1, 2. a) ¿Mbaʼe fiéstapa ojejapo algúno paíspe? (Ehecha pe rrekuádro “ ¿Mbaʼépa rakaʼe pe Jubileo?”). b) ¿Mbaʼe rehepa Jesús oñeʼẽ raʼe Lucas 4:16-18-pe?

ALGÚNO paíspe umi hénte ojapo jepi káda 50 áño peteĩ fiésta tuicháva ogueromanduʼa hag̃ua peteĩ mbaʼe iñimportánteva oiko vaʼekue. Ko fiéstape oñembohéra jepi Jubileo, ha odura jepi un día, una semána térã hetave. Péro katuete upe rire opa, ha umi hénte pyaʼe hesarái chugui.

² Yma Israélpe oĩ vaʼekue avei peteĩ fiésta ombovyʼaitereíva chupekuéra káda 50 áño: Pe Áño de Liverasión térã Jubileo. ¿Mbaʼérepa upéva iñimportánte ñandéve g̃uarã koʼág̃arupi? Pórke ñanemomanduʼa peteĩ mbaʼe Jehová ojapo vaʼekuére ñanderehehápe ikatu hag̃uáicha ñandelívre pára siémpre. Jesús oñeʼẽ vaʼekue avei upe livertáre (elee Lucas 4:16-18).

3. Ohechaukaháicha Levítico 25:8-12, ¿mbaʼéichapa pe Jubileo oipytyvõ raʼe umi israelítape?

³ Ikatu ñantende porãve mbaʼépa Jesús heʼise rakaʼe oñeʼẽrõ guare pe livertáre, ñaanalisáramo mbaʼe mbaʼépa Ñandejára omanda vaʼekue umi israelítape ojapo hag̃ua pe Áño de Liverasiónpe. Haʼe heʼi chupekuéra: “Pe áño 50 katu sagrádo vaʼerã peẽme g̃uarã, ha peikuaauka vaʼerã enterovépe og̃uahẽmaha pe áño oñemeʼẽtaha liverta enterovépe. Upe áño haʼéta hína pe Áño de Liverasión peẽme g̃uarã, ha enterove ikatúta orrekupera jey ijyvy ha avei oho jeýta oiko ifamíliandi” (elee Levítico 25:8-12). Pe artíkulo ohasa vaʼekuépe jahecha kuri mbaʼéichapa ideprovécho vaʼekue umi israelítape okumplírõ pe léi oñeʼẽva pe sábadore. ¿Péro mbaʼéichapa oipytyvõ raʼe chupekuéra pe Jubileo? Ñamoĩ chupe peteĩ israelita ouha tuichaiterei odeve  ha ovendémante vaʼerã ijyvy ikatu hag̃uáicha opaga ideveha. Pe Áño de Liverasión aja haʼe ‘orrekupera jeýta ijyvy’, ha péicha itaʼyrakuéra ndopytamoʼãi erensiaʼỹre. Térã ñapensamína peteĩ israelita ojejopy vaietereiha ha oñevende esklávoramo opaga hag̃ua idéuda, térã ovende peteĩva umi ifamíliape. Pe Áño de Liverasión aja ojelivera vaʼerã umi esklávope, ha péicha haʼekuéra “oho jeýta oiko ifamíliandi”. Upéicha rupi umi oñevende vaʼekue esklávoramo ndoperdéi la esperánsa, oikuaágui katuete ojeliverataha chupekuéra. ¡Ko mbaʼe ohechauka Jehová añetehápe ojepyʼapyha isiervokuérare!

4, 5. ¿Mbaʼérepa iñimportánte ñandéve g̃uarã pe Jubileo?

⁴ ¿Mbaʼéichapa pe Jubileo oipytyvõ avei umi israelítape? Jehová heʼi: “Avave naimboriahumoʼãi pende apytépe, pórke Jehová katuete penevendesíta pe yvy Jehová pende Jára omeʼẽvape peẽme penembaʼerã” (Deut. 15:4). ¡Ajépa idiferentete upéva umi mbaʼe oikóvagui ñane tiémpope! Koʼág̃arupi pyʼỹinte pe ipláta hetáva amás día ipláta hetave, ha pe imboriahúva katu amás día imboriahuve.

⁵ Ñande kristianokuéra nañakumplivéima Moisés léi. Upéva heʼise natekotevẽiha jajapo umi mbaʼe oñemanda vaʼekue ojejapo pe Jubileo aja, por ehémplo ojelivera umi esklávope, ojeheja rei idéuda umi odevévape pláta ha oñemeʼẽ jey ijárape umi ijyvykuéra (Rom. 7:4; 10:4; Efes. 2:15). Upéicharõ jepe, pe Jubileo iñimportánte ñandéve g̃uarã. ¿Mbaʼérepa? Pórke pe liverta Jehová omeʼẽ vaʼekue ipuévlope pe Jubileo aja ñanemomanduʼa peteĩ liverasión tuichavéva ñande jarekótavare.

6. ¿Mbaʼéguipa jajelivera vaʼerã?

⁶ Enterove ñande ningo esklávo pórke ñaime pe pekádo poguýpe, upéicha rupi ñaikotevẽ álgien ñandelivera vaʼerã upévagui. Ñande haʼe rupi pekadór ñandetuja, ñanderasy ha ñamano. Jahechakuaa upéva siertoha ñamaña jave ñandejehe espéhope, jaha jave doktórpe ñanderasy rupi térã ñañeñandu vai jave japeka rupi. Apóstol Pablo heʼi vaʼekue ‘pe pekádo oĩva hetépe orekoha chupe ipoguýpe’. Ha heʼive: “¡Ivaietépa ko che situasión! Che rete ningo chegueraha ñemanóme. ¿Máva piko chesalváta chugui?” (Rom. 7:23, 24).

7. ¿Mbaʼépa oprofetisa vaʼekue Isaías?

 ⁷ Javyʼaite ningo Jehová ojapo haguére pe oñekotevẽva ñandelivera hag̃ua pe pekádogui. Ñande ikatu jahupyty pe liverta Jesús rupive. Amo 700 áñorupi Jesús ou mboyve ko yvy ape ári, proféta Isaías heʼi vaʼekue oĩtaha peteĩ liverasión tuichavéva umi israelita oreko vaʼekuégui pe Áño de Liverasión aja. Upe liverasión rupive ojehupytýta kuri hetave mbaʼe. Isaías oskrivi: “Ñandejára Jehová ogovernáva opa mbaʼe, omeʼẽ chéve ijespíritu. Jehová cheporavo amombeʼu hag̃ua umi notísia porã umi hénte ivuénovape. Ñandejára chembou aipytyvõ hag̃ua umi oñekevrantávape, ha amombeʼu hag̃ua umi esklávope opytataha lívre” (Is. 61:1). ¿Máva rehepa oñeñeʼẽ ko profesíape?

8. ¿Mávarepa oñekumpli vaʼekue Isaías profesía oñeʼẽva pe livertáre?

⁸ Ko profesía iñimportantetéva oñeʼẽva pe livertáre oñepyrũ vaʼekue oñekumpli Jesús oñepyrũ rire opredika. Haʼe ohórõ guare Nazarétpe, pe siuda haʼe okakuaa haguépe, Jesús olee umi judío oñembyatývape upépe ko profesía Isaías oskrivi vaʼekue: “Jehová omeʼẽ chéve ijespíritu. Haʼe cheporavo amombeʼu hag̃ua umi notísia porã imboriahúvape. Ñandejára chembou amombeʼu hag̃ua umi esklávope opytataha lívre, ha umi siégo ohecha jeytaha, ha ameʼẽ hag̃ua liverta umi ojereko asývape. Ñandejára chembou avei amombeʼu hag̃ua kóva haʼeha pe tiémpo Jehová omoĩva oguerohory hag̃ua umi héntepe”. Upéi Jesús heʼi pe profesía oñekumpliha hese (Luc. 4:16-19, 21). ¿Mbaʼéichapa Jesús okumpli raʼe pe profesía?

9. ¿Mbaʼéguipa opytase vaʼekue lívre heta hénte Jesús tiémpope guare?

⁹ Jesús tiémpope umi hénte oñepyrũ vaʼekue opyta lívre, ha péicha orresivi hikuái pe liverta Isaías oprofetisa vaʼekue. Jesús okonfirma upéva, pórke olee rire pe profesía, haʼe heʼi: “Koestedía oñekumpli pe alee vaʼekue angete” (Luc. 4:21). Heta umi ohendúva upe Jesús olee vaʼekue oimoʼãne raʼe oñeguenohẽtaha chupekuéra pe goviérno rrománo poguýgui. Jesús disipulokuéra oiméne opensa avei upéicha, pórke upe rire mokõi ijapyteguikuéra heʼi: “Ore ningo roimoʼã kuri Jesús haʼe hague pe oútava osalva hag̃ua Israélpe” (Luc. 24:13, 21). Péro ñande jaikuaa Jesús nomokyreʼỹi hague isegidorkuérape opuʼã hag̃ua pe goviérno rrománore, haʼekuéra ojopyetereíramo jepe umi héntendi. Upéva rangue, Jesús heʼi chupekuéra: “Pemeʼẽ Césarpe la okorrespondéva chupe” (Mat. 22:21). ¿Mbaʼéichapa upéicharõ Jesús olivera vaʼekue umi héntepe upe tiémpope?

10. ¿Mbaʼéguipa Jesús olivera vaʼekue umi héntepe?

 ¹⁰ Ñandejára raʼy ou vaʼekue oipytyvõ hag̃ua umi héntepe opyta hag̃ua lívre mokõi mbaʼégui. Primero, Jesús olivera umi héntepe umi enseñánsa japu ha ipohyietéva omboʼévagui umi líder rrelihióso. Upe tiémpope ningo heta judíope ojeovliga vaʼekue osegi hag̃ua umi kostúmbre ha enseñánsa japu (Mat. 5:31-37; 15:1-11). Umi heʼíva ijehe oipytyvõha umi héntepe oadora hag̃ua Ñandejárape, añetehápe ndoadorái chupe haʼe oipotaháicha, upévare ikatu jaʼe isiégo hague hikuái. Ha orrechasávo pe Mesíaspe ha umi mbaʼe omboʼéva, haʼekuéra ndoikuaajepéi Ñandejárape, osegi hikuái isiégo ha opyta pekádo poguýpe (Juan 9:1, 14-16, 35-41). Péro Jesús ohechauka vaʼekue umi hénte ipyʼaporãvape mbaʼéichapa ikatu ojelivera umi enseñánsa japúgui, pórke haʼe omboʼe pe añetegua ha oheja ehémplo iporãva (Mar. 1:22; 2:23–3:5).

11. ¿Mbaʼéichapa avei Jesús olivera umi héntepe?

¹¹ Segundo, Jesús oipytyvõ umi héntepe ojelivera hag̃ua pe pekádogui. Jesús omeʼẽ rupi hekove sakrifísioramo, Ñandejára ikatu operdona umi hénte pekádo, upearã haʼekuéra ojerovia vaʼerã Jesús sakrifísiore ha ohechauka upéva umi mbaʼe ojapóva rupive (Heb. 10:12-18). Jesús heʼi vaʼekue: “Che ningo pe Taʼýra, upévare che ameʼẽramo peẽme liverta, añetehápe pepytáta lívre” (Juan 8:36). Ko liverta ningo añetehápe iporãve jey pe liverta ikatúvagui oreko umi israelita pe Áño de Liverasiónpe. Por ehémplo, peteĩ kuimbaʼe opytáramo jepe lívre pe Jubiléope, upéi ikatu jey oiko chugui esklávo ha tiémpo rire omanótante voi. Péro pe liverta Jesús omeʼẽva katu opa ára g̃uarã.

12. ¿Máva mávapa umi primeroite orresivi vaʼekue pe liverta Jesús oñeʼẽ hague?

¹² Pentekostés áño 33-pe, espíritu sánto rupive Jehová oiporavo umi apóstolpe ha hetave kuña ha kuimbaʼe ifiélvape. Haʼe oadopta chupekuéra itaʼýraramo, ikatu hag̃uáicha upéi orresusita hikuái yvágape ogoverna hag̃ua Jesús ndive (Rom. 8:2, 15-17). Haʼekuéra hína umi primeroite orresivi vaʼekue pe liverta Jesús oñeʼẽ hague pe sinagógape Nazarétpe. Koʼã kuña ha kuimbaʼe opytáma kuri lívre umi kostúmbre ha enseñánsa japúgui, umíva ningo omboʼe vaʼekue umi líder rrelihióso péro oñemoĩ Ñandejára Ñeʼẽ heʼívare. Jehovápe g̃uarã haʼekuéra oĩma kuri avei lívre pe pekádo ha ñemanógui. Upe arréglo Jehová ojapóva umi hénte oreko hag̃ua liverta, oñepyrũ vaʼekue haʼe ounhírõ guare Cristo segidorkuérape áño 33-pe, ha opáta ág̃a oñemohuʼã vove Jesús Goviérno de Mil áño. ¿Mbaʼe mbaʼépa ojehupytýtama upe tiémpope g̃uarã?

13, 14. ¿Máva mávapa avei orresivi pe liverta Jesús oñeʼẽ hague?

¹³ Koʼág̃arupi hetaiterei hénte ipyʼaporãva oúva entéro paísgui oĩ hína umi “ótro ovechakuéra” apytépe (Juan 10:16). Ñandejára ndoiporavói chupekuéra ogoverna hag̃ua Jesús ndive yvágape. Upéva rangue, haʼekuéra oreko esperánsa oikovévo pára siémpre ko yvy ape ári. ¿Ndépa reime avei ijapytepekuéra?

¹⁴ Koʼág̃ama voi ñande jarresivi hína umi mbaʼe porã ohupytýva umi ogovernátava Jesús ndive yvágape. Jajerovia rupi Jesús sakrifísiore, ikatu jajerure Jehovápe operdona hag̃ua ñandéve ñande pekádo. Upéicha rupi ikatu ñaime porã Ñandejára renondépe ha ñanekonsiénsia potĩ (Efes. 1:7; Apoc. 7:14, 15). Ñapensamíntena avei umi vendisión jahupytývare nañaimevéima rupi umi enseñánsa japu poguýpe. Jesús heʼi vaʼekue: “Peẽ peikuaáta pe añetegua ha upéva omeʼẽta peẽme liverta” (Juan 8:32). ¡Ajépa javyʼaite ñaiméma haguére lívre!

15. a) ¿Mbaʼe mbaʼéguipa koʼẽrõitéma jajeliveráta? b) ¿Mbaʼe vendisiónpa jahupytýta upe tiémpope?

¹⁵ Péro ikatu ñahaʼarõ peteĩ liverta tuichavéva. Koʼẽrõitéma Jesús ohundíta umi rrelihión fálsa ha avei umi goviérno ikorruptoitéva oĩva ko múndope. Ñandejára oprotehéta “peteĩ aty guasu” oservívape chupe, ha omeʼẽta chupekuéra hetaiterei mbaʼe porã odisfruta hag̃ua peteĩ paraísope ko yvy ape ári (Apoc. 7:9, 14). Avei Jehová omoingove jeýta hetaiterei héntepe,  ha umi odesidíva oservi Jehovápe ojeliveráta pe pekádo ha ñemanógui, upévare haʼekuéra ndahasymoʼãvéima, ndaitujamoʼãvéima ni nomanomoʼãvéima (Hech. 24:15).

16. ¿Mbaʼe liverta ijojahaʼỹvapa ohaʼarõ yvyporakuérape amo gotyove?

¹⁶ Pe Goviérno de Mil áño aja, Jesús ha umi ogovernáva hendive oipytyvõta yvyporakuérape okuera hag̃ua opaite mbaʼasýgui, ha oreko hag̃ua hikuái peteĩ amista perfékta Ñandejárandi. Umi israelita ningo oreko vaʼekue peteĩ liverta iporãitereíva pe Áño de Liverasión aja, péro pe Goviérno de Mil áño aja yvyporakuéra ohupytýta pe liverta tuichavéva ha iporãvéva. Upéva heʼise entéro persóna oservíva Jehovápe fiélmente ohupytytaha perfeksión ha núnka mas ndopekamoʼãvéima.

17. ¿Mbaʼéichapa oikóta Ñandejára puévlo, asegún Isaías 65:21-23? (Ehecha pe taʼanga oĩva ko rrevísta apére).

¹⁷ Isaías 65:21-23-pe oñemombeʼu mbaʼéichapa ojeikóta ko yvy ape ári (elee). Oĩ opensáva pe paraísope avave nombaʼapomoʼãiha ha jaiko reitaha tódo el tiémpo. Péro la Biblia ohechauka upe tiémpope Ñandejára puévlo orekotaha heta mbaʼe ojapo vaʼerã, ha umi traváho ombovyʼáta chupekuéra. Opa vove pe Goviérno de Mil áño, Ñandejára kreasión ndoikomoʼãvéima pekádo ha ñemano poguýpe, “síno oikóta chuguikuéra Ñandejára raʼy ha oguerekóta hikuái pe liverta ijojahaʼỹva” (Rom. 8:21).

18. ¿Mbaʼérepa ikatu jaʼe ñaneraʼarõha heta mbaʼe iporãva amo gotyove?

¹⁸ Jehová oñenkarga vaʼekue ikatu hag̃uáicha umi israelita ombaʼapo ha opytuʼu, ha upéicha avei ojapóta isiervokuéra rehehápe Jesús Goviérno de Mil áño aja. Upérõ katuete jarekóta tiémpo jaadora hag̃ua Ñandejárape, pórke upéva añetehápe iñimportanteterei ikatu hag̃uáicha javyʼa, tahaʼe koʼág̃a térã pe múndo pyahúpe. Cristo Goviérno de Mil áño aja, entéro persóna ifiélva ovyʼaitereíta, pórke orekóta heta traváho ombovyʼáva chupekuéra ha oservíta hikuái Jehovápe.