PE JEROVIA ningo ñanemombareteterei. Por ehémplo, Satanás ohundise pe amista jarekóva Jehovándi, péro pe jerovia rupive ñande ikatu ñambogue “kompletoite umi flécha hendýva opoíva Satanás” (Efes. 6:16). Jajeroviárõ ikatu hína ñambohovái umi provléma tuicháva umi montáñaicha. Jesús heʼi vaʼekue idisipulokuérape: “Pende jerovia ojoguáramo peteĩ mostása semíllape jepe, pejéta ko montáñape: ‘Tereho koʼágui amoite’, ha ohóta” (Mateo 17:20). Jaikuaa ningo pe jerovia ikatuha omombarete ñane amista Jehovándi, upévare iporãta ñakontesta koʼã porandu: ¿Mbaʼépa hína pe jerovia? ¿Mbaʼéichapa umi mbaʼe jarekóva ñane korasõme ikatu oafekta ñande jerovia? ¿Mbaʼéichapa ikatu ñamombarete ñande jerovia? ¿Ha mávarepa jajerovia vaʼerã? (Rom. 4:3).

Jerovia ndeʼiséi jaikuaa térã jagueroviánte la Biblia heʼíva siertoha, pórke “umi demónio jepe oguerovia avei ha oryryipa okyhyjégui” Ñandejáragui (Sant. 2:19). ¿Mbaʼépa upéicharõ pe jerovia?

La Biblia omyesakã pe jerovia orekoha mokõi mbaʼe. Primero, “jerovia heʼise jakreeha oikotaha katuete umi mbaʼe ñahaʼarõva ha ndajadudaiha ni michĩmi” (Heb. 11:1a). Jajeroviáramo, jagueroviáta ñande pyʼaite guive siertoha entéro mbaʼe Jehová heʼíva ha oñekumplitaha katuete. Por ehémplo, Jehová heʼi vaʼekue umi israelítape: “Peẽ ikatúramo pehundi pe kompromíso arekóva pe ára ha pe pyharéndi, ha pejoko pe día ha pe pyhare ani hag̃ua og̃uahẽ itiempoitépe, upéicharõ añoite ikatúta oñehundi pe kompromíso arekóva che siérvo David ndive” (Jer. 33:20, 21). ¿Ñandépa jajepyʼapýva nosẽvéiramo g̃uarã kuarahy térã ndoikevéiramo g̃uarã, ha ndaiporivéi día ni pyhare? Ñande jaikuaa ni mbaʼevéicharõ ndoikomoʼãiha upéva, ñaime segúro pe kuarahy osẽ ha oiketaha káda día. Upéicharõ, ¿jadudáta piko pe ojapo vaʼekue koʼã mbaʼe nokumplimoʼãiha ipromesakuéra? ¡Ni mbaʼevéicharõ! (Is. 55:10, 11; Mat. 5:18).

Segundo, jerovia “heʼise avei jaikuaa porãha siertoha umi mbaʼe jagueroviáva, ndajahecháiramo jepe” (Heb. 11:1b). ¿Mbaʼe ehémplo ikatu jaipuru jahechauka hag̃ua jagueroviaha oexistiha álgo ndajahecháiva? Ñamoĩ chupe peteĩ mitã oporanduha ñandéve: “¿Mbaʼéicha nde reikuaa pe yvytu oexistiha?”. Ndajahecháiramo jepe pe yvytu, jaʼekuaa pe mitãme opensa hag̃ua umi mbaʼe ohechaukávare pe yvytu oexistiha. Ikatu jaʼe chupe ñande ñahenduha pe yvytu oipejúrõ, jahechaha mbaʼéichapa omonguʼe umi yvyra rogue, ha umícha. Koʼã pruéva oipytyvõta pe mitãme oguerovia hag̃ua pe yvytu oexistiha, ndajahecháiramo jepe. Péicha avei pe jerovia oñemopyenda umi pruéva jaikuaa porãvare oexistiha (Rom. 1:20).

Jaikuaáma pe jerovia oñemopyendaha umi pruévare, upévare ikatu hag̃uáicha peteĩ persóna ojerovia, primero tekotevẽ “oikuaa porã pe añetegua” (1 Tim. 2:4). Péro ndahaʼéi upévante. Apóstol Pablo oskrivi vaʼekue: “Ojerovia vaʼerã ipyʼaite guive” (Rom. 10:10). Pe persóna ndahaʼéi ku ogueroviánte vaʼerã pe añetegua, síno omombaʼe vaʼerã ipyʼaite guive. Upéva omomýita chupe ohechauka hag̃ua ijerovia, térã oiko Ñandejárape ogustaháicha (Sant. 2:20). Peteĩ persóna nomombaʼéiva pe añetegua  ipyʼaite guive, ikatu orrechasa umi pruéva nokambiaséi rupi umi mbaʼe ogueroviáva, térã ojapose rupi haʼe ojaposévante (2 Ped. 3:3, 4; Jud. 18). Upéicha rupi, la Biblia ojeskriviha tiémpope naentéroi umi ohecha vaʼekue umi milágro ojerovia vaʼekue (Núm. 14:11; Juan 12:37). Ñandejára espíritu sánto oipytyvõ ojerovia hag̃ua sólamente umi ohayhúvape pe añetegua ipyʼaite guive (Gál. 5:22; 2 Tes. 2:10, 11).

David hína peteĩva umi ojerovia mbarete vaʼekue (Heb. 11:32, 33). Péro David famíliape naentéroi oreko vaʼekue peichagua jerovia. Por ehémplo, epensamína Eliab rehe, haʼéva David ermáno majór. David ningo ipochyeterei kuri Goliat odesafiárõ guare Israélpe. Péro Eliab ojaʼo Davídpe upévare, ha péicha ohechauka ndojeroviaiha Jehová ikatuha osalva chupekuéra ipodér rupive (1 Sam. 17:26-28). Pe jerovia ningo nañagueronaséi, ha ñande tuakuéra ndaikatúi avei ombohasa ñandéve. Jahecha upéicharõ David ojerovia hague haʼe rupi Jehová amígo.

Pe Salmo 27-pe David ohechauka mbaʼépa oipytyvõ chupe ojerovia mbarete hag̃ua (vers. 1). Haʼe ojepyʼamongeta umi mbaʼe ohasa vaʼekuére ha umi mbaʼe Jehová ojapo vaʼekuére iñenemigokuérare (vers. 2 ha 3). David omombaʼeterei vaʼekue Jehová tavernákulo (vers. 4), ha ohoseterei voi upépe oadora hag̃ua Jehovápe umi ótro israelítandi (vers. 6). Haʼe oñemboʼe vaʼekue ha ojerure asy Jehovápe ogia hag̃ua chupe (vers. 7 ha 8). Avei David oipota vaʼekue Jehová omboʼe chupe oguata hag̃ua hapére (vers. 11). Davídpe g̃uarã ningo pe jerovia iñimportanteterei vaʼekue, upévare heʼi: “Che ajerovia [...], ndaupéichairire, kién sáve mbaʼépa oiko vaʼerãmoʼã chehegui” (vers. 13).

Ñande ikatu avei jajerovia David ojerovia haguéicha. Upearã jajapo vaʼerã umi mbaʼe haʼe heʼi vaʼekue Salmo 27-pe. Jahecha kuri jajerovia hag̃ua iñimportanteha jaikuaa porã pe añetegua, upévare amáske jastudiave la Biblia ha ñane puvlikasionkuéra, ifasilvéta ñandéve jareko hag̃ua ko kualida espíritu sánto ñanepytyvõva ñamoheñói hag̃ua (Sal. 1:2, 3). Jastudia jave ñañemotiémpo vaʼerã jajepyʼamongeta hag̃ua. Ñande jajepyʼamongetárõ pe jastudiávare, ñandeagradesidovéta Jehovándi. Ha ñandeagradesidove rupi, jahechaukaséta jajeroviaha jaadorávo chupe umi rreuniónpe ha ñañeʼẽvo ótrondi pe esperánsa jarekóvare (Heb. 10:23-25). Avei jahechauka jajeroviaha jasegíramo ‘siémpre ñañemboʼe ha nañanekaneʼõi jajapo hag̃ua upéva’ (Luc. 18:1-8). Upévare, ‘ñañemboʼékena kontinuadoite’ Jehovápe, ha ñakonfia ‘haʼe ojepyʼapyha ñanderehe’ (1 Tes. 5:17; 1 Ped. 5:7). Pe jerovia ningo ñanepytyvõ jajapo hag̃ua iporãva, ha jajapo jave iporãva ñande jerovia imbareteve ohóvo (Sant. 2:22).

Pe pyhare omano mboyve, Jesús heʼi vaʼekue idisipulokuérape: “Pehechauka pejeroviaha Ñandejárare ha pehechauka pejeroviaha avei cherehe” (Juan  14:1). Upéicharõ, ñande ndahaʼéi jajeroviánte vaʼerã Jehováre, síno avei Jesúsre. ¿Mbaʼéichapa jahechauka jajeroviaha Jesúsre? Mbohapy hendáicha.

Primero, jahechakuaa vaʼerã pe rreskáte haʼeha peteĩ rregálo Ñandejára ojapo vaʼekue ñandéve g̃uarã. Apóstol Pablo heʼi vaʼekue: “Koʼág̃a aiko hína asegún pe jerovia arekóva Ñandejára Raʼýre, haʼe ningo cherayhu ha omeʼẽ kuri hekove cherehehápe” (Gál. 2:20). Jajeroviáramo Jesúsre ñaiméta segúro pe rreskáte haʼeha peteĩ rregálo ñandéve g̃uarã. Upéva rupive ningo ikatu oñeperdona ñandéve ñande pekadokuéra, oñemeʼẽ ñandéve esperánsa jaiko hag̃ua pára siémpre, ha jahechakuaa mbaʼeichaite pevépa Jehová ñanderayhu (Rom. 8:32, 38, 39; Efes. 1:7). Jahecháramo péicha pe rreskáte, upéva ñanepytyvõta anivéma hag̃ua ñañeñandu kulpávle ni ñapensa vai ñandejehe (2 Tes. 2:16, 17).

Segundo, ñañemoag̃ui vaʼerã Jehováre ñemboʼe rupive. Ñande ikatu jahupyty upéva oĩ rupi pe rreskáte. Pe sakrifísio rupive ñande ikatu ñañemboʼe Jehovápe “kyhyjeʼỹme [...] ikatu hag̃uáicha Ñandejára ñandeporiahuvereko ha imbaʼeporãiterei ñanendive ñaikotevẽ jave” (Heb. 4:15, 16; 10:19-22). Pe ñemboʼe ñanepytyvõ ñaimeve hag̃ua desidído ndajapekamoʼãiha Jehová kóntrape (Luc. 22:40).

Tercero, ñaneñeʼẽrendu vaʼerã Jesúspe. Apóstol Juan oskrivi vaʼekue: “Pe persóna ohechaukáva ojeroviaha pe Taʼýrare oikovéta pára siémpre, pe naiñeʼẽrendúiva pe Taʼýrape katu ndohupytymoʼãi jeikove opaveʼỹva, ha Ñandejára ipochýta hendive” (Juan 3:36). Jahechakuaa koʼápe Juan omoĩ hague ehémploramo mokõi persóna idiferénteva ojuehegui: Peteĩva ojerovia Jesúsre ha pe ótro katu naiñeʼẽrendúi chupe. Upéicharõ, jahechauka hag̃ua jajeroviaha Jesúsre, ñaneñeʼẽrendu vaʼerã chupe. Ñande ñaneñeʼẽrendu Jesúspe ñakumplíramo “Cristo léi”, upéva hína entéro mbaʼe Jesús omboʼe ha omanda vaʼekue (Gál. 6:2). Avei ñaneñeʼẽrendu chupe jasegíramo pe gía haʼe omeʼẽva ñandéve pe “esklávo de konfiánsa ha iñarandúva” rupive (Mat. 24:45). Ñaneñeʼẽrendúramo Jesúspe, ñanembaretéta ñaaguanta hag̃ua umi provléma tuicháva ha ñanemongyhyjéva umi torméntaicha (Mat. 7:24, 25).

Peteĩ jey peteĩ kuimbaʼe ojerure asy Jesúspe: “¡Chepytyvõna ajeroviave hag̃ua!” (Mar. 9:24). Ko kuimbaʼe ningo añetehápe ojerovia vaʼekue michĩmi, péro haʼe iñumílde ha ohechakuaa ojeroviave vaʼerãha. Ko kuimbaʼéicha avei ñande sapyʼánte ikatu jahasa umi situasión tekotevẽhápe jajeroviave. Ha enterove ikatu ñamombarete ñande jerovia koʼág̃ama voi. Jahecha haguéicha, ñande jajapo upéva jastudiávo Ñandejára Ñeʼẽ ha jajepyʼamongetávo hese. Ñande jerovia imbareteve avei jaadora jave Jehovápe ñane ermanokuérandi, ñamombeʼu jave ótrope pe esperánsa jarekóva, ha siémpre ñañemboʼe jave. Opa mbaʼe ári, ñamombaretéramo ñande jerovia jarresivíta pe prémio iporãvéva. Ñandejára Ñeʼẽ heʼi voi: “Che ermanokuéra ahayhuetéva, peñemombaretéke pende jerovia sagrádo rupive, [...] ikatu hag̃uáicha pesegi peiko Ñandejára mborayhúpe” (Jud. 20, 21).