1. ¿Mbaʼe mbaʼépa oiko Adán ha Eva odesidi vai rupi?

¿MÁVAPA heʼi vaʼerã ñandéve mbaʼépa oĩ porã ha mbaʼépa oĩ vai? Ñandejára heʼi vaʼekue Adán ha Évape ani hag̃ua hoʼu pe yva orekóva pe yvyramáta opermitíva ojekuaa mbaʼépa iporã ha mbaʼépa ivai. Péro haʼekuéra hoʼu upe yva ha péicha ohechauka porãiterei ndojeroviaiha Ñandejárare ni umi mbaʼe haʼe heʼívare. Adán ha Eva odesidise kuri ijeheguiete mbaʼépa la oĩ porãva ha oĩ vaíva (Gén. 3:22). Péro epensamíntena umi mbaʼe operdévare hikuái upéva káusare. Haʼekuéra operde iñamista Jehovándi ha pe oportunida oiko hag̃ua pára siémpre. Avei entéro ifamiliarégui oiko pekadór ha omano (Rom. 5:12). Adán ha Eva ndodesidiporãi rupi hetaiterei mbaʼe vai oiko.

2, 3. a) ¿Mbaʼépa ojapo pe eunúko etíope Felipe opredikárõ guare chupe? b) ¿Mbaʼe vendisiónpa jarresivi jajevautisa jave? c) ¿Mbaʼe porandúpa ñambohováita?

² Adán ha Eva ojapo vaʼekue idiferentete pe eunúko etíope ojapo vaʼekuégui, Felipe opredikárõ guare chupe. Pe eunúko omombaʼeterei la Jehová ha Jesús ojapo vaʼekue hesehápe, ha upévare upepete voi ojevautisa (Hech. 8:34-38). Ñande avei ñañemeʼẽvo Ñandejárape ha jajevautisa pe eunúko ojapo haguéicha, jahechauka hína ñamombaʼeha la Jehová ha Jesús ojapo vaʼekue ñanderehehápe. Avei ojekuaa jajeroviaha Jehováre ha ñarrekonoseha haʼe añoite ikatuha heʼi ñandéve mbaʼépa oĩ porã ha mbaʼépa oĩ vai.

³ Epensamína umi vendisión jarresivítavare jaservíramo Jehovápe. Jarekóta pe esperánsa jahupytývo entéro umi mbaʼe Adán ha Eva operde vaʼekue, por ehémplo pe oportunida  jaiko hag̃ua opa árare. Jajerovia rupi Jesús rehe, Jehová operdona ñande fálla ha ñanekonsiénsia potĩ (Mat. 20:28; Hech. 10:43). Ñande ikatu avei ñaĩ Jehová puévlope ijatyhápe umi persóna haʼe oguerohorýva ha ovendesítava amo gotyove (Juan 10:14-16; Rom. 8:20, 21). Añetehápe ningo koʼã vendisión ojekuaa porãitereíma voi, upéicharõ jepe heta oĩ noñanimáiva osegi pe eunúko etíope ehémplo oikuaámarõ jepe Jehovápe. ¿Mbaʼépa upéicharõ la ojokóva chupekuéra ani hag̃ua ojevautisa? ¿Ha mbaʼéichapa ikatu ombohovái porã hikuái pe situasión?

4, 5. ¿Mbaʼeichagua situasiónpa ohasa vaʼekue Avery ha Hannah?

⁴ Ndojeroviái ijehe. Avery tuakuéra ningo testígo de Jehová. Opárupinte ojekuaa itúape ha oñeñeʼẽ porã hese pórke okuida porã ifamíliare ha oservi fiélmente kómo ansiáno. Upéicharõ jepe, ko mitãkuimbaʼe noñanimái kuri ojevautisa. ¿Mbaʼérepa? Haʼe heʼi: “Ombaʼapo vaʼekue cherehe umi mbaʼe porã heta hénte opensáva che túare, aimoʼã voi ndaikatumoʼãiha ajeporta umi ótro ohaʼarõháicha chehegui”. Avery ndojeroviái ijehe ha upévare opensa ndaikatumoʼãiha okumpli porã umi rresponsavilida ikatúva oñemeʼẽ chupe tenonde gotyove. Haʼe heʼi: “Ajepyʼapy ojejerurérõ g̃uarã chéve añemboʼe hag̃ua en púvliko, ameʼẽ hag̃ua diskúrso térã amoakã hag̃ua umi grúpo de predikasión”.

⁵ Hannah ningo peteĩ mitãkuña de 18 áño ndojeroviaiete vaʼekue ijehe. Ituakuéra Testígo vaʼekue haʼe imitãite guive, péro Hannah oñandu kuri ndovaleiha mbaʼeverã, ha upévare ndoikuaái ikatútapa oiko Jehová oipotaháicha. Haʼe sapyʼánte oñeñandu vaieterei voi ha oñepyrũ oñelastima, péro koʼã mbaʼe koʼýte omoñeñandu vai chupe. Hannah heʼi: “Namombeʼúi vaʼekue ni che tuakuérape umi mbaʼe ajapóva chejehe, ha aimoʼã kuri Jehová ndoipotamoʼãiha aservi chupe umi mbaʼe ajapóvare”.

6. ¿Mbaʼépa oimpedi kuri Vanéssape ojevautisa hag̃ua?

⁶ Ojapo iñamigokuéra oipotáva. Vanessa ningo oreko 22 áño, haʼe heʼi: “Areko vaʼekue peteĩ che amigaite aikuaáva haimete 10 áñoma”. Vanessa ningo ojevautisase kuri péro iñamíga ndoapojái chupe upe desisiónpe ha upéva hasyeterei Vanéssape. Haʼe heʼi: “Ijetuʼueterei chéve añeamiga hag̃ua ótra persónare, upéicha rupi ajepyʼapy opa reírõ g̃uarã la ore amista. Apensa voi arakaʼeve ndaikatumoʼãiha akonsegi peichagua che amigarã”.

7. ¿Mbaʼéguipa okyhyje vaʼekue peteĩ mitãkuña hérava Makayla, ha mbaʼérepa?

⁷ Okyhyje ofallárõ g̃uarã. Makayla oreko kuri 5 áño iñermáno ojexpulsárõ guare.  Okakuaávo ohóvo, ohecha mbaʼéichapa upe oiko vaʼekue oheja vaieterei ituakuérape. Upévare heʼi: “Akyhyje ajúramo g̃uarã apeka ajevautisa rire ha upéicha rupi ajexpulsa. Upéva ningo ombosufrivéta che tuakuérape”.

8. ¿Mbaʼéguipa okyhyje kuri peteĩ mitãrusu hérava Miles?

⁸ Okyhyje oĩramo g̃uarã oñemoĩva ikóntrape. Miles túa ha imadrástra oservi Jehovápe, péro isy nahániri. Miles heʼi: “Aiko kuri che sýndi 18 áñore ha akyhyje haʼe hag̃ua chupe ajevautisaseha. Chemanduʼa mbaʼeichaitépa ojagarra vai kuri che túagui oikórõ guare Testígo. Upévare akyhyje chemoprovlémarõ g̃uarã oikuaa rire la ajaposéva”.

9. ¿Mbaʼépa oikóta reaprendevévo rehóvo mbaʼeichaitépa Jehová nderayhu ha ipasiénsia?

⁹ Adán ha Eva ndohayhúi vaʼekue Jehovápe ipyʼaite guive, upévare odesidi ndoserviseiha chupe. Upéicharõ jepe, Jehová opermiti oiko are hikuái ikatu hag̃uáicha ifamília, ha upéi oheja odesidi ijeheguiete mbaʼéichapa omongakuaáta ifamiliakuérape. Péro tiémpo riremínte ojekuaáma mbaʼeichaitépa Adán ha Eva ivýro kuri oimoʼãrõ guare ikatutaha oiko porã Jehová reheʼỹ. Por ehémplo, pe ifamília ypykue ojuka iñermánope, ha kon el tiémpo ko yvy tuichakuére umi hénte ijehéntema opensa ha iviolentoiterei (Gén. 4:8; 6:11-13). Péro Jehová oikuaáma kuri mbaʼéichapa osalváta entéro Adán ha Eva familiare oservisévape chupe (Juan 6:38-40, 57, 58). Reaprendevévo rehóvo mbaʼéichapa Jehová ipasiénsia ha nderayhu, katuete rehayhuvéta chupe. Nderejaposemoʼãi avei Adán ha Eva ojapo haguéicha ha reñemeʼẽséta Jehovápe reservi hag̃ua chupe.

10. ¿Mbaʼéichapa Salmo 19:7 ikatu nepytyvõ reservi hag̃ua Jehovápe?

¹⁰ Esegi eaprendeve Jehovágui. Reikuaavévo rehóvo Jehovápe, reimevéta segúro ikatuha reservi porã chupe. Por ehémplo, Avery omombeʼu: “Añepyrũ ajeroviave chejehe alee ha ajepyʼamongeta rire la heʼívare Salmo 19:7” (elee). Avery oñepyrũ ohayhuve Jehovápe ohechárõ guare mbaʼéichapa haʼe okumpli pe Salmo heʼíva. Jahayhúramo Jehovápe  ndahaʼéi jajeroviavétanteva ñandejehe, síno ñanepytyvõta avei ñamotenonde hag̃ua Ñandejárape ha ñamboyke hag̃ua umi mbaʼe chupe ndogustáiva. Hannah, ñañeʼẽma hague iñepyrũme, heʼi: “Aleévo la Biblia ha ajapóvo che estúdio personál, ahechakuaa amoñeñandu vaiha Jehovápe káda ke ajapo chejehe álgo cheperhudikáva” (1 Ped. 5:7). Upévare Hannah oñepyrũ ojapo umi mbaʼe oaprendéva la Bíbliape (Sant. 1:22). ¿Mbaʼépa ohupyty upe haguére? Haʼe omombeʼu: “Ahechakuaa cheñeʼẽrendúramo Jehovápe siémpre asẽ porãtaha, ha upéva chemomýi ahayhuve hag̃ua chupe. Koʼág̃a aikuaa porã Jehová siémpre chepytyvõtaha aikotevẽ jave hese”. Tiémpo riremi, Hannah ndojapovéima ijehe la yma ojapo vaʼekue, ha oñemeʼẽ Jehovápe ha ojevautisa.

11. ¿Mbaʼéichapa Vanessa okonsegi kuri hetave iñamíga ha iñamigorã, ha mbaʼépa ñanemboʼe upéva?

¹¹ Eiporavo porã ne amigorã. Vanessa ohechakuaa kuri iñamíga káusare ndaikatuiha oservi Jehovápe, ha upéicha rupi ndojeheʼavéi hendive. Péro ndahaʼéi upévante, Vanessa oñehaʼãmbaite kuri avei otopa hag̃ua iñamíga ha iñamigorã kongregasiónpe. Noé ha ifamília ehémplo oipytyvõ kuri chupe. Vanessa heʼi: “Upérõ entéro umi hénte ndohayhúi vaʼekue Jehovápe, péicha rupi haʼekuéra ohasánte tiémpo oñondive”. Ojevautisa rire, Vanéssagui oiko prekursóra. Haʼe omombeʼu: “Pe prekursorádo chepytyvõ areko hag̃ua hetave amíga ha amígo, ndahaʼéi che kongregasiónpente síno avei umi ótro kongregasiónpe”. Nde avei ikatu ekonsegi ne amigorã rejapóramo ikatúva guive Jehová servísiope (Mat. 24:14).

12. ¿Mbaʼépa Adán ha Eva ndokyhyjéi kuri ojapo hag̃ua, ha mbaʼépa oiko upe haguére?

¹² Sólamente ekyhyje vaʼerã embopochy hag̃ua Jehovápe. Sapyʼánte ndaivaíri la jakyhyje. Por ehémplo, jakyhyje vaʼerã jajapórõ g̃uarã peteĩ mbaʼe ndogustáiva Jehovápe (Sal. 111:10). Adán ha Eva okyhyjérire ojapo hag̃ua upéva, nopuʼãi vaʼerãmoʼã kuri Jehová kóntrape. Péro ojapo rupi upéva, “ojesapeʼa hikuái” ha opilla porã oikóma hague chuguikuéra pekadór. Upe guive entéro ifamiliarégui oikóta  avei pekadór ha omanóta. Haʼekuéra ohechakuaáma la isituasión, upévare otĩ oĩ haguére opío ha oñepyrũ oñemoʼã hikuái (Gén. 3:7, 21).

13, 14. a) Ohechaukaháicha 1 Pedro 3:21, ¿mbaʼérepa natekotevẽi jakyhyjeterei ñamanóramo g̃uarã? b) ¿Mbaʼérepa ñande jahayhu Jehovápe?

¹³ Ñande ningo jakyhyje vaʼerã jafalláramo g̃uarã Jehovándi, péro natekotevẽi jakyhyjeterei ñamanóramo g̃uarã. Jehová ningo ojapo peteĩ mbaʼe ikatu hag̃uáicha jaiko pára siémpre. Upéicha rupi, jajúramo jepe japeka, Jehová katuete ñaneperdonáta, péro upearã ñañarrepenti vaʼerã ñande pyʼaite guive ha jajerovia Jesús sakrifísiore. ¿Mbaʼéichapa ikatu jahechauka jajeroviaha upe sakrifísiore? Prinsipálmente ñañemeʼẽvo Jehovápe ha jajevautisa (elee 1 Pedro 3:21).

¹⁴ Ñande ningo jareko hetaiterei rrasón jahayhu hag̃ua Jehovápe. Por ehémplo, káda día omeʼẽ ñandéve umi mbaʼe ñaikotevẽva, ha hiʼarive ñanemboʼe mbaʼeichagua persónapa haʼe ha umi mbaʼe ojapótava (Juan 8:31, 32). Omeʼẽ avei ñandéve pe kongregasión ikatu hag̃uáicha ñandegia ha oñangareko ñanderehe. Ñandejára ñanepytyvõ avei ñaaguanta hag̃ua umi provléma jahasáva, ha omeʼẽ ñandéve esperánsa jaiko hag̃ua pára siémpre pe múndo pyahúpe (Sal. 68:19; Apoc. 21:3, 4). Ñapensávo umi mbaʼe Jehová ojapo vaʼekuére ñanderehehápe ha mbaʼeichaitépa ñanderayhu, jajúta jahayhuve chupe. Ha jahayhúramo Jehovápe, jakyhyjéta ñambopochy hag̃ua chupe pórke katuete ndajaipotamoʼãi haʼe oñeñandu vai.

15. ¿Mbaʼépa oipytyvõ Makáylape anivéma hag̃ua okyhyje ofallárõ g̃uarã?

¹⁵ Makayla ontende kuri natekotevẽiha okyhyje ofallárõ g̃uarã pórke ohechakuaa mbaʼeichaitépa Jehová oporoperdonakuaa. Haʼe omombeʼu: “Entéro ningo ñaneimperfékto ha jajavy jepi. Péro ahechakuaa Jehová ñanderayhuetereiha ha katuete ñaneperdonataha jajeroviáramo Jesús sakrifísiore”. Makayla ohayhueterei rupi Jehovápe ou oñemeʼẽ chupe ha ojevautisa.

16. ¿Mbaʼépa oipytyvõ Mílespe anivéma hag̃ua okyhyje oĩramo g̃uarã oñemoĩva ikóntrape?

¹⁶ Miles ningo okyhyje kuri heʼi hag̃ua isýpe ojevautisaseha pórke ndoipotái orreaksiona vai. Upémarõ oporandu peteĩ superintendénte de sirkuítope mbaʼépa ikatu ojapo. Miles omombeʼu: “Pe ermáno sy ningo ndahaʼéi vaʼekue avei Testígo. Upévare chepytyvõ aikuaa hag̃ua mbaʼéichapa ikatu aexplika che sýpe ndahaʼeiha papa la chejopýva ajevautisa hag̃ua, síno chete voi ajaposeha upéva”. Péro lomímonte isýpe ndogustaiete la heʼíva. Amo ipahápe, Miles tekotevẽ kuri oho hógagui ikatu hag̃uáicha ojapo pe odesidi vaʼekue. Haʼe heʼi: “Aaprendévo entéro umi mbaʼe porã Jehová ojapo vaʼekue cherehehápe, upéva opokoiterei cherehe. Ajepyʼamongetávo pe Jesús sakrifísiore, ahechakuaa mbaʼeichaite pevépa Jehová cherayhu, ha upéva chemomýi añemeʼẽ hag̃ua chupe ha ajevautisa”.

17. ¿Mbaʼépa ñande ikatu jahechauka?

¹⁷ Oĩrõ guare pe hardín de Edénpe, Eva ou kuri opuʼã Itúare hoʼúrõ guare pe yva. Adán ojapo avei upéva ha ohechauka ndovaloraiha umi mbaʼe porã Jehová ojapo vaʼekue hesehápe. Péro ñande ikatu jahechauka ndajajoguaiha chupekuéra, pórke jaagradese la Jehová ojapóva ñanderehehápe. Jajevautisávo jahechauka ñaimeha segúro Jehová añoite ikatuha heʼi ñandéve mbaʼépa oĩ porã ha mbaʼépa oĩ vai. Upéicha jahechauka jahayhu ha jajeroviaha ñande Túare.

18. ¿Mbaʼe mbaʼépa rejapo vaʼerã reservi porã hag̃ua Jehovápe?

¹⁸ Jajevautisa rire, ñañehaʼãmbaite vaʼerã káda día jaiko Jehová oipotaháicha, ndahaʼéi ñandévente ñandegustaháicha. Hetaiterei Jehová siérvo ojapóma hína upéva, ha nde ikatu avei reĩ ijapytepekuéra. Upearã resegi vaʼerã reaprende mbaʼépa omboʼe la Biblia, ejeheʼa meme ermanokuérare ha kyreʼỹme emombeʼu ótrope umi mbaʼe reaprendéva Ñandejára nderayhuetévagui (Heb. 10:24, 25). Redesidíta jave peteĩ mbaʼe katu, ehecha vaʼerã mbaʼe konséhopa Ñandejára omeʼẽ la Biblia ha iñorganisasión rupive (Is. 30:21). Upéicha entéro mbaʼe rejapóva katuete osẽ porãta (Prov. 16:3, 20).

19. ¿Mbaʼépa rehechakuaa vaʼerã, ha mbaʼérepa?

¹⁹ Rehechakuaáramo mbaʼéichapa ideprovécho ndéve resegíramo Jehová gía, katuete rehayhuvéta chupe ha umi mbaʼe haʼe heʼíva. Ha Satanás oñehaʼãmbaitéramo jepe nemomombyry Jehovágui, núnka nokonsegimoʼãi upéva. Eñeimahinamína koʼágui mil áñope, repensa vove pe día rejevautisa haguépe katuete eréta: “¡Ajépa adesidi porãite raʼe!”.