1, 2. ¿Mbaʼérepa Pablo oskrivi vaʼekue pe kárta hérava Hebreos?

ÁÑO 61-pe, umi kristiáno oĩ vaʼekue Judéare oiko pyʼaguapýpe. Upérõ apóstol Pablo oĩ kuri préso Rómape, péro opensa ojepoi potaitemaha chugui. Timoteo, omoirũva jepi chupe iviáhepe katu, osẽ ramoite kárselgui. Mokõivéva oplanea ovisita oñondive umi ermáno oikóvape Judéape (Heb. 13:23). Péro pe situasión tuicha okambiáta. Cinco áño upe rire, “umi ehérsito [rrománo] omongora Jerusalén”. Jesús heʼi kuri mbaʼépa ojapo vaʼerã umi kristiáno oiko vove upéva: umi Judeagua, koʼýte umi oikóva Jerusalénpe, pyaʼe osẽ vaʼerã upégui (Luc. 21:20-24).

² Upérõ ojapo 28 áño Jesús oprofetisa hague oikotaha upéva. Upe guive umi kristiáno evréo oĩva Judéape ombohovái heta provléma ha persekusión. Upéicharõ jepe, oñehaʼãmbaite hikuái iñeʼẽrendu Ñandejárape (Heb. 10:32-34). Péro upéi og̃uahẽ peteĩ tiémpo ipohyivehápe pe situasión (Mat. 24:20, 21; Heb. 12:4). Haʼekuéra osegiséramo iñeʼẽrendu Jesúspe, tekotevẽ ojerovia ipyʼaite guive ha oaguanta umi mbaʼe ijetuʼuetéva arakaʼeve ndohasáiva gueteri (elee Hebreos 10:36-39). Upévare Jehová, ijespíritu sánto rupive omomýi Páblope oskrivi hag̃ua umi kristiánope pe kárta hérava Hebreos. Ko kárta rupive oprepara  chupekuéra ogueropuʼaka hag̃ua umi mbaʼe ijetuʼuetéva oútava.

3. ¿Mbaʼérepa tekotevẽ ñañatende porã umi mbaʼe heʼívare kárta de Hebreos?

³ Koʼág̃a, ñande kristiáno ñañatende porã vaʼerã umi mbaʼe Pablo oskrivi vaʼekuére pe kárta de Hebréospe. ¿Mbaʼérepa? Pórke jahasa peteĩ situasión ojoguáva umi kristiáno Judeagua ohasa vaʼekuépe. Ñaime peteĩ tiémpo ‘ijetuʼúvape ha hasýva jagueropuʼaka hag̃ua’. Heta ñane ermánopema ojeataka, ha oĩ umi ohasáva heta mbaʼe ijetuʼúva, péro entéronte oñehaʼãmbaite iñeʼẽrendu Jehovápe (2 Tim. 3:1, 12). Añetehápe ningo la majoría jaiko trankílo ha ndaiporiguasúi oñemoĩva ñanderehe. Upéicharõ jepe, ojapo haguéicha umi kristiáno Pablo tiémpope guare, ñaime vaʼerã alérta, pórke hiʼag̃uimbaitéma pe pruéva ijetuʼuvéva tekotevẽtahápe jahechauka jajeroviápa Jehováre ñande pyʼaite guive (elee Lucas 21:34-36).

4. a) ¿Mbaʼe téxtopa ojeporavo áño 2016-pe g̃uarã? b) ¿Mbaʼérepa ojeporavo ko versíkulo?

⁴ ¿Mbaʼépa ñanepytyvõta jagueropuʼaka hag̃ua pe pruéva ijetuʼuetétava? Pablo omeʼẽ vaʼekue heta konsého umi kristiáno evréope, ikatu hag̃uáicha oipytyvõ chupekuéra ojerovia hag̃ua ipyʼaite guive. Peteĩva koʼã konsého haʼe hína pe oĩva Hebreos 13:1-pe, heʼíva: “Pesegíkena pejoayhu oñoermánoicha”. Ko téxto ojeporavo áño 2016-pe g̃uarã. ¿Mbaʼérepa? Pórke ñanepytyvõta jajeroviave hag̃ua, ha ñaaguanta hag̃ua umi mbaʼe ijetuʼúva og̃uahẽtava koʼẽrõite.

5. ¿Mbaʼépa heʼise jajoayhu vaʼerãha oñoermánoicha?

⁵ Jaʼe jave ‘jajoayhu vaʼerãha oñoermánoicha’, ñañeʼẽ hína pe mborayhu ñañandúvare ñane hentekuérare térã ñane amigoitére (Juan 11:36). Upéva ndeʼiséi ñande kristiáno jajotratante vaʼerãha haʼerõguáicha oñoermáno. Ñande ningo oñoermanoite voi (Mat. 23:8). Pablo heʼi vaʼekue: “Pejoayhúkena pende pyʼaite guive oñoermáno teéicha. Peñehaʼã peẽ raẽ pehechauka pemombaʼeha pende rapichápe” (Rom. 12:10). Ko téxto ohechauka mbaʼeichaite pevépa jahayhu vaʼerã ñane ermanokuérape. Jahayhúramo entéro kristiánope ñane ermáno teéicha, opavavénte jaikóta oñoamigoitéicha ha siémpre ñaiméta peteĩ ñeʼẽme.

6. ¿Máva mávapepa jahechauka vaʼerã jahayhuha ñane ermáno teéicha?

⁶ Peteĩ mboʼehára heʼi: “Umi kristiánonte la oipuruvéva ilivrokuérape pe fráse ‘jajoayhu oñoermánoicha’”. Yma ningo umi hudío ohenói vaʼekue “ermáno” ihentekuérape ha umi ótro hudíope añoite. Péro núnka ndeʼíri “ermáno” peteĩ persóna ndahaʼéivape hudío. Ñande kristiáno tee katu ñahenói “ermáno” entéro oservívape Jehovápe, tahaʼe haʼéva hetã térã irrása (Rom. 10:12). Upéicha rupi entéro jajoayhu oñoermánoicha, pórke upéva voi Jehová ñanemboʼe jajapo vaʼerãha (1 Tes. 4:9). Péro, ¿mbaʼérepa iñimportantete jasegi jajoayhu oñoermáno teéicha?

7. a) ¿Mbaʼérepa iñimportantete jajoayhu oñoermánoicha? b) ¿Mbaʼérepa avei jahayhu vaʼerã ñane ermanokuérape?

⁷ Entéro jaservíva Ñandejárape jajoayhu vaʼerã oñoermánoicha, primeroite voi pórke Jehová omanda ñandéve. Ndaikatumoʼãi ningo jahayhu Jehovápe ndajahayhúiramo ñane ermanokuérape (1 Juan 4:7, 20, 21). Avei jajoayhu vaʼerã pórke ñaikotevẽ ojuehe, koʼýte jahasa jave umi provlémare. Pablo  oskrivírõ guare ikárta umi evréope, oikuaáma upe riremínte oĩtaha heta kristiáno tekotevẽtava oheja hóga ha opa mbaʼe orekóva. Jesús avei heʼi vaʼekue upe tiémpo ijetuʼuetereitaha (Mar. 13:14-18; Luc. 21:21-23). Ha og̃uahẽ mboyve upe tiémpo, umi kristiáno ohechaukáma vaʼerã ojoayhuetereiha (Rom. 12:9).

8. ¿Mbaʼépa jajapo vaʼerã koʼág̃ama og̃uahẽ mboyve pe jehasa asy guasu?

⁸ Pe jehasa asy guasu ningo hiʼag̃uimbaitéma (Mar. 13:19; Apoc. 7:1-3). Og̃uahẽ vove upe tiémpo, jasegi vaʼerã ko mandáto: “Eike nde kotýpe ha emboty ne rokẽ. Ekañy sapyʼaitemi ohasa peve chepochyha ára” (Is. 26:20, NM). Oime vaʼerã pe ‘koty’ haʼe hína umi kongregasión. Ñane kongregasiónpe jaadora Jehovápe ñane ermanokuéra ndive. Péro ndahaʼéi ñañerreunínte vaʼerã káda semána. Pablo heʼi vaʼekue umi kristiáno evréope tekotevẽha oñomokyreʼỹ ‘oporohayhu ha ojapo hag̃ua iporãva’ ótro rehehápe (Heb. 10:24, 25). Oiméne ñande jahayhúma voi ñane ermanokuérape, péro tekotevẽ jajoayhuve ára koʼẽre, pórke upéva ñanepytyvõta jagueropuʼaka hag̃ua umi pruéva ijetuʼuetéva oútava koʼẽrõite.

9. a) ¿Mbaʼe oportunidápa jareko jahechauka hag̃ua jahayhuha ñane ermanokuérape? b) Emombeʼu peteĩ experiénsia ohechaukáva mbaʼeichaitépa umi ermáno ojoayhu.

⁹ Koʼág̃a, og̃uahẽ mboyve pe jehasa asy guasu, jareko heta oportunida jahechauka hag̃ua jahayhuha ñane ermanokuérape. Heta ermáno ohasa asy operhudikágui chupekuéra umi desástre naturál, por ehémplo terremóto, inundasión, sunámi, urakán ha umícha. Oĩ osufríva ojepersegi haguére chupekuéra (Mat. 24:6-9). Ótro katu oreko provléma ekonómiko, térã imboriahueterei pe korrupsión káusare (Apoc. 6:5, 6). Péro amáske oĩ koʼãichagua provléma, hetave oportunida jareko jahechauka hag̃ua jahayhuha ñane ermanokuérape. Ko múndope ningo ‘hetaiterei hénte ndojoayhuvéima’, péro ñande jasegi vaʼerã jajoayhu oñoermáno teéicha (Mat. 24:12). [1]

10. ¿Mbaʼépa jahecháta koʼág̃a?

¹⁰ ¿Mbaʼépa jajapo vaʼerã jasegi hag̃ua jajoayhu, ko múndo henyhẽramo jepe provlémagui? ¿Mbaʼéichapa ikatu jahechauka jahayhuha ñane ermanokuérape ñande pyʼaite guive? Pablo oñeʼẽ vaʼekue upévare heʼi riremi ‘jasegi vaʼerãha jajoayhu oñoermánoicha’. Jahechamína seis fórma ikatuhápe jahechauka jahayhuha ñane ermanokuérape.

11, 12. ¿Mbaʼépa heʼise japororresivi porãha? (Ehecha pe taʼanga oĩva iñepyrũme.)

¹¹ “Aníkena penderesarái perresivi porã vaʼerãha pende rapichakuérape.” (Elee Hebreos 13:2.) Añetehápe, pe fráse “perresivi porã” ojepurúva ko téxtope, heʼise hína “peneamávle umi extráñondi”. Oiméne ñanemanduʼa Abrahán ha Lot ehémplore. Haʼekuéra ningo iñamavleterei ha orresivi hógape umi deskonosídope jepe. Upe riréntema oñentera hikuái umi extráño ovisita vaʼekue chupekuéra haʼe hague ánhel (Gén. 18:2-5; 19:1-3). Pablo imanduʼa koʼã ehémplore umi kristiáno evréope, ikatu hag̃uáicha omokyreʼỹ chupekuéra ohechauka hag̃ua oporohayhuha opororresivi porã rupi.

¹² ¿Mbaʼéichapa ikatu jahechauka japororresivi porãha? Ikatu ñainvita umi ermánope ñande rógape okaru hag̃ua, térã jahasa porã hag̃ua oñondive sapyʼaitemi jepe. Natekotevẽi ningo jajapo peteĩ karu guasu, ni jagasta heta. Ha ani ñainvita sólamente umi orekóvape omyengovia jey hag̃ua ñandéve (Luc. 10:42; 14:12-14). Ñande ñainvita ñane  ermanokuérape ñañomokyreʼỹ hag̃ua, ndahaʼéi jajechauka hag̃ua. Ha pe superintendénte de sirkuíto ha hembireko ovisita jave ñane kongregasión, ñañehaʼã avei ñainvita koʼã ermánope ñande rógape, ndajaikuaaporãiramo jepe chupekuéra (3 Juan 5-8). Ñanerembiapo hetáramo jepe, ñañehaʼãmbaite ‘jarresivi porã ñande rapichakuérape’.

13, 14. ¿Mbaʼéichapa jahechauka ‘ñanemanduʼa memeha umi oĩvare préso’?

¹³ “Penemanduʼa memékena umi oĩvare préso.” (Elee Hebreos 13:3.) Pablo oskrivírõ guare koʼã mbaʼe, imanduʼa kuri umi ermáno oĩvare kárselpe iñeʼẽrendu haguére Jehovápe (Filip. 1:12-14). Pablo ofelisita umi kristiáno evréope, pórke haʼekuéra oiporiahuvereko umi “ermáno oĩvape préso” (Heb. 10:34). Haʼe voi oĩ aja préso cuatro áñore, umi ermáno oikóva ag̃ui upégui, heta oipytyvõ chupe. Péro, ¿mbaʼépa ojapo umi oĩva mombyry? ¿Mbaʼéichapa oipytyvõ chupe hikuái? Haʼekuéra oñemboʼe meme hese (Heb. 13:18, 19).

¹⁴ Koʼág̃a heta ermáno oĩ avei kárselpe iñeʼẽrendu haguére Jehovápe. Umi ermáno oikóva ag̃ui chuguikuéra, oipytyvõ chupekuéra heta hendáicha. Péro heta ñaime mombyry koʼã ermánogui. ¿Mbaʼéichapa ikatu ñaipytyvõ chupekuéra ha jahechauka ñanemanduʼaha hesekuéra? Jahayhúramo koʼã ermánope, siémpre ñañemboʼéta hesekuéra. Por ehémplo, ikatu ñañemboʼe umi ermáno, ermána, ha mitãnguéra oĩvare préso Eritréape. Umíva apytépe oĩ umi ermáno oĩmava mas de 20 áño kárselpe, hérava Paulos Eyassu, Isaac Mogos ha Negede Teklemariam.

15. ¿Mbaʼéichapa jahechauka jarrespetaha pe matrimónio?

¹⁵ “Enterove orrespeta vaʼerã ñemenda.” (Elee Hebreos 13:4.) Ñanderekopotĩ rupi, jahechauka avei jahayhuha ñane ermanokuérape (1 Tim. 5:1, 2). Por ehémplo, jaʼáramo inmoralida sexuálpe peteĩ ermáno térã ermánandi, tuicha japerhudikáta chupe ha ifamíliape. Avei ñambyaíta pe konfiánsa oĩva ermanokuéra apytépe (1 Tes. 4:3-8). Ñapensamína avei mbaʼéichapa oñeñandúta peteĩ kristiána opilláramo iména ohechaha oikóvo pornografía. ¿Opensátapa iména ohayhuha chupe ha orrespetaha imatrimónio? Katuete ningo nopensamoʼãi upéicha (Mat. 5:28).

16. ¿Mbaʼéichapa jahechauka jahayhuha ñane ermanokuérape ñañekontentáramo umi mbaʼe jarekóvare?

¹⁶ “Peñekontenta vaʼerã umi mbaʼe perekóvare.” (Elee Hebreos 13:5.) Jajeroviáramo Jehováre, javyʼáta umi mbaʼe jarekomívare. ¿Mbaʼéichapa upéva ñanepytyvõ jahechauka hag̃ua jahayhuha ñane ermanokuérape? Ñañekontentáramo umi mbaʼe jarekóvare, jahechakuaáta ñane ermáno ha ermanakuéra iñimportanteveha umi mbaʼerepy ha pe plátagui (1 Tim. 6:6-8). Ndajaikomoʼãi jakritika ótrore, ni ndajajekehamoʼãi umi situasión jahasávagui. Avei nañaenvidiamoʼãi avavépe, ni ndajaikomoʼãi jaipota potave umi kósa materiál. Upéva rangue, ñañehaʼãmbaitéta ñandepojera opa ikatúvandi (1 Tim. 6:17-19).

17. ¿Mbaʼéichapa jahechauka jahayhuha ñane ermanokuérape ñanekyreʼỹramo?

¹⁷ “Ñanekyreʼỹ.” (Elee Hebreos 13:6.) Jajeroviáramo Jehováre, ñanekyreʼỹta ha ndajakyhyjemoʼãi ñambohovái hag̃ua umi provléma ijetuʼúva, síno ñandepositívota. Upéva ñanepytyvõta ñaanima ha ñakonsola hag̃ua ñane ermanokuérape. Péicha jahechaukáta jahayhuha chupekuéra (1 Tes. 5:14, 15). Avei jajeroviáramo Jehováre, og̃uahẽ vove pe jehasa asy guasu ‘ñañemboʼy ha  ñañakãrapuʼãta’, pórke jaikuaa haʼe pyaʼe ñandesalvataha (Luc. 21:25-28).

18. ¿Mbaʼépa ñanepytyvõta jahayhuve hag̃ua umi ansiánope?

¹⁸ “Penemanduʼákena umi penemoakãvare.” (Elee Hebreos 13:7, 17.) Umi ansiáno heta ombaʼapo kongregasiónpe ha oipuru itiémpo upearã. Upévare tekotevẽ ‘jahechauka jaguerohoryeterei ha jahayhuha chupekuéra ombaʼapoiterei haguére’ (1 Tes. 5:13). Iporã ningo ñapensa mbaʼe mbaʼépa ojapo umi ansiáno ñanderehehápe. Péicha ñandeagradesidovéta ha jahayhuvéta chupekuéra. Ndajaipotái haʼekuéra ou ndovyʼavéi térã oñedesepsiona ñande kúlpare. Upéva rangue, ñañehaʼãmbaite vaʼerã jaapoja ha ñaneñeʼẽrendu chupekuéra.

19, 20. ¿Mbaʼépa ñanepytyvõta jahayhuve hag̃ua koʼẽ koʼẽre ñane ermanokuérape?

¹⁹ Jehová siervokuérape opárupi ojekuaa ojoayhu haguére. Apóstol Pablo tiémpope upéicha vaʼekue avei. Upéicharõ jepe, haʼe omokyreʼỹ vaʼekue entéro kristiánope ojoayhuve hag̃ua ohóvo. Haʼe oskrivi: “Rojerure jey jey peẽme pesegi hag̃ua pejoayhuve” (1 Tes. 4:9, 10). ¿Mbaʼépa ñanemboʼe upéva? Enterove jahayhu hayhuve vaʼerãha jahávo ñane ermanokuérape.

²⁰ Upévare, káda ves ke jahecha pe téxto del áño 2016 pe Salón del Réinope, iporã ñañeporandumi: “¿Tekotevẽpa amehora arresivi porãve hag̃ua umi ermánope? ¿Mbaʼéichapa ikatu aipytyvõ umi ermáno oĩvape kárselpe? ¿Arrespetápa pe matrimónio? ¿Añekontentápa umi mbaʼe arekóvare? ¿Mbaʼépa chepytyvõta ajeroviave hag̃ua Jehováre? ¿Mbaʼéichapa ikatu cheñeʼẽrenduve umi ansiáno che kongregasionguápe?”. Ñañehaʼãmbaitékena ñamehora koʼã mbaʼépe. Péicha pe téxto del áño ndahaʼemoʼãi peteĩ mbaʼe oñemoĩ reínteva pe Salónpe, síno haʼéta peteĩ mensáhe siémpre ñanemomanduʼáva jasegi hag̃ua pe konsého Pablo omeʼẽ vaʼekue: “Pesegíkena pejoayhu oñoermánoicha” (Heb. 13:1).