Rehoboam túa ningo Salomón. Haʼe ogoverna vaʼekue Israel 40 áñore (1 Rey. 11:42). Itúa omano rire, Rehoboam oho Jerusaléngui Siquem peve oiko hag̃ua chugui rréi (2 Crón. 10:1). ¿Okyhyje piko raʼe Rehoboam oikóta haguére chugui rréi? Haʼe ningo opyta kuri itúa rendaguépe, ha Salomónpe ojekuaa vaʼekue opárupi iñarandueterei rupi. Upe riremíntema oñepresenta peteĩ provléma tekotevẽtahápe Rehoboam ohechauka iñarandúpa añete osolusiona hag̃ua upe situasión.

Pe goviérno ojopyeterei kuri pe puévlope, upévare umi israelita omondo Rehoboam rendápe unos kuánto kuimbaʼépe oñeʼẽ hag̃ua pe puévlo rérape. Haʼekuéra heʼi chupe: “Nde túa ojopyeterei vaʼekue orendive. Péro nde rembovevyivéramo oréve pe traváho nde túa omeʼẽ vaʼekue oréve ha pe kárga pohýi omoĩ vaʼekue ore ári, upéicharõ ore roñemoĩta nde poguýpe” (2 Crón. 10:3, 4).

Rehoboam odesidi vaʼerã kuri peteĩ mbaʼe ijetuʼúva. Ojapótaramo umi hénte oipotáva, haʼe, hogayguakuéra ha umi oĩva pe palásiope ndaikatumoʼãvéima orekopaite umi lúho ojepokuaáva oreko. Péro Rehoboam ndoaseptáiramo la ojeruréva umi hénte, pe puévlo opuʼãta hese. ¿Mbaʼépa ojapóta? Ñepyrũrã oñeʼẽ umi ijedávandi. Koʼã kuimbaʼe ningo itúa konsehéro vaʼekue, ha heʼi chupe ohendu hag̃ua pe puévlope. Upéi Rehoboam oñeʼẽ avei umi ijaveguándi, ha ipahápe odesidi ojapo umi kuimbaʼe imitãvéva oakonseháva chupe. Haʼe heʼi pe puévlope: “Che amoĩta yugo pohýi pende ári ha ajopyvéta penendive. Che túa pendekastiga vaʼekue harreadórpe, che katu pokastiga vaivéta, pombyepotíta umi harreadór orekóvape mbaʼe akua ipúntare” (2 Crón. 10:6-14).

¿Mbaʼépa ikatu ñaaprende ko ehémplogui? Ohechauka heta vése iporãveha ñahendu umi ijedávape, iñakãguapýva espirituálmente. Haʼekuéra ningo heta mbaʼéma ohasa ha oikuaa mbaʼépepa opáta umi mbaʼe jadesidíva. Upévare ikatu omeʼẽ ñandéve umi konsého ñanepytyvõ porãvétava (Job 12:12).

Rehoboam ombyaty ijehérsitope oñorairõ hag̃ua umi trívu opuʼãvandi hese. Péro Jehová omondo iproféta Semáyape ha heʼi chupekuéra: “Peẽ ndapehói vaʼerã peñorairõ pene ermanokuéra israelita kóntrape. Káda uno peho jey vaʼerã pende rógape, pórke che voi aheja kuri oiko koʼã mbaʼe” (1 Rey. 12:21-24). *

¿Ifásilpa raʼe Rehoboámpe iñeʼẽrendu hag̃ua Jehovápe? ¿Mbaʼépa pe puévlo opensáta upe rréi pyahúre opyrũramo iñeʼẽre? Ñepyrũrã ningo haʼe heʼi kuri ombyepotitaha chupekuéra “umi harreadór orekóvape mbaʼe akua ipúntare”, péro upéi ndojapói jey mbaʼeve umi opuʼãvare hese (embojoja 2 Crónicas 13:7 rehe). Amo ipahápe Rehoboam “iñeʼẽrendu Jehovápe ha oho jeýnte hógape, Jehová heʼi haguéicha chupekuéra”.

¿Mbaʼépa ikatu ñaaprende pe oiko vaʼekuégui? Siémpre iporãiteve ñaneñeʼẽrendu Ñandejárape umi hénte oñembohorýramo jepe. Haʼe katuete ñanevendesíta jajapóramo la oipotáva (Deut. 28:2).

¿Mbaʼépa oiko Rehoboámgui? Haʼe osegi kuri ogoverna Judá ha Benjamín trívu, ha odesidi omopuʼã iterritóriope unas kuánta siuda ipyahúva. Avei omombareteve unas kuánta siuda oĩmava voi, “tuichaiterei voi omombareteve umi siuda” (2 Crón. 11:5-12) La iporãveha, peteĩ tiémpore iñeʼẽrendu kuri Jehovápe. Pe rréino de 10 trívu oñepyrũrõ guare oadora umi ñandejára guaʼúpe, heta persóna umi territoriogua oviaha Jerusalénpe oapoja hag̃ua Rehoboámpe ha pe adorasión añeteguáva (2 Crón. 11:16, 17). Upéicharõ, Rehoboam iñeʼẽrendu rupi Jehovápe omombareteve igoviérno.

Rehoboam rréino imbareteve jave, haʼe ojere ojapo peteĩ mbaʼe oñehaʼarõʼỹva. Ou naiñeʼẽrenduvéi Jehovápe ha oñepyrũ omombaʼeguasu umi ñandejára guaʼúpe. ¿Mbaʼérepa ojapo upéva? Isy ningo ndahaʼéi vaʼekue israelita, síno ammonita (1 Rey. 14:21). ¿Noiméi piko isy raʼe omboliga chupe ojapo hag̃ua koʼã mbaʼe? Ndajaikuaái upéva, péro pe puévlo osegi pe mal ehémplo. Upévare Jehová oheja pe rréi Sisac de Egipto ojagarra heta siuda oĩva pe rréino de Judápe, jepe Rehoboam omombarete kuri umi lugár (1 Rey. 14:22-24; 2 Crón. 12:1-4).

Upe situasión ivaivéntema Sisac ha ijehérsito oavansárõ guare oataka hag̃ua Jerusalén, oĩháme Rehoboam. Upe moméntope, pe proféta Semaya omeʼẽ Rehoboam ha iprinsipekuérape peteĩ mensáhe oúva Jehovágui. Haʼe heʼi: “Peẽ ningo pechereja, upévare che poheja reíta avei rréi Sisac poguýpe”. ¿Mbaʼéichapa orreaksiona Rehoboam? Haʼe orreaksiona porãiterei kuri. La Biblia heʼi: “Pe rréi ha umi prínsipe de Israel oñembyasy Ñandejára renondépe ha heʼi: ‘Jehová ihustoiterei’”. Upévare Ñandejára osalva Rehoboámpe, ha Jerusalén noñehundíri (2 Crón. 12:5-7, 12).

Upe rire, Rehoboam osegi ogoverna umi mokõi trívu oĩva sur gotyo. Haʼe omano mboyve, omeʼẽ heta rregálo itaʼyrakuérape. Oiméne ojapo upéva ani hag̃ua opuʼã hikuái itaʼýra Abías kóntrape, pórke haʼe opytáta kuri Rehoboam rendaguépe kómo rréi (2 Crón. 11:21-23). Jahechaháicha, umi mbaʼe Rehoboam ojapóvare jaʼekuaa iñaranduveha imitãve tiémpope guarégui.

Oiméramo jepe Rehoboam ojapo mimi la iporãva, la Biblia heʼi hese: “Haʼe ojapo ivaíva” ¿Mbaʼérepa ojeʼe péicha hese? “Pórke ndojedesidíri ipyʼaite guive ojapo Jehová rembipota”. Upévare Jehová ndoguerohorýi chupe (2 Crón. 12:14).

¿Mbaʼépa ikatu ñaaprende Rehoboam rembiasakuégui? Peteĩ tiémpore ningo haʼe iñeʼẽrendu vaʼekue Jehovápe. Avei ojapo mimi la iporãva pe puévlo rehehápe. Péro Rehoboam ndahaʼéi vaʼekue Jehová amígo ha ndojapói ipyʼaite guive la ogustáva chupe. Upéicha rupi ndojapomeméi la iporãva ha omombaʼeguasu avei umi ñandejára  guaʼúpe. Upéva ñanemopensa mbaʼépa omomýine raʼe chupe iñeʼẽrendu hag̃ua Jehovápe. ¿Ojapópa upéva oñembyasy añetégui hembiapo vaikuére ha ojaposégui Ñandejárape ogustáva? ¿Térãpa ojapo la iporãva oñemboligáguinte chupe? (2 Crón. 11:3, 4; 12:6). Tiémpo rire Rehoboam ojapo jey kuri la ivaíva. Ndojoguaiete ijavuélo Davídpe. David ningo ofalláramo jepe, upéi oñembyasy ipyʼaite guive hembiapo vaikuére. Haʼe ohayhu Jehovápe ha oadora chupe omano meve (1 Rey. 14:8; Sal. 51:1, 17; 63:1).

¿Mbaʼépa ikatu ñaaprendeve ko rreláto bíblicogui? Iñimportánte ningo ñameʼẽ ñane famíliape hemikotevẽ ha ñambaʼapo jejopy Jehová servísiope. Péro ndahaʼéi upévante la jajapo vaʼerã. Jaipotáramo Ñandejára ñandeguerohory, jaadora vaʼerã chupe haʼe oipotaháicha ha ñañehaʼã ñañemoag̃uive hese.

Jahupyty hag̃ua upéva, tekotevẽ jahayhu Jehovápe ñande pyʼaite guive. Ñapensamína: ñamoĩ chupe jajatapyha hína, ¿mbaʼépa jajapo vaʼerã hendy porãve hag̃ua ñande rata? Tekotevẽ ñahatapyña. Péicha avei, jastudia meme vaʼerã Ñandejára Ñeʼẽ jahayhuve hag̃ua chupe. Avei jajepyʼamongeta vaʼerã umi mbaʼe ñaaprendévagui Iñeʼẽme ha ñañemboʼe meme Jehovápe (Sal. 1:2; Rom. 12:12). Amáske jahayhu Ñandejárape jajaposéta avei entéro mbaʼe haʼe oipotaháicha, ñañembyasýta ñande pyʼaite guive jafalla jave ha jajeruréta chupe tañaneperdona. Péicha ndajajoguamoʼãi Rehoboámpe, pórke jasegíta ñandefiél Jehovápe (Jud. 20, 21).