua la Biblia ha oasisti hag̃ua rreunionhápe.

15. ¿Mbaʼéichapa orreaksiona jepi umi hénte ohecha jave iñeʼẽtépe umi vidéo? Emoĩ peteĩ ehémplo.

¹⁵ Peteĩ ermána otopa vaʼekue peteĩ kuñakarai Micronesiagua rehe. Upévare pe persóna ontende porãve pe idióma yapés. Pe ermána ohechauka chupe pe vidéo ¿Mbaʼérepa restudia vaʼerã la Biblia?, oĩva idióma yapéspe. Oñepyrũvo  ohecha pe vidéo, pe kuñakarai heʼi: “¡Ni ndagueroviaséi, kóva ningo oĩ che idiómape! Hiʼarive oñeʼẽ oñeñeʼẽ lája pe ísla aju haguégui. ¡Che idiomaitépe oñeʼẽ!”. Pe kuñakarai heʼi olee ha ohechataha entéro mbaʼe oĩva iñidiómape jw.org-pe (embojoja Hechos 2:8, 11 heʼívare). Ótra experiénsia iporãva oreko kuri peteĩ ermána Estados Unidosgua orekóva peteĩ isovríno oikóva mombyry ótro tetãme. Haʼe omondo chupe peteĩ link ohecha hag̃ua iñidiomaitépe pe vidéo ñañeʼẽma hague. Isovríno ohecha la vidéo ha upéi oskrivi itiápe peteĩ korréo heʼihápe: “Iñinteresanteterei pe párte heʼihápe pe Aña orekoha ipoguýpe ko múndo. Amondo peteĩ solisitu astudia hag̃ua la Biblia”. Añetehápe ñanembovyʼaiterei ko experiénsia, pórke ko ermána sovríno oiko peteĩ tetã umi autorida ndohejaihápe umi ermáno opredika lívremente.

16. Eexplikamína mbaʼéichapa ikatu jaipuru koʼã folléto: a) Ehendúkena Ñandejárape ha reikovéta opa árare. b) ¡Notísia porã oúva Ñandejáragui! c) ¿Mávapa umi ojapóva Jehová rembipota koʼág̃arupi?

¹⁶ Umi folléto. ¿Mbaʼéichapa ikatu ñamboʼe pe añetegua peteĩ persóna ndoleeporãivape térã ndorekóiva mbaʼeveichagua puvlikasión iñeʼẽtépe? Péicha jave, ikatu jaipuru pe folléto Ehendúkena Ñandejárape ha reikovéta opa árare. * Ótra erramiénta ideprovechoitereíva ñamoñepyrũ hag̃ua estúdio bíblico haʼe pe folléto ¡Notísia porã oúva Ñandejáragui! Jahechauka jave ko folléto, ikatu jajerure pe persónape oiporavo hag̃ua mbaʼe témapa ointeresave chupe umi 14 téma oñehesaʼỹijóvagui ha jatopáva pe última páhinape. Péicha ikatu ñañepyrũ jastudia hendive upe leksión. ¿Ñatanteámapa raʼe ko suherénsia jajapo jave rrevisíta? Ótro folléto jarekóva ñane erramientakuéra apytépe haʼe ¿Mávapa umi ojapóva Jehová rembipota koʼág̃arupi? Ko folléto oipytyvõ umi estudiántepe oikuaa porãve hag̃ua ñane organisasión. Jaikuaa hag̃ua mbaʼéichapa jaipurúta ko folléto ñane estudiántendi, ikatu jalee pe prográma Mbaʼéichapa Jaiko ha Japredika vaʼerã marzo de 2017-peguare.

17. a) ¿Maʼerãpa ideprovécho umi mokõi lívro jaipurúva jajapo hag̃ua estúdio bíblico? b) ¿Mbaʼépa ojapo vaʼerã katuete umi ojevautisámava, ha mbaʼérepa?

¹⁷ Umi lívro. Restudiáramo peteĩ persónandi peteĩva umi folléto, ikatu ijávoventema peñepyrũ pestudia pe lívro ¿Mbaʼépa ñanemboʼe la Biblia? ha pehejánte pe folléto. Ko lívro ningo oipytyvõ umi héntepe oaprendeve hag̃ua umi enseñánsa bíblica tekotevẽtereíva oikuaa hikuái. Jahecháramo peteĩ estudiánte oñakãrapuʼãha ohóvo ha ostudiapáma ko lívro, ikatu jasegi jastudia hendive pe lívro ‘Jaikókena Ñandejára mborayhúpe’. Ko erramiénta oipytyvõta chupe oreko hag̃ua enkuénta umi prinsípio bíblico káda día. Aníkena ñanderesarái jastudia vaʼerãha ñane estudiántendi koʼã mokõi lívro kompletoite ojevautisámarõ jepe. Péicha ñaipytyvõta chupe ojerovia mbarete hag̃ua Jehováre ha osegi hag̃ua ifiél chupe (elee Colosenses 2:6, 7).

18. a) ¿Mbaʼépa ñanemokyreʼỹ jajapo hag̃ua 1 Timoteo 4:16, ha mbaʼépa jahupytýta jajapórõ péicha? b) ¿Mbaʼépa jahupytyse jaipuru jave umi erramiénta jarekóva ñaporomboʼe hag̃ua?

¹⁸ Entéro testígo de Jehová omboʼe vaʼerã “pe añetegua, haʼéva hína umi marandu porã”. Péicha umi hénte ikatúta ohupyty pe jeikove opaveʼỹva (Col. 1:5; elee 1 Timoteo 4:16). Upearã jareko umi erramiénta jaipurúva ñaporomboʼe hag̃ua (Elee pe rrekuádro “ Kit de enseñanza”). Ñañehaʼãkena jaipuru hekópe porã entéro umi erramiénta. Káda uno ikatu jadesidi mbaʼe erramiéntapa jaipurúta asegún la situasión oñepresentáva. Péro ñanemanduʼákena japredika jave ndahaʼéi ñaentregánte vaʼerã umi héntepe ñane puvlikasionkuéra. Aníkena jaheja puvlikasión umi persóna noñeinteresáivape ñane mensáhere. Ñande ningo jaipota umi héntegui oiko Jesús disípulo. Avei ñaipytyvõse entéro oñehaʼãvape “ohupyty jeikove opaveʼỹva”. Koʼãva hína umi persóna ohechaukáva isinseroha, hekomirĩha ha añetehápe oikuaaseha Ñandejárape (Hech. 13:48; Mat. 28:19, 20).