1. ¿Mbaʼe kámbiopa oiko ojapo unos kuánto áño?

HETAITEREI áñore la majoría umi hénte oĩva ko múndope oreko vaʼekue irrelihión. Péro ojapo unos kuánto áño oiko hague peteĩ kámbio tuichaitereíva. Koʼág̃arupi heta hetave oĩ umi heʼíva ijehe ndairrelihiosoiha. * Añetehápe oĩ voi umi país la majoría umi hénte heʼihápe ijehe ndorekoiha peteĩ rrelihión * (Mat. 24:12).

2. ¿Mbaʼérepa heta hetave hénte heʼi ijehe ndairrelihiosoiha?

² ¿Mbaʼérepa heta hetave hénte heʼi ijehe ndairrelihiosoiha? Oĩ umi oikóva vyʼarã rapykuéri térã ojepyʼapyetereíva iprovlémare, ha upévare hesarái Ñandejáragui (Luc. 8:14). Ótro katu ymave oreko vaʼekue irrelihión péro upéi ou oiko chuguikuéra atéo. Oĩ avei ogueroviáva Ñandejára oexistiha péro heʼi pe rrelihión ohasáma hague de móda, vyroreiha, naisentidoiha térã okontradesiha la siénsia heʼíva. Haʼekuéra oiméne ohendu iñamígo, umi profesór térã umi ifamósova heʼiha la vída oñepyrũ hague pe evolusión rupive, péro oiméne nohenduguasúiva hikuái mbaʼérepa ikatu oguerovia Ñandejára oexistiha. Ha oĩ umi ndoikuaaséiva mbaʼeve rrelihióngui pórke heta omoakãva rrelihión omandasénte ha iplatapota. Avei oĩ umi lugár pe goviérno omoĩháme umi léi heʼíva mbaʼe mbaʼépa ndojapói vaʼerã umi rrelihión.

3. ¿Mbaʼéichapa ñanepytyvõta ko artíkulo?

³ Jesús ningo omanda vaʼekue ‘jaha hag̃ua ñamboʼe umi hénte opa tetãyguápe oiko hag̃ua chuguikuéra idisípulo’ (Mat. 28:19). ¿Mbaʼéichapa ikatu ñaipytyvõ umi ndorekóivape rrelihión ohayhu hag̃ua Ñandejárape, ha oiko hag̃ua chuguikuéra Jesús disípulo? Jahechakuaa vaʼerã pe lugár okakuaa hague peteĩ persóna oafektaha  mbaʼéichapa haʼe orresponde japredika jave chupe. Por ehémplo, umi europeo orresponde lája japredika jave chupekuéra idiferénte umi asiáticogui. ¿Mbaʼérepa? Európape heta hénte oikuaa michĩmi jepe la Bíbliagui, ha ohendúma ojeʼeha Ñandejára ojapo hague entéro mbaʼe. Péro Ásiape la majoría umi hénte ndoikuaái mbaʼeve la Bíbliagui térã saʼieterei oikuaa, ha oĩ voi umi ndogueroviáiva oexistiha peteĩ Apohare. Ko artíkulo ñanepytyvõta ñag̃uahẽ hag̃ua umi hénte korasõme japredika jave, tahaʼe haʼéva upe ogueroviáva térã moõguápa hikuái.

4. ¿Mbaʼérepa ñandepositívo vaʼerã?

⁴ Ñandepositívokena. Káda áño oiko testígo de Jehová hetaiterei umi hénte ndorekói vaʼekuégui rrelihión. Umíva apytépe oĩ umi hekoporãma vaʼekue voi ha ndogustáiva chupe umi rrelihión oĩ rupi ijapytepekuéra heta hovamokõiva. Ótro katu ndahekoporãi vaʼekue ha oheja vaʼerã heta mbaʼe vai anteve ojapo vaʼekue. Upévare ikatu ñaime segúro, Jehová ñanepytyvõ rupi ikatutaha jatopa umi ‘oñehaʼãvare ohupyty jeikove opaveʼỹva’ (Hech. 13:48; 1 Tim. 2:3, 4).

5. ¿Mbaʼépa ikatu ñanepytyvõ umi hénte orresponde porãve hag̃ua japredika jave chupekuéra?

⁵ Ñanderory ha ñanderrespetuósokena. Japredika jave, heta vése umi hénte orresponde porãve jepi ndahaʼéi katuete umi mbaʼe jaʼévare, síno upe jaʼe lájare. Haʼekuéra omombaʼe jepi ñanderory, ñanderrespetuóso ha jahechaukáramo añetehápe ñañeinteresaha hesekuéra. Ñande ningo ndajaovligái umi héntepe ohendu hag̃ua la jaʼéva. Upéva rangue, ñañehaʼã ñantende mbaʼérepa nointeresái chupekuéra umi rrelihión. Por ehémplo, algúno noñemongetaséi rrelihiónre umi extráñondi, ótro katu opensa imaledukadoha peteĩ persóna oporandúramo ótrope mbaʼépa opensa Ñandejárare. Ha oĩ avei umi otĩva ojehechárõ g̃uarã chupekuéra oleeha hína la Biblia, koʼýte peteĩ testígo de Jehovándi. Tahaʼe haʼeháicha, ñande ñañehaʼã vaʼerã jarrespeta haʼekuéra oñandúva (2 Tim. 2:24).

6. ¿Mbaʼéichapa apóstol Pablo ohechauka ojadapta hague umi héntere, ha mbaʼéichapa ikatu jasegi iñehémplo?

⁶ ¿Mbaʼépa ikatu jajapo algúnope ndogustáiramo jaipuru umi palávra “la Biblia”, “Ñandejára” térã “rrelihión”? Ikatu jasegi apóstol Pablo ehémplo ha ñakambia umi palávra jaipurúva. Oñeʼẽrõ guare umi judíondi, Pablo oipuru vaʼekue Ñandejára Ñeʼẽ, péro oñeʼẽrõ guare umi filósofo griégondi pe Areópagope, haʼe ndeʼíri oguenohẽha Ñandejára Ñeʼẽgui umi mbaʼe heʼíva chupekuéra (Hech. 17:2, 3, 22-31). ¿Mbaʼéichapa ikatu jasegi apóstol Pablo ehémplo? Jatopáramo peteĩ persóna ndojeroviáiva la Bíbliare, iporãvéta ndajaʼéiramo chupe jaipuruha hína la Biblia ñañeʼẽ hag̃ua hendive. Ñapensáramo upe persóna otĩtaha ojehecháramo chupe oleeha la Biblia ñanendive, upéicharõ iporãvéta jaleéramo umi téxto ojepillaʼỹ hag̃uáicha, upearã por ehémplo ikatu jaipuru selulár térã távlet.

7. Heʼiháicha 1 Corintios 9:20-23, ¿mbaʼépa tekotevẽ jajapo jasegi hag̃ua Pablo ehémplo?

⁷ Ñahendukuaákena ha ñantende umi héntepe. Ñañehaʼã vaʼerã ñantende mbaʼépa opensa umi hénte ha mbaʼérepa (Prov. 20:5). Jahechami jeýna Pablo ehémplo. Haʼe okakuaa vaʼekue judiokuéra apytépe, péro ojadaptámante opredika hag̃ua umi ndahaʼéivape judío, pórke haʼekuéra ndoikuaaguasúi heta mbaʼe Ñandejára Ñeʼẽgui ni Jehovágui, térã katu ndoikuaaiete voi. ¿Mbaʼépa ikatu jajapo ñantende hag̃ua mbaʼéichapa opensa ha oñeñandu umi hénte ñande territoriopegua, ha mbaʼéichapa ikatu ñañemoĩ ilugarpekuéra? Tekotevẽta ñainvestigaʼimi térã ñaporandu umi ermáno iñexperiensiavévape (elee 1 Corintios 9:20-23).

8. ¿Mbaʼéichapa ikatu ñañepyrũ ñañemongeta umi héntendi la Bíbliare?

⁸ Ñande ningo jatopase umi ‘omeresévape ohendu’ pe mensáhe jagueraháva (Mat. 10:11). Upearã ñaporandu vaʼerã umi héntepe mbaʼépa opensa ha jajapysaka porã hesekuéra. Peteĩ  ermáno oikóva Inglatérrape oporandu umi héntepe mbaʼépa ikatu oipytyvõ umi omendávape ovyʼa hag̃ua, mbaʼéichapa oñehekomboʼe vaʼerã umi mitãme osẽ porã hag̃ua hikuái, térã mbaʼéichapa ikatu ñambohovái umi inhustísia. Ohendu porã rire pe persóna heʼíva, pe ermáno oporandu chupekuéra: “¿Mbaʼépa repensa ko konsého ojeskrivi vaʼekuére haimete 2.000 áñoma?”. Upéi, oipuruʼỹre pe palávra “la Biblia”, haʼe ohechauka chupekuéra iselulárpe umi téxto oiporavo porã vaʼekue.

9. ¿Mbaʼéichapa ikatu ñaipytyvõ umi persóna noñeʼẽseguasúivape Ñandejárare?

⁹ Jatopáramo peteĩ persóna noñeʼẽseguasúiva Ñandejárare, ikatu ñag̃uahẽ ikorasõme ñañeʼẽramo chupe umi mbaʼe ogustávare chupe. Por ehémplo, oĩ umi omombaʼetereíva pe naturalésa. Upéicharõ ikatu jaʼe chupe: “Oime vaʼerã nde reikuaa umi sientífiko ojapo jave peteĩ mbaʼe pyahu, okopiaha jepi umi mbaʼe oĩmava voi pe naturalésape. Por ehémplo, umi ojapóva mikrófono oinvestiga mbaʼéichapa ofunsiona umi vichoʼi apysa, ha umi ojapóva kámara oinvestiga mbaʼéichapa ofunsiona umi vichoʼi resa. ¿Mbaʼépa nde repensa pe naturalésare? ¿Ndépa ere oaparese hague ijehegui reínte térãpa álgien ojapo hague?”. Ñahendu porã rire chupe, jaʼekuaa: “Péro ikatu avei ñañeporandu: ¿Mávaguipa añetehápe oaprende umi inheniéro oinvestiga jave mbaʼéichapa ofunsiona umi vichoʼi resa térã apysa? Che ahechakuaa iñinteresantetereiha peteĩ poéta yma guare oskrivi vaʼekue: ‘¿Mbaʼéicha piko nohendumoʼãi mbaʼeve upe ojapo vaʼekue ñande apysa? ¿Mbaʼéicha piko ndohechamoʼãi la oikóva, si haʼe voi ojapo ñande resa? Haʼe hína pe omboʼéva umi héntepe’. Oĩ ningo sientífiko opensáva avei ko poétaicha” (Sal. 94:9, 10). Upéi jaike JW Líbrarype, ha jahechauka chupe peteĩva umi vidéo oĩva upépe (eike heʼihápe MULTIMEDIA > ENTREVISTAS Y EXPERIENCIAS > OPINIONES SOBRE EL ORIGEN DE LA VIDA). Térã ikatu jaofrese chupe pe folléto ¿Es la vida obra de un Creador? térã pe ótro folléto El origen de la vida. Cinco cuestiones dignas de análisis.

10. ¿Mbaʼéichapa avei ikatu ñañepyrũ ñañemongeta umi noñeʼẽséivandi Ñandejárare?

¹⁰ Heta héntepe g̃uarã ningo hiʼãiterei oiko porãve amo gotyove. Péro oĩ avei umi okyhyjéva oñehundírõ g̃uarã ko yvy, térã ndaikatuvéirõ g̃uarã ojeiko pype. Peteĩ superintendénte de sirkuíto oĩva Noruégape heʼi umi hénte noñeʼẽséiva Ñandejárare, pyʼỹinte oñeʼẽseve jepi umi situasión oĩvare ko múndope. Upévare osaluda rire umi héntepe, haʼe heʼi: “¿Ndéverõ g̃uarã, mávapa ikatu omeʼẽ ñandéve peteĩ futúro iporãvéva? ¿Ndépa ere umi polítiko, sientífiko, térãpa ótro?”. Ohendu porã rire chupekuéra, pe ermáno olee térã heʼi de memória peteĩ téxto bíblico  omombeʼúva koʼẽrõite jaiko porãvetaha. Oĩ umi ohecharamoitereíva la Biblia oprometeha ko yvy noñehundimoʼãiha ha umi hénte ivuénova oikotaha pype pára siémpre (Sal. 37:29; Ecl. 1:4).

11. a) ¿Mbaʼérepa ñakambia mimi vaʼerã mbaʼéichapa japredika umi héntepe? b) ¿Mbaʼéichapa ikatu jasegi Pablo ehémplo ohechaukaháicha Romanos 1:14-16?

¹¹ Iporãta ningo ñakambia mimi jepi mbaʼéichapa japredika asegún umi hénte ñañeʼẽvandi. ¿Mbaʼérepa? Pórke káda persóna ningo idiferénte. Upe ointeresáva peteĩ persónape ikatu hína ndogustaiete ótrope. Oĩ voi umi naiprovlémaiva oñeʼẽ hag̃ua Ñandejárare térã la Bíbliare, péro oĩ avei umi oñemongetáva ñanendive ñañeʼẽ raẽramo chupekuéra ótra kósare. Tahaʼe haʼéva pe situasión, ñande jaaprovecha vaʼerã entéro oportunida ñañeʼẽ hag̃ua opaichagua persónandi (elee Romanos 1:14-16). Siémprekena ñanemanduʼa Jehová haʼeha upe omongakuaáva umi hénte ipyʼaporãva korasõme umi mbaʼe oaprendéva la Bíbliagui (1 Cor. 3:6, 7).

12. ¿Mbaʼépa ikatu jajapo ñaipytyvõ hag̃ua umi asiáticope nopensáiva oimépa oexisti peteĩ Apohare?

¹² Ko múndo tuichakuére oĩ heta ermáno ojuhúva predikasiónpe umi persóna ou vaʼekue Ásiagui. Umíva apytépe, oĩ oiko vaʼekue umi lugár pe goviérno omoĩháme léi heʼíva mbaʼe mbaʼépa ndojapói vaʼerã umi rrelihión. Unos kuánto país asiáticope, hetaiterei hénte arakaʼeve nopensáiva oimépa oexisti peteĩ Apohare. Oĩ umi persóna ikuriósova ha oaseptáva peteĩ estúdio bíblico ojeofrese jave chupe. Péro oĩ avei umi odudáva oaprende hag̃ua umi enseñánsa ipyahúva. ¿Mbaʼéichapa ikatu japredika chupekuéra? Umi puvlikadór ikatupyrýva ohechakuaa iporãveha oñeʼẽ raẽramo pe persónandi ótra kósare, ha ohechauka oipytyvõseha chupe. Upéi opyta porã vove, omombeʼu chupe mbaʼéichapa haʼekuéra oñepyrũ oiko porãve omoĩrõ guare en práktika peteĩ konsého oĩva la Bíbliape.

13. ¿Mbaʼépa ikatu oipytyvõ la héntepe oñepyrũ hag̃ua oñeinteresa la Bíbliare? (Ehecha pe taʼanga oĩva ko rrevísta apére).

¹³ Heta hénte oñepyrũ oñeinteresa la Bíbliare oreko rupi umi konsého ideprovechoitereíva ñande rekovépe g̃uarã (Ecl. 7:12). Nueva Yórkpe, peteĩ ermána ovisitáva umi oñeʼẽvape chino mandarín, omombeʼu: “Che añehaʼã ahechauka añeinteresaha umi héntere ha ahendu chupekuéra. Aikuaárõ algúno ova ramónte hague ótro paísgui, aporandu chupe: ‘¿Mbaʼeteko reho hese hína? ¿Retopáma piko nde travahorã? ¿Mbaʼéichapa ndetrata hína umi hénte koʼapegua?’”. Sapyʼánte upéva oipytyvõ pe ermánape oñepyrũ hag̃ua oñemongeta la Biblia omboʼévare. Opyta porã vove haʼe heʼive: “¿Mbaʼépa nde ere iñimportanteha jajapo jajogueraha porã hag̃ua umi héntendi? ¿Ikatúpa ahechauka ndéve peteĩ konsého iporãva oĩva la Bíbliape? Upépe heʼi: ‘Umi oikóva omoñepyrũ pléito haʼete oipeʼáva pe varréra ojokóva umi y. Repilláramo ojeiko vaitaha, upe mboyve rehóma vaʼerã upégui’. ¿Ndépa ere ko konsého ikatuha ñanepytyvõ jajogueraha porã hag̃ua ñande rapichándi?” (Prov. 17:14). Péicha ñañemongetárõ umi héntendi, ikatúta jahechakuaa mávapa oipotáta jasegi javisita chupe.

14. ¿Mbaʼéichapa peteĩ ermáno oikóva peteĩ país asiáticope oipytyvõ umi heʼívape ndogueroviaiha Ñandejára oexistiha?

¹⁴ ¿Mbaʼépa ikatu jaʼe umi heʼívape ndogueroviaiha Ñandejára oexistiha? Peteĩ ermáno oikóva peteĩ país asiáticope opredikáma heta tiémpore umi persóna ndairrelihiósoivape. Haʼe omombeʼu: “Koʼápe umi hénte heʼi jave Ñandejára ndoexistiriha, heʼise jepi opensaha natekotevẽiha ojeadora umi dios oadoráva la majoría umi hénte koʼapegua. Upévare haʼe jepi chupekuéra che avei apensaha la majoría umi dios ndoexistiriha, ha la héntente ojapo hague umíva umi dios. Che alee jepi chupekuéra Jeremías 16:20, heʼíva: ‘¿Ikatu piko peteĩ kuimbaʼe ojapo umi idiosrã? Umi dios haʼe ojapóva ningo ndahaʼeiete voi hína dios’. Upéi aporandu chupekuéra:  ‘¿Mbaʼéicha piko ikatu jaikuaa mávapa hína pe dios añetehápe oexistíva ha mávapa hína umi kuimbaʼekuérante ojapo vaʼekue?’. Ahendu porã mbaʼépa opensa hikuái ha upéi alee chupekuéra Isaías 41:23, heʼihápe: ‘Pejéna mbaʼe mbaʼépa oikóta tenonderãme, péicha ojekuaáta peẽpa dios añetehápe’. Upéi ahechauka chupekuéra mbaʼéichapa oñekumplíma raʼe peteĩ mbaʼe Jehová oprofetisa vaʼekue”.

15. ¿Mbaʼépa ñaaprende peteĩ ermáno oikóvagui avei Ásiape?

¹⁵ Ótro ermáno oikóva avei Ásiape omombeʼu mbaʼéichapa ojapo jepi rrevisíta. Haʼe heʼi: “Ahechauka umi héntepe mbaʼéichapa la Biblia omeʼẽ umi konsého porã, oñekumpli umi profesía oĩva pype, ha oĩha umi léi ogovernáva umi estrélla, planéta ha opa mbaʼe oĩva ko univérsope. Upéi ahechauka chupekuéra entéro koʼã mbaʼe ohechaukaha oĩha peteĩ Apohare iñaranduetereíva. Pe persóna oñepyrũ jave opensa ikatúne hag̃ua oexisti Ñandejára, upépe añepyrũ ahechauka chupe mbaʼépa heʼi la Biblia Jehováre”.

16. Heʼiháicha Hebreos 11:6, ¿mbaʼérepa umi estudiánte ojerovia vaʼerã Ñandejárare ha la Bíbliare, ha mbaʼéichapa ikatu ñaipytyvõ chupekuéra upearã?

¹⁶ Jastudia jave la Biblia umi persóna ndairrelihiósoivandi, tekotevẽ ñaipytyvõ meme chupekuéra ojerovia hag̃ua Ñandejára oexistiha (elee Hebreos 11:6). Avei ñaipytyvõ vaʼerã chupekuéra ojerovia hag̃ua la Biblia heʼívare. Upearã sapyʼánte tekotevẽta jarrepeti heta vése umi mbaʼe ñamboʼéva. Káda estúdiope ikatu voi ñaanalisa umi pruéva ohechaukáva la Biblia añetehápe haʼeha Ñandejára Ñeʼẽ. Por ehémplo, ikatu jahecha umi profesía oñekumplíma vaʼekue, mbaʼéichapa la Biblia ndojoavýi pe siénsia ha pe istória ndive, térã umi konsého ideprovechoitereíva oĩva pype.

17. ¿Mbaʼépa jahupytýta jahechaukáramo jahayhuha umi héntepe?

¹⁷ Ñande jahayhu rupi umi héntepe ñaipytyvõ hína chupekuéra oiko hag̃ua Cristo disípuloramo, tahaʼe umi irrelihiósovape térã umi ndahaʼéivape (1 Cor. 13:1). Ñamboʼe jave chupekuéra, ñande jaipota haʼekuéra oikuaa Ñandejára ñanderayhuha ha oipotaha avei jahayhu chupe. Káda áño, hetaiterei hénte anteve noñeinteresaguasúi vaʼekue térã ndoikuaaséi vaʼekue mbaʼeve pe rrelihióngui, ou ohayhu Jehovápe ha ojevautisa. Upévare ñandepositívo vaʼerã ha jahechauka jahayhu ha ñañeinteresaha opaichagua persónare. Ñahendúkena umi héntepe ha ñañehaʼã ñantende mbaʼépa opensa hikuái ha mbaʼérepa. Jahechaukákena chupekuéra ñane ehémplo rupive mbaʼéichapa ikatu oiko chuguikuéra Cristo disípulo.